« ថ្ងៃទី ១៥–២១ ខែ សីហា ។ ទំនុកដំកើង ៤៩–៥១; ៦១–៦៦; ៦៩–៧២; ៧៧–៧៨; ៨៥–៨៦ ៖ ‹ ខ្ញុំនឹងថ្លែងប្រាប់ពីការដែលទ្រង់បានប្រោសដល់ព្រលឹងខ្ញុំ › » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ព្រះគម្ពីរសញ្ញាចាស់ ឆ្នាំ ២០២២ ( ឆ្នាំ ២០២១ )
« ថ្ងៃទី ១៥–២១ ខែ សីហា ។ ទំនុកដំកើង ៤៩–៥១; ៦១–៦៦; ៦៩–៧២; ៧៧–៧៨; ៨៥–៨៦ » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ឆ្នាំ ២០២២
ការសង្រ្គោះចៀមដែលបាត់ ដោយ ម៉ៃឃល ធី ម៉ម
ថ្ងៃទី ១៥–២១ ខែ សីហា
ទំនុកដំកើង ៤៩–៥១; ៦១–៦៦; ៦៩–៧២; ៧៧–៧៨; ៨៥–៨៦
« ខ្ញុំនឹងថ្លែងប្រាប់ពីការដែលទ្រង់បានប្រោសដល់ព្រលឹងខ្ញុំ »
គម្រោងមេរៀននេះបញ្ជាក់ប្រធានបទខាងគោលលទ្ធិដែលបានថ្លែងនៅក្នុងទំនុកដំកើងទាំងនេះ ។ កាលដែលបងប្អូនសិក្សា ពាក្យ រូបភាព ឬគំនិតជាក់លាក់នានាអាចលេចធ្លោចំពោះបងប្អូន ។ តើបងប្អូនគិតថា ព្រះអម្ចាស់កំពុងព្យាយាមបង្រៀនបងប្អូនអំពីអ្វីខ្លះ ?
កត់ត្រាចំណាប់អារម្មណ៍របស់បងប្អូន
អ្នកនិពន្ធទំនុកដំកើងបានចែកចាយអារម្មណ៍ផ្ទាល់ខ្លួនដ៏ជ្រាលជ្រៅនៅក្នុងកំណាព្យរបស់ពួកគាត់ ។ ពួកគាត់បានសរសេរអារម្មណ៍បាក់ទឹកចិត្ត ខ្លាច និងវិប្បដិសារី ។ នៅពេលខ្លះ ពួកគាត់ហាក់ដូចជាមានអារម្មណ៍ត្រូវបានព្រះបោះបង់ចោល ហើយទំនុកដំកើងមួយចំនួនបង្ហាញនូវអារម្មណ៍ខកចិត្ត និងអស់សង្ឃឹម ។ ប្រសិនបើបងប្អូនធ្លាប់មានអារម្មណ៍បែបនេះ ការអានទំនុកដំកើងអាចជួយបងប្អូនឲ្យដឹងថាមិនមែនបងប្អូនតែម្នាក់ឯងទេដែលមានអារម្មណ៍បែបនេះ ។ ប៉ុន្តែបងប្អូនក៏នឹងរកឃើញទំនុកដំកើងដែលលើកទឹកចិត្តបងប្អូនផងដែរ នៅពេលបងប្អូនមានអារម្មណ៍បែបនោះ ពីព្រោះអ្នកនិពន្ធទំនុកដំកើងក៏មានសរសើរដល់ព្រះអម្ចាស់ពីសេចក្តីល្អរបស់ទ្រង់ ស្ងប់ស្ងែងដល់ព្រះចេស្តាទ្រង់ និងរីករាយនៅក្នុងសេចក្តីមេត្តាករុណារបស់ទ្រង់ផងដែរ ។ ពួកគាត់បានដឹងថា ពិភពលោកត្រូវបានផ្ទុកដោយអំពើអាក្រក់ និងអំពើបាប ប៉ុន្តែថាព្រះអម្ចាស់គឺ « ល្អ ទ្រង់បម្រុងតែនឹងអត់ទោស » ( ទំនុកដំកើង ៨៦:៥ ) ។ ពួកគាត់បានយល់ថា ការមានជំនឿលើព្រះអម្ចាស់ពុំមែនមានន័យថា បងប្អូននឹងមិនជួបរឿងស្មុគស្មាញថប់បារម្ភ អំពើបាប ឬភ័យខ្លាចនោះទេ ។ វាមានន័យថាបងប្អូនដឹងថាតើត្រូវទៅរកនរណា ពេលបងប្អូនជួបរឿងបែបនោះ ។
គំនិតយោបល់សម្រាប់ការសិក្សាព្រះគម្ពីរផ្ទាល់ខ្លួន
សេចក្តីប្រោសលោះ មកតែតាមរយៈព្រះយេស៊ូវគ្រីស្ទប៉ុណ្ណោះ ។
ទំនុកដំកើង ៤៩ មានសារមួយសម្រាប់ « ទាំងធំទាំងតូច ទាំងមានទាំងក្រគ្រប់គ្នា » ( ខទី ២ ) ។ តើបងប្អូននឹងនិយាយថាសារនេះជាអ្វី ? តើបងប្អូនមានអារម្មណ៍ថា ទំនុកដំកើង ៦២:៥–១២ បន្ថែមអ្វីខ្លះដល់សារនោះ ?
ការអានទំនុកដំកើងទាំងនេះអាចជំរុញបងប្អូនឲ្យសញ្ជឹងគិតពីរបៀបដែលមនុស្សមួយចំនួនបានទុកចិត្តលើអ្វីមួយក្រៅពីព្រះសម្រាប់ការប្រោសលោះ ( សូមមើល ទំនុកដំកើង ៤៩:៦–៧ ) ។ តើជីវិតរបស់បងប្អូនទទួលឥទ្ធិពលតាមរយៈទីបន្ទាល់របស់បងប្អូនដែលថា « ព្រះទ្រង់នឹងលោះព្រលឹង [ របស់បងប្អូន ] ឲ្យរួចពីអំណាចនៃស្ថានឃុំព្រលឹងមនុស្សស្លាប់ » យ៉ាងដូចម្តេច ? ( ខទី ១៥ ) ។
សូមមើលផងដែរ សុភាសិត ២៨:៦; អាលម៉ា ៣៤:៨–១៧ ។
ដោយសារតែសេចក្តីមេត្តាកុរណារបស់ព្រះអង្គសង្រ្គោះ ខ្ញុំអាចត្រូវបានអត់ទោសពីអំពើបាបរបស់ខ្ញុំ ។
ការទូលអង្វរសូមសេចក្តីមេត្តាករុណានៅក្នុង ទំនុកដំកើង ៥១ គឺត្រូវបានសន្មតថាជាស្តេចដាវីឌ ដែលទ្រង់មានពិរុទ្ធពីបទកំផិត និងឃាតកម្ម ( សូមមើល សាំយូអែល ទី២ ១១ ) ។ ទោះបីជានៅពេលអំពើបាបរបស់យើងមិនសូវធ្ងន់ធ្ងរក្តី ក៏យើងអាចទាក់ទងនឹងតម្រូវការនៃសេចក្តីមេត្តាកុរណាដែលបានបង្ហាញនៅក្នុងទំនុកដំកើងនេះដែរ ។ យើងក៏អាចរៀនអ្វីមួយអំពីអត្ថន័យនៃការប្រែចិត្តផងដែរ ។ ឧទាហរណ៍ តើពាក្យ ឬ ឃ្លាណានៅក្នុង ទំនុកដំកើង ៥១ ដែលបង្រៀនបងប្អូនអំពីបុគ្គលិកលក្ខណៈដែលយើងត្រូវការដើម្បីប្រែចិត្តនោះ ? តើបងប្អូនបានរៀនអ្វីខ្លះអំពីប្រសិទ្ធភាពនៃដង្វាយធួនរបស់ព្រះអង្គសង្រ្គោះដែលអាចមាននៅក្នុងជីវិតរបស់បងប្អូន ?
បងប្អូនអាចសួរសំណួរដូចគ្នា នៅពេលបងប្អូនអាន ទំនុកដំកើត ៨៥–៨៦ ។ បងប្អូនក៏អាចស្វែងរកឃ្លាដែលពិពណ៌នាពីព្រះអម្ចាស់ផងដែរ ។ តើឃ្លាទាំងនេះពង្រឹងទីបន្ទាល់របស់បងប្អូនថាទ្រង់នឹងអភ័យទោសដល់បងប្អូនយ៉ាងដូចម្តេច ? ( សូមមើល ឧទាហរណ៍ ទំនុកដំកើង ៨៦:៥, ១៣, ១៥ ) ។
សូមមើលផងដែរ អាលម៉ា ៣៦ ។; Russell M. Nelson, “We Can Do Better and Be Better,” លីអាហូណា ឧសភា ឆ្នាំ ២០១៩ទំព័រ ៦៧–៦៩; Carole M. Stephens, “The Master Healer,” លីអាហូណា ខែ វិច្ឆិកា ឆ្នាំ ២០១៦ ទំព័រ ៩–១២ ) ។
ទំនុកដំកើង ៥១:១៣–១៥; ៦៦:១៦–១៧; ៧១:១៥–២៤
ទីបន្ទាល់របស់ខ្ញុំពីព្រះយេស៊ូវ គ្រីស្ទ អាចជួយអ្នកដទៃឲ្យមករកទ្រង់ ។
សូមសញ្ជឹងគិតពីរបៀបដែលបងប្អូនទទួលបានទីបន្ទាល់ពីព្រះយេស៊ូវ គ្រីស្ទ និងព្រះចេស្តាដ៏ធួនរបស់ទ្រង់ ។ បន្ទាប់មក កាលដែលបងប្អូនសិក្សា ទំនុកដំកើង ៥១:១៣–១៥; ៦៦:១៦–១៧; ៧១:១៥–២៤ សូមគិតពីរបៀបដែលអាចអញ្ជើញអ្នកដទៃឲ្យ « មកនេះ ចូរមកមើលការទាំងប៉ុន្មានរបស់ព្រះ ទ្រង់ » ( ទំនុកដំកើង ៦៦:៥ ) ។ តើ « និទានពីសេចក្តីសុចរិតរបស់ទ្រង់ ជាដរាបរាល់ថ្ងៃ » មានអត្ថន័យយ៉ាងណាចំពោះបងប្អូន ? ( ទំនុកដំកើង ៧១:២៤ ) ។ តើបងប្អូននឹងប្រាប់អ្នកដទៃ « ពីការដែលទ្រង់បានប្រោសដល់ព្រលឹង [ របស់បងប្អូន ] យ៉ាងដូចម្តេច ? ( ទំនុកដំកើង ៦៦:១៦ ) ។
សូមមើលផងដែរ ម៉ូសាយ ២៨:១–៤; អាលម៉ា ២៦ ។
យើងអាចចែកចាយជាមួយអ្នកដទៃនូវទីបន្ទាល់របស់យើងពីអ្វីដែលព្រះអម្ចាស់បានធ្វើសម្រាប់យើង ។
ព្រះអម្ចាស់នឹងជួយខ្ញុំនៅពេលខ្ញុំមានអាសន្ន ។
ទំនុកដំកើងជាច្រើនពិពណ៌នាជាភាសាដ៏ គ្រលួច តើការមានអារម្មណ៍នៅឆ្ងាយពីព្រះ ហើយត្រូវការជំនួយពីទ្រង់យ៉ាងខ្លាំងបំផុត នោះមានអត្ថន័យយ៉ាងណា ។ បងប្អូនអាចពិចារណាពីការរកមើលការពិពណ៌នាបែបនេះនៅក្នុង ទំនុកដំកើង ៦៣:១, ៨; ៦៩:១–៨, ១៨–២១; ៧៧:១–៩ ។ តើបងប្អូនរកឃើញអ្វីខ្លះនៅក្នុង ទំនុកដំកើង ៦៣; ៦៩; ៧៧–៧៨ ដែលផ្តល់ការធានាដល់អ្នកនិពន្ធទំនុកដំកើង ?
នៅពេលបងប្អូនថប់អារម្មណ៍ តើវាជួយបងប្អូនឲ្យ « រឭកពីអស់ទាំងការនៃព្រះយេហូវ៉ា » និង « ការអស្ចារ្យ ដែលទ្រង់បានធ្វើកាលពីដើម » យ៉ាងដូចម្តេច ? ( ទំនុកដំកើង ៧៧:១១ ) ។ ការអស្ចារ្យទាំងនេះ មួយចំនួនត្រូវបានពិពណ៌នានៅក្នុង ទំនុកដំកើង ៧៨ ។ នៅពេលបងប្អូនអានអំពីវា សូមពិចារណានូវអ្វីដែលជួយបងប្អូន « បានតាំងចិត្តសង្ឃឹមដល់ព្រះ [ របស់បងប្អូន ] » ( ខទី ៧ ) ។ តើបទពិសោធន៍អ្វីខ្លះចេញពីពង្សប្រវត្តិរបស់បងប្អូនដែលបំផុសដល់បងប្អូន ?
គំនិតយោបល់សម្រាប់ការសិក្សាព្រះគម្ពីរជាគ្រួសារ និងរាត្រីជួបជុំក្រុមគ្រួសារ
-
ទំនុកដំកើង ៥១:១៧ ។សូមពិចារណាពីរបៀបដែលបងប្អូនអាចបង្រៀនក្រុមគ្រួសាររបស់បងប្អូននូវអត្ថន័យនៃការមានដួងចិត្តសង្រេង ។ ឧទាហរណ៍ សមាជិកគ្រួសារអាចប្តូរវានគ្នាបំបែកអ្វីមួយដែលមានសំបករឹង ដូចជា ស៊ុត ឬគ្រាប់ធញ្ញជាតិ ។ តើនៅពេលខ្លះដួងចិត្តរបស់យើងដូចជាសំបកទាំងនោះយ៉ាងដូចម្តេច ? តើយើងអាចបើកដួងចិត្តរបស់យើងទទួលយកព្រះអម្ចាស់យ៉ាងដូចម្តេច ? ការអាន ទំនុកដំកើង ៥១ ជាមួយគ្នាអាចផ្តល់ឲ្យនូវគំនិតមួយចំនួន ។
-
ទំនុកដំកើង ៦១:២–៣ ។សមាជិកគ្រួសារអាចរីករាយនឹងការគូរគំនូរនៃនិមិត្តសញ្ញាទាំងឡាយនៅក្នុងខគម្ពីរទាំងនេះ និងពិភាក្សាពីរបៀបដែលព្រះយេស៊ូវ គ្រីស្ទ គឺដូចជា « ថ្ម » ខ្ពស់, « ទីជ្រកឲ្យ [ យើង ] » និង « ប៉មយ៉ាងមាំ » ។
-
ទំនុកដំកើង ៧១:១៧; ៧៨:៥–៧ ។តើព្រះអម្ចាស់សព្វព្រះទ័យឲ្យបងប្អូន « បង្រៀនឲ្យពួកកូនចៅ [ របស់បងប្អូន ] បានដឹងតរៀងទៅ » អ្វីខ្លះ ? ( ទំនុកដំកើង ៧៨:៥ ) ។ ប្រហែលជាសមាជិកគ្រួសារម្នាក់ៗអាចចែកចាយគំរូនៃ « ការអស្ចារ្យ » របស់ព្រះអម្ចាស់ ដូចជា ដំណើររឿងក្នុងព្រះគម្ពីរ បទពិសោធន៍ ឬ ទីបន្ទាល់ផ្ទាល់ខ្លួន ដែលជួយពួកគេ « បានតាំងចិត្តសង្ឃឹមដល់ព្រះ » ( ទំនុកដំកើង ៧១:១៧; ៧៨:៧ ) ។
-
ទំនុកដំកើង ៧២ ។ទំនុកដំកើង ៧២ ត្រូវបានសរសេរដោយ ដាវីឌ អំពីបុត្រារបស់ទ្រង់ ព្រះនាមថា សាឡូម៉ូន ប៉ុន្តែភាគច្រើនក៏អាចអនុវត្តចំពោះព្រះយេស៊ូវ គ្រីស្ទ ផងដែរ ។ កាលក្រុមគ្រួសាររបស់បងប្អូនអានទំនុកដំកើងនេះ ពួកគេអាចលើករូបភាពរបស់ព្រះអង្គសង្រ្គោះឡើង នៅពេលពួកគេរកឃើញខគម្ពីរដែលរំឭកពួកគេពីព្រះយេស៊ូវ គ្រីស្ទ ។ តើយើងអាចជួយបំពេញបំណងប្រាថ្នាដែលថា « សូមឲ្យផែនដីទាំងស្រុងបានពេញដោយសិរីល្អនៃទ្រង់ » បានយ៉ាងដូចម្ដេច ? ( ទំនុកដំកើង ៧២:១៩; សូមមើលផងដែរ គោលលទ្ធិ និង សេចក្តីសញ្ញា ៦៥:២ ) ។
-
ទំនុកដំកើង ៨៥:១១ ។ខគម្ពីរនេះអាចបំផុសឲ្យមានការពិភាក្សាអំពីព្រឹត្តិការណ៍នៃការស្តារឡើងវិញនៃដំណឹងល្អ—របៀបដែលព្រះគម្ពីរមរមនគឺជាការពិតដែល « [ កើត ] ចេញពីផែនដី » និងរបៀបដែលសារទូតសួគ៌ាយាង « ចុះពីស្ថានសួគ៌ » ( សូមមើលផងដែរ ម៉ូសេ ៧:៦២ ) ។ វីដេអូ “Preparation of Joseph Smith: Tutored by Heaven” (ChurchofJesusChrist.org) depicts some of these events ។
សម្រាប់គំនិតបន្ថែមសម្រាប់ការបង្រៀនដល់កុមារ សូមមើល គម្រោងមេរៀនសប្តាហ៍នេះ នៅក្នុងសៀវភៅ ចូរមកតាមខ្ញុំ—សម្រាប់ថ្នាក់បឋមសិក្សា ។
ចម្រៀងលើកទឹកចិត្តឲ្យប្រើ ៖ « ខ្ញុំត្រូវការទ្រង់ជានិច្ច » ទំនុកតម្កើង ល.រ ៤៧ ។
ការកែលម្អការបង្រៀនរបស់យើង
ប្រើប្រាស់វិធីសាស្ត្រផ្សេងទៀត ។ « សូមរកមើលរបៀបដែលអ្នកអាចបន្ថែមនូវភាពផ្សេងៗទៅក្នុងកិច្ចខិតខំដើម្បីបង្រៀនដំណឹងល្អរបស់អ្នក ។ ការធ្វើដូច្នេះនឹងបន្ថែមនូវភាពពោរពេញ និងភាពស្រស់ស្អាតចំពោះបទពិសោធន៍ ។ … ចូរពិចារណាអំពីការប្រើតន្ត្រី រឿង រូបភាព និងសិល្បៈទម្រង់ផ្សេងៗទៀតដែលអាចអញ្ជើញព្រះវិញ្ញាណ » ( ការបង្រៀនតាមរបៀបរបស់ព្រះអង្គសង្គ្រោះ ទំព័រ ២២ ) ។
ចូរកុំសង្ស័យឡើយ ថូម៉ាស អើយ ដោយ ជេ ខឺត រីឆាត