’A fa’a’amu ia rātou nā Jorge Cocco

25-31 nō māti.

Mataio 14–15 ; Mareko 6–7 ; Ioane 5–6

« ’Eiaha e mata’u »

’A fa’aineine ai ’outou i te ha’api’i nā roto mai i te Mataio 14–15 ; Mareko 6–7 ; ’e Ioane 5–6, ’a hi’o i te mau pōro’i faufa’a roa nō tā ’outou piha ha’api’ira’a. ’A nā reira ai ’outou, ’a feruri e nāhea ’ia fa’ahaere i te mau pīahi i roto i te hō’ē ’itera’a faufa’a roa e te mau pāpa’ira’a mo’a.

’A pāpa’i i tō ’outou mana’o

Ani ’ia fa’a’ite mai

Hō’ē rāve’a nō te ha’amata i te hō’ē tau’ara’a parau nō ni’a i teie mau pene o te anira’a ïa i te tahi mau pīahi ’ia mā’iti tāta’itahi rātou i te hō’ē pene nā roto mai i te tai’ora’a ’e ’ia haere ineine mai nō te fa’a’ite mai i te hō’ē pōro’i faufa’a roa nō rātou nā roto mai i taua pene ra. ’A fa’a’ite ai rātou, e nehenehe te tahi atu mau pīahi e ui i te mau uira’a ’aore rā ’ia hōro’a mai i te tahi atu ā mau mana’o.

Ha’api’i i te ha’api’ira’a tumu

Ioane 5:16–47

’O Iesu Mesia te Tamaiti Here a te Metua i te Ao ra.

• I roto i te Ioane 5, ’ua hōro’a mai Iesu e rave rahi mau fa’a’itera’a nō ni’a iāna, tōna Metua, ’e tōna aura’a e te Metua. Nō te tauturu i te piha ’ia ’ite i teie mau fa’a’itera’a, ’a tāmata i te vahi ia rātou ’e ’a hōro’a ia rātou te tahi minuti nō te tāpura i te mau parau mau ato’a e ’itehia ia rātou i roto i te mau ’īrava 16–47 nō ni’a i te huru o te Atua, o Iesu Mesia, ’e tō rāua aura’a. ’A ani i te mau pupu ’ia tai’o i te mau parau mau tā rātou i tāpura e tae noa atu ’ua fa’a’itehia mai te mau parau mau ato’a e vai ra i ni’a i te tāpura tāta’itahi. Nāhea teie mau parau mau e tauturu ai ia tātou ’ia ta’a maita’i a’e i te huru o tō tātou Metua i te Ao ra ’e tāna ra Tamaiti ? Nāhea e nehenehe ai ia tātou ’ia pe’e i te hi’ora’a ha’apa’o o Iesu Mesia i te Metua ?

• E ani te hō’ē ’ohipara’a i roto i te arata’ira’a nō teie hepetoma i roto Mai, pe’e mai—Nō te mau ta’ata iho ’e te mau ’utuāfare i te mau pīahi ’ia tāpa’o i te mau taime ato’a e fa’a’ohipa Iesu i te parau Metua i roto i te Ioane 5. ’A ani i te tahi mau pīahi ’ia fa’a’ite mai e aha tā rātou i ha’api’i mai ’a fa’aoti ai rātou i te ’ohipara’a. E aha te mau fa’a’itera’a tei noa’a ia rātou nō ni’a i te Metua i te Ao ra ’e tāna Tamaiti Here ? ’E aha tā te ’evānelia tei fa’aho’ihia mai e ha’api’i nei o te tauturu ia tātou ’ia ta’a maita’i a’e o vai tō tātou Metua ’e nō te aha tātou e ha’amori ai iāna ? E nehenehe te tahi mau mana’o e ’itehia i raro a’e i « Te Atua te Metua » i roto Mau Māite te Fa’aro’o, 74–76. ’Ei tuha’a nō teie tau’ara’a parau, e nehenehe ’outou e hīmene, e fa’aro’o, ’aore rā e tai’o « Tō’u Metua », Te mau Hīmene, no. 178, ’ei piha ha’api’ira’a.

Mataio 14:16–21 ; Mareko 6:33–44 ; Ioane 6:5–14

E nehenehe te Fa’aora e fa’arahi i tā tātou ō nō te fa’atupu i tāna mau ’ōpuara’a.

• E aha te nehenehe e tauturu i te mau pīahi ’ia ’ite i te aura’a nō rātou iho i roto i te temeio a Iesu i te fa’a’amura’a e pae tauatini ta’ata ? E nehenehe tā ’outou e ani e nāhea te tai’ora’a i te parau o te mau temeio e fa’arahi ai i to rātou fa’aro’o i te mana o te Fa’aora nō te ha’amaita’i ia rātou tāta’itahi. ’Ua ’ite a’ena ānei rātou ē e’ita tā rātou mau rāve’a ’aore rā mau ’aravihi e nava’i nō te fa’aoti i te hō’ē fā ’aore rā i te hō’ē fa’auera’a a te Atua ? ’Ua ’ite a’ena ānei rātou ē ’ua fa’arahi ’aore rā ’ua tāta’ipiti te Fa’aora i tā rātou mau tauto’ora’a nō te tauturu ia rātou ’ia fa’aoti i te tahi mea e ’ore e noa’a ia rātou i te rave ?

  

  ’Ua fa’a’amu Iesu ma te temeio e 5 000 ta’ata ’ia e pae faraoa ’e e piti i’a.

• E nehenehe te video « Te fa’a’amura’a e 5 000 » (LDS.org) e tauturu i te mau pīahi ’ia feruri i te temeio i fa’a’itehia i roto i teie mau ’īrava. E aha te mau parau ri’iri’i e nehenehe e ’itehia e tātou i roto i teie ’ā’amu o te fa’arahi i tō tātou fa’aro’o i te Fa’aora ? Nāhea te Fa’aora e nehenehe ai e fa’a’amu vārua ia tātou ? E aha te taime tātou i te fa’a’amura’ahia ’e i te pāturura’ahia e Iesu Mesia ? ’Ei hō’ē hi’ora’a nō te hō’ē temeio i tō tātou nei ’anotau mai te temeio o te mau faraoa ’e te mau i’a, ’a hi’o i te video « Fa’aro’o mā ’e te ’ōhie » (LDS.org) ’aore rā Paul VanDenBerghe, « Power in Prayer », New Era, Tiurai 2012, 34–36.

Mataio 14:22–33

Tē ani mai nei Iesu Mesia ia tātou ’ia tu’u i te hiti tō tātou mata’u ’e tō tātou fē’a’a ’ia nehenehe tātou e haere hope roa iāna ra.

• E nehenehe te ’ā’amu i roto i te Mataio 14:22–33 e tauturu i te mau pīahi ’ia fa’arahi atu ā tō rātou fa’aro’o i te Fa’aora ’e tō rātou hina’aro ’ia pe’e atu iāna. ’A ani i te mau pīahi ’ia tai’o i teie ’ā’amu, ma te ha’apa’o maita’i i te mau parau i parauhia e te Mesia, Petero ’e te tahi atu mau ’āpōsetolo. Nāhea te mau parau a Iesu i tauturu ai ia Petero ’ia noa’a te fa’aro’o nō te fa’aru’e i te poti ’e ’ia haere nā ni’a i te pape ? Nāhea te mau ti’aorora’a a Iesu « ’a fa’aitoito » ’e « ’eiaha e mata’u » (’īrava 27) e tano ai ia tātou i teie mahana ? E aha tā tātou e nehenehe e ha’api’i mai nā roto ia Petero nō ni’a i te aura’a ’ia riro ’ei pipi na Iesu Mesia ’e ’ia ti’aturi iāna ?

• Tei roto i te Mataio 14:22–33 te mau parau ’e te mau pereota o te nehenehe e fa’auru i te mau pīahi ’ia fa’a’ohipa i te fa’aro’o rahi i te Fa’aora. ’A ani ia rātou ’ia ’imi i taua mau parau ’e mau pereota fa’auruhia ra, ’ia pāpa’i i te reira i ni’a i te tāpura ’ere’ere, ’e ’ia ’āparau i te mea tā rātou i pāpa’i. E nehenehe ānei te mau pīahi e tū’ati atu i te ’itera’a o Petero ? E nehenehe ’outou e fa’aitoito ia rātou ’ia feruri i te reira ’e ’ia fa’a’ite mai i te mau ’itera’a i reira rātou, mai ia Petero, i te fa’aotira’a e pe’e atu i te Fa’aora, noa atu e ’ere te hope’ara’a i te mea pāpū roa. E aha tā rātou i ha’api’i mai nā roto mai i te ’itera’a ? Nāhea tō Iesu Mesia tauturura’a ia rātou i roto i tō rātou mau taime mata’u ’aore rā fē’a’a ?

Ioane 6:22–71

’Ei mau pipi nā te Mesia, e ti’a ia tātou ’ia hina’aro i te ti’aturi ’e i te fāri’i i te parau mau noa atu e mea fifi ’ia nā reira.

• E nehenehe te mau mea i tupu i roto i te Ioane 6 e hōro’a mai i te hō’ē hi’ora’a tauturu, ’ia uiui ana’e te ta’ata nō te ha’api’ira’a tumu, te ’ā’amu ’aore rā te mau fa’aturera’a a te ’Ēkālesia. I roto i teie pene, ’ua pāto’i te tahi o te mau ta’ata tei pe’e ia Iesu ’ia fāri’i i tāna mau ha’api’ira’a ē o ’oia ho’i te pane ora ’e e nehenehe rātou e fa’aorahia nā roto ana’e i tāna tusia ’i’o ’e te toto. Nō te tauturu i tā ’outou mau pīahi ’ia fa’a’ohipa i teie ’ā’amu i roto i tō rātou orara’a, e nehenehe ’outou e pāpa’i i teie mau uira’a i ni’a i te tāpura ’ere’ere ’e ’ia ani i te mau pīahi ’ia ’imi i te mau pāhonora’a i roto i te mau ’īrava 22–71 : E aha tā te mau ta’ata e tīa’i nei ? (’a hi’o i te ’īrava 26). E aha ra tā Iesu i hōro’a atu ia rātou ? (’a hi’o i te ’īrava 51). E aha tā te mau ta’ata i ’ore i ta’a maita’i ? (’a hi’o i te mau ’īrava 41–42, 52). E aha te tahi atu mau rāve’a e nehenehe ai ia tātou e mā’iti nō te haere nā muri i te Mesia noa atu e mau uira’a tā tātou ? ’A ani ia rātou ’ia feruri hōhonu i te uira a te Fa’aora ’e te pāhonora’a a Petero i roto i te mau ’īrava 67–69. E aha te tahi mau ha’api’ira’a tumu, te mau ’ōro’a, ’aore rā te tahi atu mau « parau nō te ora mure ’ore » tei ’itehia i roto ana’e i te ’Ēkālesia a te Mesia tei fa’aho’ihia mai ? ’A ani i te mau pīahi ’ia fa’a’ite mai e nāhea teie mau ha’api’ira’a tumu e te mau ’ōro’a i ha’amaita’i ai ia rātou ’e tō rātou mau ’utuāfare. Nō te hi’ora’a nā roto mai i te hō’ē ’āpōsetolo nō teie ’anotau, ’a ani i te hō’ē pīahi ’ia tai’o mai i te fa’ahitira’a parau a Elder M. Russell Ballard i roto i « Te tahi atu mau rāve’a tauturu ».

Fa’aitoito i te ha’api’ira’a mai i te fare

E fa’auruhia paha te mau pīahi ’ia tai’o i te mau tufa’a o te ha’api’ira’a nō te hepetoma i mua nei, mai te mea e fa’a’ite atu ’outou ē e nehenehe te mau mea tā rātou e tai’o e ha’afaufa’a i tō rātou ’itera’a nā roto i te fa’aro’ora’a i te ’āmuiira’a rahi. ’A fa’aitoito ia rātou ’ia haere ineine mai i te ha’api’ira’a i mua nō te fa’a’ite mai i tō rātou mana’o.

Te tahi atu mau rāve’a tauturu

Mataio 14–15 ; Mareko 6–7 ; Ioane 5–6

« E haere ato’a ānei ’outou ? »

I muri ’ae i te fa’ahitira’a i te Ioane 6:68–69,’ua ha’api’i o Elder M. Russell Ballard :

« Nō te tahi, tē vai pa’ari noa ra ā—’aore rā e mea fifi ’ia fāri’i i te anira’a a te Mesia ’ia ti’aturi ’e ’ia fa’aea mai. Tē fifi nei te tahi mau pipi i te māramarama maita’i i te hō’ē ’arata’ira’a ta’a ’ē ’aore rā ha’api’ira’a a te ’Ēkālesia. Tē ’ite nei te tahi i te mau fifi i roto i tō tātou ’ā’amu ’aore rā i roto i te mau paruparu o te tahi mau melo ’e te feiā fa’atere, nō muta’a iho ’e nō teie nei mahana. Tē fifi noa ra ā te tahi ’ia ora i te hō’ē ha’apa’ora’a o tē tītau rahi nei. I te pae hope’a, ’ua rohirohi te tahi i te hāmani-maita’i-ra’a’[PH&PF 64:33]. Nō teie ’e te tahi atu mau tumu, tē tūrori nei te tahi mau melo nō te ’Ekālesia i roto i tō rātou fa’aro’o, ma te māna’ona’o mai te mea e ti’a paha ia rātou ’ia pe’e i taua mau ta’ata ra tei « fa’aru’e, e tei ’ore i pe’e fa’ahou » ia Iesu.

Mai te mea tē vai nei te hō’ē o ’outou e tūrori nei i roto i tōna fa’aro’o, tē ani nei au ia ’outou i te hō’ē ā uira’a tā Petero i ui : « E haere ti’a ïa [’outou] ’ia vai ra ?’ …

« … Nō reira, hou ’outou ’a rave ai i taua mā’itira’a ’ata’ata ra i te pae vārua ’ia fa’aru’e, tē fa’aitoito nei au ia ’outou ’ia fa’aea ’e ’ia feruri māite hou ’a fa’aru’e ai i te mau mea ato’a tei hōro’a mātāmua ia ’outou i tō ’outou ’itera’a pāpū nō te ’Ēkālesia a Iesu Mesia tei fa’aho’ihia mai. ’A fa’aea ’e ’a feruri i te mea tā ’outou i ’ite i’ō nei ’e nō te aha ’outou i ’ite ai i te reira. ’A feruri nā i te mau taime i fa’a’ite ai te Vārua Maita’i ia ’outou nō ni’a i te parau mau mure ’ore » (« E haere ti’a mātou ’ia vai ra ? » Ensign ’aore rā Liahona, Novema 2016, 90–91).

Ha’amaita’ira’a i tā tātou ha’api’ira’a

’A fa’aro’o mai ! ’Ia fa’aro’o ’oe i te hō’ē ta’ata, tē here ra ’oe iāna… ’A ani i te Metua i te Ao ra ’ia tauturu ia ’outou ’ia ta’a i te mea tā te mau pīahi e parau nei. ’Ia ha’apa’o maita’i ana’e ’outou i tā rātou mau poro’i tei parau-vaha-hia mai e ’aore rā ’aita, e riro ’outou i te māramarama i tō rātou mau hina’aro, tō rātou mau māna’ona’ora’a ’e tō rātou mau hia’ai » (Ha’api’ira’a mai tā te Fa’aora, 34).