“2–8 Mē. ʻEkesōtosi 35–40; Levitiko 1; 16; 19: ‘Māʻoniʻoni ki [he ʻEikí],’” Haʻu, ʻo Muimui ʻIate Au—Maʻá e Palaimelí: Fuakava Motuʻá 2022 (2021)
“2–8 Mē. ʻEkesōtosi 35–40; Levitiko 1; 16; 19,” Haʻu, ʻo Muimui ʻIate Au—Maʻá e Palaimelí: 2022
2–8 Mē
ʻEkesōtosi 35–40; Levitiko 1; 16; 19
“Māʻoniʻoni ki [he ʻEikí]”
ʻI hoʻo ako ʻi he faʻa lotu e folofolá ʻi he uike ní, fakakaukau ki he fānau ʻokú ke akoʻí. ʻE lava ke tokoniʻi koe ʻe he Laumālie Māʻoniʻoní ke ke ʻilo e ngaahi moʻoni ʻoku nau fie maʻu ke akó mo e founga te ke lava ai ʻo akoʻi e ngaahi moʻoni ko iá kiate kinautolú.
Lekooti Hoʻo Ngaahi Ongó
Fakaafeʻi e Feʻinasiʻakí
Tuku e hingoa ʻo e fānau takitaha ʻi ha faʻoʻanga meʻa. Kole ki ha kiʻi leka ke ne fili ha taha ʻo e ngaahi hingoá, pea fakaafeʻi ha taha ʻi he fānaú naʻe fili hono hingoá, ke ne vahevahe ha meʻa naʻá ne toki ako mei he Fuakava Motuʻá. Talanoa mo e fānaú fekauʻaki mo e founga ʻoku tokoniʻi ai kinautolu ʻe he ngaahi meʻa ʻoku nau akó ke ofi ange ai kia Sīsū Kalaisí. Hokohoko atu pē kae ʻoua kuo maʻu ʻe he tokotaha kotoa ha faingamālie ke vahevahe.
Akoʻi e Tokāteliné: Fānau Iiki Angé
Te u lava ʻo tokoni ʻi he ngāue ʻa e ʻEikí.
ʻOku maʻu ʻe he fānau īkí ha ngaahi meʻafoaki te nau lava ʻo fakaʻaongaʻi ke tokoni ki he ngāue ʻa e ʻEikí ʻi he māmaní. Te ke lava fēfē ʻo tokoni ki he fānaú ke nau ongoʻi ha loto holi ke vahevahe e meʻa kuo foaki ʻe he ʻEikí maʻanautolú?
Ngaahi ʻEkitivitī ʻe Ala Fakahokó
-
Lau ki he fānaú ʻa e ʻEkesōtosi 36:1 pea kole ange ke nau fakafanongo ki he meʻa naʻe folofola ʻaki ʻe he ʻEikí kia Pesalili mo ʻAholiapi ke tokoni kiate kinaua ki hono langa e “fale tapú” (tāpanekale). Talaange ki he fānaú takitaha ha meʻafoaki ʻokú ne maʻu (ʻe ala tokoni ke ke ʻeke ki heʻenau mātuʻá). Fakamoʻoni ange kuo “foaki” ʻe he ʻOtuá ha ngaahi meʻafoaki maʻa ʻEne fānaú takitaha.
-
Talaange ki he fānaú ʻa e ʻuhinga ʻokú ke fie tokoni ai ʻi he ngāue ʻa e ʻEikí. Tokoniʻi kinautolu ke nau fakakaukau ki ha ngaahi founga te nau lava foki ai ʻo kau mai (hangē ko ʻenau ako fekauʻaki ki haʻanau kui, talanoa ki ha taha ʻo kau kia Sīsū, pe tokoni ki ha mēmipa ʻo e fāmilí). Hiki ʻenau ngaahi fakakaukaú ʻi ha ʻū laʻipepa, faʻo kinautolu ʻi ha faʻoʻanga meʻa, pea fakaafeʻi e tokotaha takitaha ke ne fili ha laʻipepa ʻe taha pea fakatātaaʻi e foʻi ngāue ʻoku ʻasi ʻi he laʻipepá.
ʻOku lava ke u ongoʻi e ʻafio ʻa e ʻOtuá ʻi he ngaahi potu toputapú.
Naʻe fekauʻi ʻe he ʻOtuá e fānau ʻa ʻIsilelí ke langa ha tāpanekale koeʻuhí ke Ne lava ʻo “nofo ʻiate kinautolu” (ʻEkesōtosi 25:8). Te ke lava ʻo tokoni ki he fānaú ke nau ako fekauʻaki mo e ngaahi potu toputapu kuo tuku mai ʻe he ʻEikí maʻatautolu he kuongá ni ke tokoni ke tau ongoʻi ʻokú Ne ʻiate kitautolu.
Ngaahi ʻEkitivitī ʻe Ala Fakahokó
-
Fakaʻaliʻali ha fakatātā ʻo e tāpanekale fakakuonga muʻá (vakai ki he lēsoni ʻo e uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí). Kole ki he fānaú ke kumi ha ngaahi konga kehekehe ʻo e tāpanekalé ʻi he fakatātaá, hangē ko ha tuʻuʻanga teʻelango pe ko e ngaahi ʻōlitá, pea fakamatalaʻi naʻe fakataumuʻa e ngaahi meʻá ni ke tokoni ki he kakai ʻIsilelí ke nau fakakaukau ki he ʻEikí (ki ha fakamatala lahi ange kau ki he tāpanekalé, vakai, ʻEkesōtosi 40:17–34). Ko e hā ha ngaahi potu toputapu ʻoku tau maʻu he kuongá ni ʻoku tokoni mai ke tau fakakaukau ai ki he ʻEikí?
-
Fakaʻaliʻali ha fakatātā ʻo e temipalé, pea lau ki he fānaú ʻa e ʻEkesōtosi 25:8. Fakamatalaʻi ange ʻi hotau kuongá ni, kuo ʻomi ʻe he ʻOtuá ha ngaahi potu toputapu te tau lava ai ʻo ofi kiate Ia. Tokoni ki he fānaú ke lisi ha niʻihi ʻo e ngaahi feituʻu ko ʻení. ʻEke ki he fānaú e ongo ʻoku nau maʻu ʻi heʻenau fakakaukau fekauʻaki mo e ngaahi potu toputapu ko ʻení. Vahevahe ange te tau lava foki ʻo ongoʻi ofi ange ki he ʻOtuá ʻi he taimi ʻoku tau lotu aí, neongo pe ko e fē feituʻu ʻoku tau ʻi aí.
-
Fakakakato mo e fānaú ʻa e peesi ʻekitivitií. ʻI hoʻo fakahoko iá, hivaʻi mo kinautolu ha foʻi hiva fekauʻaki mo e temipalé, hangē ko e “Fie Siofia Ha Temipale” (Tohi Hiva ʻa e Fānaú, 99).
ʻĪmisiTemipale Loma ʻĪtalíHangē ko e tāpanekale ʻi he kuonga muʻá, ʻoku tataki kitautolu ʻe he temipalé ki he Fakamoʻuí.
Akoʻi e Tokāteliné: Fānau Lalahi Angé
Kuo ʻomi ʻe he ʻOtuá ha ngaahi meʻafoaki maʻaku ke tokoni ki Heʻene ngāué.
ʻOku maʻu ʻe he tokotaha kotoa pē ʻo e fānau ʻa e Tamai Hēvaní ha meʻa ke foaki ki Heʻene ngāué. ʻE ala fie maʻu ʻe he fānau ʻokú ke akoʻí hoʻo tokoní ke ʻiloʻi e founga ʻe lava ke nau fakaʻaongaʻi ai ʻenau ngaahi meʻafoakí ke tokoni ʻi he ngāue ʻa e ʻOtuá.
Ngaahi ʻEkitivitī ʻe Ala Fakahokó
-
Fakaʻaliʻali ha fakatātā ʻo e tāpanekalé (vakai, lēsoni ʻo e uiké ni ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí). ʻEke ki he fānaú pe ko e hā e ngaahi naunau naʻe fie maʻu ki hono langa ʻo e tāpanekalé. Lau mo e fānaú ʻa e ʻEkesōtosi 35:20–29, pea kole ange ke nau kumi e founga ne maʻu ai e naunau naʻe fie maʻú. Fakamoʻoni ʻoku maʻu ʻe he fānau takitaha ha meʻa ke tokoni ki he ngāue ʻa e ʻEikí.
-
Kole ki he fānaú ke lau ʻa e ʻEkesōtosi 36:1 ke ʻilo e meʻa ne foaki ʻe he ʻEikí maʻanautolu ne ui ke tokoni ʻi hono langa ʻo e tāpanekalé. Fakaafeʻi e fānaú ke vahevahe e meʻa ʻoku nau ongoʻi kuo foaki ange ʻe he ʻEikí ke tokoni ʻi hono langa hake Hono puleʻangá (ʻoange ha ngaahi fokotuʻu ʻo ka fie maʻu). Te tau fakaʻaongaʻi fēfē e ngaahi meʻá ni ke tāpuekina ai e niʻihi kehé?
Te u lava ʻo hangē lahi ange ko Sīsū Kalaisi mo e Tamai Hēvaní.
Ne ʻikai ngata pē ʻi hono fakaʻatā ʻe he tāpanekalé e fānau ʻo ʻIsilelí ke nau feʻao mo e ʻOtuá, ka naʻá ne akoʻi ange foki ha ngaahi meʻa te nau lava ʻo fai ke hangē ange ai ko e ʻOtuá.
Ngaahi ʻEkitivitī ʻe Ala Fakahokó
-
Fakaafeʻi e fānaú ke fakaʻaongaʻi ʻa e ʻEkesōtosi 40:17–33 ke ʻiloʻi e ngaahi meʻa ko ha konga ʻo e tāpanekalé pea kumi ha niʻihi ʻo kinautolu ʻi ha fakatātā ʻo e tāpanekale he kuonga muʻá (vakai, lēsoni ʻo e uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí). Fakaafeʻi e fānaú ke nau takitaha tā haʻane fakatātā ʻo e tāpanekalé. Talanoa fekauʻaki mo e founga ʻe lava ke akoʻi ai kinautolu ʻe he konga takitaha ʻo e tāpanekalé fekauʻaki mo e Fakamoʻuí pe Tamai Hēvaní. Hangē ko ʻení, ʻe lava ke fakamanatu mai ʻe he puha ʻo e fakamoʻoní ʻa e ngaahi fekau ʻa e ʻOtuá, ʻe lava ke fakamanatu mai ʻe he ʻōlitá ʻa e feilaulau ʻa Sīsū Kalaisí, ʻe lava ke fakamanatu mai ʻe he tuʻuʻanga teʻelangó ko e Fakamoʻuí ʻa e Maama ʻo e Māmaní, ʻo fai pehē ai pē.
-
Kole ki he fānaú ke nau lau ʻa e ʻEkesōtosi 25:8 ke ʻiloʻi e ʻuhinga naʻe finangalo ai e ʻEikí ke langa ʻe he fānau ʻo ʻIsilelí ha “potu toputapu” (pe tāpanekalé). Tokoni ke lisi ʻe he fānaú ha ngaahi feituʻu pe tūkunga te tau lava ʻo ongoʻi ai ʻa e ʻEikí. ʻOku tokoni fēfē mai e ngaahi feituʻu ko ʻení ke tau hangē ange ai ko e Tamai Hēvaní mo Sīsū Kalaisí?
ʻE lava ke fakamolemoleʻi au ʻo fakafou ʻi he Fakalelei ʻa Sīsū Kalaisí.
Naʻe fakataumuʻa hono feilaulau ʻaki e fanga monumanú ʻi he Fuakava Motuʻá ke akoʻi e fānau ʻo ʻIsilelí kau ki he fakamolemole ne fakahoko makatuʻunga ʻi he Fakalelei ʻa Sīsū Kalaisí.
Ngaahi ʻEkitivitī ʻe Ala Fakahokó
-
Fakaʻaliʻali ha ngaahi fakatātā ʻo Sīsū Kalaisi ʻi Ketisemani mo e kolosí (vakai, Tohi Fakatātā ʻo e Ongoongoleleí, fika 56, 57). Fakamatalaʻi ange naʻe fekauʻi ʻe he ʻEikí ʻa e fānau ʻo ʻIsilelí ke nau fakahoko ha ngaahi feilaulau ke akoʻi ange ʻe lava ke fakamolemoleʻi kinautolu mei heʻenau ngaahi angahalá ʻo fakafou ʻi he Fakalelei ʻo Sīsū Kalaisí. Lau mo e fānaú ʻa e Levitiko 1:1–4, pea fakaafeʻi kinautolu ke kumi ha ngaahi lea pe kupuʻi lea ʻokú ne fakamanatu ange ʻa e feilaulau ʻa Sīsū Kalaisí.
-
Fakaʻaliʻali ha fakatātā ʻo e ʻaʻahi ʻa Sīsū Kalaisi ki he kakai ʻi he ongo ʻAmeliká (hangē ko e Tohi Fakatātā ʻo e Ongoongoleleí, fika 82). Fakamatalaʻi ange hili hono tutuki ʻo Sīsū Kalaisi pea toetuʻú, naʻá Ne akoʻi ki he kakai ʻi ʻAmeliká ʻa e ʻuhinga ne ʻikai toe fie maʻu ai ke nau feilaulau ʻaki e fanga monumanú. Lau fakataha ʻa e 3 Nīfai 9:19–20, pea ʻeke ki he fānaú ʻa e meʻa ʻoku fekauʻi mai ke tau feilaulauʻí. Ko e hā e uhinga ʻo hono ʻoatu ʻo ha feilaulau ʻo e loto mafesifesi mo ha laumālie fakatomalá? Fokotuʻu ange ke nau kumi ʻa e “Loto-mafesifesí” ʻi he Fakahinohino ki he Ngaahi Folofolá (scriptures.ChurchofJesusChrist.org) ki ha tokoni ki hono tali ʻo e fehuʻi ko ʻení. Fakaafeʻi ke nau fakalaulauloto ki he founga ʻe lava ke nau foaki ai ha loto mafesifesi mo ha laumālie fakatomala ki he ʻEikí.
Poupouʻi e Ako ʻi ʻApí
Fakaafeʻi ʻa e fānaú ke fehuʻi ki he Tamai Hēvaní he uiké ni fekauʻaki mo e founga ʻokú Ne finangalo ke nau tokoni ai ki Heʻene ngāué ʻi honau fāmilí.
Ko Hono Fakatupulaki ʻEtau Founga Akoʻí
Fakahinohino ki he fānaú ʻa e Tamai Hēvaní mo Sīsū Kalaisi. ʻOku totonu ko hoʻo tefitoʻi taumuʻá ke tokoni ki he fānau ʻokú ke akoʻí ke fakamālohia ʻenau tui ki he Tamai Hēvaní mo Sīsū Kalaisí. Ko e hā te ke lava ʻo fai ke tokoni ke mahino kiate kinautolu ʻa e founga ʻe tokoni ai hono moʻui ʻaki e ngaahi moʻoni ʻo e ongoongoleleí ke nau hangē ange ko e Tamaí pea mo e ʻAló?