“Hulio 8–14. Dagiti Aramid 6–9: ‘Ania ti Rebbeng nga Ipaaramidmo Kaniak?’” Umaykayo, Sumurot Kaniak—Para iti Primary: Baro a Tulag 2019 (2019)
“Hulio 8–14. Dagiti Aramid 6–9,” Umaykayo, Sumurot Kaniak—Para iti Primary: 2019
Tapno Makapagbiagtayo, ni Sam Lawlor
Hulio 8–14
Dagiti Aramid 6–9
“Ania ti Rebbeng nga Ipaaramidmo Kaniak?”
Irugi babaen ti panangbasa iti Dagiti Aramid 6–9. Tibalabala iti daytoy a lawas manipud iti Umaykayo, Sumurot Kaniak—Para kadagiti Indibidual ken Pamilia ket makatulong kenka a makaawat kadagitoy a kapitulo. Dagiti aktibidad para kadagiti in-inaudi nga ubbing iti daytoy a balabala ket mabalin a maibagay kadagiti in-inauna nga ubbing, ken vice versa.
Isuratmo Dagiti Impresionmo
Yawis ti Panagbibinninglay
Isurat ti sumagmamano kadagiti nagnagan dagiti tao manipud iti Dagiti Aramid 6–9 iti pisarra — nalabit da Saulo wenno Esteban. Awisem dagiti ubbing a mangibinglay no ania ti ammoda maipapan kadagitoy a pasamak.
Isuro ti Doktrina
Dagiti In-inaudi nga Ubbing
Masurotko ni Jesucristo babaen iti panangitakder iti kinalinteg.
Ania ti masursuro dagiti ubbing manipud ken ni Esteban maipapan iti panagbalin a maysa a pasurot ni Jesucristo?
Dagiti Mabalin nga Aktibidad
-
Tulongam dagiti ubbing a mangparnuay kadagiti tignay a maigiddan iti maysa a kanta maipapan iti panagpili iti umno. Usarem ti Dagiti Aramid 7:51–60 a mangisarita kadagiti ubbing no kasano a nangisuro ni Esteban maipapan ken ni Jesucristo, uray pay ti panangaramid iti kasta ket nagpungtotan dagiti dadaulo a Judio (kitaen met iti “Kapitulo57: Pinatay dagiti Nadangkes a Lallaki ni Esteban,”Dagiti Estoria iti Baro a Tulag, . Kasano nga intakder ni Esteban ti kinalinteg?
-
Ited kadagiti ubbing dagiti sumagmamano a senario dagiti ubbing nga agaramid iti pili iti umno ken biddut. Kiddawen kadagiti ubbing no ania ti aramidenda a mangitakder iti kinalinteg.
Paregtaennak ti Espiritu Santo a mangibinglay iti ebanghelio kadagiti dadduma.
Sinurot ni Felipe dagiti pannignay ti Espiritu ken tinulonganna ti lalaki a taga Etiopia amangikarkarigatan a maawatan ti nasantuan a kasuratan. Ania dagiti leksion iti daytoy nga estoria a nasursuro dagiti ubbing a sursuruam?
Ni Felipe a Mangisursuro iti taga Etiopia, ni Robert T. Barrett
Dagiti Mabalin nga Aktibidad
-
Guyodem dagiti dua a tugaw tapno makaaramid ti maysa a karuahe. Awisem dagiti dua nga ubbing nga agtugaw iti karuahe, maysa a mangibagi ken ni Felipe ket ti sabali mangibagi iti lalaki a taga Etiopia. Kalpasanna isaritam ti estoria no kasano nga insuro ni Felipe ti ebanghelio iti lalaki manipud iti Etiopia.
-
Nariknam kadin ti Espiritu Santo a nangibaga kenka a mangibinglay iti ebanghelio iti maysa a tao, a maipada iti padas ni Felipe iti Dagiti Aramid 8:29? Ibinglaymo ti padasmo e kadagiti ubbing.
No agaramidak iti biddut, awisennak ti Nailangitan nga Ama nga agbabawi ken agbalbaliw.
Idi imbaga ni Jesus ken ni Saulo a mamagsardeng ti pangidaddadanes iti Simbaan ti Apo, ni Saulo ket dagus a nagbabawi ken nagbalbaliw. Kasano a makatulong daytoy a pakaammo kadagiti ubbing a sursuruam nga agtarigagay nga agbalbaliw a dagus no nakaaramidda iti biddut?
Dagiti Mabalin nga Aktibidad
-
Gupgopem ti estoria ti kumbersion ni Saulo a masarakan iti Dagiti Aramid 9:1–20(kitaen met iti “Kapitulo 59: Adalen ni Saulo ti maipapan ken ni Jesus,” Dagiti Estoria iti Baro a Tulag,154–55, wenno ti maitutop a video iti LDS.org).
-
Ilista wenno itugot dagiti ladawan ti bambanag nga agbalbaliw, a kas iti bayyek, nga abalbaliw nga agbalin a tukak, wenno dagiti kayo kabayatan ti nadumaduma a panawen. Kasano a nagbalbaliw ni Saulo idi bumisita kenkuana ni Jesucristo?
-
Mangidrowing iti nagkurba a kalsada iti pisarra. Awisem dagiti ubbing a manginagan kadagiti lugar a kayatda nga sarungkaran, ket isurat daytoy iti tuktok ti maysa a kalsada. Ania ti mapasamak no agturongtayo iti biddut a dalan? Kasano a maipada ti panagbabawi titi panagsubli iti umno a dalan?
-
Kiddawen kadagiti ubbing a mangulit no ania ti kinuna ni Saulo iti apo: “Ania ti rebbeng nga ipaaramidmo naniak?” Ania ti kayat ti Apo nga aramidentayo?
Isuro ti Doktrina
Dagiti In-inauna nga Ubbing
Agbalinakto a saksi ni Jesucristo.
Kasano a matulongam dagiti ubbing a sursuruam a makasursuro manipud iti pagwadan ni Esteban iti pangitakder a kas saksi ni Jesucristo?
Dagiti Mabalin nga Aktibidad
-
Basaen ti Dagiti Aramid 6:5–15 ken 7:51–60 kadagiti ubbing. Kasano a maysa ni Esteban a saksi ni Jesucristo? Awisem ti maysa wenno ad-adu pay nga ubbing nga agpammarangda a ni Esteban ken ibinglayda no ania ti patienda ken no apay.
-
Awisem dagiti ubbing nga agsisinnublat a basaenda ti Dagiti Aramid 6:3–10, a mangsukisok kadagiti kababalin ni Esteban a nakatulong kenkuana nga agserbi.
-
Kiddawen kadagiti ubbing a mangtulong kenka a mangpanunot kadagiti kasasaad a mabalin a pakapagtakderanda a saksi ni Jesucristo ken ti ebangheliona. Tulongam ida a mangyakem kadagiti sumagmamano a kasasaad. Kiddawen kadagiti ubbing a mangbasa iti Mosiah 18:9. Ilawlawag a ti maysa a saksi ni Jesucristo ket mairaman kadagiti kari nga inaramidtayo iti panagbuniag.
-
Isurat dagiti nagan da Esteban ken Felipe iti pisara. Iti babaen ti nagan ni Esteban, isurat dagiti wagas a pakapagbalinantayo a pagwadan kadagiti dadduma. Babaen iti nagan ni Felipe, isurat dagiti wagas a pakaibinglayantayo iti ebanghelio kadagiti dadduma. Kasano a ti panagbalin a pagwadan ti maysa a disipulo ni Jesucristo ket makatulong kadatayo a mangibinglay iti ebanghelio?
Maysa a di magatadan a sagut ti priesthood a naggapu iti Dios.
Itandudo ni Satanas ti mensahe a dagiti material a banag ket mangyeg kadatayo ti kinaragsak. Kasano a mausarmo ti estoria ni Simon tapno matulongam dagiti ubbing a mangipateg kadagiti banag a naespirituan kas iti priesthood ken dagiti bendisionna?
Dagiti Mabalin nga Aktibidad
-
Gupgopem ti estoria ni Simon a masarakan iti Dagiti Aramid 8:5–24 (kitaen met ti “Kapitulo 58: Ni Simon ken ti Priesthood,” DagitimEstoria iti Baro a Tulag, 152–53, wenno ti maitutop a video iti LDS.org). Apay a saantayo a maawat ti priesthood babaen ti pananggatang iti daytoy? Kasano a talaga ti panangawat ti maysa a tao ti priesthood? (Kitaen ti Pagannurotan ti Pammati 1:5).
-
Ikkam dagiti ubbing ti saan a pudno a kuarta, ken i-display dagiti ladawan ti bambanag a mabalin a magatang ti kuarta. Kiddawen kadagiti ubbing no mano kadagitoy a saan a pudno a kuartada ti itedda para kadagitoy a banag. Kalpasanna mangipakita kadagiti ladawan ti sakramento, templo (a mangibagi ti bendision ti templo), panagbuniag, ken dadduma pay a bendision nga awatentayo babaen ti priesthood. Ilawlawag a dagitoy a sagut a naggapu iti Dios ket di magatadan ken saan a magatang ti kuarta.
No agaramidak iti biddut, awisennak ti Nailangitan nga Ama nga agbabawi ken agbalbaliw.
Idi imbaga ni Jesus ken ni Saulo a mamagsardeng ti pangidaddadanes iti Simbaan ti Apo, ni Saulo ket dagus a nagbabawi ken nagbalbaliw. Kasano a makatulong daytoy a pakaammo kadagiti ubbing a sursuruam nga agtarigagay nga agbalbaliw a dagus no nakaaramidda iti biddut?
Dagiti Mabalin nga Aktibidad
-
Awisem dagiti ubbing a mangkulpi iti maysa a papel iti kagudua. Kiddawem nga isuratda ti Sakbay iti kagudua ken Kalpasan iti sabali a kagudua. Basaem a kadua dagiti ubbing ti Dagiti Aramid 8:1–3; 9:1–2; ken 9:17–22, a mangsapsapul kadagiti balikas wenno ragup dagiti balikas a mangiladawan ken ni Saulo sakbay ken kalpasan a nakitana ti Apo.
-
Awisem ti maysa a miembro ti ward a mangibinglay ti estoria ti kumbersionna ken no kasano a nagbalbaliw ti biagna a kas met iti panagbalbaliw ti biag ni Saulo.
-
Agdrowing iti “dalan nga agturong idiay Damasco” iti pisarra. Awisem dagiti ubbing a basaenda ti Dagiti Aramid 9:6, 11, 18, 20–22, a mangsukisok no ania ti inaramid ni Saul anagbabawi ken nagsubli ken ni Cristo, ket isurat dagitoy a tignay iti kalsada. Ania ti masursurotayo manipud ken ni Saul maipapan no kasano a makapagbalintayo nga ad-adda pay a kas ken ni Cristo?
-
Awisem dagiti ubbing a mangidrowing iti paggugustodda a paset ti pakaammo iti kumbersion ni Saul ken ibinglay dagiti drowingda iti klase.
Yallukoy ti Panagsursuro iti Pagtaengan
Allukoyem dagiti ubbing a mangisarita iti pamiliada ti paggugustoda nga aktibidad manipud iti klase iti agdama ken no ania ti naisuro kadakuada daytoy.
Panangpadur-as iti Panangisurotayo
Tulongam dagiti ubbing a makasursuro manipud kadagiti nasantuan a kasuratan. Mabalin a saan unay a kabaelan dagiti inaudi nga ubbing ti agbasa, ngem mabalinmo latta nga iraman ida nga agsursuro manipud kadagiti nasantuan a kasuratan. Kas pagarigan, mabalin a basaem ti maysa a binatog ket awisem ida nga agtakderda wenno ingato dagiti imada no mangngeganda a nalawag ti maysa a balikas wenno ragup dagiti balikas a kayatmo nga ipokus (kitaen iti Panangisuro iti Wagas ti Mangisalakan).