« ថ្ងៃទី ២៨ ខែ កញ្ញា–ថ្ងៃទី ១១ ខែ តុលា នីហ្វៃទី៣ ១៧–១៩ ៖ ‹ មើលចុះ សេចក្ដីអំណររបស់យើងបានពោរពេញ › » ចូរមកតាមខ្ញុំ—សម្រាប់ថ្នាក់អង្គការបឋមសិក្សា ៖ ព្រះគម្ពីរមរមន ឆ្នាំ ២០២០ ( ឆ្នាំ ២០២០ )
« ថ្ងៃទី ២៨ ខែ កញ្ញា–ថ្ងៃទី ១១ ខែ តុលា នីហ្វៃទី៣ ១៧–១៩ » ចូរមកតាមខ្ញុំ—សម្រាប់ថ្នាក់អង្គការបឋមសិក្សា ៖ ឆ្នាំ ២០២០
ថ្ងៃទី ២៨ ខែ កញ្ញា–ថ្ងៃទី ១១ ខែ តុលា
នីហ្វៃទី៣ ១៧–១៩
« មើលចុះ សេចក្ដីអំណររបស់យើងបានពោរពេញ »
ពេលអ្នកអាន នីហ្វៃទី៣ ១៧–១៩ សូមពិចារណាពីអ្វីដែលបទគម្ពីរ បទពិសោធន៍ សកម្មភាព និងរឿងនានាដែលនឹងជួយកុមារឲ្យយល់ពីសេចក្តីពិតនៅក្នុងជំពូកទាំងនេះ ។
កត់ត្រាចំណាប់អារម្មណ៍របស់អ្នក
អញ្ជើញឲ្យចែកចាយ
សូមបង្ហាញរូបភាពនៃព្រះអង្គសង្គ្រោះ ហើយអញ្ជើញកុមារឲ្យចែកចាយរបៀបដែលពួកគេទទួលអារម្មណ៍ ប្រសិនបើទ្រង់យាងមកជួបពួកគេ ដូចទ្រង់បានយាងទៅជួបពួកសាសន៍នីហ្វៃ ។
បង្រៀនគោលលទ្ធិ ៖ កុមារតូចៗ
ព្រះអង្គសង្គ្រោះស្រឡាញ់បុត្រាបុត្រីគ្រប់រូបរបស់ព្រះវរបិតាសួគ៌ ។
ព្រះយេស៊ូវបង្ហាញសេចក្តីស្រឡាញ់របស់ទ្រង់ដល់បុត្រាបុត្រីទ្រង់ ពេលទ្រង់ប្រសិទ្ធពរ និងអធិស្ឋានសម្រាប់ពួកគេ ។ តើអ្នកអាចជួយកុមារដែលអ្នកបង្រៀនឲ្យទទួលអារម្មណ៍នៃសេចក្តីស្រឡាញ់របស់ទ្រង់សម្រាប់ពួកគេដោយរបៀបណា ?
សកម្មភាពដែលអាចជ្រើសរើស
-
សូមសង្ខេបដំណើររឿងនៅក្នុង នីហ្វៃទី៣ ១៧ ខណៈពេលបង្ហាញរូបភាពមួយ ដូចជារូបភាពមួយនៅក្នុង គម្រោងមេរៀនសប្ដាហ៍នេះ នៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ។ ឬ អ្នកអាចប្រើ « ជំពូកទី ៤៤ ៖ ព្រះយេស៊ូវគ្រីស្ទប្រទានពរដល់កូនក្មេង » ( ដំណើររឿងព្រះគម្ពីរមរមន ទំព័រ ១២៤–១២៥ ឬមើលវីដេអូដូចគ្នានេះនៅគេហទំព័រ ChurchofJesusChrist.org ) ។ សូមអានឃ្លា ឬខគម្ពីរមកពី នីហ្វៃទី៣ ១៧ ដែលគូសបញ្ជាក់អំពីសេចក្តីស្រឡាញ់របស់ព្រះអង្គសង្គ្រោះសម្រាប់ប្រជាជន ( ដូចជា ខគម្ពីរ ៧ និង ២០–២៥ ) ។ សូមឲ្យកុមារប្ដូរវេនគ្នាកាន់រូបភាព ហើយប្រាប់ពីអ្វីដែលព្រះយេស៊ូវបានធ្វើ ដោយសារទ្រង់ស្រឡាញ់មនុស្ស ។
-
សូមប្រើទំព័រសកម្មភាពសប្ដាហ៍នេះ ដើម្បីជួយកុមារឲ្យគូររូបភាពអំពីពួកគេជាមួយព្រះយេស៊ូវ ។ នៅពេលអ្នកធ្វើដូច្នេះ សូមជួយពួកគេឲ្យគិតពីរបៀបនានា ដែលព្រះយេស៊ូវបានបង្ហាញសេចក្តីស្រឡាញ់របស់ទ្រង់សម្រាប់ពួកគេ ។
រូបភាពព្រះយេស៊ូវប្រទានពរដល់ពួកកូនក្មេងសាសន៍នីហ្វៃមើលន៎ កូនតូចៗរបស់អ្នករាល់គ្នា ដោយ ហ្គែរី អិល ខាប
ខ្ញុំអាចគិតអំពីព្រះយេស៊ូវ ពេលខ្ញុំទទួលទានសាក្រាម៉ង់ ។
មានរឿងជាច្រើនដែលអាចបង្វែរអារម្មណ៍របស់កុមារអំឡុងពេលសាក្រាម៉ង់ ។ តើអ្នកអាចជួយកុមារនៅក្នុងថ្នាក់របស់អ្នកឲ្យយល់ពីសារៈសំខាន់នៃការគិតអំពីព្រះអង្គសង្គ្រោះ និងសេចក្តីស្រឡាញ់របស់ទ្រង់ដល់ពួកគេ អំឡុងពេលពិធីបរិសុទ្ធដ៏ពិសិដ្ឋនេះដោយរបៀបណា ?
សកម្មភាពដែលអាចជ្រើសរើស
-
សូមឲ្យកុមារប្រាប់អ្នកអំពីអ្វីដែលកើតឡើងអំឡុងពេលសាក្រាម៉ង់ ។ សូមអានខគម្ពីរមកពីដំណើររឿងអំពីព្រះយេស៊ូវបម្រើសាក្រាម៉ង់ដល់ពួកសាសន៍នីហ្វៃ ( សូមមើល នីហ្វៃទី៣ ១៨:១–១២ ) ហើយសូមឲ្យកុមារក្រោកឈរ ពេលពួកគេស្តាប់ឮអ្វីដែលស្រដៀងនឹងអ្វីដែលពួកគេធ្វើអំឡុងពេលសាក្រាម៉ង់ ។ តើព្រះយេស៊ូវគ្រីស្ទសព្វព្រះទ័យឲ្យយើង « ចងចាំ » ឬគិតអំពីអ្វីអំឡុងពេលសាក្រាម៉ង់ ? ( សូមមើល នីហ្វៃទី៣ ១៨:៧, ១១ ) ។
-
ធ្វើសំឡេងហ៊ឹមៗ ច្រៀង ឬចាក់បទទំនុកតម្កើង ឬចម្រៀងអង្គការបឋមសិក្សា អំឡុងពេលកុមារផាត់ពណ៌រូបភាព ដែលអាចជួយពួកគេចងចាំព្រះអង្គសង្គ្រោះអំឡុងពេលសាក្រាម៉ង់ ( សូមមើលទំព័រសកម្មភាពសប្តាហ៍នេះ ) ។ សូមលើកទឹកចិត្តពួកគេឲ្យមើលរូបភាពទាំងនេះ ដើម្បីជួយពួកគេឲ្យចងចាំព្រះយេស៊ូវ ពេលពួកគេទទួលទានសាក្រាម៉ង់ ។
នីហ្វៃទី៣ ១៨:១៥, ២០–២១, ២៤; ១៩:១៦–១៧, ៣០
ព្រះយេស៊ូវបង្រៀនខ្ញុំអំពីរបៀបអធិស្ឋាន ។
តើអ្នករៀនអ្វីខ្លះអំពីការអធិស្ឋានពេលអ្នកសិក្សា នីហ្វៃទី៣ ១៧–១៩ ? តើអ្នកអាចប្រើអ្វីដែលអ្នកបានរៀនទៅបង្រៀនកុមារអំពីរបៀបអធិស្ឋានយ៉ាងដូចម្ដេច ?
សកម្មភាពដែលអាចជ្រើសរើស
-
សូមបង្ហាញរូបភាពមនុស្សអធិស្ឋាន ( ដូចជារូបភាពនៅក្នុង « ជំពូកទី ៤៦ ៖ ព្រះយេស៊ូវគ្រីស្ទបង្រៀន និងអធិស្ឋានជាមួយពួកសាសន៍នីហ្វៃ » នៅក្នុង ដំណើររឿងព្រះគម្ពីរមរមន ទំព័រ ១២៨–១៣០ ) ។ សូមឲ្យកុមារចង្អុលបង្ហាញនូវសេចក្ដីលម្អិតនៅក្នុងរូបភាពដែលបង្ហាញថា មនុស្សទាំងនេះកំពុងអធិស្ឋាន ។ សូមអាន នីហ្វៃទី៣ ១៩:១៦–១៧ ដើម្បីពន្យល់ថា ព្រះយេស៊ូវបានបង្រៀនយើងអំពីរបៀបអធិស្ឋាន ។ សូមឲ្យកុមារប្រាប់អ្នកអំពីអារម្មណ៍ពួកគេ ពេលពួកគេអធិស្ឋាន ។
-
សូមអាន នីហ្វៃទី៣ ១៨:២១ ហើយអញ្ជើញកុមារឲ្យគូររូបភាពអំពីពួកគេ ឬគ្រួសារពួកគេអធិស្ឋាន ។ សូមលើកទឹកចិត្តកុមារឲ្យអញ្ជើញគ្រួសារពួកគេឲ្យអធិស្ឋានជាមួយពួកគេ ។
-
សូមច្រៀងចម្រៀងមួយបទអំពីការអធិស្ឋានជាមួយគ្នា ដូចជាបទ « ការអធិស្ឋានរបស់កុមារ » ( សៀវភៅចម្រៀងកុមារ ទំព័រ ៦–៧ ) ។ សូមឲ្យកុមារចែកចាយអ្វីដែលពួកគេបានរៀនអំពីការអធិស្ឋានមកពីចម្រៀង ។ សូមចែកចាយទីបន្ទាល់របស់អ្នកអំពីការអធិស្ឋាន ។
បង្រៀនគោលលទ្ធិ ៖ កុមារធំៗ
ព្រះអង្គសង្គ្រោះស្រឡាញ់បុត្រាបុត្រីរបស់ព្រះវរបិតាសួគ៌ ។
ប្រធាន អ៊ែសរ៉ា ថាហ្វ ប៊ែនសឹន បានបង្រៀនថា ៖ « ក្មួយៗជាទីស្រឡាញ់ ខ្ញុំសូមសន្យានឹងក្មួយៗថា ពួកទេវតានឹងផ្តល់ការងារបម្រើដល់ក្មួយផងដែរ ។ ក្មួយៗពុំអាចឃើញពួកទេវតាទេ ប៉ុន្តែពួកទេវតាគង់នៅទីនោះដើម្បីជួយក្មួយៗ ហើយក្មួយៗនឹងទទួលអារម្មណ៍នៃវត្តមានរបស់ពួកទ្រង់ » ( « To the Children of the Church » Ensign ខែ ឧសភា ឆ្នាំ ១៩៨៩ ទំព័រ ៨៣ ) ។
សកម្មភាពដែលអាចជ្រើសរើស
-
សូមអានខគម្ពីរមួយចំនួនមកពី នីហ្វៃទី៣ ១៧ ជាមួយគ្នាដែលអ្នកយល់ថាមានអត្ថន័យចំពោះកុមារដែលអ្នកបង្រៀន ។ ពេលអ្នកអានខគម្ពីរនីមួយៗ សូមឲ្យកុមារជ្រើសរើសពាក្យ ឬឃ្លាមួយដែលពួកគេគិតថា សំខាន់ ហើយបន្ទាប់មកចែកចាយពីមូលហេតុដែលពាក្យទាំងនោះមានន័យចំពោះពួកគេ ។ សូមថ្លែងទីបន្ទាល់ថា ព្រះយេស៊ូវស្រឡាញ់កុមារខ្លាំងណាស់ ហើយនេះជាមូលហេតុដែលទ្រង់បានប្រទានពរ និងអធិស្ឋានសម្រាប់ពួកគេ ។
-
សូមអញ្ជើញកុមារឲ្យចែកចាយអារម្មណ៍របស់ពួកគេ ប្រសិនបើពួកគេបាននៅក្នុងចំណោមកុមារដែលព្រះអង្គសង្គ្រោះប្រទានពរ ។ ប្រសិនបើអាច សូមបង្ហាញវីដេអូ « My Joy Is Full » ( ChurchofJesusChrist.org ) ដើម្បីជួយពួកគេឲ្យស្រមៃពីព្រឹត្តិការណ៍នេះ ។ តើព្រះអង្គសង្គ្រោះបានធ្វើអ្វីខ្លះដើម្បីបង្ហាញសេចក្តីស្រឡាញ់របស់ទ្រង់ ? តើយើងអាចធ្វើអ្វីខ្លះ ដើម្បីរៀបចំខ្លួនយើងនៅជាមួយទ្រង់ ពេលទ្រង់យាងមកម្តងទៀត ?
ពេលខ្ញុំទទួលទានសាក្រាម៉ង់ នោះខ្ញុំពោរពេញដោយព្រះវិញ្ញាណបរិសុទ្ធ ។
យើងអាចរៀនមកពី នីហ្វៃទី៣ ១៨ អំពីសារៈសំខាន់នៃពិធីសាក្រាម៉ង់ចំពោះព្រះអង្គសង្គ្រោះ ។ តើអ្នកអាចជួយកុមារឲ្យទទួលអារម្មណ៍ថា វាសំខាន់ចំពោះពួកគេតាមរបៀបណា ?
សកម្មភាពដែលអាចជ្រើសរើស
-
សូមជួយកុមារឲ្យអាន នីហ្វៃទី៣ ១៨:១–១២ ។ តើពួកគេរៀនអ្វីខ្លះអំពីសាក្រាម៉ង់មកពីខគម្ពីរទាំងនេះ ? សូមជួយពួកគេអានការអធិស្ឋានសាក្រាម៉ង់នៅក្នុង គោលលទ្ធិ និង សេចក្ដីសញ្ញា ២០:៧៧ និង ៧៩ ហើយស្វែងរកពាក្យ និងឃ្លានានានៅក្នុងការអធិស្ឋាន ដែលមាននៅក្នុង នីហ្វៃទី៣ ១៨:១–១២ ផងដែរ ។ តើពាក្យ ឬឃ្លាទាំងនេះមានន័យដូចម្តេច ? តើយើងអាចរៀបចំខ្លួនដើម្បីទទួលទានសាក្រាម៉ង់ដោយរបៀបណា ? តើយើងសន្យា ឬចុះសេចក្ដីសញ្ញាថាធ្វើអ្វីខ្លះ នៅពេលយើងទទួលទានសាក្រាម៉ង់ ?
-
សូមច្រៀងចម្រៀងមួយបទអំពីគារវភាព ដូចជាបទ « ដោយគោរព ដោយស្ងៀមស្ងាត់ » ( សៀវភៅចម្រៀងកុមារ ទំព័រ ១១ ) ។ តើការទទួលទានសាក្រាម៉ង់ដោយមានគារវភាពជួយយើងឲ្យទទួលអារម្មណ៍ពីព្រះវិញ្ញាណដោយរបៀបណា ? តើវាជួយយើងឲ្យរើសយកជម្រើសត្រឹមត្រូវយ៉ាងដូចម្ដេច ?
នីហ្វៃទី៣ ១៨:១៥–២៤; ១៩:៦–៩, ១៥–៣៦
ការអធិស្ឋាននឹងជួយខ្ញុំឲ្យមានអារម្មណ៍ថានៅក្បែរនឹងព្រះវរបិតាសួគ៌ ។
យើងអាចមានអារម្មណ៍ថា ព្រះវរបិតាសួគ៌គង់នៅក្បែរយើងតាមរយៈការអធិស្ឋាន ។ តើសារលិខិតអ្វីស្តីពីការអធិស្ឋាននៅក្នុង នីហ្វៃទី៣ ១៨–១៩ នឹងជួយកុមារដែលអ្នកបង្រៀនកែលម្អការអធិស្ឋានរបស់ពួកគេ ?
សកម្មភាពដែលអាចជ្រើសរើស
-
សូមសរសេរបទគម្ពីរយោងខាងក្រោមនេះនៅលើក្រដាស ហើយឲ្យវាទៅកុមារម្នាក់ៗ ឬកុមារជាក្រុមតូចៗ ៖ នីហ្វៃទី៣ ១៨:១៥; នីហ្វៃទី៣ ១៨:២០; នីហ្វៃទី៣ ១៨:២១; នីហ្វៃទី៣ ១៩:១៩ និង នីហ្វៃទី៣ ១៩:២៤ ។ សូមអញ្ជើញកុមារឲ្យអានខគម្ពីរទាំងនេះ ដោយរកមើលអ្វីដែលព្រះយេស៊ូវគ្រីស្ទ ឬពួកសិស្សទ្រង់បានបង្រៀនអំពីការអធិស្ឋាន ។ សូមឲ្យពួកគេរាយការណ៍ពីអ្វីដែលពួកគេរៀនដល់សិស្សក្នុងថ្នាក់ ។
-
សូមសរសេរលើក្តារខៀន ទូលបង្គំសូមអរគុណទ្រង់សម្រាប់ ។ សូមទុកពេលមួយនាទីឲ្យកុមារគិតអំពីអ្វីជាច្រើនដែលពួកគេអាចគិតឃើញ ដើម្បីបំពេញចន្លោះនេះ ។ ហេតុអ្វីក៏វាល្អសម្រាប់យើងដើម្បីបង្ហាញអំណរគុណចំពោះព្រះវរបិតាសួគ៌ ? បន្ទាប់មក សូមសរសេរ ទូលបង្គំសូមទ្រង់ឲ្យ នៅលើក្តារខៀន ហើយអាន នីហ្វៃទី៣ ១៨:១៨–២១ និង ១៩:៩, ២៣ ជាមួយគ្នា ដោយស្វែងរកគំនិតនានាអំពីអ្វីដែលយើងគួរអធិស្ឋានទូលសូម ។
-
សូមចែកចាយទីបន្ទាល់ ឬបទពិសោធន៍ផ្ទាល់ខ្លួនអំពីឥទ្ធិពលនៃការអធិស្ឋាន ហើយលើកទឹកចិត្តកុមារឲ្យចែកចាយទីបន្ទាល់ ឬបទពិសោធន៍របស់ពួកគេ ។
លើកទឹកចិត្តឲ្យមានការរៀនសូត្រនៅឯគេហដ្ឋាន
សូមលើកទឹកចិត្តកុមារឲ្យប្រាប់ឪពុកម្ដាយរបស់ពួកគេ ឬសមាជិកគ្រួសារផ្សេងទៀតអំពីរបៀបដែលពួកគេអាចមានបទពិសោធន៍កាន់តែមានអត្ថន័យជាមួយពិធីសាក្រាម៉ង់នៅសប្តាហ៍បន្ទាប់ ។
ការកែលម្អការបង្រៀនរបស់យើង
សូមជួយកុមារតូចៗឲ្យរៀនចេញពីព្រះគម្ពីរ ។ ដើម្បីជួយកុមារតូចៗឲ្យរៀនចេញពីព្រះគម្ពីរ សូមផ្ដោតលើខគម្ពីរតែមួយ ឬតែឃ្លាគន្លឹះមួយឃ្លាប៉ុណ្ណោះ ។ អ្នកអាចនឹងអញ្ជើញកុមារឲ្យក្រោកឈរឡើង នៅពេលពួកគេឮពាក្យ ឬឃ្លាណាមួយជាក់លាក់ ។