« ថ្ងៃទី ១៣–១៩ ខែ ឧសភា ម៉ាថាយ ១៩–២០, ម៉ាកុស ១០, លូកា ១៨ ៖ ‹ តើនៅខ្វះអ្វីទៀត ? › » ចូរមកតាមខ្ញុំ—សម្រាប់ថ្នាក់បឋមសិក្សា ៖ ព្រះគម្ពីរសញ្ញាថ្មី ឆ្នាំ ២០១៩ ( ឆ្នាំ ២០១៩ )
« ថ្ងៃទី ១៣–១៩ ខែ ឧសភា ម៉ាថាយ ១៩–២០, ម៉ាកុស ១០, លូកា ១៨ »ចូរមកតាមខ្ញុំ—សម្រាប់ថ្នាក់បឋមសិក្សា ៖ ឆ្នាំ ២០១៩
ថ្ងៃទី ១៣–១៩ ខែ ឧសភា
ម៉ាថាយ ១៩–២០, ម៉ាកុស ១០, លូកា ១៨
« តើនៅខ្វះអ្វីទៀត »?
សូមអាន ម៉ាថាយ ១៩–២០; ម៉ាកុស ១០ និង លូកា ១៨ ដោយគិតក្នុងចិត្តដល់កុមារដែលអ្នកបង្រៀន ។ សូមកត់ត្រារាល់ការបំផុសគំនិតនានាដែលអ្នកទទួលបាន ។ ការរៀបចំមេរៀនរបស់អ្នកនឹងជួយដល់អ្នកឲ្យបង្រៀនកុមារនូវអ្វីដែលពួកគេត្រូវដឹងមកពីជំពូកទាំងនេះ ។
កត់ត្រាចំណាប់អារម្មណ៍របស់បងប្អូន
អញ្ជើញឲ្យចែកចាយ
សូមឲ្យកុមារប្រាប់ដល់កុមារក្នុងថ្នាក់នូវអ្វីមួយដែលពួកគេស្រឡាញ់អំពីគ្រួសាររបស់ពួកគេ ។ អ្នកថែមទាំងអាចសុំឲ្យឪពុកម្ដាយរបស់កុមារទាំងឡាយផ្ដល់នូវរូបភាពក្រុមគ្រួសាររបស់ខ្លួនដល់កូនៗរបស់ពួកគាត់ដើម្បីចែកចាយជាមួយនឹងកុមារក្នុងថ្នាក់ផងដែរ ។
បង្រៀនគោលលទ្ធិ
កុមារតូចៗ
ព្រះវរបិតាសួគ៌សព្វព្រះទ័យឲ្យយើងរៀបការនៅក្នុងព្រះវិហារបរិសុទ្ធ ហើយមានក្រុមគ្រួសារដ៏នៅអស់កល្បជានិច្ច ។
តើកុមារដែលអ្នកបង្រៀនអាចទទួលបានប្រយោជន៍មកពីការរៀនសូត្រអំពីគោលលទ្ធិនៃអាពាហ៍ពិពាហ៍ដ៏នៅអស់កល្បជានិច្ចបានយ៉ាងដូចម្ដេច ? វាប្រហែលមានប្រយោជន៍ដើម្បីបើកមើល « ក្រុមគ្រួសារ ៖ ការប្រកាសដល់ពិភពលោក » ( Ensign ឬ Liahona ខែ វិច្ឆិកា ឆ្នាំ ២០១០ ទំព័រ ១២៩ ) ។
សកម្មភាពដែលអាចជ្រើសរើស
-
សូមអាន ម៉ាកុស ១០:៦–៨ ដល់កុមារ ហើយសូមបង្ហាញរូបភាពគូស្វាមីភរិយាដែលរៀបការមួយគូ ។ សូមឲ្យកុមារចង្អុលទៅបុរស និងស្ដ្រីនៅពេលពួកគេឮអ្នកអានពាក្យ បុរស និង ស្ត្រី ។ សូមពន្យល់ថា ព្រះវរបិតាសួគ៌សព្វព្រះទ័យឲ្យបុរសម្នាក់ និងស្ដ្រីម្នាក់រៀបការជាមួយនឹងគ្នា ( សូមមើល លោកុប្បត្តិ ១:២៧–២៨ ) ។
-
សូមបង្ហាញរូបភាពអំពីគ្រួសារ និងព្រះវិហារបរិសុទ្ធ ។ សូមពន្យល់ថា ព្រះវរបិតាសួគ៌សព្វព្រះទ័យឲ្យយើងបានផ្សារភ្ជាប់ជាមួយនឹងក្រុមគ្រួសាររបស់យើងនៅក្នុងព្រះវិហារបរិសុទ្ធ ដើម្បីឲ្យយើងអាចរស់នៅជាមួយនឹងគ្នាជារៀងរហូតតទៅ ។ សូមប្រុងប្រយ័ត្នចំពោះកុមារដែលមានឪពុកម្ដាយដែលមិនទាន់បានផ្សារភ្ជាប់នៅឡើយ ។
-
សូមច្រៀង « ក្រុមគ្រួសាររីករាយ » សៀវភៅចម្រៀងកុមារទំព័រ ១០៤ ។ សូមឲ្យកុមារចង្អុលមកខ្លួនគេ ពេលណាដែលពួកគេច្រៀងពាក្យ « ខ្ញុំ » និង « យើង » ។ សកម្មភាពនេះអាចធ្វើសារឡើងវិញបីបួនដងបាន ។ សូមឲ្យកុមារចែកចាយពីរឿងសប្បាយៗដែលពួកគេបានធ្វើជាមួយនឹងក្រុមគ្រួសាររបស់ពួកគេ ។ ហេតុអ្វីពួកគេមានអំណរគុណចំពោះក្រុមគ្រួសាររបស់ពួកគេ ?
-
សូមច្រៀងចម្រៀងមួយអំពីព្រះវិហារបរិសុទ្ធ ឬក្រុមគ្រួសារដូចជាបទ « ខ្ញុំចូលចិត្តមើលព្រះវិហារបរិសុទ្ធ » ឬ « ក្រុមគ្រួសារអាចនៅជាមួយគ្នាជានិរន្តរ »សៀវភៅចម្រៀងកុមារ ទំព័រ ៩៩, ៩៨ ។ សូមឲ្យកុមារកាន់រូបភាពព្រះវិហារបរិសុទ្ធ ឬក្រុមគ្រួសារ ហើយឲ្យពួកគេលើករូបភាពរបស់ពួកគេឡើង នៅពេលពួកគេច្រៀង « ព្រះវិហារបរិសុទ្ធ » ឬ « ក្រុមគ្រួសារ » ។ ហេតុអ្វីវាសំខាន់ដែលត្រូវរៀបការនៅក្នុងព្រះវិហារបរិសុទ្ធ ?
អាពាហ៍ពិពាហ៍ដ៏នៅអស់កល្បជានិច្ចគឺជាផ្នែកមួយនៃផែនការរបស់ព្រះ ។
ព្រះយេស៊ូវសព្វព្រះទ័យឲ្យកូនតូចៗមករកទ្រង់ ដើម្បីទ្រង់អាចប្រទានពរដល់ពួកគេ ។
ដំណើររឿងនេះផ្ដល់នូវឱកាសមួយដើម្បីជួយកុមារឲ្យមានអារម្មណ៍ថាព្រះយេស៊ូវស្រឡាញ់ពួកគេខ្លាំងប៉ុណ្ណា ។
សកម្មភាពដែលអាចជ្រើសរើស
-
សូមចែកចាយរឿងនៅក្នុង ម៉ាកុស ១០:១៣–១៦ ជាសម្ដីរបស់អ្នកផ្ទាល់ ។ អ្នកក៏អាចចាក់បង្ហាញវីដេអូ « Suffer the Little Children to Come unto Me » ( LDS.org ) ផងដែរ ។ តើកុមារមានអារម្មណ៍ពីសេចក្ដីស្រឡាញ់របស់ព្រះយេស៊ូវចំពោះពួកគេនៅពេលណា ? សូមថ្លែងទីបន្ទាល់របស់អ្នកទៅកាន់កុមារថា ព្រះយេស៊ូវស្រឡាញ់ពួកគេ ហើយសព្វព្រះទ័យប្រទានពរជ័យដល់ពួកគេ ។
-
សូមដាក់បង្ហាញរូបភាព ព្រះគ្រីស្ទ និងកូនក្មេង( សៀវភៅរូបភាពដំណឹងល្អទំព័រ ៤៧ ) ។ សូមពន្យល់ថា ប្រសិនបើយើងចង់ក្លាយដូចជាកូនក្មេងដែលអង្គុយនៅក្បែរព្រះយេស៊ូវ នោះយើងអាចធ្វើតាមបទបញ្ញត្តិទាំងឡាយរបស់ទ្រង់ ហើយស្រឡាញ់ទ្រង់ ព្រមទាំងមនុស្សផ្សេងទៀតផងដែរ ។ តើកុមារអាចធ្វើអ្វីខ្លះដើម្បីក្លាយដូចជាកុមារដែលអង្គុយនៅក្បែរព្រះយេស៊ូវ ?
-
សូមឲ្យកុមារគូររូបភាពខ្លួនគេដែលត្រូវបានប្រទានពរដោយព្រះយេស៊ូវ ( សូមមើល ម៉ាកុស ១០:១៦ ) ។
បើយើងគោរពតាមបទបញ្ញត្តិទាំងឡាយ នោះយើងនឹងទទួលបានជីវិតដ៏នៅអស់កល្បជានិច្ច ។
ព្រះយេស៊ូវបានបង្រៀនដល់អ្នកមានវ័យក្មេងម្នាក់ដែលចង់ទទួលបានជីវិតដ៏នៅអស់កល្បជានិច្ច—ជាជីវិតមួយដូចជាព្រះវរបិតាសួគ៌—នោះគាត់ត្រូវគោរពតាមបទបញ្ញត្តិទាំងឡាយ ។
សកម្មភាពដែលអាចជ្រើសរើស
-
សូមអានដំណើររឿងអ្នកមានវ័យក្មេងនេះនៅក្នុង ម៉ាកុស ១០:១៧–២២ ជាមួយនឹងកុមារ ។ ( សូមមើលផងដែរ « ជំពូកទី ៤២ ៖ អ្នកមានវ័យក្មេង »រឿងព្រះគម្ពីរសញ្ញាថ្មី ទំព័រ ១០៥–៦ ឬវីដេអូដូចគ្នានេះនៅលើគេហទំព័រ LDS.org ) ។ សូមឲ្យពួកគេស្ដាប់រកអ្វីដែលព្រះយេស៊ូវបានមានបន្ទូលទៅកាន់យុវជននេះឲ្យធ្វើ និងរបៀបដែលយុវជនរូបនេះបានឆ្លើយតបវិញ ។
-
សូមតំណាលរឿងមួយ ឬច្រើនអំពីកុមារដែលសុំពាក្យទូន្មាន ឬការដឹកនាំពីឪពុកម្ដាយរបស់ពួកគេ ប៉ុន្ដែបែរជាមិនបានធ្វើតាម ឬគោរពតាមពាក្យនោះទៅវិញ ។ តើមានរឿងមួយចំនួនអ្វីខ្លះដែលព្រះវរបិតាសួគ៌សុំឲ្យយើងធ្វើ ? តើយើងមានអារម្មណ៍យ៉ាងណា នៅពេលយើងគោរពតាមបទបញ្ញត្តិទាំងឡាយរបស់ទ្រង់ ?
-
សូមចែកចាយបទពិសោធន៍ដែលអ្នកបានទទួលការបំផុសគំនិតផ្ទាល់ខ្លួនឲ្យធ្វើអ្វីមួយដើម្បីក្លាយខ្លួនជាមនុស្សដ៏ប្រសើរម្នាក់ ។
បង្រៀនគោលលទ្ធិ
កុមារធំៗ
ព្រះវរបិតាសួគ៌សព្វព្រះទ័យឲ្យយើងរៀបការនៅក្នុងព្រះវិហារបរិសុទ្ធ ហើយមានក្រុមគ្រួសារដ៏នៅអស់កល្បជានិច្ច ។
រឿងដែលព្រះយេស៊ូវបានបង្រៀនអំពីអាពាហ៍ពិពាហ៍អាចជួយដល់កុមារ នៅពេលពួកគេជួបប្រទះនឹងសារលិខិតដែលផ្ទុយទៅនឹងគោលការណ៍នេះនៅក្នុងពិភពលោកនេះ ។
សកម្មភាពដែលអាចជ្រើសរើស
-
សូមឲ្យកុមារម្នាក់អាន ម៉ាកុស ១០:៦–៨ ឮៗ ។ សូមពន្យល់ថា នៅជាប់នឹង មានន័យថា « មិនឃ្លាតពីគ្នា » ឬ « នៅកៀកនឹង » អ្វីមួយ ។ ហេតុអ្វីបានជាវាសំខាន់ដែលស្វាមី និងភរិយាត្រូវនៅជាប់ជាមួយគ្នា ស្រឡាញ់គ្នាទៅវិញទៅមក ហើយធ្វើការជាដៃគូនោះ ?
-
សូមចែកចាយសេចក្ដីថ្លែងការណ៍ដូចតទៅនេះមកពី « ក្រុមគ្រួសារ ៖ ការប្រកាសដល់ពិភពលោក » ហើយជួយកុមារឲ្យយល់ពីអត្ថន័យរបស់វា ៖ « ភេទប្រុសស្រីគឺជាលក្ខណៈពិសេសនៃអត្តសញ្ញាណ និងគោលបំណងរបស់បុគ្គលម្នាក់ៗនៅជីវិតមុនផែនដី ជីវិតរមែងស្លាប់ និងនៅអស់កល្បជានិច្ច » ។
-
សូមឲ្យកុមារជួយអ្នកគិតអំពីចម្លើយចំពោះសំណួរដូចជា « ហេតុអ្វីបានជាក្រុមគ្រួសារមានសារៈសំខាន់នៅក្នុងសាសនាចក្រ ? » ឬ « ហេតុអ្វីបានជាវាសំខាន់សម្រាប់អ្នកដើម្បីរៀបការនៅក្នុងព្រះវិហារបរិសុទ្ធ ? » សូមច្រៀងរួមគ្នានូវបទ « ក្រុមគ្រួសារអាចនៅជាមួយគ្នាជានិរន្តរ » សៀវភៅចម្រៀងកុមារ ទំព័រ ៩៨ ។ សូមចែកចាយទីបន្ទាល់របស់អ្នកអំពីអាពាហ៍ពិពាហ៍ និងគ្រួសារដ៏អស់កល្បជានិច្ចជាមួយនឹងកុមារ ។ សូមឲ្យពួកគេចែកចាយទីបន្ទាល់របស់ពួកគេផងដែរ ។
-
សូមឲ្យកុមារម្នាក់ៗអានបទគម្ពីរមួយមកពីបញ្ជីនេះ ៖ ម៉ាកុស ១០:៦–៨; កូរិនថូស ទី១ ១១:១១; គ. និង ស. ៤២:២២; ១៣១:១–៤; និង ម៉ូសេ ៣:១៨, ២១–២៤ ។ តើបទគម្ពីរទាំងនេះបង្រៀនអ្វីខ្លះអំពីអាពាហ៍ពិពាហ៍ ?
ព្រះយេស៊ូវអាចជួយខ្ញុំឲ្យដឹងពីអ្វីដែលខ្ញុំត្រូវធ្វើដើម្បីអភិវឌ្ឍទៅមុខ ។
អ្នកមានវ័យក្មេងបានទៅរកព្រះយេស៊ូវ ហើយបានទទួលការណែនាំជាក់លាក់ដែលមានអត្ថន័យជាពិសេសចំពោះរូបគាត់ ។ តើអ្នកអាចបំផុសគំនិតដល់កុមារឲ្យស្វែងរកការដឹកនាំស្រដៀងគ្នានេះនៅក្នុងជីវិតរបស់ពួកគេផ្ទាល់ដោយរបៀបណា ?
សកម្មភាពដែលអាចជ្រើសរើស
-
សូមឲ្យកុមារស្វែងរកខគម្ពីរមួយនៅក្នុង ម៉ាកុស ១០:១៧–២២ ដែលរៀបរាប់ពីរូបភាពនៅក្នុង គម្រោងមេរៀនសប្ដាហ៍នេះ នៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ។ សូមពន្យល់ថា ការប្រឹក្សាដែលព្រះយេស៊ូវបានផ្ដល់ដល់អ្នកមានរូបនេះគឺមានលក្ខណៈផ្ទាល់ខ្លួន ហើយយើងទាំងអស់គ្នាអាចទទួលបានការដឹកនាំផ្ទាល់ខ្លួនមកពីព្រះអម្ចាស់តាមរយៈព្រះវិញ្ញាណបាន ។
-
សូមអាន ម៉ាកុស ១០:១៧–២២ រួមគ្នា ។ សូមឲ្យកុមារសរសេរបទបញ្ញត្តិទាំងឡាយដែលព្រះអង្គសង្គ្រោះបានប្រាប់ទៅអ្នកមានវ័យក្មេងរូបនេះឲ្យធ្វើតាមនៅលើក្ដារខៀន ( សូមមើល ខទី ១៩ ) ។ តើគាត់មានអ្វីទៀតដែលត្រូវធ្វើ ? ( សូមមើល ខទី ២១ ) ។ សូមលើកទឹកចិត្តឲ្យកុមារគិតអំពីរឿងផ្សេងៗដែលពួកគេត្រូវចាប់ផ្ដើមធ្វើ ឬឈប់ធ្វើដើម្បីដើរតាមព្រះយេស៊ូវឲ្យបានកាន់តែប្រសើរឡើង ។ តើមានវិធីមួយចំនួនអ្វីខ្លះ ដែលយើងអាចរកឃើញអ្វីដែលព្រះយេស៊ូវសព្វព្រះទ័យឲ្យយើងធ្វើនោះ ?
លើកទឹកចិត្តឲ្យមានការរៀនសូត្រនៅឯគេហដ្ឋាន
សូមឲ្យកុមារប្រាប់ក្រុមគ្រួសាររបស់ពួកគេពីមូលហេតុដែលពួកគេមានអំណរចំពោះពួកគាត់ ប្រហែលដោយការសរសេរសំបុត្រមួយច្បាប់ទៅឪពុកម្ដាយរបស់ពួកគេ ឬដោយការចែកចាយទីបន្ទាល់របស់ពួកគេអំឡុងពេលរាត្រីជួបជុំក្រុមគ្រួសារ ។
ការកែលម្អការបង្រៀនរបស់យើង
សូមយកចិត្តទុកដាក់ចំពោះកុមារ ។ តើកុមារនៅក្នុងថ្នាក់របស់អ្នកឆ្លើយតបនឹងសកម្មភាពរៀនសូត្រនានាយ៉ាងដូចម្ដេច ? ប្រសិនបើពួកគេមើលទៅមិនសូវចូលរួមក្នុងសកម្មភាពទេ នោះវាអាចជាពេលដែលត្រូវធ្វើសកម្មភាពផ្សេងទៀត ឬចេញដើរបន្ដិចដោយគារវភាព ។ ប៉ុន្ដែ ប្រសិនបើអ្នកកត់សម្គាល់ឃើញថា កុមារចូលរួម ហើយរៀនពីផ្នែកមួយចំនួននៃមេរៀននេះ សូមកុំមានអារម្មណ៍តានតឹងដើម្បីបន្ដទៅមុខ ដើម្បីប្រាកដថា អ្នកបានបង្រៀនគ្រប់ចំណុចមេរៀនទាំងអស់ឡើយ ។