« ថ្ងៃទី ១៥–២១ ខែ មិថុនា អាលម៉ា ១៣–១៦ ៖ ‹ ចូលទៅក្នុងសេចក្ដីសម្រាកនៃព្រះអម្ចាស់ › » ចូរមកតាមខ្ញុំ—សម្រាប់ថ្នាក់អង្គការបឋមសិក្សា ៖ ព្រះគម្ពីរមរមន ឆ្នាំ ២០២០ ( ឆ្នាំ ២០២០ )

« ថ្ងៃទី ១៥–២១ ខែ មិថុនា អាលម៉ា ១៣–១៦ » ចូរមកតាមខ្ញុំ—សម្រាប់ថ្នាក់អង្គការបឋមសិក្សា ៖ ឆ្នាំ ២០២០

រចនារូបភាពនៃអាលម៉ា និងអាមូលេកត្រូវបានដោះលែងពីគុក ដោយ អែនឌ្រូ បូស្លី

ថ្ងៃទី ១៥–២១ ខែ មិថុនា

អាលម៉ា ១៣–១៦

« ចូលទៅក្នុងសេចក្ដីសម្រាកនៃព្រះអម្ចាស់ »

អ្នកនៅជាមួយនឹងកុមារក្នុងថ្នាក់របស់អ្នកក្នុងរយៈពេលខ្លីប៉ុណ្ណោះរៀងរាល់សប្តាហ៍ ។ អ្នកនឹងផ្តល់ពរដល់ជីវិតរបស់ពួកគេយ៉ាងខ្លាំង ប្រសិនបើអ្នកអាចបំផុសគំនិតពួកគេឲ្យបន្តរៀនពីព្រះគម្ពីរមរមនក្រៅពីម៉ោងរៀន—ជាពិសេសជាមួយគ្រួសាររបស់ពួកគេ ។

កត់ត្រាចំណាប់អារម្មណ៍របស់អ្នក

អញ្ជើញឲ្យចែកចាយ

សូមទុកឱកាសឲ្យកុមារចែកចាយអ្វីដែលពួកគេដឹងអំពីរឿងនៅក្នុង អាលម៉ា ១៣–១៦ ។ ដើម្បីជួយពួកគេ សូមបង្ហាញរូបភាពដូចជារូបភាពនៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ឬ « ជំពូកទី ២២ ៖ បេសកកម្មរបស់អាលម៉ាទៅទីក្រុងអាំម៉ូណៃហា » ( ដំណើររឿងព្រះគម្ពីរមរមន ទំព័រ ៩៤–១០២ ) ។

បង្រៀនគោលលទ្ធិ ៖ កុមារតូចៗ

អាលម៉ា ១៣:១–២, ៦, ១៦

បព្វជិតភាពជួយខ្ញុំឲ្យមកកាន់ព្រះគ្រីស្ទ ។

សូមពិចារណាប្រកបដោយការអធិស្ឋានអំពីអ្វីដែលកុមារនៅក្នុងថ្នាក់របស់អ្នកត្រូវការយល់ មកពីអ្វីដែលអាលម៉ាបានបង្រៀនអំពីបព្វជិតភាពនៅក្នុងខគម្ពីរទាំងនេះ ។

សកម្មភាពដែលអាចជ្រើសរើស

សូមឲ្យកុមារសូត្រឡើងវិញជាមួយអ្នកនូវនិយមន័យសាមញ្ញមួយអំពីបព្វជិតភាព ដូចជា « បព្វជិតភាពគឺជាអំណាចរបស់ព្រះ » ។
សូមបើកគម្ពីរទៅ អាលម៉ា ១៣:២ ហើយប្រាប់កុមារថា ព្រះហៅអ្នកកាន់បព្វជិតភាព « ដែលអាចឲ្យប្រជាជន…ទន្ទឹងចាំព្រះរាជបុត្រារបស់ទ្រង់ » ។ ដើម្បីបង្ហាញអំពីរបៀបដែលអ្នកកាន់បព្វជិតភាពធ្វើកិច្ចការនេះ សូមបង្ហាញរូបភាពអំពីរបៀបដែលអ្នកកាន់បព្វជិតភាពបម្រើ ( សូមមើល សៀវភៅរូបភាពដំណឹងល្អ លេខ ៣៨–៤១, ១០៣–១០៩ ) បន្ទាប់មកចែកចាយរឿងអំពីរបៀបដែលព្រះយេស៊ូវបានបម្រើ ( សូមមើល ម៉ាថាយ ២៦:២៦–២៨; ម៉ាកុស ៥:២២–២៤, ៣៥–៤៣ ) ។
សូមបើកទៅ អាលម៉ា ១៣:៦ ហើយពន្យល់ថា អ្នកកាន់បព្វជិតភាព « បង្រៀនព្រះបញ្ញត្តិទាំងឡាយ [ របស់ព្រះ ] ដល់កូនចៅមនុស្ស » ។ សូមជួយកុមារឲ្យគិតអំពីអ្នកកាន់បព្វជិតភាពដែលពួកគេស្គាល់ ។ តើពួកគេបង្រៀនព្រះបញ្ញត្តិដោយរបៀបណា ? សូមអញ្ជើញកុមារឲ្យគូររូបមួយអំពីអ្នកកាន់បព្វជិតភាពដែលពួកគេស្គាល់ ដែលបង្រៀននរណាម្នាក់អំពីព្រះបញ្ញត្តិទាំងឡាយនៃព្រះ ។

យុវជននៅឯតុសាក្រាម៉ង់ — ពិធីបរិសុទ្ធនៃបព្វជិតភាពជួយយើងឲ្យសម្លឹងឆ្ពោះទៅព្រះយេស៊ូវគ្រីស្ទសម្រាប់ការប្រោសលោះ ។

អាលម៉ា ១៤:១៨–២៩

ព្រះវរបិតាសួគ៌ពង្រឹងខ្ញុំស្របទៅតាមសេចក្តីជំនឿរបស់ខ្ញុំ ។

ដំណើររឿងរបស់អាលម៉ា និងអាមូលេកដែល ត្រូវបានដោះលែងចេញពីគុក អាចបំផុសគំនិតដល់កុមារឲ្យបែរទៅរកព្រះអម្ចាស់ នៅពេលពួកគេត្រូវការជំនួយ ។

សកម្មភាពដែលអាចជ្រើសរើស

សូមបង្ហាញរូបភាពរបស់អាលម៉ា និងអាមូលេកនៅលើទំព័រសកម្មភាពប្រចាំសប្តាហ៍ ពេលអ្នកដំណាលប្រាប់រឿងនៅក្នុង អាលម៉ា ១៤:១៨–២៩ ។ អ្នកក៏អាចមើល « ជំពូកទី ២២ ៖ បេសកកម្មរបស់អាលម៉ាទៅទីក្រុងអាំម៉ូណៃហា » ( ដំណើររឿងព្រះគម្ពីរមរមន ទំព័រ ៩៤–១០២ ឬមើលវីដេអូដូចគ្នានេះនៅគេហទំព័រ ChurchofJesusChrist.org ) ។ សូមទុកឲ្យកុមារដាក់វេនគ្នាប្រើប្រាស់រូបភាពដើម្បីប្រាប់រឿងនោះ ។ សូមគូសបញ្ជាក់ថា អាលម៉ា និងអាមូលេកត្រូវបានប្រទានកម្លាំងឲ្យគេចចេញពីគុក « តាមសេចក្ដីជំនឿ [ របស់ពួកលោក ] ទៅលើព្រះគ្រីស្ទ » ( អាលម៉ា ១៤:២៦ ) ។

សូមជួយកុមារឲ្យស្រមៃអំពីអារម្មណ៍របស់អាលម៉ា និងអាមូលេកអំឡុងពេលនៅក្នុងគុក ហើយអញ្ជើញពួកគេឲ្យបង្ហាញអារម្មណ៍ទាំងនេះ ( សូមមើល ខទី ២២ ) ។ សូមពន្យល់ថា អាលម៉ាបានទូលសូមជំនួយពីព្រះអម្ចាស់ ( សូមមើល ខទី ២៦ ) ។ សូមថ្លែងទីបន្ទាល់ថា ព្រះនឹងពង្រឹងយើងនៅពេលយើងអធិស្ឋានដោយសេចក្តីជំនឿ ។
សូមប្រើទំព័រសកម្មភាពសម្រាប់សប្ដាហ៍នេះដើម្បីបង្រៀនកុមារ អំពីរបៀបមួយចំនួនដែលព្រះពង្រឹងដល់អ្នកដែលមានសេចក្តីជំនឿ ។ អំឡុងពេលដែលកុមារកំពុងផាត់ពណ៌រូបភាពនៅទំព័រសកម្មភាព សូមប្រាប់អំពីគ្រាមួយពេលដែលព្រះបានប្រទានកម្លាំងដល់អ្នក ។

អាលម៉ា ១៦:១–៨

ខ្ញុំមានពរ ពេលខ្ញុំធ្វើតាមព្យាការី ។

សូរាំមេទ័ពធំរបស់ទាហានសាសន៍នីហ្វៃបានដឹងថា អាលម៉ាគឺជាព្យាការី ហើយស្វែងរកការណែនាំពីលោក ។ ដោយសារការណ៍នេះ សូរាំបានទទួលជោគជ័យ ។

សកម្មភាពដែលអាចជ្រើសរើស

សូមចែកចាយដំណើររឿងនេះនៅក្នុង អាលម៉ា ១៦:១–៨ ជាពាក្យសម្តីរបស់អ្នកផ្ទាល់ ។ សូមគូសបញ្ជាក់ថា ដោយសារសូរាំ និងពួកទាហានសាសន៍នីហ្វៃបានធ្វើតាមព្យាការីអាលម៉ា នោះពួកសាសន៍នីហ្វៃអាចសង្គ្រោះមិត្តភក្តិរបស់ពួកគេដែលត្រូវបានជាប់ជាឈ្លើយដោយពួកសាសន៍លេមិន ។ សូមចែកចាយបទពិសោធន៍មួយ នៅពេលអ្នកបានពរ ដោយសារអ្នកបានធ្វើតាមព្យាការី ។
សូមបង្ហាញរូបភាពមួយរបស់ប្រធានសាសនាចក្រ ហើយចែកចាយរឿងមួយចំនួនដែលលោកបានបង្រៀនពួកយើងឲ្យធ្វើ ។ សូមជួយកុមារឲ្យគិតអំពីរបៀបនានា ដែលពួកគេអាចធ្វើតាមអ្វីដែលព្យាការីរបស់ទ្រង់បង្រៀនពួកយើង ។
សូមបង្ហាញរូបភាពព្យាការី ( សូមមើល សៀវភៅរូបភាពដំណឹងល្អ លេខ ៦–៩, ១៤, ១៨, ២៦–២៧ ) នៅពេលអ្នកច្រៀងជាមួយកុមារនូវចម្រៀងអំពីពួកព្យាការី ដូចជាបទ « ធ្វើតាមព្យាការី » ( សៀវភៅចម្រៀងកុមារ ទំព័រ ៥៨–៥៩ ) ។ សូមគូសបញ្ជាក់ថា ឃ្លានានានៅក្នុងចម្រៀងនោះបង្រៀនអំពីមូលហេតុដែលយើងគួរតែធ្វើតាមព្យាការី ។

បង្រៀនគោលលទ្ធិ ៖ កុមារធំៗ

អាលម៉ា ១៣:១–១៩

បព្វជិតភាពជួយខ្ញុំឲ្យមកកាន់ព្រះគ្រីស្ទ ។

នៅពេលអ្នកអាន អាលម៉ា ១៣:១–១៩ តើអ្នករកឃើញអ្វីខ្លះដែលធ្វើឲ្យអ្នកកាន់តែមានគារវភាពចំពោះព្យាការី ? តើអ្នកទទួលបានការបំផុសគំនិតអ្វីខ្លះឲ្យចែកចាយជាមួយកុមារដែលអ្នកបង្រៀន ? យោបល់ខាងក្រោមនេះអាចជាជំនួយ ។

សកម្មភាពដែលអាចជ្រើសរើស

សូមអានជាមួយកុមារ អាលម៉ា ១៣:១០ និង ១៣ ដោយស្រាវជ្រាវរកមើលលក្ខណៈដែលអ្នកកាន់បព្វជិតភាពម្នាក់គួរមាន ។ សូមឲ្យពួកគេគិតអំពីមនុស្សដែលពួកគេស្គាល់ ដែលជាគំរូល្អអំពីលក្ខណៈទាំងនេះ ។
សូមជួយកុមារឲ្យធ្វើបញ្ជីពិធីបរិសុទ្ធមួយដែលយើងអាចទទួលតាមរយៈបព្វជិតភាព ( សូមមើល « Ordinances » នៅក្នុង True to the Faith ទំព័រ ១០៩–១១០ ) ។ សូមឲ្យនរណាម្នាក់អាន អាលម៉ា ១៣:១៦ ។ តើពិធីបរិសុទ្ធទាំងនេះជួយយើងឲ្យ « ទន្ទឹងចាំ [ ព្រះយេស៊ូវគ្រីស្ទ ] ដើម្បីបានទទួលការផ្ដាច់បាបទាំងឡាយ [ របស់យើង ] » ដោយរបៀបណា ?
សូមសួរកុមារ ប្រសិនបើពួកគេដឹងអំពីរបៀបដែល បព្វជិតភាពមិលគីស្សាដែកទទួលបានឈ្មោះនេះ ។ សូមជួយពួកគេឲ្យស្វែងរកចម្លើយនៅក្នុង អាលម៉ា ១៣:១៤–១៩ និង គោលលទ្ធិ និង សេចក្ដីសញ្ញា ១០៧:១–៤ ។ តើយើងរៀនអ្វីខ្លះមកពីមិលគីស្សាដែកអំពីរបៀបប្រើប្រាស់បព្វជិតភាព ?

អាលម៉ា ១៤:១៨–២៩

ព្រះវរបិតាសួគ៌ពង្រឹងខ្ញុំស្របទៅតាមសេចក្តីជំនឿរបស់ខ្ញុំ ។

អាលម៉ា និងអាមូលេកបានជាប់នៅក្នុងគុកអស់រយៈពេលជាច្រើនថ្ងៃ ពីមុនព្រះអម្ចាស់បានដោះលែងពួកគេ ។ រឿងនេះអាចជួយកុមារឲ្យរៀនថា ការសាកល្បងរបស់ពួកគេពុំមានដំណោះស្រាយលឿន ឬងាយស្រួលនោះទេ ប៉ុន្តែព្រះអម្ចាស់នឹងពង្រឹងពួកគេ « តាមសេចក្ដីជំនឿ [ របស់ពួកគេ ] » ( អាលម៉ា ១៤:២៦ ) ។

សកម្មភាពដែលអាចជ្រើសរើស

សូមសរសេរសំណួរនៅលើក្តារខៀន ដើម្បីជួយកុមារឲ្យស្រាវជ្រាវរកព័ត៌មានលម្អិតមកពី អាលម៉ា ១៤:១៨–២៩ ដូចជា តើពួកចៅក្រមបានធ្វើអ្វីខ្លះដល់អាលម៉ា និងអាមូលេកនៅក្នុងគុក ? ឬ តើពួកលោកបានបង្ហាញសេចក្តីជំនឿរបស់ខ្លួនលើព្រះយេស៊ូវគ្រីស្ទយ៉ាងដូចម្តេច ? សូមផ្តល់ខគម្ពីរមួយ ឬពីរដល់កុមារម្នាក់ៗអាន ដោយរកមើលចម្លើយចំពោះសំណួរ ។
សូមអញ្ជើញកុមារឲ្យគូររូបភាពនៃឈុតឆាកមកពី អាលម៉ា ១៤:១៨–២៩ ហើយបន្ទាប់មកទុកឲ្យពួកគេប្រើរូបភាពរបស់ពួកគេប្រាប់អំពីរឿងនោះ ។ តើយើងអាចក្លាយដូចជាអាលម៉ា និងអាមូលេកតាមរបៀបណា ?
សូមចែកចាយបទពិសោធន៍មួយ ដែលអ្នកបានបង្ហាញសេចក្តីជំនឿលើព្រះអម្ចាស់ ហើយទ្រង់បានប្រទានកម្លាំងដល់អ្នកឲ្យយកឈ្នះ ឬស៊ូទ្រាំនឹងការសាកល្បង ។ សូមលើកទឹកចិត្តកុមារឲ្យចែកចាយបទពិសោធន៍ស្រដៀងនេះដែលពួកគេមាន ។

អាលម៉ា ១៥:៣–១២

ដំណឹងល្អអាចផ្លាស់ប្ដូរដួងចិត្ត ។

ស៊ីអែសរ៉ុមបានប្រឆាំងអាលម៉ា និងអាមូលេកយ៉ាងសកម្មនៅគ្រាដំបូង ប៉ុន្តែទីបន្ទាល់របស់ពួកគេបានរំជួលដួងចិត្តរបស់គាត់ ហើយបំផុសគំនិតគាត់ឲ្យប្រែចិត្ត ។ នៅពេលអ្នកសិក្សាខគម្ពីរទាំងនេះ សូមពិចារណាអំពីរបៀបដែលបទពិសោធន៍របស់ស៊ីអែសរ៉ុមអាចបំផុសគំនិតកុមារដែលអ្នកបង្រៀន ។

សកម្មភាពដែលអាចជ្រើសរើស

សូមរំឭកជាមួយកុមារអំពីអ្វីដែលពួកគេបានរៀនកាលពីសប្តាហ៍មុនអំពីស៊ីអែសរ៉ុម ។ សូមអានជាមួយគ្នា អាលម៉ា ១៥:៣–១២ ដើម្បីរកមើលរបៀបដែលគាត់បានផ្លាស់ប្តូរ ។
សូមឲ្យកុមារស្រមៃថា ពួកគេបានជួបស៊ីអែសរ៉ុមពីមុនគាត់បានប្រែចិត្ត ។ តើពួកគេនឹងនិយាយអ្វីខ្លះដើម្បីជួយគាត់ឲ្យជឿលើដំណឹងល្អ ? ពួកគេអាចប្រៀបធៀបអ្វីដែលពួកគេនិយាយជាមួយនឹងអ្វីដែលអាលម៉ា និងអាមូលេកបានបង្រៀនស៊ីអែសរ៉ុម ( សូមមើល អាលម៉ា ១១:៤០–៤៦; ១៥:៦–១១ ) ។ ហេតុអ្វីការដឹងសេចក្តីពិតទាំងនេះអាចជួយនរណាម្នាក់ឲ្យផ្លាស់ប្តូរ ?

លើកទឹកចិត្តឲ្យមានការរៀនសូត្រនៅឯគេហដ្ឋាន

សូមឲ្យកុមារគិតអំពីអ្វីមួយដែលពួកគេអាចធ្វើនៅសប្តាហ៍នេះ ដើម្បីបង្ហាញសេចក្តីជំនឿរបស់ពួកគេលើព្រះអម្ចាស់ ។ សូមលើកទឹកចិត្តពួកគេឲ្យចែកចាយផែនការ និងបទពិសោធន៍របស់ពួកគេជាមួយក្រុមគ្រួសារពួកគេ ។

ការកែលម្អការបង្រៀនរបស់យើង

រៀនស្គាល់វិវរណៈ ។ « ជាញឹកញាប់ វិវរណៈកើតមាន ‹ មួយបន្ទាត់ម្ដងៗ › ( នីហ្វៃទី ២ ២៨:៣០ ) មិនកើតមានទាំងអស់ក្នុងពេលតែមួយឡើយ ។… នៅពេលអ្នកពិចារណាអំពីរបៀបដែលគោលការណ៍ទាំងឡាយនៃដំណឹងល្អដែលអ្នកកំពុងបង្រៀននឹងផ្ដល់ពរជ័យដល់សមាជិកក្នុងថ្នាក់របស់អ្នក នោះគំនិត និងចំណាប់អារម្មណ៍ទាំងឡាយនឹងកើតមានមកក្នុងជីវិតប្រចាំថ្ងៃរបស់អ្នក––នៅពេលអ្នកធ្វើដំណើរទៅធ្វើការ ធ្វើការងារក្នុងផ្ទះ ឬប្រាស្រ័យទាក់ទងនឹងគ្រួសារ និងមិត្តភក្ដិ » ( ការបង្រៀនតាមរបៀបរបស់ព្រះអង្គសង្គ្រោះ ទំព័រ ១២ ) ។

ទំព័រសកម្មភាព ៖ អាលម៉ា និងអាមូលេកមានសេចក្តីជំនឿ