« ថ្ងៃទី ៣–៩ ខែ តុលា ។ អេសាយ ៥៨–៦៦ ៖ ‹ អ្នកដ៏ជួយប្រោសលោះមកឯក្រុងស៊ីយ៉ូន › » ចូរមកតាមខ្ញុំ—សម្រាប់អង្គការបឋមសិក្សា ៖ ព្រះគម្ពីរសញ្ញាចាស់ ឆ្នាំ ២០២២ ( ឆ្នាំ ២០២១ )

« ថ្ងៃទី ៣–៩ ខែ តុលា ។ អេសាយ ៥៨–៦៦ » ចូរមកតាមខ្ញុំ—សម្រាប់អង្គការបឋមសិក្សា ៖ ឆ្នាំ ២០២២

ព្រះយេស៊ូវនៅក្នុងសាលាប្រជុំនៅណាសារ៉ែត ដោយ ហ្គ្រេក ខេ អូលសិន

ថ្ងៃទី ៣–៩ ខែ តុលា

អេសាយ ៥៨–៦៦

« អ្នកដ៏ជួយប្រោសលោះមកឯក្រុងស៊ីយ៉ូន »

គំនិតសម្រាប់សកម្មភាពនៅក្នុងគម្រោងមេរៀននេះមានគោលបំណងដើម្បីបំផុសគំនិតច្នៃប្រឌិតរបស់បងប្អូន ។ សូមកុំមានអារម្មណ៍ថាចាំបាច់ត្រូវតែធ្វើតាមគម្រោងមេរៀនទាំងនេះអី សូមធ្វើតាមការបំផុសគំនិតពីព្រះវិញ្ញាណពីមុន និងអំឡុងមេរៀនរបស់បងប្អូន ។

កត់ត្រាចំណាប់អារម្មណ៍របស់បងប្អូន

អញ្ជើញឲ្យចែកចាយ

ពាក្យសម្ដីរបស់អេសាយភាគច្រើន ថ្លែងទីបន្ទាល់អំពីព្រះអង្គសង្គ្រោះ ។ សូមបង្ហាញរូបភាពនៃព្រះយេស៊ូវ ហើយអញ្ជើញកុមារឲ្យចែកចាយអ្វីដែលពួកគេបានរៀនអំពីទ្រង់នៅសប្ដាហ៍នេះ ។

បង្រៀនគោលលទ្ធិ ៖ កុមារតូចៗ

អេសាយ ៥៨:១៣–១៤

ថ្ងៃឈប់សម្រាកជាទីរីករាយចិត្តដល់ខ្ញុំ ។

ថ្ងៃឈប់សម្រាកគឺជាពេលវេលាមួយសម្រាប់យើង ដើម្បីចងចាំពីព្រះអម្ចាស់ ហើយសម្រាកពីសកម្មភាពប្រចាំសប្ដាហ៍របស់យើង ។ តើបងប្អូនអាចជួយកុមារដែលបងប្អូនបង្រៀនឲ្យចាត់ថ្ងៃឈប់សម្រាកជាទីរីករាយចិត្តដោយរបៀបណា ?

សកម្មភាពដែលអាចធ្វើបាន

សូមឲ្យកុមារថាតាមឃ្លា « រាប់ថ្ងៃឈប់សម្រាកទុកជាទីរីករាយចិត្ត ហើយលើកថ្ងៃបរិសុទ្ធរបស់ព្រះយេហូវ៉ា » ( អេសាយ ៥៨:១៣ ) សាឡើងវិញបួនប្រាំដង ។ សូមពន្យល់ថា « ជាទីរីករាយចិត្ត » មានន័យថាអ្វីមួយដែលនាំឲ្យយើងមានអំណរ ។ សូមឲ្យកុមារចែកចាយរឿងមួយចំនួនដែលនាំឲ្យពួកគេមានអំណរ ។ សូមថ្លែងទីបន្ទាល់ថា ព្រះអម្ចាស់បានប្រទានថ្ងៃឈប់សម្រាកដល់យើង ដោយសារទ្រង់មានព្រះទ័យចង់ឲ្យយើងមានអំណរ ។ សូមប្រាប់កុមារពីមូលហេតុដែលថ្ងៃឈប់សម្រាកជាទីរីករាយចិត្តដល់បងប្អូន ។
សូមអាន អេសាយ ៥៨:១៤ ទៅកុមារ ៖ « គ្រានោះឯងនឹងបានចិត្តរីករាយក្នុងព្រះយេហូវ៉ា » ។ សូមពន្យល់ដល់កុមារថា ថ្ងៃឈប់សម្រាកគឺជាថ្ងៃពិសេសមួយ—ជាពេលមួយដែលយើងអាចគិតអំពីការណ៍ទាំងឡាយដែលព្រះវរបិតាសួគ៌ និងព្រះយេស៊ូវបានធ្វើ ដើម្បីជួយយើងឲ្យសប្បាយរីករាយ ។ សូមជួយកុមារឲ្យគិតអំពីអ្វីៗដែលពួកគេអាចធ្វើនៅថ្ងៃឈប់សម្រាក ដើម្បីចងចាំដល់ព្រះវរបិតាសួគ៌ និងព្រះយេស៊ូវ ។ សូមអញ្ជើញពួកគេឲ្យគូររូបភាពពីគំនិតរបស់ពួកគេ ហើយចែកចាយរូបភាពរបស់ពួកគេជាមួយនឹងគ្នាទៅវិញទៅមក និងក្រុមគ្រួសាររបស់ពួកគេ ។

ស្រ្តីម្នាក់កំពុងអុជចង្កៀងពីចង្កៀងនៅលើដៃរបស់បុរសម្នាក់ — « ព្រះយេហូវ៉ា ទ្រង់នឹងជាពន្លឺដ៏នៅអស់កល្បជានិច្ចដល់ឯងវិញ » ( អេសាយ ៦០:១៩ ) ។ អំណោយទាននៃពន្លឺ ដោយ អ៊ីវ៉ា ធីម៉ូធី

អេសាយ ៦០:១–៣

ខ្ញុំអាចបញ្ចាំងពន្លឺរបស់ព្រះអង្គសង្គ្រោះដល់មនុស្សដទៃបាន ។

អេសាយបានព្យាករថា នៅក្នុងថ្ងៃចុងក្រោយ រាស្ត្ររបស់ព្រះអម្ចាស់នឹងដូចជាពន្លឺដល់ពួកអ្នកដែលនៅក្នុងសេចក្តីងងឹត ។ សូមពិចារណាពីរបៀបដែលបងប្អូនអាចជួយកុមារឲ្យ « ក្រោកឡើង » និង « ភ្លឺមកចុះ » ។

សកម្មភាពដែលអាចធ្វើបាន

សូមអញ្ជើញកុមារឲ្យបិទភ្នែកពួកគេ ពេលដែលបងប្អូនអាន អេសាយ ៦០:១–៣ ។ សូមឲ្យពួកគេបើកភ្នែករបស់ពួកគេ ពេលពួកគេឮពាក្យ « ពន្លឺ » ហើយបិទភ្នែក ពេលពួកគេឮពាក្យ « សេចក្តីងងឹត » ។ សូមពន្យល់ថា ព្រះយេស៊ូវគ្រីស្ទ និងដំណឹងល្អរបស់ទ្រង់គឺដូចជាពន្លឺដែលជួយយើងឲ្យឃើញផ្លូវរបស់យើងត្រឡប់ទៅព្រះវរបិតាសួគ៌វិញដែរ ។
សូមឲ្យរូបភាពនៃពន្លឺមួយទៅកុមារម្នាក់ៗ ( ដូចជាព្រះអាទិត្យ ទៀន ឬអំពូលភ្លើង ) ។ សូមជួយពួកគេឲ្យគិតអំពីរបៀបដែលពួកគេអាចចែកចាយពន្លឺរបស់ព្រះអង្គសង្គ្រោះជាមួយអ្នកដទៃ ។ កាលដែលគំនិតនីមួយៗត្រូវបានចែកចាយហើយ សូមអញ្ជើញពួកគេឲ្យ « ក្រោកឡើង » ហើយ « ភ្លឺមកចុះ » ពោលគឺបញ្ចាំងពន្លឺរបស់ពួកគេ ដោយការលើករូបភាពរបស់ពួកគេឡើង ។ សូមប្រាប់កុមារអំពីរបៀបដែលបងប្អូនបានឃើញពួកគេចែកចាយពន្លឺរបស់ព្រះអង្គសង្គ្រោះ ។
សូមច្រៀងជាមួយគ្នានូវបទចម្រៀងមួយបទអំពីការចែកចាយពន្លឺ ដូចជាបទ « រះឡើង » ( សៀវភៅចម្រៀងកុមារ ទំព័រ ៩៦ ) ។ សូមជួយកុមារឲ្យកត់សម្គាល់ពាក្យទាំងឡាយនៅក្នុងបទចម្រៀងនេះ ដែលបញ្ជាក់បន្ថែមលើអ្វីដែលពួកគេរៀនចេញមកពី អេសាយ ៦០:១–៣ ។

អេសាយ ៦១:១–៣

ព្រះយេស៊ូវគ្រីស្ទគឺជាព្រះអង្គសង្គ្រោះ និងព្រះប្រោសលោះរបស់ខ្ញុំ ។

អេសាយ ៦១:១–៣ ផ្ដល់នូវការពិពណ៌នាដ៏មានអានុភាពអំពីបេសកកម្មរបស់ព្រះអង្គសង្គ្រោះក្នុងការបង្រៀន និងការព្យាបាល ។ សូមរកមើលវិធីដើម្បីជួយកុមារឲ្យឃើញពីរបៀបដែលព្រះយេស៊ូវគ្រីស្ទអាចបង្រៀន និងព្យាបាលពួកគេដោយផ្ទាល់ ។

សកម្មភាពដែលអាចធ្វើបាន

សូមឲ្យកុមារកាន់រូបភាពរបស់ព្រះយេស៊ូវគ្រីស្ទកំពុងបង្រៀន ព្យាបាល និងជួយអ្នកដទៃទៀត ពេលដែលបងប្អូនអាន អេសាយ ៦១:១ ( សូមមើល សៀវភៅរូបភាពដំណឹងល្អ ) ។ សូមពន្យល់ថា ព្រះបានបញ្ជូនព្រះយេស៊ូវគ្រីស្ទ ឲ្យមកធ្វើកិច្ចការទាំងនេះសម្រាប់យើងគ្រប់គ្នា ។ សូមឲ្យកុមារចែកចាយអារម្មណ៍របស់ពួកគេអំពីព្រះយេស៊ូវគ្រីស្ទ ។ សូមថ្លែងទីបន្ទាល់អំពីសេចក្ដីស្រឡាញ់របស់ព្រះអង្គសង្គ្រោះចំពោះកុមារម្នាក់ៗ ។
អេសាយ ៦១:៣ ពិពណ៌នាអំពីអ្នកដែលស្ដាប់ និងគោរពតាមព្រះអម្ចាស់ជា « ដើមឈើនៃសេចក្តីសុចរិត » ។ សូមគូររូបដើមឈើនៅលើក្តារខៀន ហើយអញ្ជើញកុមារឲ្យគិតអំពីការណ៍សុចរិតនានាដែលពួកគេអាចធ្វើបាន ។ សម្រាប់គំនិតនីមួយៗដែលបានលើកឡើង សូមឲ្យកុមារគូររូបស្លឹកឈើមួយនៅលើដើមឈើនោះ ។

បង្រៀនគោលលទ្ធិ ៖ កុមារធំៗ

អេសាយ ៥៨:៦–១១

ការតមអាហារផ្ដល់ពរជ័យដល់ខ្ញុំ និងអ្នកដទៃទៀតដែលទ័លក្រ ។

កុមារមួយចំនួនដែលបងប្អូនបង្រៀន អាចនឹងធំល្មមដើម្បីធ្វើការតមអាហារបាន ។ ប៉ុន្តែសូម្បីតែពួកកុមារដែលមិនទាន់អាចតមអាហារបាន ក៏អាចទទួលផលប្រយោជន៍ពីការរៀនច្បាប់របស់ព្រះ ស្តីពីការតមអាហារផងដែរ ហើយរៀបចំខ្លួនដើម្បីតមអាហារ នៅពេលពួកគេធំល្មម ។

សកម្មភាពដែលអាចធ្វើបាន

សូមសរសេរនៅលើក្ដារខៀន ហេតុអ្វីយើងតមអាហារ ? និង តើយើងតមអាហារដោយរបៀបណា ? សូមអញ្ជើញឲ្យកុមារសរសេរចម្លើយដែលអាចមាននៅលើក្តារខៀន ។ សូមលើកទឹកចិត្តពួកគេឲ្យមើល « តម, តំណម » នៅក្នុងសេចក្ដីណែនាំដល់បទគម្ពីរទាំងឡាយ ( នៅលើគេហទំព័រ scriptures.ChurchofJesusChrist.org ) និង អេសាយ ៥៨:៦–១១ ដើម្បីស្វែងរកចម្លើយបន្ថែមទៀត ។ តើ អេសាយ ៥៨:៦–១១ អាចជួយយើងយ៉ាងដូចម្ដេច នៅពេលពិបាកការតមអាហារ ?
សូមចែកចាយជាមួយកុមារនូវបទពិសោធន៍ផ្ទាល់ខ្លួនមួយអំពីការតមអាហារ ឬចែកចាយដំណើររឿងមួយចេញពីទស្សនាវដ្ដីសាសនាចក្រអំពីការតមអាហារ ។ សូមសង្កត់ធ្ងន់លើពរជ័យដែលទទួលបាន តាមរយៈការតមអាហារដោយមានគោលបំណងខាងវិញ្ញាណ ។ ប្រសិនបើមានកុមារណាម្នាក់ធ្លាប់បានតមអាហារ សូមអញ្ជើញពួកគេឲ្យចែកចាយអំពីបទពិសោធន៍របស់ពួកគេ ។ សូមលើកទឹកចិត្តកុមារឲ្យសួរទៅឪពុកម្ដាយរបស់ពួកគេនៅថ្ងៃអាទិត្យតមអាហារក្រោយនេះ អំពីអត្ថន័យនៃការតមអាហារ ។ សូមជួយពួកគេឲ្យយល់អំពីអត្ថន័យនៃការតមអាហារដោយមានគោលបំណងដ៏ស្មោះសរ និងដួងចិត្តដែលប្រកបដោយការអធិស្ឋាន ។
សូមអាន អេសាយ ៥៨:៦–៧ ជាមួយគ្នា ហើយពន្យល់ថា របៀបមួយដែលយើង « ចែកអាហារ [ របស់យើង ] ដល់អ្នកដែលឃ្លាន » នៅពេលយើងតមអាហារ គឺតាមរយៈការបរិច្ចាគប្រាក់ដែលយើងចំណាយលើអាហារនោះទៅជាដង្វាយតមអាហារវិញ ។ សូមបង្ហាញក្រដាសដង្វាយមួយភាគក្នុងដប់ និងដង្វាយតមអាហារទៅកុមារ ហើយពន្យល់ពីរបៀបដើម្បីបំពេញក្រដាសនេះ ។ សូមឲ្យកុមារអាន អេសាយ ៥៨:៨–១០ ហើយរកមើលពរជ័យដែលបានសន្យាទាំងឡាយដែលយើងទទួលបាន ពេលយើងតមអាហារ ។ តើការតមអាហារអាចផ្ដល់ពរជ័យដល់យើង និងជនទ័លក្រយ៉ាងដូចម្ដេច ?

អេសាយ ៦១:១–៣

ព្រះយេស៊ូវគ្រីស្ទគឺជាព្រះអង្គសង្គ្រោះ និងព្រះប្រោសលោះរបស់ខ្ញុំ ។

សូមពិចារណាពីរបៀបដែលបងប្អូនអាចប្រើប្រាស់ពាក្យសម្ដីរបស់អេសាយឲ្យបានល្អបំផុត ដើម្បីពង្រឹងទីបន្ទាល់របស់កុមារអំពីព្រះយេស៊ូវគ្រីស្ទ ថាជាព្រះអង្គសង្គ្រោះ និងព្រះប្រោសលោះរបស់ពួកគេ ។

សកម្មភាពដែលអាចធ្វើបាន

សូមផ្តល់ពេលឲ្យកុមារពីរបីនាទីដើម្បីអាន អេសាយ ៦១:១–៣ ដោយខ្លួនពួកគេ ។ បន្ទាប់មក សូមអញ្ជើញពួកគេឲ្យសរសេរនៅលើក្រដាសមួយសន្លឹក ឬនៅក្នុងទិន្នានុប្បវត្តិសិក្សា ថាខគម្ពីរទាំងនេះបង្រៀនពួកគេអ្វីខ្លះអំពីព្រះយេស៊ូវគ្រីស្ទ ។ សូមអញ្ជើញកុមារពីរបីនាក់ឲ្យចែកចាយអំពីគំនិតរបស់ពួកគេ ។
សូមអញ្ជើញកុមារឲ្យចែកចាយឃ្លាមួយចេញពីខគម្ពីរទាំងនេះ ដែលមានន័យជាពិសេសដល់ពួកគេ ហើយពន្យល់ពីមូលហេតុ ។ តើខគម្ពីរទាំងនេះជួយយើងយល់ពីអ្វី ដែលព្រះយេស៊ូវគ្រីស្ទត្រូវបានបញ្ចូនមកធ្វើនៅលើផែនដីនេះដោយរបៀបណា ?

អេសាយ ៦៥:១៧–២៥

សហស្សវត្សរ៍នឹងក្លាយជាគ្រាមួយនៃសេចក្ដីសុខសាន្ដ និងអំណរ ។

អេសាយបានឃើញគ្រាមួយ ពេលដែលរាស្ត្ររបស់ព្រះនឹងមានសេចក្ដីសុខសាន្ត និងអំណរ ។ ការព្យាករនេះនឹងត្រូវបានបំពេញ ពេលដែលព្រះយេស៊ូវគ្រីស្ទយាងមកផែនដីម្តងទៀត និងសោយរាជ្យរយៈពេលមួយពាន់ឆ្នាំ—ជារយៈពេលដែលត្រូវបានហៅថា សហស្សវត្សរ៍ ។

សកម្មភាពដែលអាចធ្វើបាន

អេសាយ ៦៥:១៧–២៥ ពិពណ៌នាអំពីស្ថានភាពរបស់ផែនដីនេះ នៅពេលព្រះអង្គសង្គ្រោះយាងមកម្ដងទៀត ។ សូមបំបែកកុមារជាក្រុមតូចៗ ដោយចែកខគម្ពីរពីរបីឲ្យក្រុមនីមួយៗអាន ។ ពីរបីនាទីក្រោយមក សូមធ្វើបញ្ជីមួយជាមួយគ្នានៅលើក្ដារខៀន ថាជីវិតនឹងខុសគ្នាយ៉ាងណានៅលើ « ផែនដីថ្មី » ដែលត្រូវបានពិពណ៌នានៅក្នុងខគម្ពីរទាំងនេះ ( ខទី ១៧ ) ។ តើហេតុអ្វីពេលនេះជាពេលមួយដើម្បី « មានសេចក្តីអំណរ ហើយរីករាយឡើងជាដរាប » ? ( ខទី ១៨ ) ។
ពីមុនថ្នាក់ចាប់ផ្ដើម សូមរៀបចំចម្រៀកពាក្យដែលមានពាក្យ និងឃ្លាទាំងឡាយមកពីមាត្រានៃសេចក្ដីជំនឿទីដប់ ។ សូមអញ្ជើញកុមារម្នាក់ឲ្យសូត្រមាត្រានៃសេចក្ដីជំនឿនោះ ហើយសូមឲ្យកុមារដាក់តម្រៀបស្លាកពាក្យតាមលំដាប់លំដោយ ។ សូមជួយកុមារឲ្យយល់ពីអ្វីដែលមាត្រានៃសេចក្ដីជំនឿនេះបង្រៀនយើងអំពីសហស្សវត្សរ៍ ។

លើកទឹកចិត្តឲ្យមានការរៀនសូត្រនៅឯគេហដ្ឋាន

សូមអញ្ជើញកុមារឲ្យចែកចាយអ្វីដែលពួកគេបានរៀននៅថ្ងៃនេះអំពីព្រះអង្គសង្គ្រោះ ជាមួយក្រុមគ្រួសាររបស់ពួកគេ ។ សូមលើកទឹកចិត្តពួកគេឲ្យអានបទគម្ពីរទាំងនោះជាមួយនឹងក្រុមគ្រួសាររបស់ពួកគេនៅសប្ដាហ៍នេះ ។

ការកែលម្អការបង្រៀនរបស់យើង

សួរសំណួរបំផុសគំនិត ។ សូមសួរសំណួរដែលអញ្ជើញកុមារឲ្យធ្វើហួសពីការគ្រាន់តែនិយាយពីការពិត ។ ឧទាហរណ៍ សូមគិតអំពីសំណួរដែលលើកទឹកចិត្តពួកគេឲ្យចែកចាយទីបន្ទាល់ និងបទពិសោធន៍របស់ពួកគេ ។

ទំព័រសកម្មភាព ៖ ខ្ញុំអាចបញ្ចាំងពន្លឺរបស់ព្រះអង្គសង្គ្រោះសម្រាប់មនុស្សដទៃបាន