“24–30 Sānuali. Mōsese 7: ‘Naʻe Ui ʻe he ʻEikí ʻa Hono Kakaí ko Saione,’” Haʻu, ʻo Muimui ʻIate Au—Maʻá e Palaimelí: Fuakava Motuʻá 2022 (2021)
“24–30 Sānuali. Mōsese 7,” Haʻu, ʻo Muimui ʻIate Au—Maʻá e Palaimelí: 2022
Love One Another, [Ke Mou Feʻofaʻaki] tā ʻe Emma Donaldson Taylor
24–30 Sānuali.
Mōsese 7
“Naʻe Ui ʻe he ʻEikí ʻa Hono Kakaí ko Saione”
Kamata hoʻo teuteú ʻaki hoʻo lau e Mōsese 7. ʻE lava ke tokoni atu ʻa e Haʻu ʻo Muimui ʻIate Au—Maʻá e Fakafoʻituituí mo e Ngaahi Fāmilí ke mahino ʻa e vahe ko ʻení, pea ʻe lava ke ʻoatu ʻe he ngaahi fakakaukau ko ʻeni ʻi laló ha ngaahi fakakaukau ki he founga ke akoʻi ʻaki ia ki he fānaú.
Lekooti Hoʻo Ngaahi Ongó
Fakaafeʻi e Feʻinasiʻakí
Tuku ha kiʻi taimi ke mou toe vakaiʻi mo e fānaú ʻa e meʻa ʻoku nau ʻilo fekauʻaki mo e palōfita ko ʻĪnoké—ʻo kau ai ʻa e meʻa ne nau ako ʻi he lēsoni he uike kuo ʻosí. Kapau ʻe ʻaonga, fakaʻaliʻali ha fakatātā mei he lēsoni ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí.
Akoʻi e Tokāteliné: Fānau Iiki Angé
ʻOku finangalo ʻa e ʻOtuá ke tau feʻofaʻaki.
ʻOku fakamatalaʻi ʻe he ngaahi veesi ko ʻení ʻa e ngaahi ʻulungaanga ʻo e kakai ʻo Saioné. Te ke tokoniʻi fēfē ʻa e fānaú ke nau fakatupulaki ʻa e ngaahi ʻulungaanga ko ʻení?
Ngaahi ʻEkitivitī ʻe Ala Fakahokó
-
Vahevahe ʻa e talanoa ki he kakai ʻo ʻĪnoké mei he “ ʻĪnoke” (ʻi he Ngaahi Talanoa mei he Fuakava Motuʻá), pe tuku ki he fānaú ke nau fakamatala ʻa e talanoá ʻi heʻenau lea pē ʻanautolu ʻo ngāue ʻaki ʻa e fakatātā ʻo ʻĪnoke ʻi he lēsoni ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí. ʻE lava foki ke mou hivaʻi mo e fānaú ʻa e veesi hono ua ʻo e “Muimui He Palōfitá” (Tohi Hiva ʻa e Fānaú, 58) ke toe fakamatalaʻi ʻa e talanoá.
-
Tokoniʻi e fānaú ke nau fakakaukau ki ha ngaahi ngāue ʻoku felāveʻi mo e kupuʻi lea “loto-taha pē mo fakakaukau taha” (Mōsese 7:18). Fakamatalaʻi ange ʻoku ʻuhinga ʻa e kupuʻi lea ko ʻení, naʻe feʻofaʻaki mo angalelei ʻa e kakai ʻo ʻĪnoké. Fakaafeʻi ke nau fakaʻaongaʻi ʻa e peesi ʻekitivitī ki he uike ní ke tā ha founga ʻe lava ke nau fakahaaʻi ai ʻa e ʻofá.
-
Hivaʻi ha foʻi hiva fekauʻaki mo e feʻofaʻakí, hangē ko e “ ʻOfa ʻi ʻApi” (Ngaahi Himí, fika 187). ʻOmi ha ʻū fakatātā ʻoku fakahaaʻi ai ʻa e ngaahi kupuʻi lea mahuʻinga ʻi he foʻi hivá ke tokoni ki he fānaú ke nau ako ʻa e fakaleá. Kole ki he fānaú ke nau vahevahe ha ngaahi founga ʻe lava ke nau fakahaaʻi ai ʻa ʻenau feʻofaʻaki ʻi he Palaimelí pea ʻi honau ʻapí. Pea tuku leva ke nau fakatātaaʻi ʻenau ngaahi fakakaukaú.
ʻOku totonu ke tau feinga ke “loto-taha pē mo fakakaukau taha” (Mōsese 7:18).
ʻOku tokanga ʻa e ʻOtuá ki Heʻene fānaú.
Te ke lava ʻo tokoni ke ʻilo ʻe he fānaú ʻoku tokanga makehe ʻa e Tamai Hēvaní mo Sīsū Kalaisi kiate kitautolu mo ʻetau ngaahi angafaí.
Ngaahi ʻEkitivitī ʻe Ala Fakahokó
-
Tokoniʻi e fānaú ke nau fakakaukau ki ha ngaahi meʻa ʻoku fakahōifua ki he Tamai Hēvaní. Lau ʻa e Mōsese 7:28 mo e fānaú, pea fakamatalaʻi ange naʻe loto-mamahi ʻa e Tamai Hēvaní he naʻe fuʻu lahi ʻaupito ʻa e faiangahala ʻa e kakaí (vakai, veesi 32–33).
-
Tuku ki he fānaú ke nau tā ha fofonga fiefia ʻi he tafaʻaki ʻe taha ʻo ha laʻipea mo ha fofonga mamahi ʻi he tafaʻaki ʻe tahá. Fakalau ha ngaahi ngāue lelei, hangē ko e fai ha lotú, pea mo ha ngaahi ngāue kovi, hangē ko e loí, pea kole ki he fānaú ke nau pukepuke hake ʻa e fofonga fiefiá pe mamahí ke fakahaaʻi ʻa e ongo ʻe maʻu ʻe he Tamai Hēvaní mo Sīsū Kalaisi fekauʻaki mo e fili takitaha.
-
Fakaafeʻi e fānaú ke nau fai ha foʻi vaʻinga ʻa ia ʻoku nau fakatātaaʻi ai ha ngaahi meʻa ʻe lava ke nau fai ʻa ia ʻoku fakahōifua ki he Tamai Hēvaní. Kole ki he fānau ko eé ke nau mateʻi pe ko e hā e meʻa ʻoku nau faí. Vahevahe mo e fānau takitaha ha meʻa kuó ke mamata kuo nau fai ʻa ia ʻoku fakahōifua ki he Tamai Hēvaní.
ʻE toe hāʻele mai ʻa Sīsū ki māmani.
ʻI he mata meʻa-hā-mai ʻa ʻĪnoké, naʻá ne mamata ai ki he ngaahi ʻaho fakaʻosí, ʻo kau ai ʻa e Hāʻele ʻAnga Ua Mai ʻa e Fakamoʻuí. Te ke tokoniʻi fēfē nai ʻa e fānaú ke nau hanganaki atu ki he Hāʻele ʻAnga Uá?
Ngaahi ʻEkitivitī ʻe Ala Fakahokó
-
Talaange ki he fānaú ke nau fakakaukauloto ʻoku haʻu ha tokotaha makehe ʻo ʻaʻahi mai kiate kinautolu. Ko e hā ha meʻa te nau fai ke teuteu ai ki he ʻaʻahí? Vahevahe e folofola ʻa e ʻEikí kia ʻĪnoke ʻi he Mōsese 7:60: “[Te u] haʻu ʻi he ngaahi ʻaho fakaʻosí.” Ko e hā ha ngaahi founga ʻe lava ke tau mateuteu ai ki he toe hāʻele mai ʻa Sīsuú?
-
Fakaʻaliʻali e ʻū fakatātā ʻo e ngaahi taimi ne hā ai ʻa e Fakamoʻuí ki he kakaí (vakai, Tohi Fakatātā ʻo e Ongoongoleleí, fika 60, 82, 83, mo e 84). Ko e hā e meʻa ʻoku fai ʻe he kakaí ʻi he ʻū fakatātaá? Ko e hā nai e ongo ne maʻu ʻe he kakaí ʻi heʻenau feʻiloaki mo Sīsuú? Tuku ki he fānaú ke nau vahevahe ʻenau ongo fekauʻaki mo e mamata kia Sīsū ʻi Heʻene toe hāʻele maí.
-
Hivaʻi ha foʻi hiva fekauʻaki mo e Hāʻele ʻAnga Ua Mai ʻa e Fakamoʻuí, hangē ko e “ ʻO Ka Ne Ka Toe Haʻú” (Tohi Hiva ʻa e Fānaú, 46), pea fehuʻi ki he fānaú pe ʻoku nau fakakaukau nai pe ʻe fēfē ʻa e taimi ʻe toe hāʻele mai ai ʻa Sīsuú.
Akoʻi e Tokāteliné: Fānau Lalahi Angé
ʻE lava ke tau taha ʻo hangē ko e kakai ʻo Saioné.
ʻI hoʻo laukonga fekauʻaki mo Saioné, fakalaulauloto ki he ngaahi sīpinga ʻo e uouangatahá kuó ke mamata ki aí. Te ke tokoniʻi fēfē ʻa e fānaú ke nau ako ke hoko ʻo uouangataha ʻo hangē ko ia ne maʻu ʻe he kakai ʻo ʻĪnoké?
Ngaahi ʻEkitivitī ʻe Ala Fakahokó
-
Kole ki he fānaú ke nau fekumi ki ha ngaahi foʻi lea ʻokú ne fakamatalaʻi ʻa e kakai ʻo ʻĪnoké, ʻa ia ʻoku toe ʻiloa ko Saioné, ʻi heʻenau lau ʻa e Mōsese 7:18. Tohiʻi e ngaahi foʻi lea ko ʻení ko ha ngaahi kaveinga ʻi he palakipoé, pea fakaafeʻi e fānaú ke nau hiki ʻi lalo ʻi he kaveinga takitaha ʻa e ngaahi meʻa ʻe lava ke nau fai ke nau tatau ange ai mo e kakai ʻo ʻĪnoké. ʻO ka hili ʻenau vahevahé, fehuʻi ki he fānaú pe ko e hā ha founga te nau ngaohi ai honau tukui ʻapí ke hangē ko Saioné. ʻE lava ke nau maʻu ha ngaahi fakakaukau ʻi he 4 Nīfai 1:15–18.
-
Kole ki he fānaú ke nau lau pe ʻoku tuʻo fiha e ʻasi ʻa e foʻi lea “Saione” ʻi he Mōsese 7:18–21, 62–63, 68–69. Ko e taimi kotoa pē ʻoku ʻasi ai e foʻi leá, tokoni ke ʻiloʻi ʻe he fānaú ʻa e meʻa ʻoku fakamatala ʻe he vēsí fekauʻaki mo Saioné (vakai foki ki he Fakahinohino ki he Ngaahi Folofolá, “Saione,” scriptures.ChurchofJesusChrist.org). Te tau lava fēfē ke tatau mo e kakai ʻoku fakamatalaʻi ʻi he ngaahi veesi ko ʻení?
-
Fakaʻaongaʻi ʻa e peesi ʻekitivitī ki he uike ní ke tokoni ki he fānaú ke nau fakakaukau ki ha ngaahi founga ʻe lava ke nau “loto-taha pē mo fakakaukau taha” (vakai, Mōsese 7:18).
ʻOku tangi ʻa e ʻOtuá maʻa ʻEne fānaú.
Te ke tokoni fēfē ke ʻiloʻi ʻe he fānaú ʻoku tokanga mai ʻa e ʻOtuá kiate kitautolu mo ʻetau ngaahi angafaí?
Ngaahi ʻEkitivitī ʻe Ala Fakahokó
-
Kole ki he fānaú pe ko e hā nai ha meʻa te ne fakatupunga ʻa e tangi ʻa e ʻOtuá (vakai, Mōsese 7:28–31). Fakaafeʻi e fānaú ke nau fekumi ʻi he Mōsese 7:32–33, 37 ki ha ngaahi tali. Ko e hā e meʻa ʻoku akoʻi mai ʻe he ngaahi veesi ko ʻení fekauʻaki mo e ongo ʻoku maʻu ʻe he ʻOtuá ki Heʻene fānaú? ʻOku tau ʻiloʻi fēfē ʻoku ʻofa ʻa e ʻOtuá ʻiate kitautolú? Vahevahe hoʻo fakamoʻoni ki he ʻofa ʻa e ʻOtuá ʻiate kitautolú.
-
Lī ha kato piini pe ko ha foʻi pulu ki ha kiʻi tamasiʻi pe taʻahine. Kole ange ke ne fakaʻosi ʻa e kupuʻi lea “Te u lava ʻo fakahoifua ki he ʻOtuá ʻaki e …” pea lī leva ki ha tokotaha ʻe taha. Toutou fai pehē kae ʻoua kuo maʻu ʻe he fānau kotoa pē hano faingamālie.
ʻE toe hāʻele mai ʻa Sīsū Kalaisi ʻi he ngaahi ʻaho fakaʻosí.
ʻI hoʻo laukonga fekauʻaki mo e Hāʻele ʻAnga Ua Maí ʻi he Mōsese 7:60–67, fakakaukau pe te ke akoʻi fēfē ia ki he fānaú ʻi ha founga ʻoku fakafiefiá.
Ngaahi ʻEkitivitī ʻe Ala Fakahokó
-
Lau fakataha ʻa e Mōsese 7:60–67, pea tokoni ke ʻiloʻi ʻe he fānaú ʻa e ngaahi meʻa ʻoku folofola ʻe he ʻEikí ʻe hoko ʻi he ngaahi ʻaho fakaʻosí. Fehuʻi ange pe ko e fē ʻi he ngaahi meʻá ni ʻoku nau fakatuʻamelie ki aí pea ko e hā hono ʻuhingá.
-
Fakaafeʻi e fānaú ke nau talanoa ki ha taimi ne nau tatali ai ki ha taha ke ʻaʻahi mai pe foki mai ki ʻapi. Ko e hā e ongo ne maʻu ʻe he fānaú? Ko e hā e meʻa naʻa nau fai ke mateuteu aí? Te tau mateuteu fēfē ke toe mamata kia Sīsuú?
-
Fakaʻaliʻali ha fakatātā ʻo e Hāʻele ʻAnga Ua Mai ʻa e Fakamoʻuí (hangē ko ʻení, vakai ki he Tohi Fakatātā ʻo e Ongoongoleleí, fika 66). Tuku ki he fānaú ke nau tā haʻanau fakatātā pē ʻanautolu ʻo e Hāʻele ʻAnga Ua Maí, ʻo makatuʻunga ʻi he meʻa ne nau lau ʻi he Mōsese 7:60–67.
Poupouʻi e Ako ʻi ʻApí
Te ke poupouʻi fēfē nai e fānaú mo ʻenau ngaahi fāmilí ke hokohoko atu ʻenau ako mei he Fuakava Motuʻá ʻi ʻapí? Hangē ko ʻení, ʻe lava ke vahevahe ʻe he fānaú ha meʻa ne nau tā pe valivali ʻi he Palaimelí ko ha konga ʻo ha lēsoni efiafi fakafāmili.
Fakatupulaki ʻEtau Founga Akoʻí
Tokoniʻi e fānaú ke nau longomoʻui. “ʻI hoʻo akoʻi ʻa e fānaú, tuku ke nau faʻu, tā fakatātaaʻi, valivali, tohi [pea] mohu founga. ʻOku mahulu hake e hoko e ngaahi meʻá ni ia ko ha fanga kiʻi ʻekitivitī fakafiefia peé—ʻoku mahuʻinga ia ki he akó” (Ko e Faiako ʻi he Founga ʻa e Fakamoʻuí, 26).