« ថ្ងៃទី ៩–១៥ ខែ សីហា ។ គោលលទ្ធិ និង សេចក្ដីសញ្ញា ៨៨ ៖ ‹ ចូរតាំង… គេហដ្ឋាននៃព្រះ › » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ព្រះគម្ពីរគោលលទ្ធិ និង សេចក្ដីសញ្ញា ឆ្នាំ ២០២១ ( ឆ្នាំ ២០២០ )

« ថ្ងៃទី ៩–១៥ ខែ សីហា ។ គោលលទ្ធិ និង សេចក្ដីសញ្ញា ៨៨ » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ឆ្នាំ ២០២១

ថ្ងៃទី ៩–១៥ ខែ សីហា

គោលលទ្ធិ និង សេចក្តីសញ្ញា ៨៨

« ចូរតាំង… គេហដ្ឋាននៃព្រះ »

ប្រធាន រ័សុល អិម ណិលសុន បានមានប្រសាសន៍ថា « ខ្ញុំសន្យាថា នៅពេលបងប្អូនធ្វើការដោយឧស្សាហ៍ព្យាយាម ដើម្បីរៀបចំគេហដ្ឋានរបស់បងប្អូនឲ្យក្លាយទៅជាមជ្ឈមណ្ឌលនៃការរៀនសូត្រដំណឹងល្អ …ឥទ្ធិពលរបស់មារសត្រូវនៅក្នុងជីវិត របស់បងប្អូន និងគេហដ្ឋាន របស់បងប្អូន នឹងត្រូវសាបរលាប » ( « ការក្លាយជាពួកបរិសុទ្ធថ្ងៃចុងក្រោយគំរូ » Ensign ឬ Liahona ខែ វិច្ឆិកា ឆ្នាំ ២០១៨ ទំព័រ ១១៣ ) ។

កត់ត្រាចំណាប់អារម្មណ៍របស់បងប្អូន

ជាញឹកញាប់ក្រៃលែង ព្រះអម្ចាស់ប្រទានដល់យើងឃើញ « ឫទ្ធានុភាព និងព្រះចេស្ដា » ( គោលលទ្ធិ និងសេចក្ដីសញ្ញា ៨៨:៤៧ ) ដ៏គ្មានព្រំដែនរបស់ទ្រង់មួយភ្លែត តាមរយៈវិវរណៈទាំងស្រុងដល់ព្យាការីរបស់ទ្រង់ ។ គោលលទ្ធិ និង សេចក្ដីសញ្ញា ៨៨ គឺជាវិវរណៈម្យ៉ាង—ជាវិវរណៈអំពីពន្លឺ និងសិរីល្អ និងនគរដែលអាចធ្វើឲ្យការថែទាំខាងលោកិយរបស់យើងមើលទៅអាចមិនសំខាន់បើយើងប្រៀបធៀបវា ។ ទោះបីយើងមិនអាចចាប់យកអ្វីទាំងអស់ដែលព្រះអម្ចាស់កំពុងបង្រៀនយើងក្ដី ក៏យើងអាចនៅតែយ៉ាងហោចណាស់ដឹងថា មានអ្វីដ៏ច្រើនទៀតទៅដល់ភាពអស់កល្ប ជាងអ្វីដែលយើងអាចយល់បាននាពេលនេះដែរ ។ ពិតណាស់ ព្រះអម្ចាស់មិនមានបន្ទូលអំពីអាថ៌កំបាំងដ៏មហិមាទាំងនេះដើម្បីបំភ័យយើង ឬធ្វើឲ្យយើងមានអារម្មណ៍ថាយើងតូចទាបនោះទេ ។ តាមពិតទៅ ទ្រង់បានសន្យាថា « គង់តែថ្ងៃនោះនឹងមកដល់ ក្នុងកាលអ្នកគួរយល់ពីព្រះ » ( ខទី ៤៩, អក្សរទ្រេតបានបន្ថែម ) ។ ប្រហែលវាដល់ចុងបញ្ចប់ដ៏ខ្ពង់ខ្ពស់នោះ ទើបព្រះអម្ចាស់បានជម្រុញឲ្យពួកបរិសុទ្ធរបស់ទ្រង់នៅទីក្រុងខឺតឡង់បង្កើតជាសាលានៃពួកព្យាការី ។ ទ្រង់បានមានបន្ទូលថា « ចូររៀបចំខ្លួន ។ ចូររៀបចំអ្វីៗដែលត្រូវការគ្រប់មុខ ហើយចូរតាំង… គេហដ្ឋាននៃព្រះ » ( ខទី ១១៩ ) ។ ដោយសារវាមាននៅតែក្នុងគេហដ្ឋានដ៏បរិសុទ្ធនៃព្រះ—និងនៅក្នុងគេហដ្ឋានយើងទេ—ទើបទ្រង់អាចលើកស្ទួយចក្ខុវិស័យរបស់យើងឲ្យហួសពីពិភពលោកខាងសាច់ឈាមនេះ « បើកព្រះភក្ត្ររបស់ទ្រង់ឲ្យ [ យើង ] ឃើញ » និង រៀបចំយើងឲ្យ « នៅជាប់ក្នុងសិរីល្អខាងសេឡេស្ទាលបាន » ខ្លាំងជាងកន្លែងណាផ្សេងទៀត ( ខទី ៦៨, ២២ ) ។

គំនិតយោបល់សម្រាប់ការសិក្សាព្រះគម្ពីរផ្ទាល់ខ្លួន

គោលលទ្ធិ និង សេចក្តីសញ្ញា ៨៨

ព្រះអម្ចាស់ផ្ដល់សេចក្ដីសង្ឃឹម និងសេចក្ដីសុខសាន្ដដល់យើង ។

គ្រាន់តែប៉ុន្មានថ្ងៃក្រោយពីការព្រមានថា សង្គ្រាមនឹង « ចាក់មកលើអស់ទាំងសាសន៍ ចាប់ផ្ដើមនៅកន្លែងនេះ » ( គោលលទ្ធិ និង សេចក្ដីសញ្ញា ៨៧:២ ) ព្រះអម្ចាស់បានប្រទានវិវរណៈមួយដែលយ៉ូសែប ស្ម៊ីធ បានហៅថាជា « ស្លឹកអូលីវ … ដែលបានបេះពីដើមនៅស្ថានបរមសុខ ជាសារអំពីសេចក្ដីសុខសាន្តរបស់ព្រះអម្ចាស់ដល់យើង » ( គោលលទ្ធិ និង សេចក្តីសញ្ញា ៨៨ ក្បាលកណ្ឌ ) ។ តើវិវរណៈនេះដូចជាស្លឹកអូលីវមួយ ដែលជានិមិត្តសញ្ញានៃសេចក្ដីសុខសាន្ដប្រពៃណីដោយរបៀបណា ? ( សូមមើលផងដែរ លោកុប្បត្តិ ៨:១១ ) ។ តើសេចក្ដីពិតអ្វីខ្លះនៅក្នុងកណ្ឌនេះជួយបងប្អូនឲ្យមានអារម្មណ៍នៃសេចក្ដីសង្ឃឹម និងសេចក្ដីសុខសាន្ដនៅក្នុងព្រះគ្រីស្ទ ?

គោលលទ្ធិ និង សេចក្ដីសញ្ញា ៨៨:៦–៦៧

ពន្លឺ និងក្រឹត្យវិន័យកើតមកពីព្រះយេស៊ូវគ្រីស្ទ ។

ពាក្យ ពន្លឺ និង ក្រឹត្យវិន័យ ត្រូវបានសរសេរជាច្រើននៅក្នុង កណ្ឌទី ៨៨ ។ ពាក្យទាំងនេះត្រូវបានប្រើនៅក្នុងគម្ពីរផ្សេងទៀតដើម្បីពិពណ៌នាព្រះយេស៊ូវគ្រីស្ទ និងដំណឹងល្អរបស់ទ្រង់ ( ឧទាហរណ៍សូមមើល អេសាយ ៦០:១៩; យ៉ូហាន ១:១–៩; នីហ្វៃទី ៣ ១៥:៩ ) ។ សូមគូសចំណាំខគម្ពីរទាំងឡាយ ដែលបងប្អូនរកឃើញពាក្យទាំងនេះនៅក្នុង គោលលទ្ធិ និងសេចក្ដីសញ្ញា ៨៨:៦–៦៧ ហើយកត់ត្រាទុកនូវអ្វីដែលបងប្អូនរៀនអំពីព្រះអង្គសង្គ្រោះ ពន្លឺ និងក្រឹត្យវិន័យ ។ ខគម្ពីរទាំងនេះអាចបំផុសគំនិតបងប្អូនឲ្យធ្វើការផ្លាស់ប្ដូរនៅក្នុងជីវិតរបស់បងប្អូន ដើម្បីទទួលបានពន្លឺ និងរស់នៅតាម « ក្រឹត្យវិន័យនៃព្រះគ្រីស្ទ » កាន់តែស្មោះត្រង់ជាងនេះ ( ខទី ២១ ) ។

សូមមើលផងដែរ សារ៉ុន អូប៊ែង « ព្រះគ្រីស្ទ ៖ ជាពន្លឺដែលបំភ្លឺនៅក្នុងភាពងងឹត » Ensign ឬ Liahona ខែ ឧសភា ឆ្នាំ ២០១៩ ទំព័រ ៧៣–៧៦ ។

គ្រួសារសិក្សាព្រះគម្ពីរ — ព្រះគម្ពីរមាននូវក្រឹត្យវិន័យនៃព្រះគ្រីស្ទ ។

គោលលទ្ធិ និង សេចក្ដីសញ្ញា ៨៨:៦២–១២៦

រៀបចំអ្វីៗដែលចាំបាច់ ។

តាមរបៀបណាមួយ យើងកំពុងរស់នៅក្នុងពេលដែលព្រះអម្ចាស់បានរៀបរាប់ ជាពេលដែល « គ្រប់ទាំងអស់នឹងនៅក្នុងស្ថានភាពចលាចល ហើយប្រាកដមែន មនុស្សលោកនឹងស្រយុតចិត្ត » ( គោលលទ្ធិ និង សេចក្ដីសញ្ញា ៨៨:៩១ ) ។ កាលបងប្អូនអាន ខទី ៦២–១២៦ សូមពិចារណាពីរបៀបដែលការប្រឹក្សារបស់ព្រះអម្ចាស់អាចជួយបងប្អូនឲ្យរៀបចំសម្រាប់ការយាងមកជាលើកទីពីររបស់ព្រះអង្គសង្គ្រោះ ។ នេះគឺជាសំណួរពីរបីដើម្បីពិចារណា ៖

ខទី ៦២–៧៦ ។កាលបងប្អូនសញ្ជឹងគិតអំពីខគម្ពីរទាំងនេះ តើបងប្អូនទទួលបានការបំផុសគំនិតឲ្យធ្វើអ្វីខ្លះដើម្បី « ចូលមកជិត » ព្រះ ? ( ខទី ៦៣ ) ។ សូមពិចារណាពីអ្វីដែលការបញ្ជារបស់ព្រះអម្ចាស់ឲ្យ « ញែកខ្លួនអ្នករាល់គ្នាចេញជាបរិសុទ្ធ » អាចមានន័យចំពោះបងប្អូន ( ខទី ៦៨ ) ។

ខទី ៧៧–៨០, ១១៨–២៦ ។ហេតុអ្វីវាអាច « ជាការចាំបាច់សម្រាប់ឲ្យអ្នកយល់ » ទាំងប្រធានបទខាងគោលលទ្ធិ និងខាងសាច់ឈាម ? ( ខទី ៧៨ ) ។ តើបងប្អូននឹងធ្វើតាមការប្រឹក្សាឲ្យ « ស្វែងរកការរៀនសូត្រ » ដោយរបៀបណា ? ( ខទី ១១៨ ) ។ តើបងប្អូនគិតថា វាមានន័យយ៉ាងណាក្នុងការរៀនសូត្រ « ដោយសារការសិក្សា និងដោយសារសេចក្ដីជំនឿផង » ?

ខទី ៨១–១១៦ ។សូមពិចារណាកត់ត្រាការព្យាករអំពីការយាងមកជាលើកទីពីររបស់ព្រះអង្គសង្គ្រោះនៅក្នុងខគម្ពីរទាំងនេះ ។ ហេតុអ្វីបងប្អូនគិតថា ព្រះអម្ចាស់សព្វព្រះទ័យឲ្យបងប្អូនដឹងពីការណ៍ទាំងនេះ ?

ខទី ១១៧–២៦ ។សូមពិចារណាអានខគម្ពីរទាំងនេះដោយគិតដល់ព្រះវិហារបរិសុទ្ធ តើបងប្អូនរកឃើញអ្វីខ្លះនៅត្រង់នេះ ដែលអាចជួយបងប្អូនឲ្យរៀបចំខ្លួនដើម្បីចូលទៅក្នុងដំណាក់របស់ព្រះអម្ចាស់ ?

សូមមើលផងដែរ ឌី ថត គ្រីស្តូហ្វឺសិន « ការត្រៀមខ្លួនសម្រាប់ការយាងត្រឡប់មកវិញរបស់ព្រះអម្ចាស់ » Ensign ឬ Liahona ខែ ឧសភា ឆ្នាំ ២០១៩ ទំព័រ ៨១–៨៤; ដាវីឌ អេ បែដណា « Seek Learning by Faith » Ensign ខែ កញ្ញា ឆ្នាំ ២០០៧ ទំព័រ ៦១–៦៨; ពួកបរិសុទ្ធ ទំព័រ ១:១៦៤–៦៦; « A School and an Endowment » Revelations in Context ទំព័រ ១៧៤–៨២ ។

គំនិតយោបល់សម្រាប់ការសិក្សាព្រះគម្ពីរជាគ្រួសារ និងរាត្រីជួបជុំក្រុមគ្រួសារ

គោលលទ្ធិ និង សេចក្ដីសញ្ញា ៨៨:១៤–៣៣, ៩៥–១០១ ។តើយើងរៀនអ្វីខ្លះ អំពីការរស់ឡើងវិញមកពីខគម្ពីរទាំងនេះ ? តើសេចក្ដីពិតទាំងនេះអាចមានឥទ្ធិពលលើជម្រើសដែលយើងរើសយ៉ាងដូចម្ដេច ?

គោលលទ្ធិ និង សេចក្តីសញ្ញា ៨៨:៣៣ ។បងប្អូនអាចចាប់ផ្ដើមការពិភាក្សាមួយអំពីខគម្ពីរនេះ ដោយសូមឲ្យសមាជិកគ្រួសារជជែកអំពីអំណោយទានដែលពួកគេមាន—ទាំងអំណោយទានដែលពួកគេទទួលបានដោយអំណរ និងអំណោយទានដែលពួកគេមិនបានទទួល ។ តើយើងអាចបង្ហាញព្រះអម្ចាស់ថា យើងរីករាយនឹងអំណោយទាននៃសិរីល្អសេឡេស្ទាល ដែលទ្រង់ប្រទានដល់យើងយ៉ាងដូចម្ដេច ? តើយើងត្រេកអរចំពោះ « ម្ចាស់ដែលប្រទានអំណោយទាននោះ » ដោយរបៀបណា ?

គោលលទ្ធិ និង សេចក្តីសញ្ញា ៨៨:៦៣, ៦៨ ។ខគម្ពីរទាំងនេះរួមមាននូវពាក្យសកម្មមួយចំនួន ដែលអាចបំផុសគំនិតបងប្អូនឲ្យគិតដល់របៀបដ៏ច្នៃប្រឌិតនានា ដើម្បីបង្រៀនពីសារលិខិតនៅក្នុងខគម្ពីរទាំងនេះដល់កូនចៅរបស់បងប្អូន ។ ឧទាហរណ៍ បងប្អូនអាចលេងបិទពួនដើម្បីពិភាក្សាពីឃ្លា « ចូរព្យាយាមស្វែងរកយើង នោះអ្នករាល់គ្នានឹងបានជួបយើង » ( ខទី ៦៣, បានបន្ថែមអក្សរទ្រេត ) ។

គោលលទ្ធិ និង សេចក្តីសញ្ញា ៨៨:៨១ ។សូមស្វែងរកទីសម្គាល់ព្រមានមួយចំនួនជាគ្រួសារនៅក្នុង និងជុំវិញគេហដ្ឋានរបស់បងប្អូន ដូចជាស្លាកព្រមានលើថ្នាំពេទ្យ ឬសញ្ញាចរាចរណ៍សម្រាប់អ្នកបើកបរ ។ តើការព្រមានទាំងនេះជួយយើងយ៉ាងដូចម្តេច ? តើព្រះវរបិតាសួគ៌សព្វព្រះទ័យឲ្យយើង « នោះត្រូវព្រមានអ្នកជិតខាងរបស់ [ យើង ] » អំពីអ្វីខ្លះ ?

គោលលទ្ធិ និង សេចក្តីសញ្ញា ៨៨:១១៩ ។ដើម្បីបំផុសគំនិតគ្រួសារបងប្អូនឲ្យធ្វើគេហដ្ឋានរបស់បងប្អូនបានដូចជាការពិពណ៌នានៅក្នុង ខទី ១១៩ សូមសាកល្បងធ្វើអ្វីមួយដូចនេះ ៖ សរសេរឃ្លាពីខគម្ពីរនេះនៅលើក្រដាសមួយចម្រៀក ហើយយកវាទៅបាំងរូបភាពព្រះវិហារបរិសុទ្ធ ។ សូមអាន គោលលទ្ធិ និង សេចក្ដីសញ្ញា ៨៨:១១៩ រួមគ្នា ហើយសូមឲ្យសមាជិកគ្រួសារដកយកក្រដាសចម្រៀកនីមួយៗចេញ កាលពួកគេឮឃ្លាត្រូវគ្នានឹងខគម្ពីរនេះ ។ តើយើងអាចធ្វើអ្វីខ្លះដើម្បីធ្វើឲ្យគេហដ្ឋានរបស់យើងជា « គេហដ្ឋាននៃព្រះ » ? ( ខទី ១១៩ ) ។

សម្រាប់គំនិតបន្ថែមសម្រាប់ការបង្រៀនដល់កុមារ សូមមើល គម្រោងមេរៀនប្រចាំសប្ដាហ៍នេះ នៅក្នុងសៀវភៅ ចូរមកតាមខ្ញុំ—សម្រាប់ថ្នាក់បឋមសិក្សា ។

ចម្រៀងស្នើ ៖ « ឱ ! សូមនៅជិតព្រះអង្គ » ទំនុកតម្កើង ល.រ. ៤៩ ។

ការកែលម្អការបង្រៀនរបស់យើង

ចូរឲ្យកូនៗបានបង្ហាញអំពីភាពច្នៃប្រឌិតរបស់ពួកគេ ។ នៅពេលបងប្អូនអញ្ជើញកូនៗរបស់បងប្អូន ឲ្យច្នៃប្រឌិតអ្វីមួយដែលទាក់ទងនឹងគោលការណ៍ដំណឹងល្អមួយ នោះបងប្អូនជួយពួកគេឲ្យយល់ពីគោលការណ៍កាន់តែច្បាស់ ហើយបងប្អូនផ្ដល់នូវការរំឭកបែបរូបីអំពីអ្វីដែលពួកគេបានរៀន ( សូមមើល ការបង្រៀនតាមរបៀបរបស់ព្រះអង្គសង្គ្រោះ ទំព័រ ២៥ ) ។

ព្រះយេស៊ូវជាមួយពួកសិស្ស — ព្រះយេស៊ូវគ្រីស្ទប្រទានសេចក្ដីសុខសាន្ដដល់យើង ។ យើងទុកសេចក្ដីសុខសាន្ដនឹងអ្នក ដោយ វ៉លធើរ រ៉េន