« 2–8 nō Mē. Exodo 35–40 ; Levitiko 1 ; 16 ; 19 : ‘Mo’a tō Iehova’ », Mai, pe’e mai—nō te ta’ata hō’ē ’e te ’utuāfare : Faufa’a Tahito 2022 (2021)

« 2–8 nō Mē. Exodo 35–40 ; Levitiko 1 ; 16 ; 19 », Mai, pe’e mai—nō te ta’ata hō’ē ’e te ’utuāfare : 2022

Hōho’a

Hiero nō São Paulo (Beresiria)

2–8 nō Mē

Exodo 35–40 ; Levitiko 1 ; 16 ; 19

« Mo’a tō Iehova »

’A tuatāpapa ai ’outou i te mau pāpa’ira’a mo’a, ’a hi’o maita’i i te mau mana’o pae vārua e tae mai nō ni’a i te mau rāve’a nō te riro rahi atu ā mai te Metua i te Ao ra ’e Iesu Mesia te huru.

Pāpa’i i te mau mana’o e tae mai

’Aita te fa’aru’era’a ia Aiphiti—noa atu ā te faufa’a rahi ’e te temeio nō te reira—i fa’atupu hope i te mau ’ōpuara’a a te Atua nō te mau tamari’i a ’Īserā’ela. E ’ere ato’a te manuiara’a i tohuhia nō ananahi i te fenua i parauhia ra, te fā hope’a a te Atua nō rātou. E mau ta’ahira’a noa nō te tāpae i te fāito tā te Atua i hina’aro mau nō tōna mau ta’ata : « ’Ia mo’a ’outou, nō te mea, tē mo’a nei au, ’o tō ’outou Atua ra ’o Iehova » (Levitiko 19:2). Nāhea te Atua i te ’imira’a ’ia ha’amo’a i tōna mau ta’ata, ’aita ho’i rātou i ’ite i te tahi atu mea maori rā te tītīra’a nō te mau u’i e rave rahi ? ’Ua fa’aue ’oia ia rātou ’ia ha’amau i te hō’ē vāhi mo’a nō te Fatu—te hō’ē sēkene i roto i te medebara. ’Ua hōro’a ’oia ia rātou i te mau fafaura’a ’e te mau ture nō te arata’i i tā rātou mau ’ohipa ē i te hope’a roa, nō te taui i tō rātou ’ā’au. ’E ’ia hapehape ana’e rātou i roto i tā rātou mau tauto’ora’a e ha’apa’o i teie mau ture, ’ua fa’aue ’oia ia rātou ’ia rave i te mau tusia ’ānimara ’ei fa’ahōho’ara’a i te tāra’ehara nō tā rātou mau hara. ’Ua riro teie mau mea ato’a ’ei fa’atorora’a i tō rātou ferurira’a, tō rātou ’ā’au ’e tō rātou orara’a i ni’a i te Fa’aora ’e i ni’a i te fa’aorara’a tāna e pūpū. ’O ’oia te ’ē’a mau i te mo’ara’a, nō te mau tamari’i a ’Īserā’ela ’e nō tātou nei. ’Ua hāhaere tātou pā’āto’a i te tahi taime i roto i te tītīra’a a te hara, ’e ’ua anihia tātou pā’āto’a ’ia tātarahapa—’ia fa’aru’e i te hara i muri ’e ’ia pe’e ia Iesu Mesia tei parau fafau ē : « E ti’a ho’i iā’u nei ’ia ha’amo’a ia ’outou » (Te Parau Ha’api’ira’a ’e te mau Parau Fafau 60:7).

Nō te hi’ora’a rere ā manu i te buka a Levitiko, hi’o « Leviticus » i roto i te Bible Dictionary.

Hōho’a

Learn More image

Hōho’a

ītona tuatāpapara’a a te ta’ata hō’ē

Mau mana’o nō te tuatāpapara’a pāpa’ira’a mo’a a te ta’ata hō’ē

Exodo 35–40 ; Levitiko 19

’Ua hina’aro te Fatu iā’u ’ia mo’a mai iāna te huru.

Tei roto i te Exodo 25–31 te mau arata’ira’a a te Fatu i te mau tamariʼi o ’Īserā’ela nō ni’a e nāhea i te hāmani i te sēkene, i reira te mau ’ōro’a mo’a e tauturu ai ia rātou ’ia riro ’ei nūna’a ta’ata mo’a. Tē fa’ata’a nei te Exodo 35–40 i te mau tauto’ora’a a te mau tamariʼi o ’Īserā’ela nō te ha’apa’o i teie mau arata’ira’a. ’A tai’o ai ’oe i te mau pene 35–40, ’a ’imi i te mau mea tā te Fatu i ani i tōna mau ta’ata ’ia tu’u i roto i te sēkene, ’e ’a feruri i te fa’ahōho’ara’a o teie mau tao’a ’e te tū’atira’a i te fa’arahira’a i te mo’ara’a. ’A feruri ato’a i te huru teie mau tao’a e fa’afāriu ai i tō ’oe mau mana’o i ni’a i te Fa’aora. E nehenehe paha teie tāpura e tauturu ia ’oe :

E aha te tao’a tā ’oe i ’ite mai ?	E aha tā te reira e fa’ahōho’a nei ?
E aha te tao’a tā ’oe i ’ite mai ? Te ’āruna faufa’a (Exodo 37:1–9 ; 40:20–21)	E aha tā te reira e fa’ahōho’a nei ? Te aro o te Atua ; tāna mau fafaura’a ’e te mau fa’auera’a
E aha te tao’a tā ’oe i ’ite mai ? Te fata tumiama (Exodo 40:26–27 ; hi’o ato’a Exodo 30:1, 6–8)	E aha tā te reira e fa’ahōho’a nei ? Te mau pure e pā’uma ra i ni’a i te Fatu ra
E aha te tao’a tā ’oe i ’ite mai ? Te menure (Exodo 37:17–24)
E aha te tao’a tā ’oe i ’ite mai ? Te fata nō te tusia (Exodo 38:1–7 ; hi’o ato’a Exodo 27:1 ; 29:10–14)
E aha te tao’a tā ’oe i ’ite mai ? Te kiura (fa’ari’i) pape (Exodo 30:17–21)

Mai te mea ’ua haere ’oe i roto i te mau ’ōro’a o te hiero, e aha te mau mea nō ni’a i te sēkene i roto i te Exodo 35–40 ’o tē fa’aha’amana’o ia ’oe i te ’ohipa tā ’oe i rave i reira ? (hi’o ato’a « Te mau mana’o e tāpe’a noa i roto i te ferurira’a : Te sēkene ’e te tusia »). ’A feruri nāhea te mau fafaura’a o te hiero i te tauturu ia ’oe ’ia riro rahi atu ā mai te Metua i te Ao ra ’e mai Iesu Mesia te huru.

Parau mau, e ’ere ē, tē ti’a ra ’oe i roto i te vāhi mo’a, ’ua mo’a ïa ’oe. Tē fa’ata’a nei te Levitiko 19 i te mau ture ’e te mau fa’auera’a tā te Fatu i hōro’a nō te tauturu i te mau tamariʼi a ’Īserā’ela ’ia fa’arahi i tō rātou mo’ara’a. E aha tā ’oe e ’ite ra i roto i teie mau fa’auera’a ’o tē tauturu ia ’oe ’ia ha’amo’a rahi atu ā ia ’oe ? I tō ’oe mana’o, e aha te tūra’i ia ’oe ’ia ē rave nō te ora hope atu ā i teie mau parau tumu ?

Hi’o ato’a Carol F. McConkie, « Te nehenehe o te huru mo’a », Liahona, Mē 2017, 9–12 ; « The Tabernacle [Te sēkene] » (video), ChurchofJesusChrist.org ; Bible Dictionary, « Holiness » ; temples.ChurchofJesusChrist.org.

Exodo 35:4–36:7

Tē ani nei te Fatu iā’u ’ia pūpū i tā’u mau ō ma te ’ā’au tae.

I te matahiti i muri iho i te fa’aru’era’a ia Aiphiti, e nehenehe e parau ē, e mea pāpū ’ore te aura’a i roto i tamari’i a ’Īserā’ela ’e Iehova. Noa atu rā, ’ia tai’o ’oe i te Exodo 35:4–36:7, ’a ha’apa’o maita’i na i te huru te mau tamariʼi a ’Īserā’ela i pāhono i te fa’auera’a e hāmani i te sēkene. E aha te ha’api’ira’a tā ’oe e ’apo nei mai roto i te mau tamariʼi a ’Īserā’ela ’o tē nehenehe e tauturu ia ’oe ’ia tāvini maita’i a’e i te Fatu ?

’Ua ha’api’i te peresideni Bonnie L. Oscarson ē : « E mea ti’a i te mau melo tāta’itahi ’ia ’ite ē e mea hina’arohia ’oia. Tē vai ra tā te ta’ata tāta’itahi hō’ē mea faufa’a roa nō te hōro’a, ’e te mau tārēni ’e te mau ’aravihi ta’a ’ē ’o tē tauturu ’ia fa’ahaere i teie ’ohipa faufa’a i mua » (« Te feiā ’āpī tamāhine i roto i te ’ohipa », Liahona, Mē 2018, 37). ’A tai’o ai ’oe i te Exodo 36:1–4, ’a feruri i te mea tā te Fatu i « tu’u » i roto ia ’oe. E nehenehe e ui i te Metua i te Ao ra e aha tāna i hōro’a ia ’oe ’ia ti’a ia ’oe ’ia ’āmui atu i roto i tāna ’ohipa.

’Ua hōro’a te mau tamari’i a ’Īserā’ela i te mau ō nō te sēkene ma te « ’ā’au tae » (Exodo 35:5). Fa’ahōho’ara’a nā Corbert Gauthier, © Lifeway Collection/parau fa’ati’a nā goodsalt.com

Levitiko 1:1–9 ; 16

Nā roto i te tāra’ehara a Iesu Mesia, e nehenehe tā’u mau hara e fa’a’orehia.

E mea ’ē ri’i te pae rahi o te buka a Levitiko nō tātou—te mau tusia ’ānimara, te mau ’ōro’a tē vai ra te toto ’e te pape, ’e te mau ture e fa’atere i te mau tuha’a na’ina’i roa o te orara’a. ’Ua ’ōpuahia rā teie mau ’ōro’a ’e teie mau ture nō te ha’api’i i te mau parau tumu tei mātauhia—te tātarahapa, te mo’ara’a ’e te tāra’ehara a te Fa’aora. Nō te hi’o mai i teie mau parau tumu ’a tai’o ai ’oe i te Levitiko 1:1–9 ; 16, ’a feruri i te mau uira’a mai teie : E aha te ha’api’ira’a tā’u e nehenehe e ’apo mai i roto i teie mau tusia, nō ni’a ia Iesu Mesia ’e tāna tusia tāra’ehara ? E aha te tū’atira’a i roto iā’u ’e ’o rātou e rave ra i teie mau tusia ? E nehenehe e hi’o fa’ahou i « Te mau mana’o e tāpe’a noa i roto i te ferurira’a : Te sēkene ’e te tusia » i roto i teie mātēria ’e tae noa atu « Tusia » i roto i te Arata’i nō te mau pāpa’ira’a mo’a (scriptures.ChurchofJesusChrist.org).

Hōho’a

ītona tuatāpapara’a a te ’utuāfare

Mau mana’o nō te tuatāpapara’a pāpa’ira’a mo’a a te ’utuāfare ’e te purera’a pō ’utuāfare

Exodo 36:1–7.I roto i te Exodo 36:1–7, e aha te ha’api’ira’a tā tātou e ’apo nei i roto i te huru te mau tamari’i a ’Īserā’ela i pāhono i te fa’auera’a e hāmani i te sēkene ? ’Ei ’utuāfare, e nehenehe ’outou e feruri i te mau rāve’a tā te Fatu i ani ia tātou ’ia ’āmui atu i tāna ’ohipa. Nāhea tātou i te pe’e i te hi’ora’a o te mau tamariʼi a ’Īserā’ela ?

Exodo 40.’A tai’o ’āmui ai ’outou i te Exodo 40, e nehenehe e ani i te mau melo o te ’utuāfare ’ia ’āfa’i i tō rātou rima i ni’a i te taime ato’a e fa’aro’o rātou i te parau « tā Iehova ho’i ». E aha te ha’api’ira’a tā tātou e ’apo nei i roto i teie pene nō ni’a i te ha’apa’ora’a i te parau a te Fatu ?

Exodo 40:1–34.’Ia tai’o ’outou nō ni’a i te fa’ati’ara’ahia te sēkene i roto i te Exodo 40, e nehenehe ’outou e ’ohipa ’āmui nō te hi’o mai i te mau tuha’a ta’a ’ē o te sēkene, ma te fa’a’ohipa i te hōho’a i roto i teie arata’i ha’api’ira’a. Nō te fa’atū’ati i teie ’āparaura’a i te ha’amorira’a hiero i tō tātou nei ’anotau, e nehenehe ’outou e hi’o ’āmui fa’ahou « Why Latter-day Saints Build Temples [Nō te aha te feiā mo’a e patu nei i te mau hiero] » (temples.ChurchofJesusChrist.org) ’aore rā e māta’ita’i i te video « Temples [Te mau hiero] »ChurchofJesusChrist.org).

Levitiko 19.E nehenehe te mau melo tāta’itahi o te ’utuāfare e mā’imi i te hō’ē ’īrava i roto i teie pene ’o tā rātou e mana’o nei e tauturu ia rātou « ’ia mo’a » Levitiko 19:2) ’e e fa’a’ite i te reira i te ’utuāfare.

Nō te mau mana’o hau atu nō te ha’api’ira’a i te mau tamari’i, hi’o te arata’i ha’api’ira’a o teie hepetomai roto Mai, pe’e mai—nō te Paraimere

Hīmene tei mana’ohia : « E te Fatu here », Te mau hīmene, N°31.

Ha’amaita’i i tā ’oe iho tuatāpapara’a pāpa’ira’a mo’a

’Imi ia Iesu Mesia. Tē parau pāpū nei te mau pāpa’ira’a mo’a ato’a, mai te Faufa’a Tahito ato’a ho’i, nō Iesu Mesia. ’A tai’o ai ’outou i te Faufa’a Tahito, ’a hi’o e aha te mau fa’ahōho’ara’a, te mau ta’ata ’e te mau ’ohipa i tupu ’o tē nehenehe e ha’api’i ia ’outou nō ni’a i te Fa’aora.