« ថ្ងៃទី ១៦–២២ ខែ សីហា ។ គោលលទ្ធិ និង សេចក្តីសញ្ញា ៨៩-៩២ ៖ ‹ « គោលការណ៍ដោយសេចក្ដីសន្យា › » ចូរមកតាមខ្ញុំ—សម្រាប់សាលាថ្ងៃអាទិត្យ ៖ គោលលទ្ធិ និង សេចក្តីសញ្ញា ឆ្នាំ ២០២១ ( ឆ្នាំ ២០២០ )

« ថ្ងៃទី ១៦–២២ ខែ សីហា ។ គោលលទ្ធិ និង សេចក្ដីសញ្ញា ៨៩–៩២ »ចូរមកតាមខ្ញុំ—សម្រាប់សាលាថ្ងៃអាទិត្យ

ថ្ងៃទី ១៦–២២ ខែ សីហា

គោលលទ្ធិ និង សេចក្តីសញ្ញា ៨៩-៩២

« គោលការណ៍ដោយសេចក្ដីសន្យា »

នៅពេលអ្នករៀបចំបង្រៀន សូមពិចារណាពីគោលការណ៍ទាំងឡាយដែលលេចធ្លោឡើងចំពោះអ្នក នៅពេលដែលអ្នកសិក្សា ជំពូកទី ៨៩–៩២នៅសប្តាហ៍នេះ ។

កត់ត្រាចំណាប់អារម្មណ៍របស់អ្នក

អញ្ជើញឲ្យចែកចាយ

នេះគឺជាសំណួរមួយចំនួនដែលអ្នកអាចប្រើដើម្បីលើកទឹកចិត្តសិស្សឲ្យចែកចាយអ្វីមួយចេញពីការសិក្សាព្រះគម្ពីររបស់ពួកគេ ៖ តើអ្នកបានអានអ្វីខ្លះនៅសប្តាហ៍នេះ ដែលពង្រឹងដល់ទីបន្ទាល់របស់អ្នកលើព្រះ យេស៊ូវ គ្រីស្ទ ? លើការហៅបម្រើជាព្យាការីរបស់យ៉ូសែប ស្ម៊ីធ ? តើអ្នកបានអានអ្វីខ្លះដែលបានជួយអ្នកយល់កាន់តែស៊ីជម្រៅពីផែនការរបស់ព្រះវរបិតាសួគ៌សម្រាប់កូនចៅរបស់ទ្រង់ ?

បង្រៀនគោលលទ្ធិ

គោលលទ្ធិ និង សេចក្តីសញ្ញា ៨៩

ពាក្យសម្ដីនៃប្រាជ្ញាវាងវៃ ៖ « គោលការណ៍ ដោយសេចក្តី សន្យា » ។

មនុស្សជាច្រើនអាចមើលឃើញថា ពាក្យសម្ដីនៃប្រាជ្ញាវាងវៃគឺសាមញ្ញ ជាបញ្ជីដែល « ត្រូវធ្វើ » និង « មិនត្រូវធ្វើ » ។ ដើម្បីជួយសិស្សសញ្ជឹងគិតពីគោលការណ៍ទាំងឡាយនៅពីក្រោយសេចក្តីណែនាំនេះ សូមអញ្ជើញពួកគេឲ្យស្វែងរក គោលលទ្ធិ និង សេចក្តីសញ្ញា ៨៩ដោយមានសំណួរដូចខាងក្រោមនៅក្នុងចិត្ត ៖ ហេតុអ្វីព្រះអម្ចាស់ប្រទានដល់យើងនូវពាក្យសម្ដីនៃប្រាជ្ញាវាងវៃ ? តើវិវរណៈនេះបង្រៀនយើងអំពីព្រះវរបិតាសួគ៌ និងផែនការទ្រង់សម្រាប់យើងអ្វីខ្លះ ? សេចក្ដីថ្លែងការណ៍នៅក្នុង « ធនធានបន្ថែមទាំងឡាយ » អាចផ្តល់ជាជំនួយច្រើន ។ ប្រសិនបើអ្នកមានអារម្មណ៍ថា វាផ្តល់ជាអត្ថប្រយោជន៍ដល់សិស្ស នោះអ្នកអាចអញ្ជើញពួកគេឲ្យសរសេរនៅលើក្តារខៀននូវការអនុវត្តន៍ដែលនាំឲ្យមានសុខភាពល្អ និងអ្វីដែលបំផ្លាញដែលព្រះអម្ចាស់បានបញ្ជាក់នៅក្នុង គោលលទ្ធិ និង សេចក្ដីសញ្ញា ៨៩:៥-១៧ ។ បន្ទាប់មក អាចពិនិត្យមើល « សុខភាពខាងរាងកាយ និងសតិអារម្មណ៍ » នៅក្នុង ដើម្បីកម្លាំងនៃយុវជន ( ទំព័រ ២៥–២៧ ) ហើយសូមបន្ថែមចូលក្នុងបញ្ជីរបស់ពួកគេនូវអ្វីដែលពួកគេរកឃើញ ។ តើការសន្យានៅក្នុង ខទី ១៨-២១ ធ្លាប់បានបំពេញនៅក្នុងជីវិតរបស់យើងតាមរបៀបណា ?
ទាំងនេះគឺជារបៀបមួយចំនួនទៀតដែលជួយសិស្សឲ្យពិភាក្សាពីគោលការណ៍ទាំងឡាយនៅក្នុងពាក្យសម្ដីនៃប្រាជ្ញាវាងវៃ ។ អ្នកអាចបំបែកថ្នាក់ទៅជាបីក្រុម ហើយសូមឲ្យក្រុមនីមួយៗអាន កណ្ឌទី ៨៩ ដោយរកមើលចម្លើយចំពោះសំណួរមួយដូចខាងក្រោម ៖ តើគោលការណ៍អ្វីដែលអាចលើកទឹកចិត្តនរណាម្នាក់ដែលមានការលំបាកក្នុងការគោរពតាមពាក្យសម្ដីនៃប្រាជ្ញាវាងវៃ ? តើគោលការណ៍អ្វីដែលអាចជួយយើងមិនឲ្យវិនិច្ឆ័យដល់ជនណាដែលកំពុងមានការលំបាកក្នុងការគោរពដល់ពាក្យសម្ដីនៃប្រាជ្ញាវាងវៃ ? តើគោលការណ៍អ្វីខ្លះដែលអាចលួងលោមយើង នៅពេលយើងមានបញ្ហាសុខភាព ថ្វីបើយើងរស់នៅតាមពាក្យសម្ដីនៃប្រាជ្ញាវាងវៃក្តី ? ដោយសារជាផ្នែកមួយនៃសកម្មភាពនេះ នោះអ្នកអាចចែកចាយបទពិសោធន៍របស់ប្រធាន ឌៀថើរ អេស្វ អុជដូហ្វ នៅក្នុងការហ្វឹកហាត់ដើម្បីធ្វើជាអ្នកបើកយន្តហោះចម្បាំង ( សូមមើល « Continue in Patience » Ensign ឬ Liahona ខែ ឧសភា ឆ្នាំ ២០១០ ទំព័រ ៥៨ ) ។ សូមលើកទឹកចិត្តសិស្សឲ្យសញ្ជឹងគិតអំពីអ្វីមួយដែលពួកគេមានអារម្មណ៍ថាគួរឲ្យចាប់អារម្មណ៍ដើម្បីធ្វើអំឡុងការពិភាក្សា ហើយសូមទុកពេលឲ្យពួកគេសរសេរពីចំណាំអាម្មណ៍របស់ពួកគេ ។

ព្រះបានបើកសម្តែងពាក្យសម្ដីនៃប្រាជ្ញាវាងវៃដើម្បីជួយកូនចៅរបស់ទ្រង់ ។

គោលលទ្ធិ និង សេចក្ដីសញ្ញា ៩០:១–១៧

គណៈប្រធានទីមួយបានកាន់ « កូនសោទាំងឡាយនៃនគរ » ។

គម្រោងមេរៀនប្រចាំសប្ដាហ៍នេះ នៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ផ្តល់យោបល់ថាសមាជិកធ្វើការស្រាវជ្រាវ គោលលទ្ធិ និង សេចក្តីសញ្ញា ៩០:១–១៧ ដើម្បីរៀនអំពីគណៈប្រធានទីមួយ ។ អ្នកអាចសូមឲ្យសិស្សចែកចាយនូវអ្វីដែលពួកគេបានរៀននៅផ្ទះចេញពីសកម្មភាពនេះ ឬអ្នកអាចស្វែងរកខគម្ពីរទាំងនេះរួមគ្នាក្នុងថ្នាក់ ។ សិស្សក៏អាចស្វែងរកឃ្លា នៅក្នុង « ចូរមកស្ដាប់សំឡេងព្យាការី » ( ទំនុកតម្កើង ល.រ. ១២ ) ឬ ច្រៀងចម្រៀងផេ្សងទៀតអំពីពួកព្យាការីដែលទាក់ទងនឹងការបង្រៀននៅក្នុងខគម្ពីរទាំងនេះ ។ តើការបម្រើរបស់គណៈប្រធានទីមួយបានជួយអ្នកឲ្យស្គាល់ព្រះវរបិតាសួគ៌ និងព្រះយេស៊ូវ គ្រីស្ទ យ៉ាងដូចម្តេច ?

គោលលទ្ធិ និង សេចក្តីសញ្ញា ៩១

« ព្រះវិញ្ញាណបើកសម្តែងសេចក្ដីពិត » ។

នៅក្នុងពិភពលោកសព្វថ្ងៃនេះ យើងប្រឈមនិងសារជាច្រើនដែលមាននូវ « អ្វីៗច្រើន … ដែលពិត » និង « អ្វីៗច្រើន … ដែលមិនពិត » ( ខទី ១–២ ) ។ សូមអញ្ជើញសិស្សឲ្យរកមើលនៅក្នុង កណ្ឌទី ៩១ សម្រាប់ការទូន្មានអំពីអ័ប៉ូគ្រីផា ដែលអាចជួយពួកគេស្វែងយល់ពីសេចក្តីពិតនៅក្នុងសារលិខិតដែលពួកគេជួបប្រទះ ។ តើឧទាហរណ៍អ្វីខ្លះដែលពួកគេអាចចែកចាយអំពីរបៀបដែលព្រះវិញ្ញាណបានជួយពួកគេស្វែងយល់ពីសេចក្តីពិត ?

ធនធានបន្ថែមទាំងឡាយ

ពាក្យសម្តីនៃប្រាជ្ញាវាងវៃ ។

ប្រធាន ប៊យដ៏ ឃេ ផាកកឺ បានបង្រៀនថា ៖

« ពាក្យសម្ដីនៃប្រាជ្ញាវាងវៃ ‹ គោលការណ៍ ដោយសេចក្តី សន្យា › [ គោលលទ្ធិ និង សេចក្ដីសញ្ញា ៨៩:៣ ] ។ ពាក្យថា គោលការណ៍នៅក្នុងវិវរណៈនេះ គឺជាពាក្យដ៏សំខាន់មួយ ។ គោលការណ៍មួយ គឺជាសេចក្តីពិតស្ថិតស្ថេរមួយ ឬជាច្បាប់ ដែលអ្នកអាចទទួលយក ដើម្បីដឹកនាំអ្នកនៅក្នុងការធ្វើសេចក្ដីសម្រេចចិត្ត ។ ជាទូទៅ គោលការណ៍ទាំងឡាយគឺមិនអាចសរសេរជាលម្អិតអស់នោះទេ ។ ដែលអនុញ្ញាតឲ្យអ្នកមានសេរីភាពក្នុងការស្វែងរកផ្លូវរបស់អ្នកជាមួយនឹងសេចក្តីពិតដ៏ស្ថិតស្ថេរមួយ ជាគោលការណ៍មួយទុកជាយុថ្ការបស់អ្នក ។

« សមាជិកទាំងឡាយបានសរសេរសួរថាតើរបស់នេះ ឬរបស់នោះ ប្រឆាំងនឹងពាក្យសម្ដី នៃប្រាជ្ញាវាវៃឬអត់ ។ វាត្រូវបានស្គាល់ច្បាស់ថា តែ កាហ្វេ សុរា និងថ្នាំជក់ គឺប្រឆាំងនឹងពាក្យសម្ដី នៃប្រាជ្ញាវាវៃ ។ វាពុំត្រូវបានពន្យល់លម្អិតជាងនេះទេ ។ តែយើងបង្រៀនគោលការណ៍រួមគ្នានឹងពរជ័យទាំងឡាយដែលបានសន្យា ។ មាននូវទម្លាប់ដែលបង្កើតឡើងដោយមនុស្ស និងការញៀនជាច្រើន ពេលដែលមនុស្សម្នាក់ផឹក ឬចុកថ្នាំ ឬស្រូបចូល ឬចាក់ថ្នាំ ដែលនឹងធ្វើឲ្យទាំងរូបកាយ និងវិញ្ញាណមានគ្រោះថ្នាក់ ដែលវាពុំបានប្រាប់នៅក្នុងវិវរណៈទេ ។…

« សូមឲ្យតម្លៃលើគោលការណ៍នៃពាក្យសម្ដីនៃប្រាជ្ញាវាងវៃ នោះអ្នកនឹងទទួលបានពរជ័យដែលបានសន្យា » ( « The Word of Wisdom: The Principle and the Promises » Ensign ខែ ឧសភា ឆ្នាំ ១៩៩៦ ទំព័រ ១៧–១៨ ) ។

ការអភិវឌ្ឍន៍ការបង្រៀនរបស់យើង

សូមថ្លែងទីបន្ទាល់ជាញឹកញាប់ ។ សាក្សីអំពីសេចក្ដីពិតខាងវិញ្ញាណដ៏សាមញ្ញ ដ៏ស្មោះរបស់អ្នក អាចមានឥទ្ធិពលដ៏មានអនុភាពមួយទៅលើអ្នកទាំងឡាយដែលអ្នកបង្រៀន ។ សាក្សីរបស់អ្នកពុំចាំបាច់ត្រូវប្រកបដោយវោហារកោសល្យ ឬ ពេលវេលាច្រើនឡើយ ។ ឧទាហរណ៍ វាអាចជាទីបន្ទាល់នៃពរជ័យទាំងឡាយដែលអ្នកបានទទួលពីការរស់នៅតាមពាក្យសម្ដីនៃប្រាជ្ញាវាងវៃ ។ ( សូមមើល ការបង្រៀនតាមរបៀបរបស់ព្រះអង្គសង្គ្រោះទំព័រ ៣៥ ) ។