Iesu e fa’atōro’a ra ia Petero

11–17 nō māti.

Mataio 10–12 ; Mareko 2 ; Luka 7 ; 11

« O taua tino ’Ahuru ma Piti nei tā Iesu i fa’atono »

E tauturu te tai’ora’a i te Mataio 10–12 ; Mareko 2 ; ’e Luka 7 ; 11 ’ia ’outou, ma te ha’amana’o i tā ’outou mau pīahi ’ia fāri’i i te fa’aurura’a a te Vārua Maita’i nō ni’a i te mea e hina’arohia e rātou ra. ʼA pāpa’i i te mau faʼaʼiteraʼa pae vārua tā {278}ʼoutou i fāriʼi, ʼe ʼa tai’o i teie arataʼiraʼa nō te tahi atu ā mau ʼite ʼe mau manaʼo haʼapiʼira’a.

’A pāpa’i i tō ’outou mana’o

tāpa’o nō te fa’a’itera’a mai

Ani ’ia fa’a’ite mai

’A ani i te tahi mau pīahi ’ia haere ineine mai nō te fa’a’ite mai i tā rātou mau uira’a nō ni’a ia Mataio 11:28–30 (Nō te tahi huru uira’a, a hi’o te arata’ira’a nō teie hepetoma i roto i te Mai, pe’e mai—Nō te mau ta’ata iho ’e te mau ’utuāfare.) E aha te mau pāhonora’a tā rātou i ’ite mai ?

tāpa’o nō te ha’api’ira’a

Ha’api’i i te ha’api’ira’a tumu

Mataio 10

’Ua hōro’a te Fatu i tāna mau tavini i te mana nō te rave i tāna ’ohipa

• E nehenehe te fa’auera’a a te Fa’aora i tāna mau ’āpōsetolo e tauturu ia tātou i roto i tā tātou mau hōpoi’a tāta’itahi. E mana’o paha tō te mau pīahi nō teie tumu parau nā roto mai i tā rātou iho tuatāpapara’a ; ’ei hi’ora’a tē vai nei te hō’ē ’ohipara’a nō ni’a i teie tumu parau i roto i te Mai, pe’e mai—Nō te mau ta’ata iho ’e te mau ’utuāfare. ’A ani ia rātou ’ia fa’a’ite mai i te mea tā rātou i ha’api’i mai ’aore rā i ha’a i roto i te mau pupu na’ina’i nō te fa’ahope i te ’ohipara’a i roto i te piha ha’api’ira’a. ’A ani i te mau pīahi ’ia fa’a’ite mai, e aha te taime ’a ’ite ai rātou i te mana o te Fa’aora, ’a rave ai rātou i tō rātou mau pi’ira’a.

• Te tahi atu rāve’a ’ia tai’o fa’ahou te mau pīahi i te Mataio 10 o te ’imira’a ïa i roto i teie pene te tahi mea tā te Fa’aora i ani i te mau ’āpōsetolo ’ia rave ’e ’ia nīno’a i te hō’ē hōho’a nō taua mea ra. E nehenehe rātou e fa’a’ite mai i tā rātou hōho’a ’e te mea tā rātou i ha’api’i mai nō ni’a i te fa’auera’a ’a nā ’Ahuru ma Piti ’āpōsetolo.

• Nāhea te tuatāpapara’a i te fa’auera’a tā te Mesia i hōro’a i tāna mau ’āpōsetolo i roto i te Mataio 10 e tauturu ai tā ’outou mau pīahi ’ia ta’a maita’i i te ti’ara’a ’o te mau peropheta ’e te mau ’āpōsetolo nō teie ’anotau ? E riro paha ’ei tauturura’a ’ia fa’aau i te fa’auera’a a te Fa’aora i nā ’Ahuru ma Piti ’āpōsetolo i te fa’auera’a i hōro’ahia i te pupu mātāmua nō te Tino ’Ahuru ma Piti ’āpōsetolo i roto i teie tau tu’ura’a ’evanelia, e ’itehia i roto i « Te tahi atu mau rāve’a tauturu ». Nāhea te tāvinira’a a te mau ’āpōsetolo ora i te fa’aurura’a i te mau pīahi ? ’A fa’a’ite i tō ’outou ’itera’a pāpū nō ni’a i te pi’ira’a hanahana ’o te mau peropheta ’e te mau ’āpōsetolo ora, ’e ’a ani i te mau pīahi ’ia fa’a’ite mai i tō rātou ’itera’a pāpū.

• Nō te fa’ahōho’a i te parau ē e nehenehe te mau taea’e tei mau i te autahu’ara’a e ’ite i tōna rēni autahu’ara’a e tae roa atu i te taime i fa’atōro’a ai Iesu i tāna mau ’āpōsetolo, ’a ani i te hō’ē taea’e tei mau i te autahu’ara’a ’ia fa’a’ite mai i tōna reni autahu’ara’a.

Te Pupu Tino ’Ahuru Ma Piti

Tē rave nei te Tino ’Ahuru ma Piti ’āpōsetolo i te ’ohipa a te Fatu i teie mahana.

Mataio 10:17-20

’Ia tāvini ana’e tātou i te Fatu, e fa’auru ’oia ia tātou i te mau parau e parau atu.

• E taiā te mau ta’ata i te tahi taime ’ia ha’ap’i’i ana’e ’aore ra ’ia paraparau ia vetahi ’ē i te ’evanelia. ’Ua fafau rā te Fatu i te mau pipi ē e tauturu ’oia ia rātou ’ia ’ite i te mea e parau atu. E aha te mea e ti’a ia tātou ’ia rave nō te fāri’i nō tātou iho i te tauturura’a tei fafa’uhia e te Fatu ? ’A ani i te mau pīahi ’ia tai’o i te Mataio 10:19–20 ; Parau Ha’api’ira’a ’e Parau Fafau 84:85 ; ’e Parau Ha’api’ira’a ’e Parau Fafau100:5–8 nō te ’ite i te mau pāhonora’a i teie uira’a. E aha te taime tō te Vārua Maita’i tauturura’a ia ’outou ’ia ’ite i te mea e parau atu ? E nehenehe ’outou e fa’a’ite i tō ’outou ’itera’a ’e ’a ani i te mau pīahi ia fa’a’ite mai i tō rātou iho.

Mataio 12:1–13 ; Mareko 2:23–28

Te sābati o te mahana ïa nō te rave i te ’ohipa maita’i.

• Nō te ha’amo’a i te mahana sābati, ’ua ha’amau te mau pharisea i te mau ture ’eta’eta ’e te mau peu a te ta’ata, tei ha’apōuri i muri iho i tō rātou ’ite nō te tumu mau o te sābati. E riro ānei te hō’ē tau’ara’a parau nō ni’a i te tumu i hōro’a mai ai te Fatu ia tātou i te mahana sābati ’ei maita’i nō te mau pīahi tā ’outou e ha’api’i ra ? E nehenehe ’outou e ani i te mau pīahi ’ia tai’o fa’ahou i te mau ’ā’amu i roto i te Mataio12:1–13 ’e Mareko 2:23–28 ’e ’ia fa’a’ite mai e aha tā te Fa’aora i ha’api’i nō ni’a i te mahana sābati (’a hi’o ato’a ’Īritira’a a Iosepha Semita, Mareko 2:26–27 [i roto i te Parau Hi’u Bibilia]). E aha te tahi atu ā mau mana’o nō ni’a i te sābati i noa’a mai ia tātou nā roto mai i te Exodo 31:16–17 ; Isaia 58:13–14 ; ’e Parau Ha’api’ira’a ’e Parau Fafau 59:9–13? ’E aha te mau peu ’aore rā te mau ture e hahi ’ē ai tātou i te fā mau nō te sābati ?

• ’A fa’atumu noa ai te mau pharisea i te mau ture hu’ahu’a e rave rahi nō ni’a i te sābati, ’ua ha’api’i te Fa’aora i te hō’ē parau tumu ’ōhie : « ’E au maori i te ture ’ia hāmani maita’i i te sābati » (Mataio 12:12). E mea iti roa te fifi o te mau ta’ata e ha’apa’o nei i teie parau tumu ’ia ha’amo’a i te mahana sābati. E aha te tahi atu mau parau tumu o te tauturu i te mau pīahi ’ia ha’amo’a i te mahana sābati ? Nō te aha te ha’api’ira’a i te mau parau tumu e mea hau roa atu i te maita’i i te ha’amaura’a i te mau ture nō te fa’atupura’a i te ha’apa’ora’a iāna iho i te pae vārua ? (’a hi’o i te fa’ahitira’a parau a te peropheta Iosepha Semita i roto i te « Te tahi atu mau rāve’a tauturu ). Tē vai ra ānei te tahi atu mau parau tumu o tā tātou i mana’o e tauturu ia tātou ’ia ha’apa’o i te mau fa’auera’a a te Atua ? ’Ei hi’ora’a, e aha te mau tumu parau e nehenehe e tauturu i te mau metua ’ia fa’auru i tā rātou mau tamari’i ’ia ha’apa’o i te Parau Pa’ari ’aore ra ’ia rave i te mā’imira’a i te ’ā’amu ’utuāfare ?

• E nehenehe te pōro’i a te peresideni Russell M. Nelson « Te sāpati e mahana ïa e hina’aorohia » (Ensign ’aore rā Liahona, Me 2015, 129–32) 'e te mau video nō te a’ora’a a Elder Jeffrey R. Holland i roto i « Te tahi atu mau rāve’a tauturu » e fa’arahi atu ā i te tāu’ara’a parau nō ni’a i te mahana sābati.

• E riro paha ’ei tauturura’a nō te mau pīahi ’ia tai’o fa’ahou i te « Te ha’apa’ora’a i te mahana sābati » i roto Nō te Pūai o te Feiā ’Āpī. E nenenehe rātou e ha’uti e nāhea ’ia ha’amāramarama atu i te tahi ta’ata e ’ere nō tā tātou ha’apa’ora’a, nō te aha rātou e ha’amo’a ai i te mahana sābati.

Luka 7:36–50

’A fa’a’orehia ai tā tātou mau hara, e hōhonu atu ā tō tātou here i te Fa’aora.

• E aha te mea tā tātou e nehenehe e ha’api’i mai nā roto i te hi’ora’a o te vahine ’e te ha’api’ira’a a te Fa’aora i roto i te Luka 7:36–50 ’a tūtava ai tātou ’ia fa’a’orehia tā tātou iho mau hara ? Nāhea te tātarahapa e ha’apūai ai i tō tātou aura’a e te Mesia ? Nāhea tātou i te fa’a’ohipa i teie ’ā’amu nō te ha’api’i atu i te tahi atu ta’ata i te aura’a ’ia tūtava i te fa’a’orera’a hara ?

tāpa’o nō te ha’api’ira’a mai.

Fa’aitoito i te ha’api’ira’a mai i te fare

E nehenehe ’outou e tītau i te mau pīahi ’ia tai’o i te mau parabole i roto i te Mataio 13 ’e Luka 8 ; 13 ’e ’ia ineine nō te fa’a’ite mai i te piha ha’api’ira’a i te hepetoma i mua nei te hō’ē mana’o nō ni’a i te hō’ē parau tumu nō te ’evanelia tei noa’a ia rātou nā roto mai i te hō’ē o te mau parabole.

tāpa’o nō te mau rāve’a tauturu

Te tahi atu mau rāve’a tauturu

Mataio 10–12 ; Mareko 2 ; Luka 7 ; 11

Te mau ha’amaita’ira’a nō te ha’apa’ora’a i te mahana sābati.

I roto i nā video e toru, tē ha’api’i mai nei o Elder Jeffrey R. Holland nō ni’a i te mau ha’amaita’ira’a nō te ha’apa’ora’a i te mahana sābati : « I tā’u mahana mo’a—Ha’afātata atu i te Atua », « I tā’u mahana mo’a—Fa’aturara’a i te sābati », ’e « I tā’u mahana mo’a—Fa’afa’aea e Fa’a’āpīra’a » (LDS.org).

E hō’ē fa’auera’a i te mau ’āpōsetolo nō teie ’anotau

I te taime ’a pi’ihia ai te mau melo mātāmua nō te Pupu nō te Tino ’Ahuru ma Piti ’āpōsetolo i teie tau tu’ura’a ’evanelia, ’ua hōro’a o ’Olive Kaudere ia rātou te hō’ē fa’auera’a mai tā Iesu Mesia i hōro’a i roto i te Mataio 10. ’Ua parau ’oia ē :

« E aro atu ’outou i te mau mana’o hape o te mau fenua ato’a… Nō reira, tē fa’aara atu nei au ia ’outou ’e ’ia fa’atupu i te ha’eha’a rahi, nō te mea ’ua ’ite au i te te’ote’o o te ’ā’au ta’ata. ’A ara, ’oi fa’ateitei ai te feiā fa’ahua o te ao ia ’outou. ’A ara ’oi haruhia ai tō ’outou mau mana’o here ’e te mau tao’a nō te ao nei. ’Ia nā mua rā tā ’outou tāvinira’a… [E] mea tītauhia ē ’ia fāri’i ’outou nō ’outou iho i te hō’ē ’itera’a pāpū nō te ra’i mai, ’ia nehenehe ia ’outou ’ia fa’a’ite pāpū atu i te parau mau …

« ‘… E ti’a ia ’outou 'ia fa’a’ite pāpū atu i teie pōro’i i te mau ta’ata ato’a e fa’ariro nei ia rātou ’ei mau ta’ata tei mau i te pa’ari. ’E e nehenehe taua mau huru ta’ata ra e hāmani 'ino ia ’outou ; e nehenehe rātou e tītau i tō ’outou ora. ’Ua tītau noa nā te ’enemi i te ora o te mau tāvini a te Atua. Nō reira e ti’a ia ’outou ’ia vai ineine i te mau taime ato’a nō te fa’atusia i tō ’outou nei ora, ’ia tītau ana’e te Atua i te reira nō te fa’ahaere ’e nō te patu i tāna ’ohipa. …

« I reira ’oia e rave tāta’itahi ai i tō rātou rima ma te parau atu, ‘e rave ānei ’outou ma te ’ā’au tae i tā ’outou tufa’a nō teie misiōni, nō te poro i te ’evanelia ma te itoito ato’a i piha’i iho i tō ’outou mau taea’e, mai te au i te huru ’e te ’ōpuara’a o te hōpoi’a o tā ’outou i fāri’i ?’ ’Ua pāhono tāta’itahi mai rātou ē » (i roto i Joseph Smith Papers, Documents, Volume 4 : ’Ēperēra 1834–Setepa 1835, ed. Matthew C. Godfrey ’e te tahi atu mau ta’ata [2016], 243–44, 247 ; ’ua fa’atanohia te pi’ira’a ’e te tomara’a).

Ha’api’ira’a i te mau parau tumu ti’a.

’Ua ani te tahi ta’ata i te peropheta Iosepha Semita ē nāhea i nehenehe ai iāna ’ia fa’atere maita’i e rave rahi mau ta’ata i Nauvoo. ’Ua fa’ata’a atu te peropheta, « tē ha’api’i nei au ia rātou i te mau parau tumu ti’a, ’e tē fa’atere nei rātou ia rātou iho » (’a hi’o Te mau Ha’api’ira’a a te mau Peresideni o te ’Ēkālesia : Iosepha Semita [2007], 284).

Ha’amaita’ira’a i tā tātou ha’api’ira’a

’A fafau atu i te mau ha’amaita’ira’a. ’Ia ani ana’e ’outou i te mau pīahi ’ia rave, ’a fa’a’ite atu ia rātou ē e fāri’i rātou i te mau ha’amaita’ira’a tā te Atua i fafau ’ia ha’apa’o ana’e rātou ma te fa’aro’o i tāna mau ha’api’ira’a. ’Eiaha te mau ha’amaita’ira’a ’ia riro ’ei tumu mātāmua roa nō te ha’apa’ora’a, ’ua hina’aro rā te Metua i te ao ra i te ha’amaita’i i te tā’āto’ara’a o tāna mau tamari’i. (’A hi’o i te Ha’api’ira’a mai tā te Fa’aora 35.)