“Iingcinga Zokugcinwa eNgqondweni: Umnquba kunye neDini,” Uze, Undilandele—Eyabantu Ngabanye kunye Neentsapho: iTestamente eNdala 2022 (2021)
“Iingcinga Zokugcinwa eNgqondweni: Umnquba kunye neDini,” Uze, Undilandele—Eyabantu Ngabanye kunye Neentsapho: 2022
Iingcinga Zokugcinwa eNgqondweni
Umnquba kunye neDini
Njengoko sifunda iTestamente eNdala, ngamanye amaxesha siye sifumane imihlathi emide emalunga nezinto ezazibalulekile ngokucacileyo eNkosini kodwa sisenokuziva ngokukhawuleza ngathi azisifanelanga thina namhlanje. Eksodus 25–30; 35–40; Levitikus 1–9; 16–17 yimizekelo. Ezi zahluko zichaza ngokweenkcukacha umnquba wakwaSirayeli entlango kwakunye nangamadini wezilwanyana ekwakumele enziwe khona apho.1 Umnquba yayiyitempile ephathekayo, indawo yeNkosi yokuhlala phakathi kwabantu baYo.
Iitempile zethu zanamhlanje zabelana ngezinto ezifanayo nezo zomnquba wakwaSirayeli, kodwa ngokuqinisekileyo azifani nenkcazelo ekwi–Eksodus. Kwaye asibulali zilwanyana ezitempileni zethu—iNtlawulelo yoMsindisi yawaphelisa amadini wezilwanyana eminyakeni engaphaya kwama–2,000 eyagqithayo. Kodwa nangaphandle kwezi zantlukwano, kunexabiso elikhulu namhlanje ekufundeni malunga neentlobo-ntlobo zonqulo zakwaSirayeli wamandulo, ngakumbi ukuba sibabona ngendlela efana naleyo yabantu beNcwadi kaMormoni—njengendlela “yokomeleza ukholo lwabo kuKrestu” (Alma 25:16; bona naye Yakobi 4:5; Yaromi 1:11). Xa siqonda indlela yophawulo emnqubeni kunye nedini lesilwanyane, singazuza iimbono zasemoyeni eziya kuthi zomeleze ukholo lwethu kuKrestu.
Umzobo wamaSirayeli ezisa imvana emnqubeni, nguRobert T. Barrett
Umnquba Womeleza UKholo kuYesu Krestu
Xa uThixo wayeyalela uMoses ukuba okhe umnquba kwinkampu yamaSirayeli, Yena wayichaza injongo yawo: “ndihlale phakathi kwabo” (Eksodus 25:8). Ngaphakathi komnquba, ubukho bukaThixo babumelwe yityeya yomnqophiso—ibhokisi yeenkuni, eyogqunywe ngegolide, iqulethe uxwebhu olubhalwe umnqophiso kaThixo kunye nabantu baKhe (bona Eksodus 25:10–22). Ityeya yayigcinwa kwelona lingcwele, liphakathi naphakathi igumbi, yahluliwe kuwo wonke umnquba ngesigqubuthelo. Esi sigqubuthelo sibonisa ukwahlulwa kwethu kubukho bukaThixo ngenxa yoKuwa.
Ngaphandle nje kukaMoses, sazi umntu omnye kuphela owayenako ukungena “kwingcwele kangcwele” (Eksodus 26:34)—umbingeleli omkhulu. Ngokufana nabanye ababingeleli, kwakumele ahlanjwe kwaye athanjiswe kuqala (bona Eksodus 40:12–13) kwaye ambathiswe izambatho ezingcwele ezaziphawula i-ofisi yakhe (bona Eksodus 28). Kanye ngonyaka, ngomhla owawubizwa ngokuba nguMhla weNtlawulelo, umbingeleli omkhulu waye anikele amadini wabantu phambili kokungena yedwa emnqubeni. Esigqubuthelweni, yena wayetshisa isiqhumiso (bona Levitikus 16:12). Umsi onevumba wawunyukela ezulwini owawumele imithandazo yabantu eyayinyukela kuThixo (bona IiNdumiso 141:2). Ngoko ke umbingeleli omkhulu, ephethe igazi eliphuma kwidini lesilwanyana, ebegqitha kwisigqubuthelo kwaye asondele kwitrone kaThixo, okwakuphawulwe yityeya yomnqophiso (bona Levitikus 16:14–15).
Usazi oko ukwaziyo ngoYesu Krestu nangendima yaKhe kwicebo likaBawo Osezulwini, ingaba uyaqonda ukuba umnquba usalathisa njani kuMsindisi? Njengokufana nomnquba, kunye netyeya eyayingaphakathi kwawo, zazimele ubukho bukaThixo phakathi kwabantu baKhe, uYesu Krestu waye bubukho bukaThixo phakathi kwabantu baKhe (bona Yohane 1:14). Njengombingeleli omkhulu, uYesu Krestu nguMlamleli phakathi kwethu noThixo uBawo. Yena waye wagqitha kwisigqubuthelo esenzela intethelelo ngenxa yegazi ledini laKhe (bona AmaHebhere 8–10).
Eminye imiba yomnquba wakwaSirayeli isenokuvakala ngathi iqhelekile kuwe, ngakumbi ukuba wawukhe waya etempileni wayo kufumana imimiselo yakho. Njengengcwele kangcwele yomnquba, igumbi leselestiyali etempileni limele ubukho bukaThixo. Ukuze singene, kufuneka kuqala sihlanjwe kwaye sithanjiswe. Sinxiba izambatho ezingcwele. Siyathandaza esibingelelweni apho imithandazo inyukela khona kuThixo. Kwaye ekugqibeleni sigqitha kwikhuselo ukungena kubukho bukaThixo.
Mhlawumbi eyona nto ebaluleke kakhulu efanayo phakathi kweetempile zanamhlanje kunye nomnquba wamandulo yileyo yokuba zombini, ukuba iqondwa ngokuchanekileyo, yomeleza ukholo lwethu kuYesu Krestu kwaye isigcwalisa ngombulelo wedini leNtlawulelo yaKhe. UThixo ufuna bonke abantwana baKhe ukuba bangene kubukho baKhe; Yena ufuna “ubukumkani bababingeleli” kunye nababingelelikazi (Eksodus 19:6). Kodwa izono zethu ziyasithintela ekubeni sizuze loo ntsikelelo, kuba “ayikho into engacocekanga enokuhlala noThixo” (1 Nifayi 10:21). Ngoko ke uThixo waye wathumela uYesu Krestu, “umbingeleli wethu omkhulu wazo izinto ezilungileyo eziza kubakho” (AmaHebhere 9:11). Yena usivulela isigqubuthelo kwaye uxhobisa bonke abantu bakaThixo ukuba “sisondele ke ngoko sinokungafihlisi kuyo itrone yobabalo, ukuze samkeliswe inceba” (AmaHebhere 4:16).
Namhlanje, injongo yeetempile ingaphezulu kokuzuza ukuphakanyiswa kwethu. Emveni kokuzifumanela imimiselo yethu, singema endaweni yezinyanya zethu, sizifumanele imimiselo yazo. Ngaloo ndlela, singaba yinto ethile efana nombingeleli omkhulu wamandulo—kwaye uMbingeleli Omkhulu Ophakemeyo—evulela abanye indlela eya kubukho bukaThixo.
Idini Lomeleza UKholo kuYesu Krestu
Imigaqo yentlawulelo kunye noxolelwaniso iyafundiswa ngokumandla kwisenzo samandulo sedini lesilwanyane, elalikhona kwakudala ngaphambili komthetho kaMoses. Ngenxa yevangile ebuyisiweyo, siyazi ukuba u–Adam no–Eva babenikela amadini, babeyiqonda impawu yazo kwidini loMsindisi, kwaye babekufundisa oku ebantwaneni babo (bona Moses 5:4–12; bona futhi Genesis 4:4).
Indlela yophawulo lwedini lesilwanyane isenokuba yayibonakala ichukumisa ngoMhla weNtlawulelo kuSirayeli wamandulo (“Yom Kippur” ngesiHebhere). Imfuneko yalo msitho wonyaka wawuye wachazwa kwi–Levitikus 16:30: “Ngaloo mhla uya kunicamagushela, ukuba anihlambulule, nihlambuluke ezonweni zenu zonke phambi koYehova.” Ngoko ke ubukho bukaThixo babunokuhlala phakathi kwabantu. Le ntlawulelo yayifezekiswa ngemisitho eyahlukeneyo. Komnye wale misitho, ibhokhwe yayibulawa njengomnikelo wezono zabantu, kwaye umbingeleli omkhulu wayethatha igazi lebhokhwe alise kwindawo engcwele. Kamva, umbingeleli omkhulu wayebeka izandla zakhe phezu kwebhokhwe ephilayo kwaye axele izono zabantwana bakaSirayeli—ngophawulo agqithisele ezo zono ebhokhweni. . Ibhokhwe yayiqhutyelwa ngaphandle kwenkampu yakwaSirayeli.
Kweli siko, iibhokhwe zazimele uYesu Krestu, ethatha indawo yabantu abanezono. Isono kufuneka singavunyelwa kubukho bukaThixo. Kodwa kunokuba kutshatyalaliswe okanye kuqhutyelwe aboni ngaphandle, uThixo waye wabonelela ngenye indlela—endaweni yoko ibhokhwe yayibulawa okanye iqhutyelwe ngaphandle. “Inkunzi leyo yebhokhwe yobuthwala ke phezu kwayo ubugwenxa babo” (Levitikus 16:22).
Indlela yophawulo lwala masiko yayikhomba kwindlela uThixo awayebonelele ukusibuyisa ngayo kubukho baKhe—uYesu Krestu kunye neNtlawulelo yaKhe. UMsindisi “uzithabathele phezu kwakhe izifo zethu, wathwala umvandedwa wethu,” nkqu “nobugwenxa bethu sonke” (Isaya 53:4, 6). Yena wema endaweni yethu, wanikela ngobomi baKhe ukuhlawula isohlwayo sesono sethu, kwaye ngoko ke waze woyisa ukufa ngoVuko lwaKhe (bona Mozaya 15:8–9). Idini likaYesu Krestu yayilelona “idini elikhulu nelokugqibela; ewe, hayi idini lomntu, nalo elesilo” kodwa ngokungcono kube “lidini elingenasiphelo nelanaphakade” (Alma 34:10). Yena wayeyinzaliseko yento yonke yamadini amandulo awayekhomba kuyo.
Ngenxa yesi sizathu, emveni kokuba idini laKhe laligqityiwe, Yena wathi oku, “Aniyi kuphinda ninikele kum impalalo-gazi; ewe amadini enu … aya kupheliswa. … Kwaye niya kunikela njengedini kum intliziyo eyaphulikileyo nomoya otyumkileyo” (3 Nifayi 9:19–20).
Ngoko ke xa ufumana imihlathi kwiTestamente eNdala emalunga namadini kunye nomnquba, (okanye kamva, itempile)—kwaye uya kuyifumana emininzi—ukhumbule ukuba eyona njongo esisiseko sako konke kukomeleza ukholo lwakho kuMesiya, uYesu Krestu. Vumela intliziyo yakho kunye nengqondo yakho ukuba ziguqukele kuYe. Cinga nzulu ngoko Yena athe wakwenza ukukubuyisela kubukho bukaThixo—kwaye nangoko uya kukwenza ukulandela Yena.