« ថ្ងៃទី ២០–២៦ ខែ ឧសភា ។ ម៉ាថាយ ២១–២៣, ម៉ាកុស ១១, លូកា ១៩–២០, យ៉ូហាន ១២ ៖ ‹ មើល ស្ដេចឯងទ្រង់យាងមក › » ចូរមកតាមខ្ញុំ—សម្រាប់ថ្នាក់បឋមសិក្សា ៖ ព្រះគម្ពីរសញ្ញាថ្មី ឆ្នាំ ២០១៩ ( ២០១៩ )
« ថ្ងៃទី ២០–២៦ ខែ ឧសភា ។ ម៉ាថាយ ២១–២៣, ម៉ាកុស ១១, លូកា ១៩–២០, យ៉ូហាន ១២ » ចូរមកតាមខ្ញុំ—សម្រាប់ថ្នាក់បឋមសិក្សា ៖ ឆ្នាំ ២០១៩
លោកសាខេនៅលើដើមឧទុម្ពរ ដោយ ជេមស៍ ធីសុទ្ធ
ថ្ងៃទី ២០–២៦ ខែ ឧសភា
ម៉ាថាយ ២១–២៣; ម៉ាកុស ១១; លូកា ១៩–២០; យ៉ូហាន ១២
« មើល ស្ដេចឯងទ្រង់យាងមក »
កាលអ្នកអាន ម៉ាថាយ ២១–២៣; ម៉ាកុស ១១; លូកា ១៩–២០ និង យ៉ូហាន ១២ សូមយកចិត្តទុកដាក់ទៅលើចំណាប់អារម្មណ៍ដែលអ្នកទទួលបានមកពីព្រះវិញ្ញាណបរិសុទ្ធ ។ សូមមើល « ការបំពេញតាមតម្រូវការរបស់កុមារតូចៗ » នៅទំព័រដំបូងនៃសៀវភៅសិក្សានេះ នូវរឿងនានាដែលត្រូវទុកក្នុងចិត្ត កាលអ្នកបង្រៀនគោលការណ៍ទាំងនេះ ។
កត់ត្រាចំណាប់អារម្មណ៍របស់អ្នក
អញ្ជើញឲ្យចែកចាយ
សូមបង្ហាញរូបភាពនៅក្នុង គម្រោងសប្ដាហ៍នេះ នៅក្នុង ចូរមកតាមខ្ញុំ—សម្រាប់បុគ្គល និងក្រុមគ្រួសារ ហើយសូមឲ្យកុមារចែកចាយអ្វីដែលពួកគេដឹងអំពីអ្វីដែលបានកើតឡើងនៅក្នុងរូបភាពនេះ ។
បង្រៀនគោលលទ្ធិ
កុមារតូចៗ
ព្រះវរបិតាសួគ៌ និងព្រះយេស៊ូវទ្រង់ស្គាល់ខ្ញុំតាមឈ្មោះ ។
កាលអ្នកអានអំពីទំនាក់ទំនងរបស់ព្រះអង្គសង្គ្រោះនឹងលោកសាខេ តើសារលិខិតអ្វីដែលអ្នករកឃើញ ដែលអាចប្រទានពរដល់កុមារដែលអ្នកបង្រៀន ?
សកម្មភាពដែលអាចជ្រើសរើស
-
សូមបង្ហាញរូបភាព លោកសាខេនៅលើដើមឧទុម្ពរ ( LDS.org ) ។ សូមជួយកុមារឲ្យរកមើលលោកសាខេ ហើយហៅឈ្មោះរបស់លោក ។ សូមបង្កើតសកម្មភាពឲ្យកុមារធ្វើ នៅពេលអ្នកតំណាលប្រាប់រឿងលោកសាខេ និង ព្រះយេស៊ូវ—ឧទាហរណ៍ ដោយជំអឺតជើងដើម្បីមើលហ្វូងមនុស្ស ឬធ្វើជាឡើងដើមឈើ ។ សូមពន្យល់ថា ព្រះអង្គសង្គ្រោះបានឃើញលោកសាខេ ហើយហៅលោកតាមឈ្មោះរបស់លោក ។ សូមថ្លែងទីបន្ទាល់ថា ព្រះអង្គសង្គ្រោះក៏ស្គាល់កុមារម្នាក់ៗ និងឈ្មោះរបស់ពួកគេផងដែរ ។
-
សូមយកស៊ុមរូបថតទទេទៅកាន់ថ្នាក់រៀន ឬធ្វើស៊ុមមួយពីក្រដាស ។ សូមឲ្យកុមារម្នាក់ៗប្ដូរវេនគ្នាកាន់ស៊ុមនេះនៅពីមុខរបស់គាត់ ខណៈកុមារផ្សេងទៀតក្នុងថ្នាក់និយាយថា « ព្រះវរបិតាសួគ៌ និង ព្រះយេស៊ូវស្គាល់ [ ឈ្មោះរបស់កុមារ ] » ។
-
សូមអញ្ជើញកុមារឲ្យប្ដូរវេនគ្នាធ្វើជាឡើងដើមឈើ ដូចជាលោកសាខេបានធ្វើ ។ សូមឲ្យកុមារផ្សេងទៀតក្នុងថ្នាក់និយាយថា « ព្រះវរបិតាសួគ៌ និង ព្រះយេស៊ូវស្គាល់ [ ឈ្មោះរបស់កុមារ ] » ។
-
សូមច្រៀងរួមគ្នាបទ « ខ្ញុំជាកូនរបស់ព្រះ »សៀវភៅចម្រៀងកុមារ ទំព័រ ២ ហើយសូមឲ្យកុមារស្ដាប់រករឿងដែលជួយពួកគេឲ្យដឹងថា ព្រះវរបិតាសួគ៌ស្រឡាញ់ពួកគេ ។
ព្រះវិហារបរិសុទ្ធគឺជាទីបរិសុទ្ធមួយ ។
ទីបន្ទាល់របស់អ្នកអំពីព្រះវិហារបរិសុទ្ធអាចជួយកុមារដែលអ្នកបង្រៀនឲ្យយល់ថា ព្រះវិហារបរិសុទ្ធគឺជាទីបរិសុទ្ធមួយ ។
សកម្មភាពដែលអាចជ្រើសរើស
-
សូមបង្ហាញរូបភាព ព្រះគ្រីស្ទសម្អាតព្រះវិហារបរិសុទ្ធ ( សៀវភៅរូបភាពដំណឹងល្អ ទំព័រ ៥១ ) ហើយតំណាលប្រាប់រឿងដូចបានកត់ត្រានៅក្នុង ម៉ាថាយ ២១:១២–១៤ ។ សូមជួយកុមារឲ្យរកឃើញរូបប្រាក់កាក់ និងសត្វធាតុនានានៅក្នុងរូបភាពនេះ ។ រួចសូមពិភាក្សាពីមូលហេតុដែលព្រះអង្គសង្គ្រោះចង់ឲ្យអ្នកដូរប្រាក់ និងអ្នកលក់សត្វចាកចេញពីព្រះវិហារបរិសុទ្ធ ។
-
សូមបង្ហាញរូបភាពព្រះវិហារបរិសុទ្ធ ( ឧទាហរណ៍ សូមមើល សៀវភៅរូបភាពដំណឹងល្អទំព័រ ១១៧–២១ ) ហើយសូមឲ្យកុមារចែកចាយអារម្មណ៍របស់ពួកគេកាលពួកគេឃើញព្រះវិហារបរិសុទ្ធ ។ សូមប្រាប់កុមារថា អារម្មណ៍ទាំងនោះគឺជាព្រះវិញ្ញាណបរិសុទ្ធមានបន្ទូលមកកាន់យើងថា ព្រះវិហារបរិសុទ្ធគឺជាទីបរិសុទ្ធមួយ ។ សូមឲ្យកុមារសម្ដែងធ្វើដូចជាពួកគេបាននៅខាងក្នុងព្រះវិហារបរិសុទ្ធ ។ ឧទាហរណ៍ ពួកគេអាចនិយាយខ្សឹបៗ ហើយអង្គុយដោយគារវភាព ។ សូមច្រៀងរួមគ្នាបទ « ខ្ញុំចូលចិត្តមើលព្រះវិហារបរិសុទ្ធ » សៀវភៅចម្រៀងកុមារ ទំព័រ ៩៩ ហើយសូមកុមារឲ្យដាក់គោលដៅមួយដើម្បីចូលទៅក្នុងព្រះវិហារបរិសុទ្ធនៅថ្ងៃណាមួយ ។
ព្រះវិហារបរិសុទ្ធគឺជាដំណាក់របស់ព្រះអម្ចាស់ ។
ខ្ញុំអាចគោរពប្រតិបត្តិ ។
ព្រះវរបិតាសួគ៌សព្វព្រះទ័យឲ្យខ្ញុំចេះគោរពប្រតិបត្តិ ។ រឿងប្រៀបប្រដូចអំពីកូនប្រុសពីរនាក់គឺជាឱកាសមួយដើម្បីបង្រៀនអំពីសារៈសំខាន់នៃការគោរពប្រតិបត្តិ ។
សកម្មភាពដែលអាចជ្រើសរើស
-
សូមគូររូបកូនប្រុសពីរនាក់នៅលើក្ដារខៀន ហើយប្រើគំនូរនេះ កាលអ្នកតំណាលរឿងប្រៀបប្រដូចសារជាថ្មីដែលមាននៅក្នុង ម៉ាថាយ ២១:២៨–៣២ ។ តើកូនប្រុសមួយណាដែលបានធ្វើរឿងត្រឹមត្រូវនៅចុងបញ្ចប់ ? សូមឲ្យកុមារនឹកឈ្មោះការណ៍នានាដែលពួកគេអាចធ្វើបានដើម្បីចេះគោរពប្រតិបត្តិនៅផ្ទះ ។ សូមអនុញ្ញាតឲ្យពួកគេគូររូបភាពខ្លួនឯងដែលកំពុងធ្វើការណ៍ទាំងនេះណាមួយ ។
-
សូមឲ្យកុមារចែកចាយបទពិសោធន៍ដែលពួកគេបានមានក្នុងការចេះគោរពប្រតិបត្តិដល់ឪពុកម្ដាយរបស់ពួកគេ ឬអាណាព្យាបាល ឬអ្នកដឹកនាំផ្សេងទៀត ។ តើពួកគេទទួលបានពរជ័យយ៉ាងណាខ្លះក្នុងការចេះគោរពប្រតិបត្តិនេះ ? តើពួកគេអាចកាន់តែចេះគោរពប្រតិបត្តិទៅពេលអនាគតដោយរបៀបណា ?
បង្រៀនគោលលទ្ធិ
កុមារធំៗ
នៅពេលខ្ញុំស្វែងរកព្រះអង្គសង្គ្រោះ នោះខ្ញុំនឹងរកឃើញទ្រង់ ។
អ្នកអាចប្រើរឿងលោកសាខេ ដើម្បីជួយកុមារឲ្យគិតអំពីការណ៍នានាដែលពួកគេអាចធ្វើបានដើម្បីខិតទៅកាន់ជិតនឹងព្រះអង្គសង្គ្រោះ ។
សកម្មភាពដែលអាចជ្រើសរើស
-
សូមអាន លូកា ១៩:១–១០ ហើយផ្អាករាល់ពីរបីខម្ដង ដើម្បីពិភាក្សាអំពីអ្វីដែលយើងរៀនពីលោកសាខេ ។ តើលោកសាខេបានធ្វើអ្វីខ្លះ ដើម្បីលោកអាចមើលឃើញព្រះយេស៊ូវ ? តើលោកបានឆ្លើយតបយ៉ាងណា នៅពេលព្រះយេស៊ូវបានសុំលោកឲ្យចុះមកដីនោះ ? សូមឲ្យកុមារម្នាក់ៗចែកចាយនូវមូលហេតុមួយដែលពួកគេចង់ឃើញព្រះយេស៊ូវ ។ ប្រសិនបើព្រះអង្គសង្គ្រោះនឹងមកកាន់ទីក្រុងរបស់អ្នក តើអ្នកនឹងធ្វើអ្វីដើម្បីរៀបចំជួបទ្រង់នោះ ?
-
សូមឲ្យកុមារគិតអំពីមនុស្សដែលពួកគេស្គាល់ ដូចជាលោកសាខេដែរ ដែលអាចកំពុងស្វែងរកព្រះអង្គសង្គ្រោះ ។ សូមសួរកុមារថា តើពួកគេអាចធ្វើអ្វីខ្លះដើម្បីជួយដល់នរណាម្នាក់ទៀតឲ្យរៀនអំពីព្រះអង្គសង្គ្រោះ ។
-
សូមឲ្យសិស្សចែកចាយពីបទពិសោធន៍ផ្សេងៗកាលពួកគេបានមានអារម្មណ៍ថា ព្រះវរបិតាសួគ៌ និងព្រះយេស៊ូវគ្រីស្ទបានស្គាល់ពួកគេ ហើយបានស្រឡាញ់ពួកគេ ។
ព្រះវិហារបរិសុទ្ធគឺជាទីបរិសុទ្ធមួយ ដែលខ្ញុំត្រូវគោរព ។
តើដំណើររឿងរបស់ព្រះអង្គសង្គ្រោះសម្អាតព្រះវិហារបរិសុទ្ធអាចជួយអ្នកឲ្យបង្រៀនកុមារអំពីភាពបរិសុទ្ធនៃព្រះវិហារបរិសុទ្ធដោយរបៀបណា ?
សកម្មភាពដែលអាចជ្រើសរើស
-
សូមអញ្ជើញកុមារអាន ម៉ាថាយ ២១:១២–១៤ ។ សូមបង្ហាញរូបភាព ព្រះគ្រីស្ទសម្អាតព្រះវិហារបរិសុទ្ធ ( សៀវភៅរូបភាពដំណឹងល្អ ទំព័រ ៥១ ) ហើយសូមសួរពួកគេថា តើខគម្ពីរមួយណាដែលរៀបរាប់ពីរូបភាពនេះ ។ សូមឲ្យពួកគេគូររូបភាពព្រះវិហារបរិសុទ្ធពីមុន និងក្រោយពេលដែលព្រះយេស៊ូវបានសម្អាតវា ។
-
សូមឲ្យកុមារចែកចាយពីអារម្មណ៍របស់ពួកគេ កាលពួកគេបានទៅខាងក្នុងព្រះវិហារបរិសុទ្ធមួយ បានទៅមើលទីតាំងព្រះវិហារបរិសុទ្ធ ឬបានមើលរូបភាពនានានៃព្រះវិហារបរិសុទ្ធ ។ តើអ្វីទៅដែលបានជួយពួកគេឲ្យដឹងថា ព្រះវិហារបរិសុទ្ធគឺជាទីបរិសុទ្ធមួយ ?
-
សូមឲ្យយុវវ័យម្នាក់ ឬច្រើននាក់មកកាន់ថ្នាក់រៀន ហើយនិយាយអំពីរបៀបដែលពួកគេបានរៀបចំដើម្បីចូលទៅកាន់ព្រះវិហារបរិសុទ្ធ ។ ប្រសិនបើពួកគេធ្លាប់បានទៅព្រះវិហារបរិសុទ្ធហើយ សូមឲ្យពួកគេនិយាយអំពីអារម្មណ៍របស់ពួកគេ កាលពួកគេបាននៅទីនោះ ។
-
សូមកាត់រូបភាពព្រះវិហារបរិសុទ្ធជាបំណែកតូចៗ ហើយឲ្យបំណែកមួយដល់កុមារម្នាក់ៗ ។ សូមឲ្យកុមារសរសេរនៅខាងខ្នងនៃបំណែករបស់ពួកគេនូវការណ៍មួយដែលពួកគេអាចធ្វើបានដើម្បីរៀបចំចូលទៅកាន់ព្រះវិហារបរិសុទ្ធ ។ កាលកុមារម្នាក់ៗចែកចាយគំនិតរបស់ពួកគេហើយ សូមដាក់បំណែករបស់គេទៅក្នុងបំណែករូបភាពទាំងឡាយនោះ ។
ខ្ញុំត្រូវតែមានសុចរិតភាពនៅក្នុងសកម្មភាព និងបំណងប្រាថ្នារបស់ខ្ញុំ ។
ព្រះយេស៊ូវបានបង្រៀនពួកអាចារ្យ និងពួកផារិស៊ីអំពីសារៈសំខាន់នៃការរស់នៅតាមដំណឹងល្អដ៏ពិត—ដោយមិនគ្រាន់តែធ្វើពុតជាសុចរិតប៉ុណ្ណោះទេ ។ តើអ្វីទៅដែលនឹងជួយកុមារឲ្យយល់ពីសេចក្ដីពិតនេះ ?
សកម្មភាពដែលអាចជ្រើសរើស
-
នៅពេលអ្នកអាន ម៉ាថាយ ២៣:២៥–២៨ ជាមួយនឹងកុមារ សូមពិចារណាចែកចាយនូវនិយមន័យនៃពាក្យនេះ មនុស្សកំពុត មកពីវចនានុក្រមគម្ពីរប៊ីប ៖ « មនុស្សដែលធ្វើពុតជាគោរពសាសនា ដែលតាមពិតមនុស្សនេះមិនជឿលើសាសនាឡើយ » ។ ហេតុអ្វីក៏វាអាក្រក់ដើម្បីធ្វើជាមនុស្សកំពុត ?
-
សូមបង្ហាញដល់កុមារនូវពែងមួយ ដែលស្អាតតែខាងក្រៅ ប៉ុន្ដែកខ្វក់ខាងក្នុងដើម្បីជួយបង្ហាញពីអត្ថន័យប្រៀបធៀបនៅក្នុង ម៉ាថាយ ២៣:២៥ នេះ ។ តើយើងអាចប្រាកដថា យើងស្អាត ហើយបរិសុទ្ធនៅខាងក្នុងដោយរបៀបណា ?
លើកទឹកចិត្តឲ្យរៀនសូត្រនៅផ្ទះ
សូមជួយកុមារឲ្យរើសយកគោលការណ៍ ឬសកម្មភាពមួយពីក្នុងថ្នាក់ដើម្បីចែកចាយវាដល់ក្រុមគ្រួសាររបស់ពួកគេនៅផ្ទះ ។
កែលម្អការបង្រៀនរបស់យើង
សូមគាំទ្រឪពុកម្ដាយរបស់កុមារ ។ « ឪពុកម្ដាយគឺជាគ្រូបង្រៀនដំណឹងល្អដ៏សំខាន់បំផុតសម្រាប់កូនចៅរបស់ពួកគេ—ពួកគេមានទាំងទំនួលខុសត្រូវជាចម្បង និងអំណាចដ៏អស្ចារ្យក្នុងការមានឥទ្ធិពលទៅលើកូនចៅរបស់ពួកគេ ( សូមមើល ចោទិយកថា ៦:៦–៧ ) ។ កាលអ្នកបង្រៀនកុមារនៅឯព្រះវិហារ សូមអធិស្ឋានស្វែងរករបៀបគាំទ្រដល់ឪពុកម្ដាយរបស់ពួកគេនៅក្នុងតួនាទីដ៏ចាំបាច់ហើយសំខាន់របស់ពួកគេ » ( ការបង្រៀនតាមរបៀបរបស់ព្រះអង្គសង្គ្រោះ ទំព័រ ២៥ ) ។