Te fa’aorara’a i roto i tōna mau pererau, nā Jon McNaughton

4–10 nō māti.

Mataio 8–9 ; Mareko 2–5

« ’Ua ora ’oe i tō ’oe fa’aro’o »

E ha’amata tā ’outou fa’aineinera’a ’ia ha’api’i ’a tuatāpapa ai ’outou nā roto i te pure i te Mataio 8–9 ’e Mareko 2–5. E nehenehe te Mai, pe’e mai—Nō te mau ta’ata iho ’e te mau ’utuāfare e ha’amaita’i i tā ’outou tuatāpapara’a ’e e fa’atupu mai i te mau mana’o nō te ha’api’ira’a hau atu i tei hōhorahia i ’ō nei.

’A pāpa’i i tō ’outou mana’o

Ani ’ia fa’a’ite mai

E nehenehe ’outou e ’āfa’i mai i te mau hōho’a e fa’a’ite ra i te mau ’ohipa i tupu i roto i te Mataio 8–9 ’e Mareko 2–5 (’a hi’o Gospel Art Book, nos. 40, 41, ’aore rā LDS.org) ’aore rā ’a tāpura i teie mau ’ohipa i tupu i ni’a i te tāpura ’ere’ere. ’A ani i te mau pīahi ’ia fa’a’ite mai i te mea tā rātou i ’ite nō ni’a i te temeio tāta’itahi. E aha te mau poro’i tā rātou i ’ite i roto i teie mau temeio ?

Ha’api’i i te ha’api’ira’a tumu

Mataio 8–9 ; Mareko 2 ; 5

E tupu te mau temeio mai te au i te hina’aro o te Atua ’e tō tātou fa’aro’o ia Iesu Mesia.

• ’Ua ’ite paha te mau pīahi i te mau hi’ora’a pūai i roto i tā rātou iho tuatāpapara’a i te mau temeio i roto i teie mau pene (’a hi’o i te tāpura nō te mau fa’aorara’a i roto i te arata’i nō teie hepetoma i roto Mai, pe’e mai—Nō te mau ta’ata iho ’e te mau ’utuāfare). ’A feruri i te ani i te mau pīahi ’ia fa’a’ite mai i tō rātou hi’ora’a i te hō’ē hoa pīahi ’aore rā i te tā’āto’ara’a o te piha ha’api’ira’a.

• Nō te tauturu i te mau pīahi ’ia ta’a maita’i i te aura’a i roto i te fa’aro’o ’e te mau temeio, e nehenehe ’outou e tai’o e rave rahi mau temeio nō te fa’aorara’a i roto i te Mataio 8–9 ’e Mareko 2 ; 5, ma te hi’o atu i te fa’aro’o o te ta’ata tei fa’aorahia ’aore rā te fa’aro’o o vetahi ’ē. (Mai te mea ’aita tō ’outou e taime nō te tāu’aparau i te mau temeio ato’a, ’a ani i te mau pīahi o tei hea te mau temeio faufa’a rahi roa a’e nō rātou.) E nehenehe te tahi o teie mau pāpa’ira’a mo’a e ha’amaita’i i tā ’outou tāu’ara’a parau : Moromona 9:15–21 ; Etera 12:12–16 ; Moroni 7:27–37 ; ’e Te Parau Ha’api’ira’a ’e te Parau Fafau 35:8. E aha tā te mau fa’aorara’a a te Fa’aora ’e teie mau pāpa’ira’a mo’a e ha’api’i nei nō ni’a i te fa'aro'o ’e te mau temeio ?

• Tē vai ra paha te mau pīahi i roto i tā ’outou piha ha’api’ira’a e fa’aro’o tō rātou ’e te ’imi ra i te hō’ē temeio, ’aita rā te temeio i tupu mai tā rātou i hina’aro. E aha tā te mau pāpa’ira’a mo’a ’e tā te feiā fa’atere i ha’api’i mai nō ni’a i te reira ? I roto i te hō’ē pāpa’ira’a tei pi’ihia « Accepting the Lord’s Will and Timing », ’ua parau ’o Elder David A. Bednar e nāhea tōna a’ora’a i te hō’ē nā ta’ata fa’aipoipo i roto i teie huru fifi (Ensign, ’Ātete 2016, 31–35; ’a hi’o ato’a 2 Korinetia12:7–10 ; PH&PF 42:43–52). ’Ua ’ite ānei te mau pīahi i te mau ha’amaita’ira’a i te taera’a mai i roto i tō rātou orara’a ’aore rā te orara’a o vetahi ’ē, i te taime ’aita te mau temeio i hina’arohia i tupu ?

• ’Ia tai’o ana’e rātou i te mau temeio tei tupu i roto i te Mataio 8–9 ’e Mareko2 ; 5, e ui paha te tahi mau ta’ata, e tupu ānei taua mau huru ’ohipa ra i teie mahana. ’Ua fa’a’ite mai o Moroni i tō tātou tau mai te hō’ē taime « e parauhia ïa e ’ua ’ore te mau temeio », ’ua fafau ato’a mai rā ’oia ē e Atua noa ā te Atua nō te mau temeio, nō te mea « e ta’ata tāuiui ’ore » te Atua (Moromona 8:26 ; 9:18–21 ; a hi’o ato’a Moroni 7:27–29). Nāhea e nehenehe ai ia ’outou e tauturu i tā ’outou mau pīahi ’ia fa’arahi i tō rātou fa’aro’o i te mana o te Atua nō te ha’ama’ita’i i tō rātou orara’a ? E nehenehe ’outou e ani ia rātou ’ia fa’a’ite mai i te mau huru temeio tā rātou i ’ite. E nehenehe ato’a ’outou e feruri i te fa’a’ite atu i te mau ’ā’amu nō te mau temeio nā roto mai i te ’ā’amu o te ’Ēkālesia (’a hi’o i « Te tahi atu mau tāve’a tauturu »).

’A ti’aturi i te Fatu, nā Liz Lemon Swindle

Mataio 8:23–27 ; Mareko 4:35–41

E mana tō Iesu Mesia nō te ’āfa’i mai i te hau i rotopū i te mau vero o te orara’a nei.

• E ’ite paha ’outou i te tahi o te mau fifi e fa’aruruhia ra e tā ’outou mau pīahi. No te mea ē e mau tāmatara’a ana’e tō tātou pā’āto’a i te hō’ē taime i roto i tō tātou orara’a, e nehenehe te tai’o-fa’ahou-ra’a i te ’ā’amu i roto i te Mareko 4:35–41 e patu i te fa’aro’o o te mau pīahi ē e nehenehe tā te Fa’aora e ’āfa’i mai i te hau ia rātou. ’A hōro’a i te pīahi tāta’itahi i te hō’ē ’api parau, ’e ’a ani ia rātou ia pāpa’i i ni’a i te hō’ē pae te hō’ē tāmatara’a tā rātou i fāri’i. I te tahi atu pae, ’a ani ia rātou ’ia pāpa’i i te tahi mea nā roto mai i te Mareko 4:35–41 tei fa’auru ia rātou ’ia fāriu atu i te Fa’aora i roto i tō rātou mau tāmatara’a. ’A fa’aitoito i te mau pīahi ’ia fa’a’ite mai i te mea tā rātou i pāpa’i, mai te mea e au rātou ’ia nā reira.

• ’Ua niuhia te hīmene « E Mea Pūai te Vero », Te mau Hīmene, no. 52, i ni’a i te ’ā’amu i roto i te Mataio 8:23–27 ’e Mareko 4:35–41. Penei a’e e nehenehe te mau pīahi e ’imi i te mau parau i roto i te hīmene o te tū’ati atu i te mau parau i roto i te mau pāpa’ira’a moa. E nehenehe ato’a ’outou e fa’a’ite i te hō’ē hōho’a e fa’aite ra i te ’ohipa i tupu (’a hi’o i teGospel Art Book, no. 40) ’e ’a tāu’aparau i te taime te ta’ata peni e fa’ahōho’a ra. E aha te tahi atu mau rāve’a e nehenehe ai ’outou e tauturu i te mau pīahi ’ia ta’a maita’i i te aura’a ’e te mana o teie temeio ?

Mareko 2:1–12

E tītauhia tā tātou mau tauto’ora’a nō te fa’aora i te mau ta’ata tei mo’e.

• Tē ha’api’i nei te ’ā’amu nō teie temeio i te faufa’a nō te ha’a ’āmui nō te tauturu i te Fa’aora ’ia fa’aora i te mau ta’ata i roto i te fifi i te pae vārua ’e i te pae tino. E nehenehe te pōro’i a Elder Chi Hong (Sam) Wong « Fa’aora i roto i te hō’ēra’a » (Ensign ’aore rā Liahona, Novema 2014, 14–16) e tauturu i te tāu’ara’a parau nō ni’a i teie parau mau. ’A feruri i te ani i te hō’ē pīahi ’ia haere ineine mai nō te tai’o fa’ahou i te ’ā’amu i roto i te mau pāpa’ira’a mo’a ’e ’ia fa’a’ite mai i te mea tā Elder Wong i ha’api’i mai. E aha tā tātou e nehenehe e ha’api’i mai i roto i te Mareko 2:1–12 nō ni’a i te faufa’a o te ha’a-’āmiui-ra’a nō te fa’aora i te feiā i roto i te fifi ? (’a hi’o ato’a Mareko 3:24–25).

Fa’aitoito i te ha’api’ira’a mai i te fare

Nō te fa’aitoito i te mau pīahi ’ia tai’o Mataio 10–12; Mareko 2 ; ’e Luka 7 ; 11 i teie hepetoma i mua, ’a parau atu ia rātou ē e ’ite rātou i roto i teie mau pene i te tahi a’ora’a o te nehenehe e tauturu ia rātou ’ia rave fa’aoti i tō rātou mau pi’ira’a ’e mau hōpoi’a i roto i te ’Ēkālesia.

Te tahi atu mau rāve’a tauturu

Mataio 8–9 ; Mareko 2–5

Te peropheta Iosepha Semita e fa’aora ra i te ma’i

I te ’āva’e tiurai1839, tē ora ra te feiā mo’a e rave rahi, tei ti’avaruhia i rāpae au i te fenua Missouri, i roto i te mau pere’o’o huti, i roto i te mau fare ’ie, ’e i ni’a i te tufa’a fenua piri atu i te ’oire nō Commerce, i Illinois. E rave rahi tei ro’ohia i te ma’i, ’e ’ua rohirohi roa ’o Iosepha ’e ’o Emma i te tāmatara’a i te tauturu ia rātou. ’Ua fa’a’ite mai o Wilford Woodruff i te mea tei tupu i te 22 nō tiurai ra : « E mahana nō te mana o te Atua. E rave rahi tei ma’ihia i roto i te feiā mo’a i nā pae e piti o te ’anavai nō Mississipi, ’e ’ua haere atu o Iosepha i rotopū ia rātou, ma te rave ia rātou nā te rima ’e te fa’auera’a ia rātou ma te hō’ē reo pūai nā ni’a i te i’oa o Iesu Mesia ’ia ti’a mai ni’a mai i tō rātou ra mau ro’i ’e ’ua fa’aorahia, ’e ’ua ou’a rātou mai ni’a mai i tō rātou ra mau ro’i ma te fa’aorahia e te mana o te Atua… ’Ua riro mau ’ei hō’ē taime nō te ’oa’oara’a » (Wilford Woodruff, Journal, 22 nō  tiurai 1839, Fare Vaira’a ’ā’amu a te ’Ēkālesia).

’Ua tāmaru Elder Franklin D. Richards i te hō’ē vero.

’Ua fa’ati’a mai o Elder LeGrand Richards, e melo nō te Pupu o te Tino Hō’ē ’Ahuru ma Piti ’āposetolo, i te hō’ē ’ā’amu nō roto mai i te orara’a o tōna pāpā rū’au,’o Elder Franklin D. Richards, tei riro i te matahiti 1848 ’ei arata’i nō te hō’ē pupu nō te feiā mo’a Peretāne o tē tere ra na ni’a i te moana Ateranetita e tae atu i te fenua Marite : « Nō te ataata rahi o te pahī tei fa’aruru i [te hō’ē vero u’ana] ’e tei ni’a ho’i o [Elder Richards] ’ua haere atura te tāpena e fārerei iāna ’e ’ua tāparu iāna ’ia ani i te Fatu nō te pahi ’e te mau horo pātete ’ia pāruruhia ; e ’ua ha’amana’o o pāpā rū’au ē ’ua fafauhia iāna ē e noa’a iāna te mana i ni’a i te mau ’ā [éléments], nō reira ’ua haere ti’a atu ’oia i ni’a i te tahua o te pahī e ’ua ’āfa’i i tāna nā rima i te ra’i teitei ’e ’ua ’avai atura i te miti ’e i te mau ’are, ’e ’ua hau a’era i te reira ihoa taime » (i roto i te Conference Report, ’Ēperēra 1941, 84).

Ha’amaita’ira’a i tā tātou ha’api’ira’a

’A fa’a’ite pinepine i te ’itera’a pāpū. E nehenehe tō ’outou ’itera’a pāpū ’ōhie ’e te hōhonu e riro ’ei fa’aurura’a pūai i ni’a i te feiā tā ’outou e ha’api’i ra. ’Aita tō ’outou ’itera’a e tītauhia ’ia pūai ’aore rā i te roa roa. E nehenehe, ’ei hi’ora’a, e riro ’ei ’itera’a ’ōhie noa nō te temeio i te fāri’ira’a i te ’evanelia i roto i tō ’outou orara’a.