“9–15 Mē. Nōmipa 11–14; 20–24: ‘ ʻOua Pē Naʻa Mou Angatuʻu ki [he ʻEikí], Pea ʻOua Naʻa Mou Manavahē,’ ” Haʻu, ʻo Muimui ʻIate Au—Maʻá e Palaimelí: Fuakava Motuʻá 2022 (2021)
“9–15 Mē. Nōmipa 11–14; 20–24,” Haʻu, ʻo Muimui ʻIate Au—Maʻá e Palaimelí: 2022
9–15 Mē
Nōmipa 11–14; 20–24
“ ʻOua Pē Naʻa Mou Angatuʻu ki [he ʻEikí], Pea ʻOua Naʻa Mou Manavahē”
ʻOku ʻikai fakataumuʻa ʻa e fokotuʻutuʻu ko ʻení ke muimuiʻi pau. Ka, ke fakaʻaongaʻi ia ke maʻu ha ngaahi fakakaukau mo ha ueʻi fakalaumālie ki hono ako ʻo e ngaahi ʻekitivitī te ne tāpuekina ʻa e fānau ʻi hoʻo kalasí.
Lekooti Hoʻo Ngaahi Ongó
Fakaafeʻi e Feʻinasiʻakí
Fakaʻaliʻali ki he fānaú ha fakatātā ʻe taha ʻi he fokotuʻutuʻu ko ʻení pe ʻi he lēsoni ʻo e uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí. Tuku ke nau vahevahe atu ha faʻahinga meʻa pē ʻoku nau ʻilo fekauʻaki mo e meʻa ʻoku hoko ʻi he fakatātaá.
Akoʻi e Tokāteliné: Fānau Iiki Angé
Te u lava ʻo fakahoungaʻi e meʻa kuo foaki mai ʻe he ʻOtuá maʻakú.
Neongo kuo fai ʻe he ʻEikí ha ngaahi meʻa lelei maʻá e fānau ʻo ʻIsilelí, ka ne faʻa tukutaha ʻenau tokangá ki he meʻa ne ʻikai ke nau maʻú. Tokoni ki he fānaú ke nau ako ke fakamālōʻia ʻa e meʻa kuo foaki ange ʻe he ʻOtuá maʻanautolú.
Ngaahi ʻEkitivitī ʻe Ala Fakahokó
-
ʻEke ange ki he fānaú pe ʻoku nau manatuʻi ha niʻihi ʻo e ngaahi mana naʻe fakahoko ʻe he ʻEikí ke tāpuekina e kakai ʻIsileli ʻi he toafá. (Kapau ʻoku fie maʻu tokoni e fānaú, fakaʻaliʻali ange ha ngaahi fakatātā mei he fokotuʻutuʻu ki he ʻaho 4–10 ʻo ʻEpeleli ʻi he Haʻu, ʻo Muimui ‘Iate Au—Maʻá e Fakafoʻituituí mo e Ngaahi Fāmilí; vakai foki, ʻEkesōtosi 14:21–22; 15:23–25; 16:4.) Hili iá pea fakamatalaʻi fakanounou ange leva ʻa e Nōmipa 11:4–10, ʻo fakamamafaʻi ange ne ʻikai hoifua lelei ʻa e ʻEikí koeʻuhí naʻe lāunga ʻa e kakai ʻIsilelí. Tokoni ki he fānaú ke nau fakakaukau ki ha ngaahi founga te nau lava ai ʻo fakahaaʻi ʻenau loto-houngaʻiá ki he ʻEikí.
-
Hivaʻi fakataha ha foʻi hiva fekauʻaki mo e loto houngaʻiá, hangē ko e “Tānaki Ho Ngaahi Tāpuaki” (Ngaahi Himi, fika 148). Fakaafeʻi e fānau takitaha ke ne tā ha ngaahi fakatātā ʻo e ngaahi tāpuaki kuo foaki ange ʻe he ʻEikí maʻanautolu pe ko honau ngaahi fāmilí. Poupouʻi ke nau fakakaukau pe sio ki heʻenau fakatātaá ʻi ha taimi pē ʻoku ʻahiʻahiʻi ai kinautolu ke lāunga fekauʻaki mo ha meʻa ʻoku ʻikai ke nau maʻu.
ʻE lava ke tokoniʻi au ʻe he tuí ke ʻoua te u manavahē.
ʻI he taimi ne fekauʻi atu ai ʻe Mōsese ha kau tangata ʻe toko 12 ke fekumi ki he fonua ʻo e talaʻofá, ne foki ilifia mai hanau toko 10 koeʻuhí ko e kakai lalahi naʻe nofo aí. Naʻe ʻikai ke ilifia ha toko ua ʻa ia ko Kēlepi mo Sosiua, koeʻuhí he naʻá na tui ki he ʻEikí.
Ngaahi ʻEkitivitī ʻe Ala Fakahokó
-
Fakaʻaongaʻi ha ngaahi fakatātā pe tā fakatātā ʻo e kālepi, hone, kakai lalahi mo e heʻe ke fakamatalaʻi mahino ki he fānaú ʻa e kakai ʻe toko 12 ne fekauʻi atu ʻe Mōsese ki he fonua ʻo e talaʻofá (vakai, Nōmipa 13:17–33; vakai foki, “Taʻu ʻe Fāngofulu ʻi he Toafá” ʻi he Ngaahi Talanoa ʻo e Fuakava Motuʻá). Fakamatalaʻi ange ne nau maʻu ha fuaʻiʻakau lahi mo ha meʻatokoni kehe (fakaafeʻi e fānaú ke pehē pē ʻoku nau kai ʻa e meʻakaí), ka naʻa nau ilifia koeʻuhí ne lalahi mo mālohi ʻa e kakai ʻi aí (fakaafeʻi e fānaú ke pehē pē ʻoku nau ilifia). Fakaʻaliʻali ha fakatātā ʻo Sīsū, pea fakamahinoʻi ange ne ʻi ai ha ongo tangata ʻIsileli ʻe ua, ko Kēlepi mo Sosiua, ne ʻikai ke na ilifia koeʻuhí he naʻá na tui kia Sīsū Kalaisi.
-
Lau ki he fānaú ʻa e Nōmipa 14:9 pea talanoa ki ha taimi naʻá ke ilifia ai ka naʻe tokoniʻi koe ʻe hoʻo tui kia Sīsū Kalaisí ke ke loto-toʻa. Tokoniʻi e fānaú ke nau fakakaukau ki ha ngaahi aʻusia tatau ne nau maʻu.
ʻĪmisikau tangata ʻoku nau fakaʻaliʻali ha fuaʻiʻakau kia MōseseNaʻe manavahē ha toko 10 ʻo e kau tangata mataki ʻIsilelí; naʻe maʻu ʻe Sosiua mo Kēlepi ha tui. © Lifeway Collection/licensed mei he goodsalt.com
Te u lava ʻo muimui kia Sīsū Kalaisi.
Hangē ko hono fakamoʻui ʻo e fānau ʻo ʻIsilelí ʻi heʻenau sio ki he ngata palasá, ʻoku maʻu ʻe he fānau ʻi hoʻo kalasí ha fakamoʻui ʻi heʻenau muimui ki he Fakamoʻuí.
Ngaahi ʻEkitivitī ʻe Ala Fakahokó
-
ʻI hono fakaʻaongaʻi ʻo e peesi ʻekitivitī ʻo e uike ní pe fakatātā ʻi he lēsoni ʻo e uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí, fakamatalaʻi ki he fānaú ʻa e meʻa ne hoko ʻi he taimi naʻe haʻu ai ki he nofoʻanga kemi ʻo e kakai ʻIsilelí ʻa e “fanga ngata fakavelá” (vakai Nōmipa 21:6–9). Tokoni ke nau ʻiloʻi e founga ʻoku tatau ai ʻa e ngata palasá mo Sīsū Kalaisí (vakai, Sione 3:14–15). Tuku ke taufetongi e fānaú ʻi hono fakaʻaongaʻi e fakatātaá ke nau fetalanoaʻaki ai.
-
Kole ki he fānaú ke nau kuikui lolotonga haʻo tuku ha fakatātā ʻo e Fakamoʻuí ʻi ha feituʻu ʻi he lokí. Fakaafeʻi leva e fānaú ke nau ʻāʻā, kumi e fakatātaá, pea sio ki ai. Tuku ke nau taufetongi hono fūfuuʻi ʻo e fakatātaá. ʻI he taimi kotoa pē ʻoku maʻu ai ʻe he fānaú e fakatātaá, tokoniʻi ke nau fakakaukau ki ha meʻa te nau lava ʻo fakahoko ke nau sio ai ki he Fakamoʻuí.
Akoʻi e Tokāteliné: Fānau Lalahi Angé
ʻOku finangalo ʻa e ʻEikí ke u muimui ʻi Heʻene palōfitá.
ʻOku ʻi he Nōmipa 12 ha ngaahi lēsoni mahuʻinga ʻe lava ʻo tokoni ki he fānaú ʻi he taimi ʻoku nau fanongo ai ʻoku fakahoko ʻe he kakaí ha ngaahi lea taʻeʻofa fekauʻaki mo e kau palōfita ʻa e ʻEikí pe kau taki kehe ʻo e Siasí.
Ngaahi ʻEkitivitī ʻe Ala Fakahokó
-
Talaange ki he fānaú naʻe ʻi ai ha taimi ʻe taha ne ʻikai hoifua lelei ai e ʻEikí kia ʻĒlone mo Meliame, ko e tokoua mo e tuofefine ʻo Mōsesé. Fakaafeʻi ke nau lau ʻa e Nōmipa 12:1–2 ke ʻiloʻi e ʻuhingá. Fakatatau ki he veesi 5–8, ko e hā e ongo ʻa e ʻEikí ki he lea fakafepaki ʻa ʻĒlone mo Meliame ki Heʻene palōfitá?
-
Tokoniʻi e fānaú ke nau fakakaukau ki ha ngaahi sīpinga ʻo ha kakai ʻi he folofolá ne nau muimui ʻi he palōfitá pea tāpuekina ai kinautolu (hangē ko ʻení, vakai, Sēnesi 7:7; 1 Nīfai 3:7). Ko e hā ha ngaahi meʻa ʻe niʻihi kuo akoʻi mai heʻetau palōfita moʻuí? ʻOku faitāpuekina fēfē kitautolu ʻi heʻetau talangofua ki heʻene ngaahi akonakí?
ʻOku maʻu ʻe Sīsū Kalaisi ʻa e mālohi ke fakamoʻui fakalaumālie au.
Naʻe mate ha kakai ʻIsileli tokolahi koeʻuhí ne ʻikai ke nau tui ʻe fakamoʻui kinautolu ʻe he ʻEikí kapau te nau sio ki he ngata palasá (vakai, ʻAlamā 33:18–20). Te ke tokoni fēfē nai ki he fānau ʻokú ke akoʻí ke nau tui ki he mālohi faifakamoʻui ʻo Sīsū Kalaisí?
Ngaahi ʻEkitivitī ʻe Ala Fakahokó
-
Fakaafeʻi e fānaú ke nau tā ha ngaahi fakatātā ʻo e meʻa ʻoku nau lau ʻi he Nōmipa 21:4–9. Tuku ke nau fakaʻaongaʻi ʻenau ngaahi fakatātaá ke fakahoko ʻa e talanoá. Kole ki he fānaú takitaha ke fili ha taha ʻo e ngaahi potufolofola ko ʻení pea vahevahe ʻa e meʻa ʻokú ne tānaki mai ki he mahino ʻoku tau maʻu ki he talanoá: Sione 3:14–15; 1 Nīfai 17:41; ʻAlamā 33:18–20; Hilamani 8:13–15; Tokāteline mo e Ngaahi Fuakava 6:36.
-
Hiki ʻi he palakipoé ha fehuʻi hangē ko e Ko e hā te u lava ʻo fai ke “muimui ki he ʻAlo ʻo e ʻOtuá ʻi he tui”? (Hilamani 8:15). ʻOange ki he fānau takitaha ha laʻipepa, pea fakaafeʻi ke nau hiki ki he lahi taha te nau lava ʻo fakakaukau ki aí ʻa e ngaahi tali ki he fehuʻí. Tānaki e ʻū laʻipepá, lau leʻolahi ha niʻihi ʻo e ngaahi talí, pea fakaafeʻi ʻa e fānaú ke nau talanoa fekauʻaki mo e founga ʻe lava ʻe hono fakahoko ʻo e ngaahi meʻá ni ʻo tokoniʻi kitautolu ʻi he taimi ʻoku tau fie maʻu ai e mālohi faifakamoʻui ʻo e Fakamoʻuí.
Te u lava ʻo muimui he finangalo ʻo e ʻOtuá, naʻa mo e taimi ʻe feinga ai e niʻihi kehé ke ʻoua te u fakahoko iá.
Naʻe feinga ʻa Pēlaki ke fakalotoʻi ʻa Pēlami ke fakahalaiaʻi e kakai ʻIsilelí, ka naʻe ʻiloʻi ʻe Pēlami ne ʻikai ko e finangalo ia ʻo e ʻOtuá. ʻE lava ke tokoni e sīpinga ʻa Pēlamí ki he fānaú ʻi he taimi ʻoku nau fehangahangai ai mo e fakaʻaiʻai ke talangataʻa ki he ʻOtuá.
Ngaahi ʻEkitivitī ʻe Ala Fakahokó
-
Fakamatalaʻi fakanounou ki he fānaú ʻa e Nōmipa 22:1–18, ʻo fakamamafaʻi ʻa e founga naʻe fakafisi ai ʻa Pēlami ke fakahalaiaʻi e kakai ʻo e ʻOtuá, neongo ne ʻoange ʻe Pēlaki, ko e tuʻi ʻo Moapé, hono lāngilangi mo ha ngaahi koloa. Kole ki he fānaú ke nau fekumi ʻi he ngaahi veesi ko ʻení ki ha ngaahi kupuʻi lea ʻoku nau ongoʻi ʻokú ne fakahaaʻi e loto-fakapapau ʻa Pēlami ke muimui ki he ʻOtuá: Nōmipa 22:18; 23:26; 24:13. Fakaafeʻi e fānaú ke nau fili ha kupuʻi lea ʻe taha ʻoku nau saiʻia ai pea hiki ia ʻi ha kaati ke tokoni ke nau manatuʻi ke talangofua ki he ʻEikí.
-
Talanoa mo e fānaú fekauʻaki mo ha ngaahi tūkunga ʻe ala feinga ai ha ngaahi kaungāmeʻa pe niʻihi kehe ke fakalotoʻi kinautolu ke nau fai ha meʻa hala, hangē ko ia ne fai ʻe Pēlaki kia Pēlamí. Naʻe tokoni fēfē ʻa e tukupā ʻa Pēlami ki he ʻEikí ke ne matuʻuaki e vili taʻeʻunua ʻa Pēlakí? Fakaafeʻi e fānaú ke nau akoako fakahoko ha ngaahi tali ki he ngaahi tūkunga ko ʻení ʻo fakaʻaongaʻi ha ngaahi lea hangē ko Pēlamí.
Poupouʻi e Ako ʻi ʻApí
Fakaafeʻi e fānaú ke nau vahevahe ha meʻa mo honau ngaahi fāmilí, hangē ko ha fakatātā, potufolofola pe ko ha foʻi hiva ʻokú ne fakahaaʻi ʻa e meʻa ne nau ako ʻi he Palaimelí.
Ko Hono Fakatupulaki ʻEtau Founga Akoʻí
Tali lelei e ngaahi ueʻi ʻa e Laumālié. “ ʻOku faʻa taʻeʻamanekina foki ʻa e ngaahi mōmeniti akoʻi lelei tahá—hangē ko ʻení, ʻi he taimi ʻoku vahevahe ai ʻe ha taha haʻane aʻusia pe fai ha fehuʻi ʻe iku ai ki ha fealēleaʻaki mahuʻinga. … Loto fiemālie ke liliu hoʻo ngaahi palaní ʻo ka fie maʻu, ke ke muimui ki he ngaahi ueʻi fakalaumālie ʻokú ke maʻú” (Faiako ʻi he Founga ʻa e Fakamoʻuí, 10).