Taimi Ututaʻú ʻi Falanisē, fai ʻe James Taylor Harwood

18–24 Sānuali

Tokāteline mo e Ngaahi Fuakava 3–5

“ʻE Kei ʻAlu Atu Pē ʻA ʻEku Ngāué”

ʻI hoʻo ako ʻa e Tokāteline mo e Ngaahi Fuakava 3–5, te ke ala maʻu ha ngaahi fakakaukau ki he meʻa ʻoku fie maʻu ke mahino ki he fānau ʻokú ke akoʻí. ʻE ala ʻoatu foki ʻe he ngaahi ʻekitivitī ʻi he fokotuʻutuʻu fakanounou ko ʻení ha ngaahi fakakaukau.

Lekooti Hoʻo Ngaahi Ongó

Fakaafeʻi e Feʻinasiʻakí

Fakaʻaliʻali e fakatātā ʻo Siosefa Sāmitá mei he fokotuʻutuʻu fakanounou ki he uike ní ʻi he Haʻu, o Muimui ʻIate Au—Maʻá e Fakafoʻituituí mo e Ngaahi Fāmilí, pea tokoniʻi e fānaú ke nau vahevahe e meʻa ʻoku nau ʻilo fekauʻaki mo e talanoa ʻokú ne fakatātaaʻí. Tokoniʻi ke nau manatuʻi ʻa e talanoa ʻo e fakamoleki ʻe Māteni Hālisi ʻa e ngaahi fuofua lauʻi peesi ʻo e liliu ʻo e Tohi ʻa Molomoná (vakai, “Vahe 4: Ko Māteni Hālisi mo e Ngaahi Lauʻi Peesi Naʻe Molé,” Ngaahi Talanoa ʻo e Tokāteline mo e Ngaahi Fuakavá, 18–21; pe Kau Māʻoniʻoní, 1:51–56).

Akoʻi e Tokāteliné: Fānau Iiki Angé

Tokāteline mo e Ngaahi Fuakava 3:7–10

Te u lava ʻo fili ki he totonú ʻi he taimi ʻoku feinga ai e niʻihi kehé ke u faihalá.

Tokoniʻi e fānaú ke nau ako e meʻa naʻe ako ʻe Siosefa Sāmitá: kapau te nau falala ki he Tamai Hēvaní, te Ne “ʻiate [kinautolu] ʻi he taimi kotoa pē ʻo e faingataʻá” (Tokāteline mo e Ngaahi Fuakava 3:8).

Ngaahi ʻEkitivitī ʻe Ala Fakahokó

• Toe fakamanatu ʻa e talanoa ʻo Māteni Hālisi mo e ʻū lauʻi peesi naʻe molé (vakai, Ngaahi Talanoa ʻo e Tokāteline mo e Ngaahi Fuakava, 18–21, pe ko e vitiō ʻoku fekauʻaki mo iá ʻi he ChurchofJesusChrist.org). Vahevahe mo e fānaú ʻa e ngaahi tūkunga ʻe niʻihi ʻe ala ʻahiʻahiʻi ai kinautolu ke nau fai ha meʻa ʻoku nau ʻilo ʻoku ʻikai totonu. ʻE tokoniʻi fēfē nai kitautolu ʻe he Tamai Hēvaní ke tau fili ʻa e totonú? (vakai, Tokāteline mo e Ngaahi Fuakava 3:8).

  

  Māteni Hālisi, tā ʻa Lewis A. Ramsey

• Lau ʻa e lea ko ʻení mei he Tokāteline mo e Ngaahi Fuakava 3:8: “ʻE mafao atu ʻe ia ʻa hono toʻukupú ʻo poupouʻi koe.” Fakaafeʻi ʻa e fānaú ke nau tuʻu ki ʻolunga pea mafao atu honau nimá ʻi hoʻo toe lau ʻa e kupuʻi leá. Vahevahe mo kinautolu ha ngaahi founga ʻe niʻihi ʻe ala fakamafao mai ai ʻe he ʻEikí ʻa Hono toʻukupú ke tokoniʻi kinautolu ʻi he taimi ʻoku feinga ai e niʻihi kehé ke nau fai e ngaahi meʻa halá. Tuku ke nau taufetongi ʻi he fakamafao atu honau nimá ʻi heʻenau talaatu e ngaahi founga kehe ʻoku mafao mai ai ʻe he ʻEikí ʻa Hono toʻukupú ke tokoniʻi kitautolú.

Tokāteline mo e Ngaahi Fuakava 4

ʻOku finangalo ʻa e ʻEikí ke u fai ʻEne ngāué.

ʻE lava ʻe he fānaú ke nau “fai ʻa e ngāue ʻa e ʻOtuá” (Tokāteline mo e Fuakava 4:2) ʻi ha ngaahi founga lahi, pea te nau lava ʻo teuteu he taimí ni ki ha ngaahi faingamālie makehe ʻi honau kahaʻú.

Ngaahi ʻEkitivitī ʻe Ala Fakahokó

• Lau ki he fānaú ʻa e Tokāteline mo e Ngaahi Fuakava 4:1. ʻOmi ha ʻū fakatātā ʻokú ne fakatātaaʻi ʻa e ngāue “fakaofo” ʻa e ʻOtuá ʻi he ngaahi ʻaho kimui ní (hangē ko ha ʻū tā ʻo ha kau faifekau, temipale, pea mo e Tohi ʻa Molomoná). Tuku ki he fānaú ke nau taufetongi ʻi hono fili ha fakatātā pea talanoa kau ki ai. Vahevahe ʻa e ʻuhinga ʻoku fakaofo ai ʻa e ngāue ʻa e ʻEikí kiate koé.

• Tokoniʻi e fānaú ke nau fakakaukau ki ha ngaahi ngāue pe tā ha ʻū fakatātā ʻokú ne fakatātaaʻi ʻa e kupuʻi lea “tauhi kiate ia ʻaki homou lotó, iví, ʻatamaí mo e mālohí kotoa” (Tokāteline mo e Ngaahi Fuakava 4:2). Vahevahe ha sīpinga ʻo ha taha ʻokú ke ʻiloʻi ʻokú ne tauhi ki he ʻOtuá ʻi he founga ko ʻení.

• Hivaʻi fakataha ha hiva kau ki he ngāue fakafaifekaú, hangē ko e “ ʻOku ou Fie Hoko Leva ko ha Faifekau” (Tohi Hiva ʻa e Fānaú, 90). Aleaʻi ʻa e meʻa ʻoku akoʻi mai ʻe he hivá fekauʻaki mo e founga te tau lava ai ʻo tokoni ki he ʻOtuá ke fai ʻEne ngāué.

Tokāteline mo e Ngaahi Fuakava 5:10

Kuo tau mau ʻa e folofola ʻa e ʻOtuá ʻo fakafou ʻia Siosefa Sāmita.

Te ke tokoni fēfē nai ke fakamālohia ʻe he fānaú ʻenau fakamoʻoni ʻoku akoʻi ʻe Siosefa Sāmita mo e kau palōfita kehé ʻa e folofola ʻa e ʻOtuá?

Ngaahi ʻEkitivitī ʻe Ala Fakahokó

• Fufuuʻi ha fakatātā ʻo Siosefa Sāmita ʻi ha feituʻu ʻi he lokí (vakai, Tohi Fakatātā ʻo e Ongoongoleleí, fika 87). Lau ʻa e Tokāteline mo e Ngaahi Fuakava 5:10, pea fakaafeʻi ʻa e fānaú ke nau fekumi ki he fakatātaá ke ʻiloʻi pe ko hai ʻoku ʻuhinga ki ai ʻa e foʻi lea “koe”. Vahevahe hoʻo fakamoʻoní kuo tau maʻu ʻa e folofola ʻa e ʻOtuá ʻo fakafou ʻia Siosefa Sāmita.

• Fakaʻaliʻali ki he fānaú ha tatau ʻo e Tohi ʻa Molomoná mo e Tokāteline mo e Ngaahi Fuakavá. Fakamatalaʻi ange naʻe foaki mai ʻe he ʻOtuá ʻa e ngaahi folofola ko ʻení ʻo fakafou mai ʻia Siosefa Sāmita. Vahevahe ha niʻihi ʻo e ngaahi veesi ʻokú ke manako taha aí mei he ongo tohí ni, pea talaange ʻa e ʻuhinga hoʻo houngaʻia aí.

Akoʻi e Tokāteliné: Fānau Lalahi Angé

Tokāteline mo e Ngaahi Fuakava 3:5–10; 5:21–22

ʻOku totonu ke u tokanga lahi ange ki hono fakahōifua ʻa e ʻOtuá ʻi hono fakafiefiaʻi ʻo e niʻihi kehé.

Lolotonga e ako ʻa e fānaú fekauʻaki mo e aʻusia ʻa Siosefa Sāmita ʻi he mole ʻa e ʻū lauʻi peesi ʻo e Tohi ʻa Molomoná, ʻe lava ke ueʻi fakalaumālie kinautolu ke nau kei tui faivelenga pē ʻi he taimi ʻe ʻahiʻahiʻi ai kinautolu ʻe he niʻihi kehé ke nau talangataʻá.

Ngaahi ʻEkitivitī ʻe Ala Fakahokó

• ʻI he ngaahi ʻaho kimuʻa pea fai ʻa e kalasí, fakaafeʻi ha taha ʻo e fānaú ke ne haʻu mateuteu ke vahevahe ʻa e talanoa ki hono fakamoleki ʻe Siosefa Sāmita mo Māteni Hālisi ʻa e ʻū lauʻi peesi ʻo e Tohi ʻa Molomoná naʻe liliú (vakai, Tokāteline mo e Ngaahi Fuakava, 18–21; pe Kau Māʻoniʻoní, 1:51–56). Lau fakataha ʻa e Tokāteline mo e Ngaahi Fuakava 3:5–8; 5:21–22, pea fekumi ki he ngaahi tāpuaki ʻe maʻu ʻi he taimi ʻoku tau tauhi totonu ai ki he ʻOtuá.

• Tuku ha taimi ki he fānaú ke nau fakakaukau ki ha tūkunga ʻe ala feinga ai ha kaungāmeʻa ke nau fai ha meʻa hala. Fakaafeʻi ke nau kumi ha kupuʻi lea ʻi he Tokāteline mo e Ngaahi Fuakava 3:5–8; 5:21–22 ʻa ia te ne lava ʻo tokoniʻi kinautolu ʻi he ngaahi tūkunga ko iá. Fakafaivaʻi ha ngaahi sīpinga ʻe niʻihi.

Tokāteline mo e Ngaahi Fuakava 4

ʻOku finangalo ʻa e ʻEikí ke u fai ʻEne ngāué.

ʻE lava ke ueʻi fakalaumālie ʻe he Tokāteline mo e Ngaahi Fuakava 4 ʻa e fānaú ke nau hoko ko ha konga ʻo e “ngāue fakaofo” ʻa e ʻEikí (veesi 1).

Ngaahi ʻEkitivitī ʻe Ala Fakahokó

• Hiki ʻi he palakipoé Ngāue Maʻá e ʻOtuá. Fakaafeʻi ʻa e fānaú ke nau fekumi ki he Tokāteline mo e Ngaahi Fuakava 4 pea hiki e ngaahi meʻa ʻoku nau ako fekauʻaki mo e ʻuhinga ke tauhi ki he ʻOtuá. Kole ange ke nau tānaki ki he lisí ʻa e ngaahi meʻa ʻoku nau ako mei he hiva “Te u Loto-toʻa” (Tohi Hiva ʻa e Fānaú, 85) pe ko ha toe hiva fekauʻaki mo e tauhi ki he ʻOtuá.

• ʻOmi ha ʻū meʻangāue (pe fakatātā ʻo e meʻangāue) ʻe ala fakaʻaongaʻi ʻe ha taha ke ne ngāue ʻi ha ngoueʻanga. ʻOku tokoniʻi fēfē nai kitautolu ʻe he ʻū meʻangāue ko ʻení? Tokoniʻi ʻa e fānaú ke nau kumi ha ngaahi meʻa ʻi he Tokāteline mo e Ngaahi Fuakava 4:5–6 ʻe ala hoko ko ha ʻū meʻangāue ki hono fakahoko ʻa e ngāue ʻa e ʻOtuá.

• Fakaafeʻi e kau faifekau taimi kakató pe fakauōtí ke nau vahevahe ha meʻa ʻi he Tokāteline mo e Ngaahi Fuakava 4 ʻa ia kuó ne ueʻi kinautolu ke nau fakahoko e ngāue ʻa e ʻOtuá. Ko e hā te tau lava ʻo fai ke tau tokoni ai ki he ngāue ʻa e ʻOtuá?

Tokāteline mo e Ngaahi Fuakava 5:1–7, 11, 16, 23–24

Te u lava ʻo hoko ko ha fakamoʻoni ʻoku moʻoni ʻa e Tohi ʻa Molomoná.

Ne talaʻofa kia Māteni Hālisi te ne lava ʻo hoko ko e taha ʻo e kau fakamoʻoni ki he ʻū lauʻi peleti koulá kapau naʻá ne faivelenga. He ʻikai ke tau mamata ki he ʻū lauʻi peletí ʻo hangē ko Mātení, ka te tau lava ʻo maʻu ha fakamoʻoni fakalaumālie ki he Tohi ʻa Molomoná. Te ke tokoniʻi fēfē nai ʻa e fānaú ke nau fakatupulaki mo vahevahe ʻenau ngaahi fakamoʻoni ki he Tohi ʻa Molomoná?

Ngaahi ʻEkitivitī ʻe Ala Fakahokó

• Hiki ha ngaahi fehuʻi ʻi he palakipoé ʻo hangē ko ʻení, pea tokoniʻi e fānaú ke nau maʻu e ngaahi talí ʻi he Tokāteline mo e Ngaahi Fuakava 5:1–3, 7, 11: Ko e hā e meʻa naʻe holi ʻa Māteni Hālisi ke ne ʻiló? Ko hai naʻe lava ke fakaʻaliʻali ki ai ʻe Siosefa Sāmita ʻa e ʻū lauʻi peleti koulá? Ko e hā e ʻuhinga ʻoku ngalingali ai ne ʻikai feʻunga ʻa e mamata pē ki he ʻū lauʻi peletí ke ʻiloʻi ai ʻe ha taha ʻoku moʻoni ʻa e Tohi ʻa Molomoná?

• Fehuʻi ki he fānaú pe ko e hā ʻa e fakamoʻoni pea ko e hā e ʻuhinga ʻoku mahuʻinga aí. Ko e hā naʻe fie maʻu ke fai ʻe Māteni Hālisi kae lava ke ne hoko ko ha fakamoʻoni ʻo e ʻū lauʻi peleti koulá? (vakai, Tokāteline mo e Ngaahi Fuakava 5:23–24). Neongo kuo teʻeki ke tau mamata ki he ʻū lauʻi peletí, ko e hā te tau lava ʻo fai ke tau hoko ai ko ha kau fakamoʻoni ki he Tohi ʻa Molomoná? (vakai, Tokāteline mo e Ngaahi Fuakava 5:16; Molonai 10:3–5).

Poupouʻi e Ako ʻi ʻApí

Poupouʻi e fānaú ke nau hiki ʻenau ngaahi fakamoʻoni ki he Tohi ʻa Molomoná pea vahevahe ia mo ha taha ʻoku nau maheni.

Ko Hono Fakatupulaki ʻEtau Founga Akoʻí

Fulifulihi ʻa e ngaahi ʻekitivitií ke feʻunga mo e fānau ʻoku nau faingataʻaʻia fakaesinó. ʻE lava ke fakapapauʻi ʻe he fanga kiʻi liliu iiki ki he ngaahi ʻekitivitií ʻa e malava ke ako ʻa e fānau kotoa pē mei aí. Hangē ko ʻení, kapau ʻoku fokotuʻu mai ʻe ha ʻekitivitī ke fakaʻaliʻali ha fakatātā, te ke lava ʻo hivaʻi ha foʻi hiva kae lava ke kau mai ʻa kinautolu ʻoku kovi ʻenau vakaí.