« ថ្ងៃទី ១៣–១៩ ខែ ធ្នូ ។ ក្រុមគ្រួសារ ៖ ការប្រកាសដល់ពិភពលោក ៖ ‹ គ្រួសារជាផ្នែកដ៏សំខាន់មួយនៅក្នុងផែនការរបស់ព្រះ › » ចូរមកតាមខ្ញុំ—សម្រាប់ថ្នាក់បឋមសិក្សា ៖ គោលលទ្ធិ និង សេចក្ដីសញ្ញា ឆ្នាំ ២០២១ ( ឆ្នាំ ២០២០ )
« ថ្ងៃទី ១៣–១៩ ខែ ធ្នូ ។ ក្រុមគ្រួសារ ៖ ការប្រកាសដល់ពិភពលោក » ចូរមកតាមខ្ញុំ—សម្រាប់ថ្នាក់បឋមសិក្សា ៖ ឆ្នាំ ២១២១
ថ្ងៃទី ១៣–១៩ ខែ ធ្នូ
ក្រុមគ្រួសារ ៖ ការប្រកាសដល់ពិភពលោក
« គ្រួសារជាផ្នែកដ៏សំខាន់មួយនៅក្នុងផែនការរបស់ព្រះ »
តើគោលការណ៍អ្វី ដែលអ្នករកឃើញនៅក្នុង « ក្រុមគ្រួសារ ៖ ការប្រកាសដល់ពិភពលោក » ដែលអ្នកមានអារម្មណ៍បានទទួលការបំផុសគំនិតដើម្បីចែកចាយជាមួយកុមារ ? នៅពេលអ្នករៀបចំបង្រៀន សូមកត់ត្រានូវការបំផុសគំនិតនានាដែលអ្នកបានទទួលពីព្រះវិញ្ញាណ ។
កត់ត្រាចំណាប់អារម្មណ៍របស់អ្នក
អញ្ជើញឲ្យចែកចាយ
សូមអញ្ជើញកុមារឲ្យយក ឬគូររូបភាពក្រុមគ្រួសាររបស់ពួកគេដើម្បីចែកចាយជាមួយសិស្សក្នុងថ្នាក់ ។ សូមឲ្យកុមារចែកចាយអ្វីមួយដែលពួកគេស្រឡាញ់អំពីក្រុមគ្រួសាររបស់ពួកគេ ឬអ្វីដែលពួកគេបានរៀនអំពីក្រុមគ្រួសារនៅសប្តាហ៍នេះ ។
បង្រៀនគោលលទ្ធិ ៖ កុមារតូចៗ
ក្រុមគ្រួសារមានសារៈសំខាន់នៅក្នុងផែនការនៃព្រះវរបិតាសួគ៌ ។
តើអ្នកអាចប្រើសេចក្តីប្រកាសពីក្រុមគ្រួសារដើម្បីជួយកុមារឲ្យយល់ពីសារៈសំខាន់នៃក្រុមគ្រួសារនៅក្នុងផែនការរបស់ព្រះដោយរបៀបណា ?
សកម្មភាពដែលអាចជ្រើសរើស
-
សូមជួយកុមារឲ្យគិតពីអ្វីៗដែលមានសារៈសំខាន់បំផុត ដែលពួកគេចង់ប្រាប់មនុស្សគ្រប់គ្នាឲ្យដឹងពីវា ។ សូមបង្ហាញកុមារនូវច្បាប់ថតចម្លងនៃ « ក្រុមគ្រួសារ ៖ ការប្រកាសដល់ពិភពលោក » ហើយសូមពន្យល់ថា ពួកព្យាការី និងពួកសាវកបានសរសេរដើម្បីប្រាប់មនុស្សគ្រប់គ្នាថាតើក្រុមគ្រួសារមានសារៈសំខាន់យ៉ាងណាចំពោះព្រះវរបិតាសួគ៌ ។ សូមសួរកុមារពីមូលហេតុដែលពួកគេគិតថា ក្រុមគ្រួសារគឺមានសារៈសំខាន់យ៉ាងខ្លាំងចំពោះព្រះវបិតាសួគ៌ ។ សូមចែកចាយអ្វីមួយចេញពីសេចក្តីប្រកាសដែលអ្នកមានអារម្មណ៍ថា មនុស្សគ្រប់គ្នាត្រូវដឹងអំពីរឿងនេះ ។
-
សូមបង្ហាញកុមារនូវរូបភាពនៃព្រះវិហារបរិសុទ្ធ និងរូបភាពក្រុមគ្រួសារ ។ សូមឲ្យកុមារកាន់រូបភាពនោះ ខណៈពេលដែលអ្នកកំពុងអាននូវប្រយោគចុងក្រោយនៃកថាខណ្ឌទីបីក្នុងសេចក្តីប្រកាសពីក្រុមគ្រួសារ ។ សូមឲ្យពួកគេចង្អុលបង្ហាញរូបភាពដែលត្រឹមត្រូវ នៅពេលពួកគេអានពាក្យ « ព្រះវិហារបរិសុទ្ធ » និង « ក្រុមគ្រួសារ » ។ សូមថ្លែងទីបន្ទាល់ថា ពីព្រោះពិធីបរិសុទ្ធនៃព្រះវិហារបរិសុទ្ធ នោះក្រុមគ្រួសាររបស់យើងអាចរស់នៅជាមួយគ្នាជានិរន្តរ៍ ។ សូមច្រៀងចម្រៀងមួយបទជាមួយគ្នា ដូចជាបទ « ខ្ញុំមើលព្រះវិហារបរិសុទ្ធ » ( សៀវភៅចម្រៀងកុមារ ទំព័រ ៩៩ ) ហើយជួយកុមារគិតពីពាក្យដូចជា « ព្រះវិហារបរិសុទ្ធ » និង « ក្រុមគ្រួសារ » ។
-
សូមសួរកុមារពីអ្វី ដែលយើងអាចធ្វើដើម្បីធ្វើឲ្យរឿងផ្សេងៗរឹងមាំ—ដូចជា ធ្មេញរបស់យើង រូបកាយរបស់យើង ឬអគារមួយ ។ តើយើងអាចធ្វើអ្វីដើម្បីធ្វើឲ្យក្រុមគ្រួសារយើងរឹងមាំ ? សូមជួយកុមារឲ្យយល់ពីគោលការណ៍ដែលដឹកនាំទៅរកសុភមង្គលនៅក្នុងជីវិត ដែលមាននៅក្នុងកថាខណ្ឌទីប្រាំពីរនៃសេចក្តីប្រកាសពីក្រុមគ្រួសារ ( សូមមើលផងដែរទំព័រសកម្មភាពប្រចាំសប្តាហ៍នេះ ) ។ សូមជួយកុមារឲ្យដាក់ផែនការពីវិធីដែលពួកគេនឹងពង្រឹងក្រុមគ្រួសាររបស់ពួកគេ ។
រូបភាពក្រុមគ្រួសារកំពុងចម្អិនអាហារឪពុកម្តាយគួរតែចិញ្ចឹមបីបាច់កូនចៅរបស់ពួកគេដោយក្តីស្រឡាញ់ និងសុចរិតភាព ។
ខ្ញុំជា « បុត្រា និងបុត្រីខាងវិញ្ញាណរបស់ព្រះមាតាបិតាសួគ៌ » ។
សេចក្តីប្រកាសពីក្រុមគ្រួសារបង្រៀនថា យើងទាំងអស់គ្នាគឺជាបុត្រាបុត្រីនៃព្រះមាតាបិតាសួគ៌ ហើយយើងនៅលើផែនដីនេះដើម្បីបានប្រែក្លាយកាន់តែដូចពួកទ្រង់ ។
សកម្មភាពដែលអាចជ្រើសរើស
-
សូមច្រៀងរួមគ្នាបទ « ខ្ញុំជាកូនរបស់ព្រះ » សៀវភៅចម្រៀងកុមារ ទំព័រ ២ ។ បន្ទាប់មក សូមបោះបាល់ ឬវត្ថុទន់ៗដល់កុមារនៅពេលអ្នកនិយាយថា « ខ្ញុំស្គាល់បុត្ររបស់ព្រះម្នាក់ឈ្មោះថា [ ឈ្មោះរបស់កុមារ ] » ។ សូមឲ្យកុមារបោះវត្ថុនេះទៅកុមារផ្សេងទៀត ដោយនិយាយដូចគ្នា ហើយបញ្ចូលឈ្មោះរបស់កុមារនោះចូល ។ សូមធ្វើសកម្មភាពនេះដដែលៗរហូតដល់កុមារគ្រប់គ្នាបានធ្វើ ។ សូមថ្លែងទីបន្ទាល់ថា កុមារម្នាក់ៗគឺជា « បុត្រា និងបុត្រីខាងវិញ្ញាណរបស់ព្រះមាតាបិតាសួគ៌ » ។
-
សូមពិចារណាពីវិធីទាំងឡាយដែលអ្នកអាចបង្ហាញថា ពីព្រោះយើងជាកូនចៅនៃព្រះវរបិតាមាតាសួគ៌ នោះយើងអាចប្រែក្លាយដូចជាពួកទ្រង់បាន ។ ឧទាហរណ៍ បង្ហាញរូបភាពសត្វពាហនៈ និងកូនៗរបស់វា ឬខ្លួនរបស់អ្នក និងឪពុកម្តាយរបស់អ្នក ឬកូនៗរបស់អ្នក ហើយសូមជួយកុមារឲ្យមើលឃើញពីភាពស្រដៀងគ្នា ។ សូមថ្លែងទីបន្ទាល់ថា ដូចជាទារកធំឡើងដូចជាឪពុកម្តាយរបស់ពួកគេ នោះនៅថ្ងៃណាមួយយើងអាចប្រែក្លាយដូចជាព្រះវរបិតាមាតាសួគ៌របស់យើងដែរ ។
បង្រៀនគោលលទ្ធិ ៖ កុមារធំៗ
គ្រួសារជាផ្នែកដ៏សំខាន់មួយនៅក្នុងផែនការរបស់ព្រះវរបិតាសួគ៌ ។
សេចក្តីប្រកាសពីក្រុមគ្រួសារត្រូវបានចេញផ្សាយដើម្បីអះអាងជាថ្មីពីសេចក្តីពិតដ៏នៅអស់កល្បជានិច្ចអំពីក្រុមគ្រួសារ ។ សូមពិចារណាពីរបៀបដែលអ្នកនឹងជួយកុមារឲ្យពង្រឹងទីបន្ទាល់របស់ពួកគេពីសេចក្តីពិតទាំងនេះកាន់តែរឹងមាំ ។
សកម្មភាពដែលអាចជ្រើសរើស
-
សូមសួរកុមារប្រសិនបើពួកគេដឹងថាតើនរណាជាអ្នកសរសេរសេចក្តីប្រកាសពីក្រុមគ្រួសារ ។ ( នៅក្នុងសារលិខិតរបស់លោក « ផែនការ និងសេចក្តីប្រកាស » [ Ensign ឬ លីអាហូណា ខែ វិច្ឆិកា ឆ្នាំ ២០១៧ ទំព័រ ២៨–៣១ ] ប្រធាន ដាល្លិន អេក អូក បានពិពណ៌នាពីរបៀបដែលវាបានសរសេរឡើង ) ។ សូមជួយកុមារឲ្យយល់ពីអត្ថន័យនៃពាក្យ « ប្រកាសដោយឧឡារិក » នៅក្នុងកថាខណ្ឌបើក ។ សូមឲ្យពួកគេចែកចាយគំនិតរបស់ពួកគេអំពីមូលហេតុដែលពួកព្យាការី និងពួកសាវកចង់ « ប្រកាសជាឧឡារិក » នូវសេចក្តីពិតអំពីក្រុមគ្រួសារនៅក្នុងសម័យរបស់យើង ។
-
សូមចែកចាយសេចក្តីថ្លែងការណ៍ពីរបីចេញពី សេចក្តីប្រកាសពីក្រុមគ្រួសារដែលមានអត្ថន័យពិសេសចំពោះអ្នក ។ សូមអញ្ជើញកុមារឲ្យចែកចាយអារម្មណ៍របស់ពួកគេអំពីសេចក្តីពិតទាំងនោះ ។ តើជីវិតរបស់យើងនឹងខុសគ្នាយ៉ាងណា ប្រសិនបើយើងមិនស្គាល់រឿងទាំងនេះទេនោះ ? សូមច្រៀងចម្រៀងដែលទាក់ទងនឹងសេចក្តីពិតដែលមាននៅក្នុងសេចក្តីប្រកាស ដូចជាបទ « ខ្ញុំនឹងធ្វើតាមផែនការព្រះ » ឬ « ក្រុមគ្រួសារអាចនៅជាមួយគ្នាជានិរន្តរ » ( សៀវភៅចម្រៀងកុមារ ទំព័រ ៨៦, ១៨៧ ) ។
-
សូមបង្ហាញរូបភាពដល់កុមារ ( ឬអញ្ជើញពួកគេឲ្យគូររូបភាពមួយចំនួន ) ដែលបង្ហាញសេចក្ដីពិតដែលមាននៅក្នុងសេចក្តីប្រកាសពីក្រុមគ្រួសារ ។ រូបភាពទាំងនេះអាចជារូបព្រះវិហារបរិសុទ្ធ ក្រុមគ្រួសារកំពុងអធិស្ឋាន ឬកំពុងលេងជាមួយគ្នា ឬប្តីប្រពន្ធរៀបការ ។ សូមអញ្ជើញកុមារឲ្យស្វែងរកប្រយោគនៅក្នុង សេចក្តីប្រកាសពីក្រុមគ្រួសារ ដែលទាក់ទងនឹងរូបភាពនេះ ។ តើប្រយោគទាំងនេះបង្រៀនយើងអ្វីខ្លះ ?
-
សូមរៀបចំសំណួរមួយចំនួនដែលអាចមានចម្លើយនៅក្នុងសេចក្តីប្រកាសពីក្រុមគ្រួសារ ដូចជា « តើព្រះមានព្រះទ័យយ៉ាងណាអំពីអាពាហ៍ពិពាហ៍ ? » និង « តើអ្វីដែលធ្វើឲ្យមានគ្រួសាររីករាយ ? » សូមឲ្យកុមារម្នាក់ៗជ្រើសរើសសំណួរមួយ ហើយជួយពួកគេឲ្យស្វែងរកចម្លើយនៅក្នុងសេចក្តីប្រកាសនោះ ។
-
សូមអញ្ជើញម្តាយ និងឪពុករបស់កុមារម្នាក់ឲ្យចែកចាយនៅក្នុងថ្នាក់ពីរបៀបដែលពួកគាត់ « ជួយគ្នាទៅវិញទៅមកជាដៃគូស្មើគ្នា » នៅក្នុង « ការទទួលខុសត្រូវដ៏ពិសិដ្ឋ » របស់ពួកគាត់នៅក្នុងក្រុមគ្រួសាររបស់ពួកគាត់ ។ សូមអញ្ជើញកុមារឲ្យពិភាក្សាពីអ្វីដែលពួកគេអាចធ្វើឥឡូវនេះដើម្បីរៀបចំខ្លួនធ្វើជាភរិយា និងស្វាមី ជាម្តាយ និងឪពុកសុចរិត ។
ក្រុមគ្រួសារមានសុភមង្គលបំផុត នៅពេលពួកគេធ្វើតាមព្រះយេស៊ូវគ្រីស្ទ ។
ព្រះវរបិតាសួគ៌ស្រឡាញ់បុត្រាបុត្រីរបស់ទ្រង់ម្នាក់ៗ ហើយមានព្រះទ័យចង់ឲ្យពួកគេសប្បាយរីករាយ ។ តើអ្នកអាចជួយកុមារដែលអ្នកបង្រៀនឲ្យយល់ថា សុភមង្គលពិតប្រាកដបានទទួលពីការធ្វើតាមការបង្រៀន និងគំរូរបស់ព្រះអង្គសង្រ្គោះយេស៊ូវគ្រីស្ទយ៉ាងដូចម្តេច ?
សកម្មភាពដែលអាចជ្រើសរើស
-
សូមគូរគ្រោងរូបបេះដូងដ៏ធំមួយនៅលើក្តារខៀន ហើយអញ្ជើញកុមារឲ្យអានកថាខណ្ឌទីប្រាំពីរពីសេចក្តីប្រកាស ។ សូមឲ្យពួកគេរកមើលអ្វីមួយដែលពួកគេអាចធ្វើបាន ដើម្បីជួយក្រុមគ្រួសាររបស់ពួកគេឲ្យមានភាពសប្បាយ ហើយសរសេរចម្លើយដាក់នៅក្នុងរូបបេះដូងនោះ ។ សូមអញ្ជើញកុមារឲ្យជ្រើសរើសអ្វីមួយដែលពួកគេអាចធ្វើដើម្បីធ្វើឲ្យផ្ទះរបស់ពួកគេកាន់តែសប្បាយរីករាយ ។
-
សូមអញ្ជើញកុមារឲ្យចែកចាយបទពិសោធន៍នានា នៅពេលពួកគេទទួលបានសេចក្តីស្រឡាញ់ពីសមាជិកគ្រួសាររបស់ពួកគេ ។ សូមជួយកុមារឲ្យយល់ពីគោលលទ្ធិចេញពីកថាខណ្ឌទីប្រាំពីរនៃសេចក្តីប្រកាសដែលអាចជួយសមាជិកគ្រួសារឲ្យទទួលបានសេចក្តីស្រឡាញ់ ។ តើចំណេះដឹងរបស់យើងអំពីដំណឹងល្អនៃព្រះយេស៊ូវគ្រីស្ទគួរតែជះឥទ្ធិពលលើរបៀបដែលយើងប្រព្រឹត្តចំពោះក្រុមគ្រួសាររបស់យើងយ៉ាងដូចម្តេច ?
-
សូមសួរកុមារពីអ្វីដែលពួកគេនឹងនិយាយ ប្រសិនបើមានមិត្តភក្តិម្នាក់សួរពួកគេពីមូលហេតុដែលការរៀបការ ឬការមានកូនចៅមានសារៈសំខាន់ ។ តើយើងអាចជួយមិត្តភក្តិរូបនេះឲ្យយល់ថា ក្រុមគ្រួសារមានសារៈសំខាន់ខ្លាំងចំពោះព្រះវរបិតាសួគ៌ដោយរបៀបណា ? សូមជួយកុមារឲ្យស្វែងរកសេចក្តីថ្លែងការណ៍នៅក្នុងសេចក្តីប្រកាសពីក្រុមគ្រួសារដែលអាចជួយបាន សូមមើលផងដែរវីដេអូ « What Is the Purpose of Family ? »( នៅលើគេហទំព័រ ChurchofJesusChrist.org ) ។
លើកទឹកចិត្តឲ្យមានការរៀនសូត្រនៅឯគេហដ្ឋាន
សូមអញ្ជើញកុមារឲ្យដាក់ផែនការធ្វើអ្វីមួយដើម្បីពង្រឹងក្រុមគ្រួសាររបស់ពួកគេ ។ សូមលើកទឹកចិត្តពួកគេឲ្យចែកចាយផែនការរបស់ពួកគេជាមួយសមាជិកក្រុមគ្រួសារនៅឯផ្ទះ ។
ការអភិវឌ្ឍន៍ការបង្រៀនរបស់យើង
សូមប្រយ័ត្នប្រយែង ។ នៅពេលអ្នកបង្រៀនសេចក្តីពិតដែលបានបង្រៀននៅក្នុងសេចក្តីប្រកាសពីក្រុមគ្រួសារ សូមចាំថា កុមារជាច្រើនត្រូវបានចិញ្ចឹមបីបាច់នៅក្នុងក្រុមគ្រួសារដែលមិនត្រូវនឹងគំនិតដែលបានពិពណ៌នានៅក្នុងសេចក្តីប្រកាសនេះ ។ សូមប្រយ័ត្នប្រយែងកុំនិយាយអ្វីដែលអាចធ្វើឲ្យពួកគេមានអារម្មណ៌បាក់ទឹកចិត្ត ឬអន់ចិត្ត ។