Fakatātā ʻo e ʻEikí ʻi Heʻene hā kia Mōsese mo e kaumātuʻa ʻe toko 70 ʻo ʻIsilelí, tā ʻe Jerry Harston

25 ʻEpeleli–1 Mē

ʻEkesōtosi 24; 31–34

“Te U ʻAlu mo Koe”

ʻI he teuteu ʻa Mōsese ke tataki e fānau ʻo ʻIsilelí ki he fonua ʻo e talaʻofá, ne folofola e ʻEikí ʻo pehē, “Te u ʻalu mo koe” ( ʻEkesōtosi 33:14). ʻI hoʻo teuteu ke akoʻi ʻa e fānau ʻi hoʻo kalasí, fakakaukau ki he founga te ke lava ai ʻo fakaafeʻi e ʻEikí ke “ ʻalu mo [koé].”

Lekooti Hoʻo Ngaahi Ongó

Fakaafeʻi e Feʻinasiʻakí

Kole ki he fānau takitaha ke fili ha taha pē ʻo e ʻū laʻipepa ʻoku fakafikefiká. Fakaʻaongaʻi e ngaahi fika ko ʻení ke ʻiloʻi e hokohoko ʻe lava ke vahevahe ai ʻe he fānaú ha meʻa ʻoku nau ako mei he folofolá, pe mei honau ʻapí pe ʻi he Palaimelí.

Akoʻi e Tokāteliné: Fānau Iiki Angé

ʻEkesōtosi 31:13, 17

Ko hono fakaʻapaʻapaʻi ʻo e ʻaho Sāpaté ko ha fakaʻilonga ia ʻo ʻeku ʻofa ki he ʻEikí.

Naʻe folofola e ʻEikí kia Mōsese, ko e taimi ʻoku tauhi ai ʻe he fānau ʻo ʻIsilelí e Sāpaté ke māʻoniʻoní, ʻoku nau fakahaaʻi ai kiate Ia ʻoku nau fie hoko ko Hono kakai.

Ngaahi ʻEkitivitī ʻe Ala Fakahokó

• Tā ha foʻi haati ʻi he palakipoé, pea ʻeke ki he fānaú pe ko e hā e ʻuhinga ‘o e fakaʻilonga ko ʻení. Tokoniʻi kinautolu ke fakakaukau ki ha ngaahi meʻa kehe ʻe lava ke hoko ko ha fakaʻilonga ʻo e ʻofá, hangē ko ha fāʻofua pe ko ha ngāue tokoni. Lau kiate kinautolu ʻa e ʻEkesōtosi 31:13. Tokoni ke mahino kiate kinautolu ko e taimi ʻoku tau tauhi ai e ʻaho Sāpaté ke māʻoniʻoní, ko ha fakaʻilonga ia ki he ʻEikí ʻoku tau ʻofa ʻiate Ia.

• Talanoa ki he fānaú fekauʻaki mo ha niʻihi ʻo e ngaahi founga ʻokú ke feinga ke fakahaaʻi ai hoʻo ʻofa ki he ʻEikí ʻi he ʻaho Sāpaté. Tuku ke nau vahevahe e founga ʻoku nau fakahoko ai ʻeni mo honau fāmilí. Fakaafeʻi kinautolu ke fakaʻaongaʻi e peesi ʻekitivitī ʻo e uike ní ke vahevahe ha ngaahi fakakaukau lahi ange.

  

  ʻI hono fakaʻapaʻapaʻi ʻo e ʻaho Sāpaté, ʻoku tau fakahaaʻi ai ʻetau ʻofa ki he ʻEikí.

ʻEkesōtosi 32:1–8, 19–24

Te u lava ʻo fakamuʻomuʻa ʻa e ʻEikí ʻi heʻeku moʻuí.

Lolotonga e fefolofolai ʻa Mōsese mo e ʻEikí ʻi he Moʻunga Sainaí, naʻe fili e fānau ʻo ʻIsilelí ke nau moihū ki ha tamapua koula kae ʻikai kiate Ia. ʻE lava ke fakamanatu ʻe he talanoá ni ki he fānau ʻokú ke akoʻí ʻoku ʻikai totonu ke tau tuku e ngaahi meʻa kehé ke mahuʻinga ange kiate kitautolu ʻi he ʻEikí.

Ngaahi ʻEkitivitī ʻe Ala Fakahokó

• Toe vakaiʻi nounou mo e fānaú ʻa e Ngaahi Fekau ʻe Hongofulú, ʻo fakamamafaʻi e ʻuluaki fekau ʻe uá (vakai, ʻEkesōtosi 20:3–6). Fakaʻaongaʻi ʻa e “Ngaahi Fekau ʻe Hongofulu” (ʻi he Ngaahi Talanoa mei he Fuakava Motuʻá) ke vahevahe mo kinautolu e talanoa mei he ʻEkesōtosi 32:1–8, 19–24. Kapau ʻe lava, tuku ke tokoni atu e fānaú hono fakahoko e talanoá. Tokoni ke mahino ki he fānaú e ngāue hala ne fakahoko ʻe he kakai ʻIsilelí ʻi he talanoa ko ʻení (ʻe lava ke ke fakamanatu ki he fānaú e ʻuluaki fekau ʻe ua ʻo e Ngaahi Fekau ʻe Hongofulú). Ko e hā naʻe totonu ke fakahoko ʻe he kakai ʻIsilelí?

• Fakaʻaliʻali ha fakatātā ʻo Sīsū Kalaisi, fakataha mo ha ngaahi fakatātā ʻo ha ngaahi meʻa kehe ʻe lava ke fakaʻaongaʻi ki ai ʻe he fānaú honau taimí, hangē ko ha ngaahi meʻa vaʻinga, fanga kiʻi vaʻinga, mo ha ngaahi meʻa pehē. Kole ki he fānaú ke nau kumi ha fakatātā ʻoku ʻasi ai e meʻa ʻoku totonu ke mahuʻinga taha kiate kitautolú. Vahevahe mo e fānaú ʻa e founga ʻoku faitāpuekina ai koe ʻi hono fakamuʻomuʻa e ʻEikí ʻi hoʻo moʻuí—ʻo aʻu ki he ngaahi meʻa kehe ʻoku leleí.

ʻEkesōtosi 33:11

Naʻe fefolofolai mata ki he mata ʻa e ʻEikí kia Mōsese.

Hili hono fakaʻauha ʻe Mōsese e ʻuhikiʻi pulu koulá, “naʻe folofola ʻa [e ʻEikí] kia Mōsese, ko e mata ki he mata, ʻo hangē ko e lea ʻa e tangatá ki hono kāingá.” ʻE lava ʻe hono ʻiloʻi ení ʻo fakatupulaki e tui ʻa e fānaú ko ha tokotaha moʻoni ʻa e ʻEikí ʻokú Ne ʻofa ʻiate kinautolu.

Ngaahi ʻEkitivitī ʻe Ala Fakahokó

• Talaange ki he fānaú e meʻa ʻokú ke ongoʻi ʻi he taimi ʻokú ke talanoa ai mo haʻo kaungāmeʻa lelei, pea ʻeke ange pe ʻoku nau ongoʻi fēfē nai. Lau kiate kinautolu ʻa e ʻuluaki sētesi ʻo e ʻEkesōtosi 33:11. ʻEke ki he fānaú pe ʻoku nau pehē ne mei ongoʻi fēfē e palōfita ko Mōsesé. Talanoa ki he fānaú fekauʻaki mo ha ngaahi taimi naʻá ke ongoʻi ofi ai ki he ʻEikí, neongo kapau ne ʻikai te ke mamata kiate Ia ʻaki ho matá.

• Hivaʻi fakataha ha foʻi hiva ʻokú ne fakahaaʻi e ongo ʻoku maʻu ʻe he Tamai Hēvaní pe Sīsū fekauʻaki mo kitautolú, hangē ko e “Sīsū Hotau Kaumeʻa ʻOfá” (Tohi Hiva ʻa e Fānaú, 37). Fakaʻaliʻali ha ngaahi fakatātā ʻoku fakahaaʻi ai ʻe he Fakamoʻuí ʻa e ʻofa ki he niʻihi kehé (vakai, Tohi Fakatātā ʻo e Ongoongoleleí, fika 36, 41–43, 46–47). Poupouʻi e fānaú ke vahevahe ʻenau ongo fekauʻaki mo e Tamai Hēvaní mo Sīsuú.

Akoʻi e Tokāteliné: Fānau Lalahi Angé

ʻEkesōtosi 31:12–17

Ko hono fakaʻapaʻapaʻi ʻo e ʻaho Sāpaté ko ha fakaʻilonga ia ʻo ʻeku ʻofa ki he ʻEikí.

ʻE lava ke faingofua ange hono tauhi ʻo e ʻaho Sāpaté ke māʻoniʻoní—pea fakafiefia ange—ki he fānaú ʻi he taimi ʻoku nau ʻiloʻi ai ko ha fakaʻilonga ia ʻo ʻenau tukupā ki he ʻEikí.

Ngaahi ʻEkitivitī ʻe Ala Fakahokó

• ʻEke ki he fānaú ha ngaahi fehuʻi ʻe niʻihi ke tokoni ke mahino kiate kinautolu ko e hā ʻa e fakaʻilonga—hange, ko ʻení “Ko e hā ha ngaahi fakaʻilonga ʻokú ke ʻiloʻi ai ʻoku tuʻunuku mai ʻa e faʻahitaʻu failaú pe ʻoku maʻu koe ʻe he momokó?” Fakaafeʻi kinautolu ke lau ʻa e ʻEkesōtosi 31:13, 16–17 pea kumi e foʻi lea ko e “fakaʻilonga.” Ko e hā naʻe folofola e ʻEikí ko ha fakaʻilonga ʻiate kitautolu mo Ia? Ko e hā ʻoku fuʻu mahuʻinga ai e fakaʻilonga ko ʻení?

• Fakaafeʻi e fānaú ke nau taufetongi hono fakamatalaʻi ʻa e ʻuhinga ʻoku nau fili ai ke fakaʻapaʻapaʻi e ʻaho Sāpaté.  

• Fakaafeʻi e fānaú ke nau hiki kotoa hifo e ngaahi meʻa ʻoku nau lava ʻo fakakaukau ki ai te nau lava ʻo fakahoko ʻi he ʻaho Sāpaté ke fakahaaʻi ki he ʻEikí ʻoku nau ʻofa ʻiate Ia. Poupouʻi kinautolu ke vahevahe ha ngaahi meʻa ʻe niʻihi mei heʻenau ngaahi lisí. Fakaafeʻi kinautolu ke ō mo ʻenau ngaahi lisí ki ʻapi, vahevahe ia mo honau ngaahi fāmilí, pea toutou vakai ki ai ʻi he taimi pē ʻoku nau fie maʻu ai ha ngaahi fakakaukau fekauʻaki mo e meʻa ke fai ʻi he ʻaho Sāpaté.

ʻEkesōtosi 32:1–8, 19–24

Te u lava ʻo fakamuʻomuʻa ʻa e ʻEikí ʻi heʻeku moʻuí.

ʻOku fekauʻaki ha pōpoaki ʻe taha mei he fakamatala ʻi he ʻEkesōtosi 32 mo e mahuʻinga hono tauhi ʻo e ʻuluaki fekau ʻe ua ʻo e Ngaahi Fekau ʻe Hongofulú—ʻoua naʻá ke moihū ki ha taha pe ha meʻa kehe mei he ʻEikí.

Ngaahi ʻEkitivitī ʻe Ala Fakahokó

• Kole ki he fānaú ke vahevahe ha meʻa pē ʻoku nau ʻilo fekauʻaki mo e talanoa ʻo hono faʻu ʻe ʻĒlone ha ʻuhikiʻi pulu koula ke moihū ki ai e kakai ʻIsilelí. Kapau ʻoku nau fie maʻu tokoni, mou vakai ki he ʻEkesōtosi 32:1–8, 19–24, pe vahevahe mo kinautolu ʻa e “Ko e Ngaahi Fekau ʻe Hongofulu” (ʻi he Ngaahi Talanoa mei he Fuakava Motuʻá). Ko e hā naʻe hala ai e moihū ʻa e kakai ʻIsilelí ki ha tamapuá? (ʻE lava ke ke vakai mo e fānaú ki he ʻuluaki fekau ʻe ua ʻo e Ngaahi Fekau ʻe Hongofulú ʻi he ʻEkesōtosi 20:3–6.)

• Tokoni ki he fānaú ke nau fakakaukau ki ha ngaahi sīpinga ʻo e ngaahi meʻa ʻe ala ʻahiʻahiʻi e kakaí ke nau moihū ki ai kae ʻikai ko e ʻEikí—ngaahi meʻa ʻokú ne toʻo ʻetau tokangá meiate Iá. Kole ange leva ke nau vahevahe ha ngaahi sīpinga ʻo ha ngaahi meʻa ʻe lava ʻo tokoni ke nau tokanga taha ai ki he Fakamoʻuí mo moihū kiate Ia.

ʻEkesōtosi 32:1–5, 21–24

Te u lava ʻo tuʻu maʻu ʻi he anga māʻoniʻoní.

ʻI hono talaange ʻe he kakai ʻIsilelí kia ʻĒlone ke ngaohi ha tamapua koulá, naʻá ne loto lelei ke fakahoko ia, neongo naʻe hala ʻeni (vakai, Teutalōnome 9:20). Fakakaukau ki he founga te ke lava ai ʻo poupouʻi e fānaú ke nau tuʻu maʻu i he anga māʻoniʻoní, ʻo aʻu ki he taimi ʻoku teke mālohi ai ke ʻoua te nau fai peheé.

Ngaahi ʻEkitivitī ʻe Ala Fakahokó

• Fakaafeʻi ʻa e fānaú ke lau fakafoʻituitui pe tauhoa ʻa e ʻEkesōtosi 32:1–5, 21–24, pea vahevahe ʻa e meʻa ʻoku nau pehē naʻe totonu ke fakahoko ʻe ʻĒlone ʻi he taimi ne kole ange ai ʻe he kakai ʻIsilelí ke ne faʻu ha ʻuhikiʻi pulu koulá. Naʻe mei tokoni fēfē nai ʻa ʻĒlone ki he kakaí?

• Tokoni ki he fānaú ke nau fakakaukau ki ha ngaahi tūkunga te nau ala fehangahangai mo ia ʻi he taimi ʻoku kole ange ai ʻe ha kakai kehe ke fakahoko ha meʻa ʻoku nau ʻilo ʻoku hala. Kole ki he fānaú ke nau fevahevaheʻaki ha ngaahi fakakaukau fekauʻaki mo e meʻa ke fakahoko ʻi he ngaahi tūkunga peheé.

Poupouʻi e Ako ʻi ʻApí

Fakaafeʻi ʻa e fānaú ke nau vahevahe mo honau ngaahi fāmilí ha faʻahinga fakakaukau pē ne nau fanongoa he ʻahó ni fekauʻaki mo e founga hono tauhi ʻo e ʻaho Sāpaté ke māʻoniʻoní.

Ko Hono Fakatupulaki ʻEtau Founga Akoʻí

Fakaafeʻi e fānaú ke fakahoko ʻenau fakamoʻoní. ʻE lava ke poupouʻi ʻa e fānaú ʻe he ngaahi fehuʻi ʻokú ke ʻeké ke vahevahe ʻa e anga ʻenau ongo fekauʻaki mo e Fakamoʻuí pea mo e founga kuo tāpuekina ai kinautolu ʻe hono moʻui ʻaki e ongoongoleleí. ʻI heʻenau fakahoko ʻení, ʻoku nau vahevahe ai ha fakamoʻoni. (Vakai, Ko e Faiako ‘i he Founga ‘a e Fakamoʻuí, 11, 32.)