« ថ្ងៃទី ៥–១១ ខែ កញ្ញា ។ អេសាយ ១–១២ ៖ ‹ ព្រះទ្រង់ជាសេចក្តីសង្គ្រោះរបស់ខ្ញុំ › » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ព្រះគម្ពីរសញ្ញាចាស់ ឆ្នាំ ២០២២ ( ឆ្នាំ ២០២១ )
« ថ្ងៃទី ៥–១១ ខែ កញ្ញា ។ អេសាយ ១–១២ » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ឆ្នាំ ២០២២
ព្យាការីអេសាយបានប្រាប់ទុកជាមុនពីការប្រសូតរបស់ព្រះគ្រីស្ទ ដោយ ហារី អាន់ឌើរសុន
ថ្ងៃទី ៥–១១ ខែ កញ្ញា
អេសាយ ១–១២
« ព្រះទ្រង់ជាសេចក្តីសង្គ្រោះរបស់ខ្ញុំ »
សូមស្វែងរកការណែនាំពីព្រះវិញ្ញាណកាលដែលបងប្អូនសិក្សា ។ ពាក្យសម្តីរបស់អេសាយកាន់តែយល់បានច្បាស់បំផុត នៅពេលយើង « ពោរពេញទៅដោយវិញ្ញាណនៃការព្យាករ » ដូចជានីហ្វៃបានបង្រៀន ( នីហ្វៃទី២ ២៥:៤ ) ។
កត់ត្រាចំណាប់អារម្មណ៍របស់បងប្អូន
ទោះបីជាបងប្អូនអានគម្ពីរអេសាយជាលើកដំបូងក្តី ក៏បងប្អូនអាចរកឃើញវគ្គបទគម្ពីរដែលស្ដាប់ទៅដូចជាធ្លាប់ឮដែរ ។ នោះក៏ព្រោះតែក្នុងចំណោមពួកព្យាការីព្រះគម្ពីរសញ្ញាចាស់ទាំងអស់ ព្យាការីអេសាយ គឺជាអ្នកដែលត្រូវបានគេដកស្រង់ពាក្យសម្ដីទៅក្នុងគម្ពីរផ្សេងៗជាញឹកញាប់ ដោយរួមទាំងព្រះអង្គសង្រ្គោះទ្រង់ផ្ទាល់ផងដែរ ។ ពាក្យសម្តីរបស់អេសាយក៏ឃើញមាននៅក្នុងទំនុកតម្កើង និងតន្រ្តីពិសិដ្ឋផ្សេងៗទៀតជារឿយៗផងដែរ ។ ហេតុអ្វីអេសាយត្រូវបានគេដកស្រង់ញឹកញាប់ខ្លាំងដូច្នេះ ?
មូលហេតុពិតប្រាកដគឺថា អេសាយមានអំណោយទានសម្រាប់ការថ្លែងព្រះបន្ទូលរបស់ព្រះ ជាភាសាដែលរស់រវើក និងគួរឲ្យចងចាំ ។ ប៉ុន្តែវាមានច្រើនលើសពីនោះទៅទៀត ។ អេសាយបានបំផុសគំនិតដល់ពួកព្យាការីអស់ជាច្រើនជំនាន់ ពីព្រោះតែសេចក្តីពិតដែលលោកបានបង្រៀន បានបន្តមានហួសពីជំនាន់លោកផ្ទាល់ទៅទៀត—ពួកសាសន៍អ៊ីស្រាអែលដែលរស់នៅចន្លោះ ឆ្នាំ ៧៤០ និង ឆ្នាំ ៧០១ មុន គ.ស. ។ តួនាទីរបស់លោកគឺដើម្បីបើកភ្នែករបស់យើងឲ្យមើលឃើញកិច្ចការដ៏អស្ចារ្យនៃសេចក្តីប្រោសលោះរបស់ព្រះ ដែលធំជាងប្រទេសមួយ ឬអំឡុងពេលមួយទៅទៀត ។ តាមរយៈអេសាយ នោះនីហ្វៃបានរៀនថា លោក និងប្រជាជនរបស់លោក ទោះជាបានបំបែកចេញពីសាសន៍អ៊ីស្រាអែលផ្សេងទៀតក្តី ក៏នៅតែជារាស្រ្តនៃសេចក្តីសញ្ញារបស់ព្រះដដែល ។ នៅក្នុងគម្ពីរអេសាយ ពួកអ្នកនិពន្ធព្រះគម្ពីរសញ្ញាថ្មីបានរកឃើញការព្យាករអំពីព្រះមែស៊ី ដែលត្រូវបានបំពេញនៅចំពោះមុខរបស់ពួកគេ ។ ហើយនៅក្នុងគម្ពីរអេសាយ យ៉ូសែប ស៊្មីធ បានរកឃើញការបំផុសគំនិតសម្រាប់កិច្ចការនៃការប្រមូលផ្តុំអ៊ីស្រាអែល និងការស្ថាបនាស៊ីយ៉ូននៅថ្ងៃចុងក្រោយ ។ នៅពេលបងប្អូនអានអេសាយ តើបងប្អូននឹងរកឃើញអ្វីខ្លះ ?
សម្រាប់សាច់រឿងបន្ថែមទៀតអំពីអេសាយ និងសំណេររបស់លោក សូមមើល « អេសាយ » នៅក្នុងសេចក្តីណែនាំដល់បទគម្ពីរទាំងឡាយ ។ ចំពោះព័ត៌មានអំពីគ្រាដែលអេសាយបានរស់នៅ សូមមើល ពង្សាវតារក្សត្រ ទី២ ១៥–២០ និង របាក្សត្រ ទី២ ២៦–៣២ ។
គំនិតយោបល់សម្រាប់ការសិក្សាព្រះគម្ពីរផ្ទាល់ខ្លួន
តើខ្ញុំអាចយល់កាន់តែច្បាស់នូវការបង្រៀនរបស់អេសាយតាមរបៀបណា ?
ដោយលើកឡើងពីសំណេររបស់អេសាយ ព្រះអង្គសង្គ្រោះបានមានបន្ទូលថា « ចូរអ្នករាល់គ្នាពិចារណាមើលការណ៍ទាំងនេះដោយព្យាយាម ដ្បិតពាក្យពេចន៍របស់អេសាយជាពាក្យដ៏មហិមា » ( សូមមើល នីហ្វៃទី៣ ២៣:១–៣ ) ។ ប៉ុន្តែ គម្ពីរអេសាយពិបាកយល់ណាស់ចំពោះមនុស្សជាច្រើន ។ នេះគឺជាគន្លឹះខ្លះៗដើម្បីជួយបងប្អូនឲ្យរកឃើញអត្ថន័យកាន់តែប្រសើរនៅក្នុងពាក្យរបស់អេសាយ ៖
-
សូមពិចារណាពីនិមិត្តរូប និងការប្រៀបធៀបដែលអេសាយបានប្រើ ។ ឧទាហរណ៍ សូមពិចារណាពីអ្វីដែលបងប្អូនគិតថា អេសាយចង់និយាយប្រាប់ នៅពេលលោកបានសរសេរអំពីចម្ការទំពាំងបាយជូរ ( សូមមើល អេសាយ ៥:១–៧ ) ទឹកស៊ីឡោម ( សូមមើល អេសាយ ៨:៥–១០ ) និងទង់ជ័យ ( សូមមើល អេសាយ ៥:២៦ ) និង ទង់ ( សូមមើល អេសាយ ១១:១០,១២ ) ។
-
ចំពោះគ្រប់ជំពូកដែលបងប្អូនអាន សូមសួរខ្លួនបងប្អូនថា « តើខ្ញុំកំពុងរៀនអ្វីខ្លះអំពីព្រះយេស៊ូវគ្រីស្ទ ? » ( សូមមើល នីហ្វៃទី១ ១៩:២៣ ) ។
-
សូមស្វែងរកប្រធានបទដែលបងប្អូនមានអារម្មណ៍ថាទាក់ទងនឹងសម័យរបស់យើង ដូចជា ព្រះជន្ម និងព្រះរាជបេសកកម្មរបស់ព្រះយេស៊ូវគ្រីស្ទ ការខ្ចាត់ព្រាត់ និងការប្រមូលផ្ដុំអ៊ីស្រាអែល ថ្ងៃចុងក្រោយ និងសហស្សវត្សរ៍ ។ បងប្អូនក៏អាចរក្សាបញ្ជីនៃសេចក្តីយោងមកពីគម្ពីរអេសាយ ដែលបង្រៀនអំពីប្រធានបទទាំងនេះផងដែរ ។
-
សូមប្រើជំនួយសិក្សា ប្រសិនបើមាន ដូចជា វចនានុក្រម លេខយោងព្រះគម្ពីរប៊ីប ក្បាលកណ្ឌ និង សេចក្ដីណែនាំដល់បទគម្ពីរទាំងឡាយ ។
សូមមើលផងដែរ នីហ្វៃទី២ ២៥:១–៨ ។
« លែងប្រព្រឹត្តអំពើអាក្រក់តទៅ » ។
អេសាយបន្តព្រមានដល់នគរយូដាអំពីស្ថានភាពខាងវិញ្ញាណរបស់ពួកគេ ។ បន្ទាប់ពីអាន អេសាយ ១, ៣ និង ៥ តើបងប្អូននឹងពិពណ៌នាស្ថានភាពខាងវិញ្ញាណរបស់ប្រជាជននេះយ៉ាងដូចម្តេច ? តើការព្រមានអ្វីខ្លះដែលបងប្អូនរកឃើញដែលបងប្អូនមានអារម្មណ៍ថាអនុវត្តចំពោះសម័យរបស់យើងបាន ?
បន្ថែមពីលើការព្រមាននេះ បងប្អូនអាចកត់ចំណាំសារលិខិតនៃក្តីសង្ឃឹមសម្រាប់សាសន៍អ៊ីស្រាអែលដែលមានបាប ( សូមមើល ឧទាហរណ៍ អេសាយ ១:១៦–២០, ២៥–២៧; ៣:១០ ) ។ តើបងប្អូនរៀនអ្វីខ្លះ អំពីព្រះអម្ចាស់ចេញពីសារលិខិតទាំងនេះ ?
ព្រះនឹងធ្វើកិច្ចការដ៏អស្ចារ្យនៅថ្ងៃចុងក្រោយ ។
សំណេររបស់អេសាយជាច្រើនគឺជាការព្យាករដែលមានអត្ថន័យជាក់លាក់សម្រាប់ជំនាន់របស់យើង ។ តើការពិពណ៌នាណាមួយរបស់អេសាយ អំពីថ្ងៃចុងក្រោយនៅក្នុង ជំពូក ២; ៤; ១១–១២ ដែលបំផុសគំនិតជាពិសេសដល់បងប្អូន ?( គោលលទ្ធិ និង សេចក្ដីសញ្ញា ១១៣:១–៦ ផ្តល់នូវការយល់ដឹងដ៏មានអត្ថប្រយោជន៍អំពី អេសាយ ១១ ) ។ តើបងប្អូនរៀនបានអ្វីខ្លះអំពីការប្រមូលផ្ដុំអ៊ីស្រាអែល និងសេចក្តីប្រោសលោះនៃស៊ីយ៉ូន ? តើបងប្អូនមានអារម្មណ៍បំផុសគំនិតឲ្យធ្វើអ្វីខ្លះ បន្ទាប់ពីអានជំពូកទាំងនេះហើយ ?
សូមមើលផងដែរ អេសាយ ៥:២៦; ១០:២០ ។
ពួកព្យាការីគឺត្រូវបានហៅពីព្រះ ។
នៅក្នុង ជំពូក ៦ អេសាយបានរៀបរាប់ឡើងវិញពីការហៅរបស់លោកឲ្យធ្វើជាព្យាការី ។ នៅពេលបងប្អូនអានជំពូកនេះ តើអ្វីដែលធ្វើឲ្យបងប្អូនចាប់អារម្មណ៍ អំពីអ្វីដែលអេសាយបានជួបប្រទះ ? តើជំពូកនេះជះឥទ្ធិពលលើរបៀបដែលបងប្អូនគិតអំពីព្រះអម្ចាស់ ពួកព្យាការីរបស់ទ្រង់ និងកិច្ចការដែលពួកលោកត្រូវបានហៅឲ្យធ្វើយ៉ាងដូចម្តេច ?
« ដ្បិតមានបុត្រ១កើតដល់យើង ព្រះទ្រង់ប្រទានបុត្រា១មកយើង » ( អេសាយ ៩:៦ ) ។
អេសាយបានព្យាករអំពីព្រះយេស៊ូវគ្រីស្ទ ។
នៅដើមការងារបម្រើរបស់អេសាយ នគរអ៊ីស្រាអែល ( ក៏ត្រូវបានហៅថាអេប្រាអិមផងដែរ ) បានចងសម្ព័ន្ធភាពជាមួយស៊ីរី ដើម្បីការពារខ្លួនប្រឆាំងនឹងស្រុកអាសស៊ើរ ។ អ៊ីស្រាអែល និង ស៊ីរី ចង់បង្ខិតបង្ខំឲ្យ អេហាស ដែលជាស្តេចយូដា ឲ្យចូលរួមនឹងសម្ព័ន្ធរបស់ពួកគេ ។ ប៉ុន្តែអេសាយបានព្យាករថា សម្ព័ន្ធនេះនឹងបរាជ័យ និងបានទូន្មានដល់អេហាសឲ្យទុកព្រះទ័យលើព្រះអម្ចាស់ ( សូមមើល អេសាយ ៧–៩ ជាពិសេស អេសាយ ៧:៧–៩; ៨:១២–១៣ ) ។
កាលដែលអេសាយបានទូន្មានដល់អេហាស លោកបានធ្វើការព្យាករដ៏ល្បីល្បាញជាច្រើន ដូចជា ការព្យាករដែលមាននៅក្នុង អេសាយ ៧:១៤; ៨:១៣–១៤; ៩:២, ៦–៧ ។ ខណៈដែលអត្ថន័យនៃការព្យាករនេះពុំសូវច្បាស់លាស់ទាំងស្រុងនៅក្នុងសម័យរបស់ អេហាស ក៏ការព្យាករទាំងនេះអនុវត្តនៅក្នុងសម័យរបស់ព្រះយេស៊ូវគ្រីស្ទដែរ ( សូមមើលផងដែរ ម៉ាថាយ ១:២១–២៣; ៤:១៦; ២១:៤៤; លូកា ១:៣១–៣៣ ) ។ តើបងប្អូនរៀនអ្វីខ្លះ អំពីព្រះអង្គសង្គ្រោះមកពីខគម្ពីរទាំងនេះ ?
គំនិតយោបល់សម្រាប់ការសិក្សាព្រះគម្ពីរជាគ្រួសារ និងរាត្រីជួបជុំក្នុងគ្រួសារ
-
អេសាយ ១:១៦–១៨ ។ដើម្បីជួយសមាជិកគ្រួសារឲ្យយល់អត្ថន័យពីខគម្ពីរទាំងនេះ បងប្អូនអាចអានវគ្គ « Some of Us Feel We Can Never Be Good Enough » មកពីសារលិខិតរបស់ស៊ីស្ទើរ សារ៉ុន អូប៊ែង « Christ: The Light That Shines in Darkness » (Ensign ឬ Liahona ខែ ឧសភា ឆ្នាំ ២០១៩ ទំព័រ ៧៥ ) ។ ឬបងប្អូនអាចបង្ហាញពីរបៀបដែលស្នាមប្រឡាក់អាចត្រូវបានសម្អាតចេញពីសម្លៀកបំពាក់បាន ។ តើសារលិខិតរបស់ព្រះអម្ចាស់នៅក្នុងខគម្ពីរទាំងនេះខុសពីអ្វីដែលសាតាំងចង់ឲ្យយើងជឿយ៉ាងដូចម្តេច ?
-
អេសាយ ២:១–៥ ។សមាជិកគ្រួសារអាចជ្រើសរើសខគម្ពីរមួយក្នុងចំណោមខគម្ពីរទាំងនេះ ហើយគូររូបភាពនៃអ្វីដែលខគម្ពីរនេះពិពណ៌នា ។ តើព្រះវិហារបរិសុទ្ធបង្រៀនយើងអ្វីខ្លះអំពីរបៀបរបស់ព្រះអម្ចាស់ ? តើព្រះវិហារបរិសុទ្ធប្រទានពរជ័យយ៉ាងដូចម្ដេច កាលដែលយើង « ដើរក្នុងពន្លឺនៃព្រះយេហូវ៉ា » ? ( អេសាយ ២:៥ ) ។
-
អេសាយ ៤:៥–៦ ។តើព្រះអម្ចាស់សន្យាអ្វីខ្លះនៅក្នុងខគម្ពីរទាំងនេះ ? តើការសន្យាទាំងនេះអាចមានអត្ថន័យយ៉ាងណាខ្លះ ? តើការសន្យាទាំងនេះអាចបំពេញដោយរបៀបណា ? ( សូមមើលផងដែរ និក្ខមនំ ១៣:២១–២២ ) ។
-
អេសាយ ៧:១៤; ៩:១–៧ ។ដោយការប្រើរូបគំនូរ ឬរូបភាពពីទស្សនាវដ្តីសាសនាចក្រ បងប្អូនអាចធ្វើផ្ទាំងរូបភាពមួយដែលបង្ហាញពីអ្វីដែលយើងរៀនអំពីព្រះយេស៊ូវគ្រីស្ទចេញពីខគម្ពីរទាំងនេះ ។
សម្រាប់គំនិតបន្ថែមសម្រាប់ការបង្រៀនដល់កុមារ សូមមើល គម្រោងមេរៀនសប្តាហ៍នេះ នៅក្នុង ចូរមកតាមខ្ញុំ—សម្រាប់អង្គការបឋមសិក្សា ។
ចម្រៀងដែលលើកទឹកចិត្តឲ្យប្រើ ៖ « នៅលើកំពូលភ្នំខ្ពស់ » ទំនុកតម្កើង ល.រ. ៥ ។
ការកែលម្អដល់ការសិក្សាផ្ទាល់ខ្លួន
សូមជំនួយពីព្រះអម្ចាស់ ។ ដើម្បីយល់ពីបទគម្ពីរ យើងត្រូវការវិវរណៈផ្ទាល់ខ្លួន ។ ព្រះអម្ចាស់បានសន្យាថា « ចូរសូម នោះតែងនឹងឲ្យមកអ្នក ចូររក នោះតែងនឹងឃើញ ចូរគោះ នោះតែងនឹងបើកឲ្យអ្នក » ( ម៉ាថាយ ៧:៧ ) ។
អេសាយបានបង្រៀនថា រោងឧបោសថនឹង « ជាទីជម្រក » និង « ជាទីបាំងខ្លួនឲ្យរួចពីព្យុះ និងភ្លៀងផង » ( អេសាយ ៤:៦ ) ។ព្រះវិហារបរិសុទ្ធអៃដាហូ ហ្វល រដ្ឋអៃដាហូ