“ʻAokosi 15–21. Saame 49–51; 61–66; 69–72; 77–78; 85–86: ʻTe u Fakahā ʻa ia Kuó Ne Fai ki Hoku Laumālié,’” Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí: Fuakava Motuʻá 2022 (2021)
“ʻAokosi 15–21. Saame 49–51; 61–66; 69–72; 77–78; 85–86,” Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí: 2022
Saving That Which Was Lost (Fakahaofi ʻa ia Naʻe Molé), tā ʻe Michael T. Malm
ʻAokosi 15–21
Saame 49–51; 61–66; 69–72; 77–78; 85–86
“Te u Fakahā ʻa ia Kuó Ne Fai ki Hoku Laumālié”
ʻOku ʻoatu ʻi he lēsoni ko ʻení ha niʻihi ʻo e ngaahi tefito fakatokāteline ʻoku ʻi he ngaahi sāme ko ʻení. ʻI hoʻo akó, ʻe ʻi ai ha ngaahi foʻi lea, ʻata, pe fakakaukau pau ʻe makehe ia. Ko e hā ʻokú ke ongoʻi ʻoku feinga e ʻEikí ke akoʻi atu kiate koé?
Lekooti e Ngaahi Ongo ʻOkú ke Maʻú
Naʻe vahevahe ʻe he kau tangata tohi ʻo e ngaahi Saamé ha ngaahi ongo loloto fakatāutaha mei heʻenau māaú. Naʻa nau tohi ʻo kau ki he ongoʻi loto-foʻí, tailiilí, mo e loto-laveá. Ne ʻi ai e taimi ne nau ongoʻi hangē ʻoku liʻekina kinautolu ʻe he ʻOtuá, pea ʻoku ʻi ai e ngaahi sāme ʻoku ʻasi ai e ongo ʻo e puputuʻú pe ʻamanaki kuo tō noá. Kapau ʻe faifaiangé peá ke maʻu e ongo ko ʻení, ʻe lava ʻo tokoniʻi koe ʻi hono lau e ngaahi Saamé ke ke ʻiloʻi ʻoku ʻikai ko koe tokotaha pē ʻoku peheé. Ka te ke toe ʻilo foki mo ha ngaahi sāme te ne lava ʻo fakalotolahiʻi koe ʻi hoʻo maʻu ha faʻahinga ongo peheni, koeʻuhí he ʻoku fakahikihikiʻi foki ʻe he kau faʻu sāmé ʻa e ʻEikí ʻi Heʻene angaleleí, ofoofo ʻi Hono mālohí, mo fiefia ʻi Heʻene ʻaloʻofá. Naʻa nau ʻiloʻi ʻoku fakamafasiaʻi ʻe he koví mo e angahalá ʻa e māmaní ka ʻoku “angalelei, pea faʻa fakamolemole” ʻa e ʻEikí (Saame 86: 5). Naʻe mahino kiate kinautolu ʻoku ʻikai ke ʻuhinga e tui ia ki he ʻEikí peá ke hao ai mei he fefaʻuhi mo e loto-hohaʻá, angahalá, pe tailiilí. Ka ʻoku ʻuhinga ia ʻokú ke ʻiloʻi e Tokotaha ke ke tafoki ki ai ʻi he taimi ʻokú ke faingataʻaʻia aí.
Ngaahi Fakakaukau ki Hono Ako Fakatāutaha ʻo e Folofolá
Ko Sīsū Kalaisi pē ʻoku fakafou mei ai ʻa e huhuʻí.
ʻOku ʻi ai ha pōpoaki ʻi he Saame 49 ki he “maʻulalo mo e māʻolunga, ʻa e maʻumeʻa mo e masiva fakataha” (veesi 2). ʻOkú ke pehē ko e hā ʻa e pōpoaki ko ʻení? Ko e hā ʻokú ke ongoʻi ʻoku tānaki mai ʻe he Saame: 62: 5–12 ki he pōpoaki ko iá?
Mahalo ʻe ueʻi koe ʻi hono lau e ngaahi saame ko ʻení ke ke fakalaulauloto ki he ngaahi founga ʻoku tuku ai e falala ʻa ha kakai ʻe niʻihi ki ha meʻa kehe kae ʻikai ko e ʻOtuá ʻoku maʻu ai e huhuʻi (vakai, Saame 49: 6–7). ʻOku tākiekina fēfē hoʻo moʻuí ʻe hoʻo fakamoʻoni ko e “Ka ʻe huhuʻi [ho] laumālié ʻe he ʻOtuá mei he mālohi ʻo e faʻitoká”? (veesi 15).
Vakai foki, Lea Fakatātā 28:6; ʻAlamā 34:8–17.
ʻE lava ke fakamolemoleʻi ʻeku ngaahi angahalá, koeʻuhí ko e ʻaloʻofa ʻa e Fakamoʻuí.
Naʻe tautapa ʻa e Tuʻi ko Tēvitá ki ha ʻaloʻofa ʻi he Saame 51, koeʻuhi naʻe halaia ʻi he tono malí mo e fakapoó (vakai, 2 Samuela 11). Neongo ʻoku ʻikai ke ʻi ai haʻatau ngaahi angahala mamafa, ka ʻe lava ke tau fakahoa ia ki he fie maʻu ha ʻaloʻofa hangē ko ʻene hā ʻi he sāme ko ʻení. Te tau lava foki ʻo ako ha meʻa kau ki he ʻuhinga ʻo e fakatomalá. Hangē ko ʻení, ko e hā ha ngaahi foʻi lea pe kupuʻi lea ʻi he Saame 51 ʻokú ne akoʻi kiate koe ʻo kau ki he faʻahinga tōʻonga ʻoku tau fie maʻu kae lava ʻo fai ha fakatomalá? Ko e hā ʻokú ke ako fekauʻaki mo e lelei ʻe lava ke maʻu ʻe he Fakalelei ʻa e Fakamoʻuí ʻi hoʻo moʻuí?
Te ke lava ʻo ʻeke e ngaahi fehuʻi tatau ʻi hoʻo lau e Saame 85–86. Te ke toe lava ʻo kumi e ngaahi kupuʻi lea ʻokú ne fakamatalaʻi e ʻEikí. ʻOku fakamālohia fēfē ʻe he ngaahi kupuʻi leá hoʻo tui te Ne fakamolemoleʻi koe? (vakai, hangē ko ʻení, Saame 86:5, 13, 15).
Vakai foki, ʻAlamā 36; Russell M. Nelson, “Te Tau Lava ʻo Fai Lelei Ange pea Toe Lelei Ange,” Liahona, Mē 2019, 67–69; Carole M. Stephens, “Ko e ʻEiki Faifakamoʻuí,” Liahona, Nōvema 2016, 9–12.
Saame 51:13–15; 66:16–17; 71:15–24
ʻE lava ke tokoniʻi heʻeku fakamoʻoni kia Sīsū Kalaisí ʻa e niʻihi kehé ke nau haʻu kiate Ia.
Fakalaulauloto ki he founga naʻá ke maʻu ai hoʻo fakamoʻoni kia Sīsū Kalaisí mo e mālohi ʻEne fakaleleí. ʻI hoʻo ako ʻa e Saame 51:13–15; 66:16–17; 71:15–24, fakakaukau ki he founga te ke lava ʻo fakaafeʻi ai ha niʻihi kehe ke nau “haʻu ʻo mamata ki he ngaahi ngāue ʻa e ʻOtuá” (Saame 66: 5). Ko e hā ʻene ʻuhinga kiate koe ʻa e “talanoa ki [Heʻene] māʻoniʻoní ʻi he ʻaho kotoa pē”? (Saame 71:24). Te ke talanoaʻi fēfē ki he niʻihi kehé “ʻa ia kuó ne fai ki [ho] Laumālié”? (Saame 66:16).
Vakai foki, Mosaia 28:1–4; ʻAlamā 26.
Te tau lava ʻo vahevahe ki he niʻihi kehé ʻetau fakamoʻoni ki he meʻa naʻe fai ʻe he ʻEikí maʻatautolú.
ʻE tokoniʻi au ʻe he ʻEikí ʻi he taimi ʻo ʻeku fie maʻu vivilí.
ʻOku fakamatalaʻi ʻe he ngaahi sāme lahi ʻi ha lea mahino ʻa e ongoʻi ko ia ʻo e vāmamaʻo mei he ʻOtuá mo hono fuʻu fie maʻu moʻoni ʻEne tokoní. Mahalo te ke fakakaukau ke fekumi ki he ngaahi fakamatala ko ʻení ʻi he Saame 63:1, 8; 69:1–8, 18–21; 77:1–9. Ko e hā ʻokú ke maʻu ʻi he Saame 63; 69; 77–78 naʻá ne ʻoange ha loto fakapapauʻi moʻoni ki he kau faʻu sāmé?
ʻI he taimi ʻokú ke faingataʻaʻia aí, ʻokú ne tokoniʻi fēfē koe ke ke “manatu ki he ngaahi ngāue ʻa e ʻEikí” mo ʻEne “ngaahi meʻa fakaofo ʻo e kuonga muʻá”? (Saame 27:11). ʻOku fakamatalaʻi ʻe he Saame 78 ha niʻihi ʻo e ngaahi meʻa fakaofo ko iá. ʻI hoʻo lau kinautolú, fakalaulauloto ki he meʻa ʻokú ne tokoniʻi koe “[ke ke] ʻamanaki lelei maʻu ai pē ki he ʻOtuá” (veesi 7). Ko e hā ha ngaahi aʻusia mei ho hisitōlia fakafāmilí ʻokú ne tataki fakalaumālie koe?
Ngaahi Fakakaukau ki Hono Ako Fakafāmili ʻo e Folofolá mo e Efiafi ʻi ʻApí
-
Saame 51:17.Fakakaukau ki he founga te ke akoʻi ai ho fāmilí ki he ʻuhinga ʻo hono maʻu ha loto-mafesifesí. Hangē ko ʻení, ʻe lava ke taufetongi e kau mēmipa ʻo e fāmilí ʻi hono feingaʻi ke fakaava ha meʻa ʻoku tuʻa fefeka hangē ko ha fuaʻi moa pe ko ha foʻi nati. ʻOku anga fēfē ha faitatau he taimi ʻe niʻihi hotau lotó mo e meʻa fefeka ko iá? Te tau lava fēfē ʻo fakaava hotau lotó ki he ʻEikí? Lau fakataha ʻa e Saame 51 ke lava ʻo maʻu mei ai ha ngaahi fakakaukau.
-
Saame 61:2–3.ʻE lava ke fiefia e kau mēmipa ʻo e fāmilí ʻi hono tā ha ngaahi fakatātā ʻo e ngaahi fakataipe mei he ngaahi veesi ko ʻení mo aleaʻi e anga e hoko ʻa Sīsū ko ha “maka,” māʻolunga ange mo “[hatau] ūngaki,” pea mo “ha fale māʻolunga.”
-
Saame 71:17; 78:5–7.Ko e hā ‘oku finangalo e ʻEikí ke ke “fakaʻilo … ki [hoʻo] fānaú”? (Saame 78:5). Mahalo ʻe lava ke vahevahe ʻe he mēmipa takitaha ʻo e fāmilí ha sīpinga ʻo e “ngāue fakaofo” ʻa e ʻEikí, hangē ko ha talanoa mei he folofolá, ko ha aʻusia, pe ko ha fakamoʻoni fakataautaha, te ne tokoniʻi ke nau “ʻamanaki lelei maʻu ai pē ki he ʻOtuá” (Saame 71:17; 78:7).
-
Saame 72.Naʻe tohi ʻe Tēvita ʻa e Saame 72 ki hono foha ko Solomoné, ka ko e konga lahi ai ʻe lava ke toe ʻuhinga ia kia Sīsū Kalaisi. ʻI hono lau ʻe ho fāmilí e sāme ko ʻení, ʻe lava ke nau puke hake ha fakatātā ʻo e Fakamoʻuí ʻi he taimi te nau maʻu ai ha ngaahi veesi ʻokú ne fakamanatu kiate kinautolu ʻa Sīsū Kalaisi. Te tau tokoni fēfē ke fakahoko e fakaʻamu ke “pito ʻa māmani kotoa pē ʻi hono nāunaú”? (Saame 72:19; vakai foki, Tokāteline mo e Ngaahi Fuakavá 65:2).
-
Saame 85:11.ʻE lava ke ueʻi fakalaumālie ʻe he veesi ko ʻeni ha fealeaʻaki kau ki he ngaahi meʻa naʻe hoko ʻi Hono Fakafoki Mai ʻo e ongoongoleleí—mo e anga e hoko ʻa e Tohi ʻa Molomoná ko e moʻoni naʻe “[mapuna] hake mei he kelekelé” mo e founga ne toe “ʻalu hifo mei he langí” ha kau talafekau fakalangi (vakai foki, Mōsese 7: 62). (ChurchofJesusChrist.org).
Ki ha ngaahi fakakaukau lahi ange ki hono akoʻi ʻo e fānaú, vakai, lēsoni ʻo e uike níʻi he Haʻu, ʻo Muimui ʻIate Au—Maʻá e Palaimelí.
Hiva ʻoku fokotuʻu atú: “ʻOku ou Fie Maʻu Koe,” Ngaahi Himi, fika 48.
Fakatupulaki ʻo ʻEtau Founga Akoʻí
Fakaʻaongaʻi ha ngaahi founga kehekehe. “Kumi ha ngaahi founga kehekehe te ke lava ʻo fulifulihi ai hoʻo feinga ke akoʻi ʻa e ongoongoleleí. ʻI hono fai iá te ne tānaki mai ha koloa lelei mo fakaʻofoʻofa ki he meʻa ʻe aʻusiá. … Fakakaukau ki he founga ʻe fakaʻaongaʻi ai e hivá, talanoá, fakatātá, mo ha ngaahi founga fakaʻaati kehe te ne lava ʻo fakaafeʻi e Laumālié” (Faiako ʻi he Founga ʻa e Fakamoʻuí, 22).
Doubt Not, Thomas (Tōmasi, ʻOua ʻe Tālaʻa),tā ʻe J. Kirk Richards