« ថ្ងៃទី ១៦–២២ ខែ សីហា ។ គោលលទ្ធិ និង សេចក្តីសញ្ញា ៨៩–៩២ ៖ ‹ គោលការណ៍ដោយសេចក្ដីសន្យា › » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ព្រះគម្ពីរគោលលទ្ធិ និង សេចក្ដីសញ្ញា ឆ្នាំ ២០២១ ( ឆ្នាំ ២០២០ )

« ថ្ងៃទី ១៦–២២ ខែ សីហា ។ គោលលទ្ធិ និង សេចក្ដីសញ្ញា ៨៩–៩២ » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ឆ្នាំ ២០២១

ថ្ងៃទី ១៦–២២ ខែ សីហា

គោលលទ្ធិ និង សេចក្តីសញ្ញា ៨៩–៩២

« គោលការណ៍ដោយសេចក្ដីសន្យា »

សូមសិក្សាប្រកបដោយការអធិស្ឋានក្នុង គោលលទ្ធិ និង សេចក្ដីសញ្ញា ៨៩–៩២ ហើយកត់ត្រាចំណាប់អារម្មណ៍ខាងវិញ្ញាណនានា ដែលបងប្អូនបានទទួល ។ សូមឆាប់ដឹងពីរបៀប « ព្រះវិញ្ញាណសម្ដែងប្រាប់ពីសេចក្ដីពិត » ដល់បងប្អូន កាលបងប្អូនសិក្សា ( គោលលទ្ធិ និងសេចក្ដីសញ្ញា ៩១:៤ ) ។

កត់ត្រាចំណាប់អារម្មណ៍របស់បងប្អូន

នៅក្នុងសាលានៃពួកព្យាការី ព្យាការី យ៉ូសែប ស្ម៊ីធ បានបង្រៀនពួកអែលឌើរនៃអ៊ីស្រាអែលអំពីកសាងនគររបស់ព្រះនៅលើផែនដី ។ ពួកលោកបានពិភាក្សាពីសេចក្ដីពិតខាងវិញ្ញាណ បានអធិស្ឋានរួមគ្នា បានតមអាហារ និងរៀបចំខ្លួនទៅប្រកាសដំណឹងល្អ ។ ប៉ុន្ដែបរិយាកាសមួយហាក់ចម្លែកចំពោះយើងនាសព្វថ្ងៃនេះ ហើយវាហាក់មិនត្រឹមត្រូវចំពោះអិមម៉ា ស្ម៊ីធផងដែរ ។ អំឡុងការប្រជុំ ពួកបុរសបានជក់បារី ហើយចុកថ្នាំ ដែលវាជារឿងធម្មតាសម្រាប់ពេលនោះ ប៉ុន្ដែវាប្រឡាក់កម្រាលឈើទៅជាពណ៌ខ្មៅ ហើយខ្យល់ធុំក្លិនមិនល្អ ។ អិមម៉ាបានចែកចាយកង្វល់របស់នាងជាមួយយ៉ូសែប ហើយយ៉ូសែបបានទូលសូមដល់ព្រះអម្ចាស់ ។ លទ្ធផលគឺជាវិវរណៈមួយ ដែលទៅហួសពីការជក់បារី និងថ្នាំចុក ។ វាបានផ្ដល់ឲ្យពួកបរិសុទ្ធ រាប់ជំនាន់ដែលនឹងកើតមកនូវ « គោលការណ៍ដោយសេចក្ដីសន្យា »—ជាសេចក្ដីសន្យាដល់សុខភាពផ្លូវកាយ « ប្រាជ្ញា » និង « និងផលថ្លៃវិសេសនៃចំណេះវិជ្ជា » ( គោលលទ្ធិ និង សេចក្ដីសញ្ញា ៨៩:៣, ១៩ ) ។

សូមមើលផងដែរ ពួកបរិសុទ្ធ ទំព័រ ១:១៦៦–៦៨ ។

គំនិតយោបល់សម្រាប់ការសិក្សាព្រះគម្ពីរផ្ទាល់ខ្លួន

គោលលទ្ធិ និង សេចក្តីសញ្ញា ៨៩

ពាក្យសម្ដីនៃប្រាជ្ញាវាងវៃគឺជា « គោលការណ៍ដោយសេចក្ដីសន្យា » ។

នៅពេលពួកអែលឌើរក្នុងសាលានៃពួកព្យាការីបានឮយ៉ូសែប ស្ម៊ីធ អានពាក្យសម្ដីនៃប្រាជ្ញាវាងវៃដំបូង ពួកគេបាន « បោះចោលបំពង់ និងដុំថ្នាំចុករបស់គេទៅក្នុងភ្លើង » ភ្លាម ( ពួកបរិសុទ្ធ ទំព័រ ១:១៦៨ ) ។ នៅពេលនោះ ពាក្យសម្ដីនៃប្រាជ្ញាវាងវៃត្រូវបានគេចាត់ទុកថាជាបម្រាម ជាជាងបទបញ្ញត្តិ ប៉ុន្ដែពួកគេចង់បង្ហាញឆន្ទៈគោរពតាម ។ ប្រហែលបងប្អូនបាន « បោះ » សារធាតុដែលពាក្យសម្ដីនៃប្រាជ្ញាវាងវៃបានព្រមានហាមឃាត់ចេញពីជីវិតបងប្អូនរួចហើយ ប៉ុន្ដែតើមានអ្វីផ្សេងទៀតដែលបងប្អូនអាចរៀនមកពីវិវរណៈនេះ ? សូមពិចារណាអំពីយោបល់ទាំងនេះ ៖

សូមរកមើលឃ្លាដែលបងប្អូនអាចមិនបានកត់សម្គាល់—ឬមិនបានគិតច្រើនអំពីវា—ពីមុនមក ។ តើបងប្អូនរៀនអ្វីខ្លះពីវា ?
គោលលទ្ធិ និង សេចក្ដីសញ្ញា ៨៩ រួមមានសេចក្ដីសន្យាជាច្រើន ( សូមមើល ខទី ១៨–២១ ) ។ តើបងប្អូនគិតថា សេចក្ដីសន្យាទាំងនេះមានន័យដូចម្ដេច ?
តើវិវរណៈនេះបង្រៀនបងប្អូនអ្វីខ្លះអំពីព្រះអម្ចាស់ ?
តើបងប្អូនបានឃើញគំរូអ្វីខ្លះនៃ « អំពើអាក្រក់ទាំងឡាយ និងផែនការទាំងឡាយដែលមាន … នៅក្នុងដួងចិត្តមនុស្ស ដែលរួមគំនិតប្រព្រឹត្តអំពើទុច្ចរិត » ? ( ខទី ៤ ) ។
សូមគិតពីវិវរណៈថាជា « គោលការណ៍ដោយសេចក្ដីសន្យា » ( ខទី ៣ )—ជាសេចក្ដីពិតដ៏យូរអង្វែង ដែលដឹកនាំការសម្រេចចិត្ត—មិនមែនគ្រាន់តែជាបញ្ជីនៃការធ្វើបាន និង មិនធ្វើបាននោះទេ ។ តើបងប្អូនរកឃើញគោលការណ៍អ្វីខ្លះ ដែលអាចដឹកនាំការសម្រេចចិត្តរបស់បងប្អូន ?

ព្យាការីសម័យទំនើបក៏បានព្រមានពីសារធាតុគ្រោះថ្នាក់នានា និងអាកប្បកិរិយាដែលមានលើសពីអ្វីដែលបានលើកឡើងនៅក្នុងពាក្យសម្ដីនៃប្រាជ្ញាវាងវៃទៅទៀត ( សូមមើល « សុខភាពផ្លូវកាយ និងផ្លូវចិត្ត » ដើម្បីកម្លាំងនៃយុវជន ទំព័រ ២៥–២៧ ) ។ តើបងប្អូនត្រូវបានបំផុសឲ្យធ្វើអ្វីខ្លះ ដើម្បីយកចិត្តទុកដាក់កាន់តែខ្លាំងឡើងលើគំនិត និងរាងកាយរបស់បងប្អូន ?

សូមមើលផងដែរ ដានីយ៉ែលទី ១; កូរិនថូសទី ១ ៦:១៩–២០; Gospel Topics « Word of Wisdom » topics.ChurchofJesusChrist.org; « The Word of Wisdom » Revelations in Context ទំព័រ ១៨៣–៩១; addictionrecovery.ChurchofJesusChrist.org ។

ក្មេងប្រុសៗរត់លេងលើឆ្នេរខ្សាច់ — ពាក្យសម្ដីនៃប្រាជ្ញាវាងវៃបង្រៀនយើងឲ្យថែទាំដល់រាងកាយរបស់យើង ។

គោលលទ្ធិ និង សេចក្ដីសញ្ញា ៩០:១–១៧

គណៈប្រធានទីមួយកាន់ « កូនសោទាំងឡាយនៃនគរ » ។

នៅក្នុងកណ្ឌទី ៩០ ព្រះអម្ចាស់បានប្រទានការណែនាំអំពី « ការងារបម្រើ និងគណៈប្រធានទី១ » ( ខទី ១២ ) របស់យ៉ូសែប ស្ម៊ីធ ស៊ីឌនី រិកដុន និង ហ្វ្រែឌើរិក ជី វិលលាម្ស—សមាជិកនៃអ្វីដែលយើងហៅនាពេលនេះថាជា គណៈប្រធានទីមួយ ។ តើបងប្អូនរៀនអ្វីខ្លះអំពីគណៈប្រធានទីមួយមកពី ខទី ១–១៧ ? សូមពិនិត្យសារលិខិតនាពេលថ្មីៗនេះមកពីសមាជិកក្នុងគណៈប្រធានទីមួយឡើងវិញ ។ តើពាក្យពេចន៍របស់ពួកលោក « បើកបង្ហាញសេចក្ដីអាថ៌កំបាំងទាំងឡាយនៃនគរ » ដល់បងប្អូនយ៉ាងដូចម្ដេច ? ( ខទី ១៤ ) ។ តើពួកលោក « តាំងឲ្យមានរបៀបរៀបរយនៅអស់ទាំងការងារនៃសាសនាចក្រ និងនគរនេះ » ដោយរបៀបណា ? ( ខទី ១៦ ) ។

សូមមើលផងដែរ ហិនរី ប៊ី អាវរិង « អំណាចនៃសេចក្ដីជំនឿដើម្បីគាំទ្រ » Ensign ឬ Liahona ខែ ឧសភា ឆ្នាំ ២០១៩ ទំព័រ ៥៨–៦០ ។

គោលលទ្ធិ និង សេចក្ដីសញ្ញា ៩០:២៤

« គ្រប់ការណ៍ទាំងអស់ផ្សំគ្នាសម្រាប់សេចក្ដីល្អដល់ [ ខ្ញុំ ] » ។

សូមសញ្ជឹងគិតពីបទពិសោធន៍នានា ដែលបងប្អូនបានមានដែលថ្លែងទីបន្ទាល់ពីសេចក្ដីសន្យារបស់ព្រះអម្ចាស់នៅក្នុង គោលលទ្ធិ និង សេចក្តីសញ្ញា ៩០:២៤ ។ សូមពិចារណាធ្វើការកត់ត្រាបទពិសោធន៍របស់បងប្អូន ហើយចែកចាយវាជាមួយនឹងសមាជិកគ្រួសារ ឬមនុស្សជាទីស្រឡាញ់—ប្រហែលជានរណាម្នាក់ដែលត្រូវការការអះអាងជាថ្មី ឬការលើកទឹកចិត្ត ។ ប្រសិនបើមានពរជ័យណាដែលបងប្អូននៅតែរង់ចាំ សូមសញ្ជឹងគិតពីអ្វីដែលបងប្អូនអាចធ្វើបានដើម្បីបន្ដស្មោះត្រង់ កាលបងប្អូនរង់ចាំឃើញរបៀបដែល « គ្រប់ការណ៍ទាំងអស់ផ្សំគ្នាសម្រាប់សេចក្ដីល្អដល់អ្នក » ។

គោលលទ្ធិ និង សេចក្តីសញ្ញា ៩០:២៨–៣១

តើនរណាជាវីអែណា ចាកស៍ ?

វីអែណា ចាកស៍បានកើតនៅថ្ងៃទី ១០ ខែ មិថុនា ឆនាំ ១៧៨៧ ក្នុងរដ្ឋម៉ាសាឈូសេត ។ ជាស្ដ្រីដ៏មានសេចក្ដីជំនឿម្នាក់ ដែលមានទ្រព្យហិរញ្ញវត្ថុច្រើនគួរសម នាងវីអែណាបានជួបនឹងអ្នកផ្សព្វផ្សាយសាសនាដំបូងក្នុងឆ្នាំ ១៨៣១ ។ ក្រោយពីទទួលបានសាក្សីខាងវិញ្ញាណថា សារលិខិតរបស់ពួកគេគឺពិត នោះនាងបានធ្វើដំណើរទៅជួបនឹងព្យាការីនៅទីក្រុងខឺតឡង់ រដ្ឋអូហៃអូ ជាកន្លែងដែលនាងបានទទួលបុណ្យជ្រមុជទឹក ។

នាងវីអែណាំបានគោរពតាមការប្រឹក្សារបស់ព្រះអម្ចាស់ដល់នាងនៅក្នុង គោលលទ្ធិ និង សេចក្ដីសញ្ញា ៩០:២៨–៣១ ។ ការថ្វាយរបស់នាងដល់ព្រះអម្ចាស់រួមមានការបរិច្ចាគ ដែលនាងបានធ្វើពីមុននៅទីក្រុងខឺតឡង់ បានមកដល់ក្នុងពេលដ៏សំខាន់សម្រាប់សាសនាចក្រ នៅពេលថ្នាក់ដឹកនាំព្យាយាមទិញដី ដែលព្រះវិហារបរិសុទ្ធខឺតឡង់នឹងត្រូវកសាង ។ នាងវីអែណាបាន « មានចិត្តស្មោះត្រង់ ហើយមិនខ្ជិលច្រអូស » ពេញមួយជីវិតរបស់នាង ហើយនៅទីបញ្ចប់អាច « បានរស់នៅដោយសេចក្ដីសុខសាន្ត » ( ខទី ៣១ ) នៅក្នុងជ្រលងភ្នំសលត៍ លេក ជាកន្លែងដែលនាងបានស្លាប់នៅអាយុ ៩៦ ។

គំនិតយោបល់សម្រាប់ការសិក្សាព្រះគម្ពីរជាគ្រួសារ និងរាត្រីជួបជុំក្រុមគ្រួសារ

គោលលទ្ធិ និងសេចក្ដីសញ្ញា ៨៩ ។សមាជិកគ្រួសាររបស់បងប្អូនអាចរីករាយនឹងការគូរ ឬរកមើលរូបភាពអាហារ និងសារធាតុផ្សេងទៀតដែលបានលើកឡើងនៅក្នុង គោលលទ្ធិ និង សេចក្ដីសញ្ញា ៨៩ ។ រួចហើយបងប្អូនអាចលេងល្បែងមួយ—សមាជិកគ្រួសារអាចប្ដូរវេនគ្នាជ្រើសរើសរូបភាពដោយចៃដន្យ ដាក់របស់ដែលយើងមិនគួរប្រើនៅក្នុងធុងសម្រាម ហើយរបស់ដែលយើងគួរប្រើនៅលើចានមួយ ។ តើសេចក្ដីសន្យានៅក្នុង ខទី ១៨–២១ ត្រូវបានបំពេញនៅក្នុងជីវិតរបស់យើងតាមរបៀបណា ?

ការអាន « សុខភាពផ្លូវកាយ និងផ្លូវចិត្ត » នៅក្នុងសៀវភៅ ដើម្បីកម្លាំងនៃយុវជន ( ទំព័រ ២៥–២៧ ) អាចបំផុសឲ្យមានការពិភាក្សាអំពីរបៀបផ្សេងទៀតដើម្បីថែទាំដល់សុខភាពរបស់យើង និងអំពីពរជ័យនានាដែលព្រះសន្យា ។

គោលលទ្ធិ និង សេចក្ដីសញ្ញា ៩០:៥ ។សូមនិយាយអំពីរបៀបដែលបងប្អូន « ទទួលព្រះបន្ទូល [ វិវរណៈ ឬព្យាការី ] នៃព្រះ » ។ តើយើងអាចបង្ហាញថា ពួកលោកមិនមែនជា « ការឥតការ » ចំពោះយើងដោយរបៀបណា ?

គោលលទ្ធិ និង សេចក្ដីសញ្ញា ៩១ ។បងប្អូនអាចពិភាក្សាពីរបៀបដែលការប្រឹក្សារបស់ព្រះអម្ចាស់អំពីអ័ប៉ូគ្រីផា ( សូមមើល ខទី ១–២ ) អនុវត្តចំពោះប្រព័ន្ធផ្សព្វផ្សាយដែលគ្រួសាររបស់បងប្អូនអាចជួបប្រទះនាសព្វថ្ងៃនេះ ( សូមមើលផងដែរ សេចក្ដីណែនាំដល់បទគម្ពីរទាំងឡាយ « អ័ប៉ូគ្រីផា » នៅលើគេហទំព័រ scriptures.ChurchofJesusChrist.org » ។ បងប្អូនក៏អាចចែកចាយបទពិសោធន៍ផ្ទាល់ខ្លួនផងដែរ នៅពេលការត្រូវបាន « បំភ្លឺដោយព្រះវិញ្ញាណ » ( ខទី ៥ ) បានជួយបងប្អូនឲ្យបែងចែករវាងសេចក្ដីពិត និងកំហុស ។

គោលលទ្ធិ និង សេចក្ដីសញ្ញា ៩២:២ ។តើការធ្វើជា « សមាជិកសកម្មម្នាក់ » ក្នុងសាសនាចក្រមានន័យដូចម្តេច ?

សម្រាប់គំនិតបន្ថែមសម្រាប់ការបង្រៀនដល់កុមារ សូមមើល គម្រោងមេរៀនប្រចាំសប្ដាហ៍នេះ នៅក្នុងសៀវភៅ ចូរមកតាមខ្ញុំ—សម្រាប់ថ្នាក់បឋមសិក្សា ។

ចម្រៀងស្នើ ៖ « ព្រះបានប្រទានវិហារឲ្យខ្ញុំ » សៀវភៅចម្រៀងកុមារ ទំព័រ ៧៣ ។

ការកែលម្អការបង្រៀនរបស់យើង

ប្រើប្រាស់វិធីសាស្ត្រផ្សេងទៀត ។ សូមរកមើលរបៀបផ្សេងៗទៀតដើម្បីឲ្យគ្រួសារបងប្អូនចូលរួមក្នុងការសិក្សាព្រះគម្ពីរជាគ្រួសារ ។ ឧទាហរណ៍ សមាជិកគ្រួសារអាចច្រៀងទំនុកតម្កើង ឬចម្រៀងកុមារដែលទាក់ទងទៅនឹងខគម្ពីរមួយ គូររូបភាពអំពីអ្វីដែលពួកគេបានអាន ឬសង្ខេបខគម្ពីរមួយជាសម្ដីរបស់ពួកគេផ្ទាល់ ។

ផ្លែឈើ និងបន្លែ — « ពួកបរិសុទ្ធទាំងអស់ដែល … ប្រព្រឹត្តតាមពាក្យសម្ដីទាំងនេះ ដោយដើរក្នុងការគោរពដល់ព្រះបញ្ញត្តិទាំងឡាយ នោះនឹងបានទទួលសេចក្ដីសុខស្រួលដល់ផ្ចិតពួកគេ ហើយជាខួរដល់ឆ្អឹងពួកគេ » ( គោលលទ្ធិ និង សេចក្ដីសញ្ញា ៨៩:១៨ ) ។