¶ 1 BEA i he mamata ae kakai kuo tuai ae alu hifo a Mosese mei he mouga, nae fakataha ae kakai kia Elone, o nau behe kiate ia, Tuu hake o gaohi ho tau gaahi otua, aia e muomua iate kitautolu; he koeuhi ko Mosese ni, koe tagata nae omi akitautolu mei he fonua ko Ijibite, oku ikai te tau ilo be kuo ife ia.

2 Bea nae fekau e Elone kiate kinautolu, Motuhi mai ae gaahi hau koula, aia oku i he teliga o ho mou gaahi unoho, mo ho mou gaahi foha, mo ho mou gaahi ofefine, bea omi ia kiate au.

3 Bea nae feji‘i leva e he kakai kotoabe ae gaahi hau koula nae i no nau teliga, o omi ia kia Elone.

4 Bea ma‘u eia i ho nau nima, bea hili ene haka ia ke gaohi ae fakatātā oe bulu mui, naa ne fakafuofua ia aki ae mea ta; bea naa nau behe, Ko eni ho gaahi otua e Isileli, aia kuo omi koe mei he fonua ko Ijibite.

5 Bea kuo mamata ki ai a Elone, bea fokotuu eia ae feilaulauaga i hono ao: bea nae fakaha e Elone, o behe, E fai ae katoaga kia Jihova abogibogi.

6 Bea naa nau tuu hegihegi hake i he bogibogi, o atu ae gaahi feilaulau tutu, o omi ae gaahi feilaulau fakamelino; bea nae nofo hifo ae kakai ke kai mo inu, bea tutuu hake ke fakavā.

¶ 7 Bea nae folofola a Jihova kia Mosese, Alu koe, bea ke alu ki lalo: he ko ho kakai, aia kuo ke omi mei he fonua ko Ijibite, kuo nau fakahala‘i akinautolu:

8 Kuo nau afe leva mei he hala aia kuou fekau‘i ai akinautolu: kuo nau gaohi moo nautolu ae fakatātā haka ki he bulu mui, bea kuo nau hu ki ai, mo nau feilaulau ki ai, o behe, Koeni ho gaahi otua e Isileli, aia kuo omi koe mei he fonua ko Ijibite.

9 Bea nae folofola a Jihova kia Mosese, Kuou mamata ki he kakai ni, bea vakai, koe kakai kia kekeva ia:

10 Bea koeni, tuku ai be au, koeuhi ke tubu be o vela eku tubutamaki kiate kinautolu, bea koeuhi keu fakaauha akinautolu: bea teu fakatubu iate koe ae buleaga lahi.

11 Bea nae kole fakamatoato e Mosese kia Jihova ko hono Otua, o behe, E Jihova, koeha oku tubu o vela ai ho houhau ki ho kakai, aia kuo ke autaki mai mei he fonua ko Ijibite i he malohi lahi, bea i he nima mafimafi?

12 Koeha ka lea ai ae kakai Ijibite, o behe, Naa ne omi kovi akinautolu kituaa, ke tamate‘i akinautolu i he gaahi mouga, bea ke fakaauha akinautolu mei he fuga o mama ni? Tafoki mei ho houhau lahi, bea lolou i he kovi ni ki ko kakai.

13 Manatu ki hoo kau tamaioeiki ko Ebalahame, mo Aisake, mo Isileli, akinautolu naa ke fuakava ki ai i he afiona, mo ke behe kiate kinautolu, Teu fakatubu ke toko lahi ho mou hako ke tatau moe gaahi fetuu oe lagi, bea koe fonua ni kotoabe, aia kuou lea ki ai teu foaki ia ki ho mou hako, bea te nau ma‘u ia o taegata.

14 Bea nae lolou a Jihova i he kovi aia naa ne finagalo ke fai ki hono kakai.

¶ 15 Bea nae tafoki a Mosese, o alu nifo mei he mouga, moe maka e ua oe fuakava nae i hono nima: kuo tohi ae ogo maka i ho na botu fakatouoji: kuo tohi ia i hono botu e taha mo hono botu e taha.

16 Bea nae gaohi e he Otua ae ogo maka, bea koe tohi koe tohi ae Otua, kuo togi ki he ogo maka.

17 Bea i he fanogo a Josiua ki he logoaa oe kakai i he e nau kalaga, nae behe eia kia Mosese, Oku logologo tau ae abitaga.

18 Bea behe eia, Oku ikai koe le‘o ia o kinautolu oku mavava i he malohi, bea oku ikai koe le‘o o nautolu oku tagi i he fakavaivai‘i: ka oku ou ogo‘i ae le‘o o nautolu oku hiva.

¶ 19 Bea nae behe, i he ene hoko o ofi ki he abitaga, naa ne mamata leva ki he  fakatātā oe bulu mui moe mee hobohobo: bea tubu o vela ae ita a Mosese, bea ne ji ae ogo maka mei hono nima: bea nae laiki ia i he lalo mouga.

20 Bea naa ne too ae bulu mui aia naa nau gaohi, o tutu ia i he afi, o ne momoji ia ke efu, o ne li ia ki he vai, o ne fakainu aki ia ae fānau a Isileli.

21 Bea nae behe e Mosese kia Elone, Koeha nae fai e he kakai ni kiate koe, kuo ke omi ai ae agahala lahi behe ni kiate kinautolu?

22 Bea beheage e Elone, Ke oua naa tubu o vela lahi ae ita a hoku eiki: oku ke ilo‘i ae kakai, oku bau be ho nau loto ki he kovi.

23 He naa nau behe mai kiate au, Gaohi ho tau gaahi otua, aia e muomua iate kitautolu: he koeuhi koe Mosese ni, koe tagata naa ne omi akitautolu mei he fonua ko Ijibite, oku ikai te tau ilo be kuo ife ia.

24 Bea neu tala kiate kinautolu, Koia fulibe oku ai haa nau koula, ke nau motuhi ia. Bea naa nau tuku mai ia kiate au: bea naaku ji ia ki he afi, bea nae ha‘u mei ai ae bulu mui ni.

¶ 25 Bea i he mamata a Mosese, oku telefua ae kakai; (he nae fakatelefua‘i akinautolu e Elone ke nau ma ai i he lotolotoga o ho nau gaahi fili:)

26 Nae tuu ai a Mosese i he mataba oe abitaga, o ne behe, Kohai oku kau mo Jihova? ke ha‘u ia kiate au. Bea koe gaahi foha kotoabe o Livai, naa nau fakataha kiate ia.

27 Bea behe eia kiate kinautolu, Oku behe mai e Jihova koe Otua o Isileli, Ke ai e he tagata taki taha ene heleta ki hono vakavaka, bea alu o fealuaki i he mataba ki he mataba i he abitaga kotoabe, o tamate‘i e he tagata hono tokoua, moe tagata kotoabe ene kaumea, moe tagata kotoabe hono kaugaabi.

28 Bea nae fai e he fānau a Livai o fakatatau ki he fekau a Mosese: bea nae to ai i he kakai i he aho koia ae kau tagata koe toko tolu afe nai.

29 He nae behe e Mosese, Fakatabu‘i akimoutolu kia Jihova he aho ni, ae tagata taki taha ki hono foha, bea ki hono tokoua: koeuhi ke ne foaki ae tabuaki kiate kimoutolu he aho ni.

¶ 30 Bea bogibogi ai, nae behe e Mosese ki he kakai, Kuo mou fai ae agahala lahi: bea koeni, teu alu hake kia Jihova; hei ilo be teu lava‘i ke fai ae fakalelei i hoo mou agahala.

31 Bea nae toe alu a Mosese kia Jihova, o ne behe, Oiaue. kuo fai ae agahala lahi e he kakai ni, bea kuo gaohi ho nau gaahi otua koula.

32 Ka koeni, kabau e lelei te ke fakamolemole e nau agahala; bea kabau e ikai, oku ou kole kiate koe, tamate‘i au mei hoo tohi aia kuo ke tohi.

33 Bea behe e Jihova kia Mosese, Koia fulibe kuo fai agahala kiate au, teu tamate‘i ia mei he eku tohi.

34 Koia, ke ke alu ni, o ave ae kakai ki he  fonua, aia naaku lea ai kiate koe: vakai, e muomua iate koe a eku Agelo: ka koe mooni i he aho o eku aahi, Teu aahi e nau agahala kiate kinautolu.

35 Bea nae fakamamahi e Jihova ae kakai, koe mea i he e nau gaohi ae bulu mui, aia nae gaohi e Elone.