¶ 1 BEA naa nau gaohi aki ae lanumoana, moe bauhiuhi, moe kulaahoaho, ae gaahi kofu gaue, ke fai aki ae gaue i he botu maonioni, bea nae gaohi ae gaahi kofu tabu kia Elone; o hage koe fekau a Jihova kia Mosese.

2 Bea naa ne gaohi ae efoti aki ae koula, moe lanumoana, moe bauhiuhi, moe kulaahoaho, moe tubenu tuovalevale.

3 Bea naa nau tuki ae koula ke manifinifi, bea hele ia ke tuoiki, koeuhi ke nau lalaga ia i he lanumoana, moe bauhiuhi, moe kulaahoaho, moe tubenu tuovalevale, moe gaue fakabotoboto.

4 Nae nau gaohi ae tuiga nima e ua ki he uma, ke fakamau fakataha ia; bea nae fakataha ia i hono kaba e ua.

5 Bea nae i he mea be koia hono noo fakanikoniko‘i oe efoti nae i ai, o fakatatau ki he gaue o ia: koe koula, moe lanumoana, moe bauhiuhi, moe kulaahoaho, moe tubenu tuovalevale: o hage koe fekau a Jihova kia Mosese.

¶ 6 Bea naa nau ta ae gaahi maka oniki, bea fakamau i he takafi koula, kuo togi o hage koe togi oe mama, aki ae gaahi higoa oe fānau a Isileli.

7 Bea naa ne ai ia ki he uma e ua oe efoti, koeuhi ke hoko ia koe gaahi maka fakamanatu ki he fānau a Isileli: o hage koe fekau a Jihova kia Mosese.

¶ 8 Bea naa ne gaohi ae jifafatafata oe gaue fakabotoboto, o hage koe gaue oe efoti; i he koula, moe lanumoana, moe bauhiuhi, moe kulaahoaho, moe tubenu tuovalevale.

9 Nae botubotu tatau be ia; naa nau gaohi ae jifafatafata ke louua: koe haga be taha hono loloa o ia, moe haga be taha hono maukubu, oka beluua ia.

10 Bea naa nau fakamau i ai ae otu maka e fa: ko hono uluaki otu koe satisi, moe tobasi, moe kabukeli: koeni ae uluaki otu.

11 Bea ko hono ua oe otu, koe emalata, moe safaia, moe taimoni.

12 Bea ko hono tolu oe otu, koe likua, moe aketi, moe ametisi.

13 Bea ko hono fa oe otu, koe belili, moe oniki, moe jasiba: nae fakamau ia i he gaahi takafi koula mo ono fakamau.

14 Bea nae hogofulu ma ua ae maka, o fakatatau ki he higoa oe fānau a Isileli, o hage koe tohi togitogi oe mama, taki taha mo hono higoa, o fakatatau ki he faahiga e hogofulu ma ua.

15 Bea naa nau gaohi ki hono botu e ua oe jifafatafata ae nonoo koula haohaoa e ua, koe gaue fihifihi.

16 Bea naa nau gaohi ae takafi koula e ua, moe kavei koula e ua; bea ai ae kavei e ua ki hono botu e ua oe jifafatafata.

17 Bea naa nau ai ae ogo nonoo koula fihifihi ki he kavei e ua i hono botu e ua oe jifafatafata.

18 Bea ko hono botu e ua oe nonoo fihifihi e ua, naa nau fakamau ki he takafi e ua, bea nae ai ia ki he botu e ua oe uma oe efoti ki ao.

19 Bea naa nau gaohi ae kavei koula e ua, o ai ia i he botu e ua oe jifafatafata, ki he kaba oia, aia nae i he botu ki loto oe efoti.

20 Bea naa nau gaohi ae kavei koula kehe e ua, bea nae ai ia i he botu e ua oe efoti i lalo, o ofi ki he botu ki ao; o hagatonu atu ki he fakamau e taha o ia, i oluga i he noo fakanikoniko‘i oe efoti.

21 Bea naa nau fakamau ae jifafatafata aki hono kavei ki he kavei oe efoti aki ae noo lanumoana, koeuhi ke i oluga ia i he noo fakanikoniko‘i oe efoti, bea koeuhi ke oua naa vete ae jifafatafata mei he efoti; o hage koe fekau a Jihova kia Mosese.

¶ 22 Bea naa ne gaohi ae kofu fakatōtōlōfa oe efoti aki ae gaue lalaga, bea koe lanumoana be ia katoa.

23 Bea nae ai ae ava i he loto oe kofu tōtōlōfa, o hage koe ava oe kofu tau, moe mea fakamau nae takatakai ae ava telia naa mahae ia.

24 Bea naa nau gaohi i he tabataba oe kofu fakatōtōlōfa ae gaahi bomikaniti oe lanumoana, moe bauhiuhi, moe kulaahoaho, moe tubenu tuovalevale.

25 Bea naa nau gaohi ae gaahi fafagu oe koula haohaoa bea nae ai ae gaahi fafagu ki he vahaa oe bomikaniti i he taba oe kofu fakatōtōlōfa, o takatakai i he vahaa oe gaahi bomikaniti;

26 Koe fafagu moe bomikaniti, koe fafagu moe bomikaniti, o takatakai i he tabataba oe kofu fakatōtōlōfa ke fai ai ae gaue: bage koe fekau a Jihova kia Mosese.

¶ 27 Bea naa nau gaohi ae gaahi kofutua oe tubenu tuovalevale kuo lalaga moo Elone, mo hono gaahi foha,

28 Moe tatā oe tubenu tuovalevale, moe gaahi tatā lelei oe tubenu tuovalevale, moe kofu va‘e tubenu koe tubenu tuovalevale,

29 Moe noo oe tubenu tuovalevale, moe lanumoana, moe bauhiuhi, moe kulaahoaho, nae tuitui: o hage koe fekau a Jihova kia Mosese.

¶ 30 Bea naa nau gaohi ae bale oe tatā tabu oe koula haohaoa, o tohi ki ai ae tohi, o hage koe tohi togitogi oe mama. KOE MAONIONI KIA JIHOVA.

31 Bea naa nau nonoo ki ai ae noo koe lanumoana, ke fakamau aki ia i oluga ki he tatā; o hage koe fekau a Jihova kia Mosese.

¶ 32 Bea nae behe hono fakaoji oe gaahi gaue kotoabe ki he fale tabu oe fale fehikitaki oe kakai: bea nae fai e he fānau a Isileli o fakatatau ki he mea kotoabe nae fekau e Jihova kia Mosese, nae behe be e nau fai.

¶ 33 Bea naa nau omi ae fale tabu kia Mosese, koe fale fehikitaki, mo hono nāunāu kotoabe, ko hono gaahi fakamau, mo hono gaahi laubaba, mo hono gaahi akau fakamau, mo hono gaahi bou, mo hono gaahi tuuga,

34 Mo hono fakabuloga oe kili‘i sibi tagata nae tukukula, bea moe fakabuloga oe kili‘i bajia, bea moe buibui ke ufiufi aki,

35 Koe buha oe fuakava, mo hono ogo haamo, moe nofoaga aloofa,

36 Koe balebale, mo hono gaahi nāunāu oia, moe ma oe ao,

37 Koe tuuga māma maa, mo hono gaahi foi māma, mo hono gaahi aiaga māma ke teu‘i, mo hono gaahi nāunāu kotoabe o ia, moe lolo ki he māma.

38 Moe feilaulauaga koula, moe lolo tākai, moe mea namu kakala, moe mea tautau ki he mataba oe fale fehikitaki,

39 Koe feilaulauaga balasa mo hono mea vagavaga balasa, a hono ogo haamo, mo hono nāunāu kotoabe, koe sene mo hono tuuga,

40 Koe gaahi buibui tautau ki he lotoa, a hono gaahi bou, mo hono gaahi tuuga, moe mea tautau ki he mataba oe lotoa, a hono gaahi afo, mo hono gaahi fa‘o, bea moe gaahi ibu kotoabe ki he gaue oe fale tabu, ki he fale fehikitaki oe kakai,

41 Koe gaahi kofu gaue ke fai ai ae gaue i he botu maonioni, moe gaahi kofu maonioni kia Elone koe taulaeiki, moe gaahi kofu ki hono gaahi foha, ke gaue ai i he gaue fakataulaeiki.

42 Bea nae fai ae gaue kotoabe e he fānau a Isileli, o fakatatau ki he mea kotoabe nae fekau e Jihova kia Mosese.

43 Bea nae vakai e Mosese ki he gaahi gaue kotoabe, bea vakai, kuo nau fai ia o hage koe fekau a Jihova, io, nae behe be e nau fai ia: bea nae tabuaki akinautolu e Mosese.