“31 ôktôbra–6 nôvambra. Daniela 1–6: -Tsy misy andriamani-kafa mahavonjy,-” Avia, hanaraka Ahy—Ho an’ny isam-batan’olona sy ny fianakaviana: Testamenta Taloha 2022 (2021)

“31 ôktôbra–6 nôvambra. Daniela 1–6,” Avia, hanaraka Ahy—Ho an’ny isam-batan’olona sy ny fianakaviana: 2022

Sary

I Daniela milaza ny hevitry ny nofin’ny mpanjaka

Daniel Interprets Nebuchadnezzar’s Dream (Milaza ny hevitry ny nofin’i Nebokadnezara i Daniela), nataon’i Grant Romney Clawson

31 ôktôbra–6 nôvambra

Daniela 1–6

“Tsy misy andriamani-kafa mahavonjy”

Ny Loholona Richard G. Scott dia nanazava fa ny firaketana an-tsoratra ireo fitaomam-panahy “dia mampiseho amin’ Andriamanitra fa masina ho antsika ny fifandraisana Aminy. Ny firaketana koa dia hampivoatra ny fahafahantsika mahatsiaro fanambarana” (“Ahoana no fomba ahafahana mahazo fanambarana sy fanentanam-panahy ho an’ny fiainanao manokana,” Liahona, mey 2012, 46).

Raketo ireo zavatra tsapanao

Azo inoana fa tsy hisy olona handrahona hanipy anao ao anaty lafaoro misy afo mirehitra na ao an-davaky ny liona na oviana na oviana noho ny finoanao an’i Jesoa Kristy. Saingy tsy misy amintsika izay mandalo eto amin’ity fiainana ity ka tsy handalo fisedrana ny finoana. Isika rehetra dia afaka mandray tombotsoa avy amin’ny ohatra nasehon’ny olona toa an’i Sadraka, sy i Mesaka, ary i Abednego izay nalain’ilay fanjakana Babyloniana mahery ho babo fony izy ireo mbola tovolahy (jereo ny 2 Mpanjaka 24:10–16). Ireo tanora ireo dia voahodidin’ny kolontsaina tsy mahazatra miaraka amin’ny soatoavina samy hafa, ary niatrika fakam-panahy lehibe handao ny zavatra inoany sy ny fomban-drazana marina izy ireo. Na izany aza dia nijanona ho nahatoky tamin’ny fanekempihavanany izy ireo. Toa an’i Josefa tany Egypta sy i Estera tany Persia, dia nitazona ny finoan’izy ireo an’ Andriamanitra i Daniela sy ireo namany tany Babylona, ary Andriamanitra dia nanao fahagagana izay mbola manentam-panahy ny mpino mandraka androany.

Ahoana no nahitan’izy ireo ny hery hijanonana ho mahatoky toy izany? Izy ireo dia nanao ireo zavatra kely sy tsotra nasain’ Andriamanitra hataontsika rehetra ireo, —mivavaka, mifady hanina, mifidy namana tsara, matoky an’ Andriamanitra ary mijoro ho fahazavana ho an’ny hafa. Rehefa lasa matanjaka vokatry ny fanaovana ireo zavatra kely sy tsotra ireo ihany koa isika dia afaka miatrika ireo liona sy lafaoro mirehitra ao amin’ny fiainantsika manokana amim-pinoana.

Raha hanao topimaso ny bokin’i Daniela, dia jereo ny “Bokin’i Daniela” ao amin’ny Torolalana ho an’ny Soratra Masina.

Sary

famantarana ny fandalinan’ny tena manokana

Hevitra ho an’ny fandalinan’ny tena manokana ny soratra masina

Daniela1; 3; 6

Afaka matoky ny Tompo aho rehefa mandalo fitsapana ny finoako.

Amin’ny lafiny iray isika rehetra dia miaina ao Babylona avokoa. Ny tontolo manodidina antsika dia feno fakam-panahy maro izay hanohitra ny fenitra arahintsika sy hitsapa ny finoantsika an’i Jesoa Kristy. Rehefa mamaky ny Daniela 1, 3, sy 6, ianao dia jereo tsara ireo karazana fomba nentina nanerena an’i Daniela, i Sadraka, sy i Mesaka, ary i Abednego mba hanaovan’izy ireo zavatra izay fantany fa tsy tokony hataony. Efa nahatsapa noterena ny handika ny zavatra izay inoanao ve ianao? Inona no ianaranao avy amin’ireo lehilahy ireo izay afaka ny hanampy anao hatoky ny Tompo rehefa miatrika fanoherana ianao?

Ny bokin’i Daniela sy ny soratra masina hafa dia mirakitra traikefa maro izay ahitana fa ny finoana lehibe dia nitarika fahagagana lehibe. Saingy ahoana raha tsy mitarika any amin’ny fahagagana izay katsahintsika ny finoantsika? (jereo ohatra ny Almà 14:8–13). Raha miainga amin’ny zavatra nianaranao ao amin’ny Daniela 3:13–18, dia mety ho tamin’ny fomba ahoana araka ny hevitrao no namalian’i Sadraka, sy i Mesaka, ary i Abednego an’io fanontaniana io? Inona no mety ho fiantraikan’ny ohatra nasehon’izy ireo amin’ny fiatrehanao ny fisedrana ny finoanao?

Ny bokin’i Daniela ihany koa dia mampiseho fa ny safidy tsara izay ataon’ny tsirairay dia afaka ny hitarika ny hafa ho amin’ny finoana lehibe kokoa an’ny Tompo. Inona no ohatra mahakasika izany izay hitanao ao amin’ny toko 1, 3, ary 6? Saintsaino ny mety ho fiantraikan’ireo safidinao eo amin’ny hafa (jereo ny Matio 5:16)

Jereo ihany koa Dieter F. Uchtdorf, “Aza matahotra, minoa fotsiny ihany,” Liahona, nôv. 2015, 76–79.

Sary maneho an’i Daniela sy ireo namany mandà ny sakafon’ny mpanjaka, nataon’i Brian Call

Daniela 2

Ny Fiangonan’i Jesoa Kristy ho an’ny Olomasin’ny Andro Farany no fanjakan’ Andriamanitra eto an-tany.

Tamin’ny alalan’ny fanambarana, i Daniela dia nahita ny nofin’i Nebokadnezara nilaza mialoha ny fanjakan’izao tontolo izao amin’ny ho avy, ary koa ny fanjakan’ Andriamanitra amin’ny ho avy, izay “tsy ho rava mandrakizay” (Daniela 2:44). “Ny Fiangonana izany fanjakana amin’ny andro farany voalazan’ny faminaniana izany, izay tsy noforonin’ny olona fa naorin’ Andriamanitra ka nikodiadia toy ny vato -nendahana tamin’ny tendrombohitra nefa tsy nendahan-tanana- ka nahafeno ny tany” (“Nahoana no ilaina ny Fiangonana,” Liahona, nôv. 2015,108). Eritrereto ny momba ny fanjakan’ Andriamanitra amin’ny andro farany rehefa mamaky ny famariparitana ilay vato ao amin’ny Daniela 2:34–35, 44–45 ianao. Inona no fitoviana hitanao amin’ilay vato sy ilay fanjakana? Amin’ny fomba ahoana no ahitanao ny fanjakan’ Andriamanitra mameno ny tany amin’izao fotoana izao?

Jereo ihany koa ny Gordon B. Hinckley, “La pierre détachée de la montagne,” EnsignLiahona, nov. 2007, 83–86; L.Whitney Clayton, “Ho avy ny andro,” Liahona, nôv. 2011, 11–13.

Daniela 3:19–28

Hanohana ahy ao anatin’ny fitsapana lalovako ny Tompo.

Inona no hevi-baovao izay tonga aminao rehefa mamaky momba ilay olona fahaefatra miseho ao anatin’ilay lafaoro misy afo mirehitra niaraka tamin’i Sadraka, sy i Mesaka, ary i Abednego ianao? Ahoana no hanampian’io tantara io anao amin’ireo fitsapana izay lalovanao? Mety hahita hevi-baovao fanampiny ianao ao amin’ny Môzià 3:5–7; Almà 7:11–13; Fotopampianarana sy Fanekempihavanana 61:36–37; 121:5–8.

Sary

famantarana ny fandalinan’ny mpianakavy

Hevitra ho an’ny fandalinan’ny mpianakavy ny soratra masina sy ny takarivan’ny mpianakavy

Daniela 1–2.Rehefa mamaky miaraka ny Daniela 1 sy 2 ianareo dia azonareo atao ny mitady ireo fitahiana izay noraisin’i Daniela sy ireo namany vokatry ny fandavan’izy ireo tsy hihinana ny hanina sy divain’ny mpanjaka. Afaka mampitaha ireo fitahiana ireo amin’ny fampanantenan’ny Tompo amintsika rehefa mitandrina ireo didiny, toa ny Tenin’ny Fahendrena ianao (jereo ny Fotopampianarana sy Fanekempihavanana 89:18–21). Tamin’ny fomba ahoana no nitahian’ny Tompo antsika noho ny fanajantsika ny Tenin’ny Fahendrena?

Daniela 3.Ahoana no ahafahanao manampy ny fianakavianao hianatra momba ny tantara ao amin’ny Daniela 3? “Sadraka, Mesaka, ary Abednego,” ao amin’ny Tantara ao amin’ny Testamenta Taloha dia afaka manampy anareo. Inona no mahatalajona antsika amin’i Sadraka, sy i Mesaka, ary i Abednego? Inona ny toe-javatra lalovantsika izay mitondra olana eo amin’ny finoantsika sy mitaky antsika mba hampiseho fa matoky an’ Andriamanitra isika?

Daniela 6:1–23.Mety ho tian’ny fianakavianao ny hilalao an-tsehatra ny ampahany amin’ny tantara ao amin’ny Daniela 6:1–23 (ohatra, andininy 10–12 na 16–23). Inona no azontsika ianarana avy amin’ny ohatra nasehon’i Daniela? Inona no azontsika atao mba hitovy kokoa aminy?

Daniela 6:25–27.Araka ireo andininy ireo dia inona no fiantraikan’ny nanavotan’ny Tompo an’i Daniela tamin’ireo liona tamin’ny Mpanjaka Dariosy? Azonareo vakina ihany koa ny Daniela 2:47; 3:28–29 momba ny hoe nisy fiantraikany tamin’ny Mpanjaka Nebokadnezara toy izany koa ny zavatra tao. Inona avy ireo fahafahana ananantsika mba hitarihana ny hafa? Ifanakalozy hevitra ireo ohatra hitanao momba ny finoan’olon-kafa, tafiditra ao anatin’izany ny an’ny olona ao amin’ny fianakaviana, izay nitarika ny hafa hanao ny tsara.

Mba hahitana hevitra misimisy kokoa hampianarana ny ankizy dia jereo ny rindran-damina ho an’ity herinandro ity ao amin’ny Avia, hanaraka Ahy—Ho an’ny Kilonga.

Hira aroso mba ho hiraina: “Te-hiaina ny filazantsara aho,” Bokin-kiran’ny ankizy,72.

Manatsara ny fampianarantsika

Ampianaro ny fotopampianarana. Ny filazantsaran’ny Tompo dia mahafinaritra ao anatin’ny fahatsorany (jereo ny Fotopampianarana sy Fanekempihavanana 133:57). Ireo zavatra atao sy fifanakalozan-kevitra tsotra mifantoka amin’ny fotopampianarana dia afaka manasa ny Fanahy Masina hitondra ny hafatry ny filazantsara ao am-pon’ny fianakavianao.