“3–9 Siulai. Ngāue 1–5: ‘Ko ʻEku Kau Fakamoʻoni ʻa Kimoutolu,’” Haʻu, ʻo Muimui ʻIate Au—Maʻá e Palaimelí: Fuakava Foʻoú 2023 (2022)
“3–9 Siulai. Ngāue 1–5,” Haʻu, ʻo Muimui ʻIate Au—Maʻá e Palaimelí: 2023
ʻAho ʻo e Penitekosí, tā ʻa Sidney King
3–9 Siulai
Ngāue 1–5
“Ko ʻEku Kau Fakamoʻoni ʻa Kimoutolu”
Kamata hoʻo teuteú ʻaki haʻo lau e Ngāue 1–5. Fekumi ʻi he faʻa lotu ke mahino e ngaahi fiemaʻu ʻa e fānau ʻokú ke akoʻí. ʻE lava foki ke tokoni atu ʻa e Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí mo e fokotuʻutuʻu ko ʻení kiate koe.
Fakaafeʻi e Feʻinasiʻakí
Tohiʻi e Ko hai Au? ʻi he palakipoé. ʻOange ha ngaahi fakamatala ʻe niʻihi fekauʻaki mo Pita pea fehuʻi ki he fānaú pe ʻoku fekauʻaki e ngaahi fakamatalá mo hai? Ko e hā mo ha toe meʻa ʻoku nau ʻilo fekauʻaki mo Pita?
Akoʻi e Tokāteliné: Fānau Iiki Angé
ʻOku tataki ʻe Sīsū Kalaisi ʻa Hono Siasí ʻo fakafou ʻi ha kau palōfita mo e kau ʻaposetolo.
ʻE lava ke tokoni ʻa e ako fekauʻaki mo e founga naʻe tataki ʻaki ʻe he Fakamoʻuí ʻa Hono Siasí ʻi he kuonga muʻá ʻo fakafou ʻi he kau ʻaposetoló, ke maʻu ai ʻe he fānaú ʻa e ngaahi fakamoʻoni ki he kau palōfita mo e kau ʻaposetolo ʻi hotau kuongá.
Ngaahi ʻEkitivitī ʻe Ala Fakahokó
-
Fakaʻaliʻali ange ʻa e fakatātā peesi kakato mei he fokotuʻutuʻu ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí. ʻEke ange ki he fānaú pe ʻoku nau pehē ko e hā e ʻuhinga ʻoku sio ʻa e kakaí ki he langí. Fakamatala fakaikiiki e talanoa mei he Ngāue 1:1–11. (Vakai foki, “Vahe 55: Ko Hono Tataki ʻe he Kau ʻAposetoló ʻa e Siasí,” ʻi he Ngaahi Talanoa ʻo e Fuakava Foʻoú, 145–47, pe ko e vitiō fekauʻaki mo iá ʻi he ChurchofJesusChrist.org.) Fakaafeʻi ha tokotaha ke ne puke hake ha fakatātā ʻo e kau ʻAposetolo lolotongá. Ko hai ʻoku tokoni kia Sīsū Kalaisi ke tataki ʻa e Siasí ʻi he taimi ʻoku ʻikai ke Ne ʻi he māmaní aí?
-
Fakahoko ha vaʻinga fakatauhoa ʻo fakaʻaongaʻi ha ongo seti ʻe ua ʻo e ʻū tā ʻo e Kau Palesitenisī ʻUluakí mo e Kau ʻAposetolo ʻe Toko Hongofulu Mā Ua ʻoku moʻuí. ʻI he taimi ko ia ʻoku hoa ai ha ongo fakatātā, vahevahe e hingoa ʻo e ʻAposetolo pe Palesiteni ko iá, mo ha meʻa fekauʻaki mo ia.
-
ʻI he tafaʻaki ki mui ʻo ha tā ʻo e Palesiteni ʻo e Siasí, fakapipiki ha ʻū fakatātā iiki ʻo e ngaahi meʻa ʻokú ne akoʻi, hangē ko e Fakamoʻuí, papitaisó, pe ko ha temipale. Tuku ki he fānau takitaha ke nau taufetongi ʻi he vakai ki ha taha ʻo e ʻū fakatātaá pea talaange ki he toenga ʻo e kalasí, “ʻOku akoʻi kitautolu ʻe he palōfitá fekauʻaki mo e [tefito ʻo e fakatātaá].” Fakamoʻoni ange, ʻoku akoʻi mai ʻe he kau palōfitá mo e kau ʻaposetoló ʻa e meʻa ʻoku finangalo ʻa Sīsū ke tau ʻiloʻi mo fakahokó.
ʻOku lava ke tāpuekina ʻe he Tamai Hēvaní e niʻihi kehé ʻo fakafou ʻiate au.
Ko e hā te ke lava ʻo fai ke tokoni ki he fānaú ke nau fakatokangaʻi ha ngaahi founga te nau lava ai ʻo tāpuekina e niʻihi ʻoku nau feohí? Tokoniʻi ke nau ako mei he sīpinga ʻo hono fakamoʻui ʻe Pita mo Sione ʻa e tangata pipikí.
Ngaahi ʻEkitivitī ʻe Ala Fakahokó
-
Fakaafeʻi e fānaú ke nau fakatātaaʻi fakatatau mo e talanoa ʻi he Ngāue 3:1–10, hangē ko hono tuku atu honau nimá ke kole ha paʻanga mo puna fiefia. Naʻe tāpuekina fēfē ʻe he Tamai Hēvaní ʻa e tangata naʻe ʻikai lava ʻo lué?
-
ʻOmi ha kato ʻoku ʻi ai ha ʻū fakatātā ʻokú ne fakafofongaʻi ʻa e ngaahi founga ʻe lava ke tau tāpuekina mo tokoniʻi ai e niʻihi kehé. Tuku ki he fānaú ke nau taufetongi ʻi hono fili ha ʻū fakatātā mei he kató pea vahevahe e founga te nau lava ai ʻo faitāpuekina e niʻihi kehé ʻi he founga ko iá.
-
Kole ki he fānaú ke nau vahevahe ki ha taimi ne nau tokoniʻi ai ha taha.
Te u lava ʻo faitotonu.
Naʻe vahevahe ʻe he kau Kalisitiane ʻi onoʻahó ʻa e meʻa ne nau maʻú, ke tokoni ke nau fetauhiʻaki. Ko kinautolu ne nau maʻu kelekelé, ne nau fakatau atu ia pea foaki ʻa e paʻangá ki he kau ʻAposetoló, ʻa ia ne nau foaki ki he Kāingalotú ʻo fakatatau mo ʻenau ngaahi fiemaʻú. Naʻe taʻe-faitotonu ʻa ʻAnanaia mo Safaila ʻi heʻena tokoní, mo fakakaukau te na lava ʻo kākaaʻi e kau tamaioʻeiki ʻa e ʻEikí.
Ngaahi ʻEkitivitī ʻe Ala Fakahokó
-
Tokoniʻi e fānaú ke nau fakatātaaʻi ʻa e talanoa ʻo ʻAnanaia mo Safailá. Fakamatalaʻi ange neongo he ʻikai ke tau mate ʻi he taimi ʻoku tau loi aí, ka ʻoku fakahā mai ʻe he talanoa ko ʻení ʻa e mahuʻinga ʻo e faitotonú ki he Tamai Hēvaní.
-
Tokoniʻi e fānaú ke mahino kiate kinautolu, ʻoku ʻuhinga ʻa e faitotonú ki hono tala maʻu pē ʻa e moʻoní pea ʻoua naʻa toʻo e ngaahi meʻa ʻa ha tokotaha kehe.
-
Fakaʻaongaʻi ha ngaahi tamapua pepa ke nau fakatātaaʻi ha ngaahi tūkunga faingofua ʻa ia ʻoku faitotonu pe taʻefaitotonu ai ha tokotaha. Kole ki he fānaú ke nau tuʻu ki ʻolunga kapau ʻoku faitotonu e tokotahá pe tangutu he falikí kapau ʻoku taʻefaitotonu. Tokoni ke mahino ki he fānaú ʻa e ʻuhinga ʻoku mahuʻinga ai ke faitotonú.
Akoʻi e Tokāteliné: Fānau Lalahi Angé
ʻOku tataki ʻe Sīsū Kalaisi ʻa Hono Siasí ʻo fakafou ʻi ha kau palōfita mo e kau ʻaposetolo.
Te ke tokoni fēfē nai ke mahino ki he fānaú, ʻoku tataki e Siasi ʻo e Fakamoʻuí ʻi he kuongá ni ʻe ha kau palōfita mo ha kau ʻaposetolo, ʻo hangē pē ko ia ʻi he kuonga muʻá?
Ngaahi ʻEkitivitī ʻe Ala Fakahokó
-
Hikiʻi ʻi he palakipoé ʻOku tataki fēfē ʻe Sīsū Kalaisi ʻa e Siasí ʻi he taimi ʻoku ʻikai ke Ne ʻi māmani aí? Fakaafeʻi e fānaú ke nau fakafanongo ki ha ngaahi tali ki he fehuʻí, lolotonga hoʻo lau e ngaahi folofola ʻa e Fakamoʻuí ki he kau ʻAposetoló ʻi he Ngāue 1:8. Tokoni ke mahino ki he fānaú kuo fili ʻe Sīsū ha kau palōfita mo ha kau ʻaposetolo ke tataki ʻa e Siasí he kuongá ni, ʻo hangē pē ko ia naʻá Ne fakahoko ʻi he kuonga muʻá.
-
Lau fakataha e Ngāue 1:22–26. Feinga mo e kalasí ke ʻiloʻi e founga naʻe uiuiʻi ʻaki ʻe he kau ʻAposetoló ha ʻAposetolo foʻoú.
-
Tomuʻa kole ki ha fānau pe ko ʻene mātuʻá ke ne ako fekauʻaki mo ha ʻAposetolo ne toki uiuiʻi kimuí ni. Fakaafeʻi ʻa e tokotaha ko iá ke ne vahevahe mo e kalasí ʻa e meʻa naʻá ne akó, pea kapau ʻe lava, ko e hā naʻe lea ʻaki ʻe he ʻAposetoló fekauʻaki mo hono uiuiʻí ʻi heʻene fuofua pōpoaki ʻi he konifelenisi lahí.
Naʻe tataki ʻe he Kau ʻAposetoló ʻa e Siasí hili e hāʻele hake ʻa Sīsū ki he langí.
ʻOku fakamoʻoniʻi mai ʻe he Laumālie Māʻoniʻoní ki hoku lotó, ʻa e ngaahi moʻoni ʻo e ongoongoleleí.
ʻI he taimi ʻoku ako ai e fānaú ke fakatokangaʻi e founga ʻoku lea ai e Laumālie Māʻoniʻoní kiate kinautolú, ʻe ueʻi ai kinautolu ke nau fakafanongo mo ngāueʻi e ueʻi fakalaumālie ʻoku nau maʻú.
Ngaahi ʻEkitivitī ʻe Ala Fakahokó
-
Lau fakataha e Ngāue 2:36–37. ʻOku tau ongoʻi fēfē ʻi he taimi ʻoku talamai ai ʻe he Laumālie Māʻoniʻoní ha meʻa ʻi hotau lotó?
-
Faʻu mo e kalasí ha pousitā ʻoku tohi ʻi ʻolunga e ngaahi lea Ko e hā te tau faí? Fakaʻaliʻali ʻa e pousitaá ʻi he uike takitaha, pea tānaki atu ha ngaahi founga ʻe lava ai ʻe he fānaú ke nau ngāueʻi e meʻa ne nau ako ʻi he lēsoni ʻo e uike takitaha.
-
Fakaafeʻi e fānaú ke nau lau ʻa e Ngāue 2:41–47 pea kumi e ngaahi meʻa lelei naʻe fai ʻe he kakaí hili ʻenau papitaisó. Ko e hā ha ngaahi meʻa lelei te tau lava ʻo fai ke fakahaaʻi ʻoku tau fakamāloʻia e meʻafoaki ʻo e Laumālie Māʻoniʻoní, ʻa ia ʻoku tau maʻu ʻi he taimi ne papitaiso ai kitautolú?
ʻOku lava ke tāpuekina ʻe he Tamai Hēvaní e niʻihi kehé ʻo fakafou ʻiate au.
Te ke lava fēfē ʻo akoʻi ki he fānaú ʻoku malava ke nau faitāpuekina e niʻihi kehé, neongo kapau ʻoku ʻikai ke nau maʻu e “silivá mo e koulá”? (Ngāue 3:6). Te ke lava fēfē ʻo tokoniʻi ke nau vakai ki he ngaahi faingamālie ke tokoni ki he ʻOtuá ʻaki ha ngāue tokoni ki he niʻihi kehé? (vakai, Mōsaia 2:17).
Ngaahi ʻEkitivitī ʻe Ala Fakahokó
-
Kole ki ha taha ʻo e fānaú ke lau e Ngāue 3:1–10 lolotonga iá ʻoku fakatātāaʻi ʻe he toenga ʻo e fānaú e talanoá. (Ki ha tokoni, vakai ki he “Vahe 56: Ko e Fakamoʻui ʻe Pita ha Tangata,” ʻi he Ngaahi Talanoa ʻo e Fuakava Foʻoú, 148–49, pe vitiō fekauʻaki mo iá ʻi he ChurchofJesusChrist.org.) Ko e hā ʻa e founga naʻe lahi ange ai ʻa e tāpuaki naʻe maʻu ʻe he tangatá ni ʻi he paʻanga naʻá ne kolé?
-
ʻAve takai ha kato koini. ʻI hono puke ʻe he fānaú ʻa e kató, fehuʻi ange pe ko e hā ha meʻa te nau lava ʻo fakatau mai ʻaki e paʻangá. Fehuʻi ki he fānaú pe ko e hā ha meʻa ʻoku tau maʻu ke foaki ki he niʻihi kehé, ʻoku ʻikai fakamole ki ai ha paʻanga. Fakaafeʻi ke nau vahevahe e founga te nau lava ai ʻo tokoniʻi e niʻihi kehé ke nau ofi ange ki he Fakamoʻuí—ko ha meʻaʻofa ʻoku ʻikai fie maʻu ki ai ha paʻanga (Ngāue 3:6).
Poupouʻi e Ako ʻi ʻApí
Poupouʻi e fānaú ke nau palani ha founga ʻe taha te nau lava ai ʻo tokoni ki he Tamai Hēvaní ʻaki hano tokoniʻi ha mēmipa ʻo honau fāmilí he uiké ni.
Fakatupulaki ʻEtau Founga Akoʻí
Ako maʻuloto ha potufolofola. Fili ha kupuʻi folofola ʻokú ke fakakaukau ʻe ala tokoni ki he fānau ʻi hoʻo kalasí, hangē ko e Ngāue 2:38 pe Ngāue 3:19, pea tokoniʻi ke nau maʻuloto ha kupuʻi lea mei he folofolá. ʻE lava foki ke tokoni e ʻū fakatātaá ke ako maʻuloto ʻe he fānaú ʻa e folofolá.