Iesu e ha’api’i ra i te pae tahatai

Tē ha’api’i ra Iesu i te mau ta’ata i te pae tahatai,nā James Tissot

25 nō fepuare–3 nō mati.

Mataio 6–7

« I ha’api’i ho’i ’oia ia rātou ma te mana »

’A fa’aineine ai ’outou i te ha’api’i, ’a ha’amata nā roto i te fa’aineinera’a ia ’outou iho. ’A tai’o Mataio 6–7, ’e ’a pāpa’i i tō ’outou mana’o pae vārua. Nā teie e tauturu ia ’outou ’ia fāri’i i te heheura’a e nāhea ’ia pāhono maitai’i atu i te mau hina’aro o tā ’outou mau pīahi. ’A ’imi i muri iho i teie arata’ira’a nō te mau mana’o ha’api’ira’a.

’A pāpa’i i tō ’outou mana’o

tāpa’o nō te fa’a’itera’a mai

Ani ’ia fa’a’ite mai

’A ani i te mau pīahi ’ia fa’a’ite mai i te mau tuha’a nō te A’ora’a i ni’a i te Mou’a tā rātou i mana’o ē e hina’aro-rahi-hia i teie mahana. ’A fa’aitoito i te mau pīahi ’ia fa’a’ite mai i tō rātou iho mau mana’o.

tāpa’o nō te ha’api’ira’a

Ha’api’i i te ha’api’ira’a tumu

Mataio 6–7

Mai te mea e fa’aro’o ’e e ha’apa’o tātou i te mau ha’api’ira’a a te Fatu, e patuhia tō tātou orara’a i ni’a i te hō’ē niu pāpū.

• E aha te mau ha’api’ira’a ta’a ’ē nā roto mai i te Mataio 6–7 o te ha’amaita’i rahi i te mau pīahi tā ’outou e ha’api’i ra ? ’A feruri i te pāpa’i i ni’a i te tāpura ’ere’ere e rave rahi mau fa’ahorora’a nā roto mai i te Mataio 6–7 tē vai nei teie mau ha’api’ira’a. E nehenehe te mau pīahi e mā’iti hō’ē o teie mau fa’ahorora’a nō te tuatāpapa muhu ’ore noa ’e ’ia pāpa’i i muri iho i ni’a i te tāpura ’ere’ere te mau parau mau pae vārua atoa tā rātou i ha’api’i mai. Nāhea teie mau ha’api’ira’a i te ha’amaita’i i tō tātou orara’a ?

• ’Ua fa’ahope te Fa’aora i tāna a’ora’a nā roto i te hō’ē parabole o te nehenehe e tauturu i tā ’outou mau pīahi ’ia ta’a maita’i i te faufa’a rahi ia ora i te mau ha’api’ira’a a te Fa’aora (’a hi’o Mataio 7:24–27; a hi’o ato’a Helamana 5:12). Nō te fa’ahōho’a i teie parabole, e nehenehe i te mau pīahi e ha’a ’āmui nō te patu i te hō’ē niu pūai ma te fa’a’ohipa i te mau ’ōfa’i, te mau ’āu’a, ’aore rā te tahi atu mau materia ’e ’ia tāmata i te pūai o tā rātou mau niu. Penei a’e e nehenehe ato’a rātou e tāpa’o i tā rātou mau materia patura’a ma te mau mea tā rātou e nehenehe e rave nō te fa’a’ohipa i te mau ha’api’ira’a a te Fa’aora. Nāhea e nehenehe ai i teie mau mea e tauturu ia tātou ’ia pāruru atu i te mau vero o te orara’a nei ?

Mataio 6:5-13

’Ua ha’api’i te Fa’aora ia tātou e nāhea ’ia pure.

• E nehenehe te tuatāpapara’a i te pure a te Fatu e tauturu i te mau pīahi ’ia ’ite e nāhea ’ia ha’amaita’i i tā rātou iho mau pure mā te pe’era’a i te hi’ora’a o te Fatu. E nehenehe ’outou e ani ia rātou ’ia pāpa’i i ni’a i te tāpura ’ere’ere te mau pereota nō roto mai i te Mataio 6:9–13 (’aore rā ia Luka 11:1–4) tei ha’aputapū ia rātou. ’A feruri hōhonu ai tātou i te mau parau a te Fa’aora, e aha tā tātou i ha’api’i mai nō ni’a i te mau huru e ti’a ia tātou ’ia rave ’ia pure ana’e tātou ? E aha tā tātou i ha’api’i mai nō ni’a i te mau mea e ti’a ia tātou ’ia pure ? E mea maita’i ’ia fa’ahiti te mau pīahi i te tahi o te mau parau a te Fa’aora, mai te mau mea tā rātou e hina’aro e parau i roto i tā rātou iho mau pure. ’Ei hi’ora’a, e nehenehe te pereota « hō mai i te mā’a e au ia mātou i te mau mahana ato’a » e parauhia mai teie te huru « ’a tauturu mai iā’u i roto i tā’u mau tauto’ora’a ’ia fa’a’amu i tō’u nei ’utuāfare ».

• E nehenehe te feiā tā ’outou e ha’api’i ra e ha’amaita’ihia nā roto i te tuatāpapara’a i te tahi mau hi’ora’a o te Fa’aora i te purera’a i tōna ra Metua, mai teie i roto i te Mataio 26:36–42 ’e Ioane 17. E nehenehe ’outou e ani i te mau pīahi ’ia tuatāpapa i te tahi o teie mau tuha’a, te ’imira’a i te mau pāhonora’a i te mau uira’a mai teie te huru : « E aha tā tatou i ha’api’i mai nō ni’a i te pure nā roto mai i te huru pure a te Fa’aora ? » ’e « Nāhea tātou e nehenehe ai e fa’ariro i tā tātou mau pure mai tā te Fa’aora ? » Nō te tahi atu mau hi’ora’a nō ni’a i te pure, ’a hi’o Enosa1:3–17 ; Alama 31:26–35 ; 33:3–11.

• Tē vai ra ’ānei te tahi mau ’itera’a nō ni’a i te pure tā ’outou e nehenehe e fa’a’ite mai ? E nehenehe te fa’a’itera’a i tō ’outou mau ’itera’a e fa’aitoito i te mau pīahi ’ia nā reira ato’a. E rave rahi mau ’itera’a o te peresideni Thomas S. Monson tāna i fa’a’ite nō ni’a i te pure i roto i tāna a’ora’a « ’A feruri i te mau ha’amaita’ira’a » (Ensign ’aore rā Liahona, Novema 2012, 86–89). ’E nehenehe ’outou e tāu’aparau i te mau parau tumu nā roto mai i teie a’ora’a ’e nā roto mai i te mau fa’ahitira’a parau i roto i te « Te tahi atu mau rāve’a tauturu ».

Mataio 7:7–11

E pāhono te Metua i te Ao ra i te mau pure.

• Nō te tauturu i te mau pīahi ’ia ha’apūai i tō rātou fa’aro’o ē e fa’aro’o ’e e pāhono te Atua i tā rātou pure, e nehenehe ’outou e pāpa’i ani, ’imi, ’e pātoto i ni’a i te tāpura ’ere’ere. ’A ani i muri iho i te mau pīahi ’ia ’imi i roto i te mau pāpa’ira’a mo’a te mau hi’ora’a o te mau ta’ata tei « ani », tei « ’imi », ’e tei « pātoto » (’ei mau hi’ora’a, a hi’o 1 Nephi 11:1 ; Etera 2:18–3:6 ; Iosepha Semita—’Ā’amu 1:11–17). ’E aha tā tātou i ha’api’i mai nā roto mai i teie mau hi’ora’a nō ni’a i te noa’ara’a i te mau pāhonora’a i tā tātou pure ?

• E nehenehe e ’itehia te tahi mau ha’amāramaramara’a faufa’a roa nō Mataio 7:7-11 i roto i te ’Iritira’a a Iosepha Semita nō Mataio 7:12-17 I roto i teie mau ’īrava, ’ua ’ite ’ātea te mau pipi a Iesu i te tahi mau tumu o tā te mau ta’ata e hōro’a nō te ’orera’a e ’imi i te parau mau nō ō mai i te Metua i te Ao ra. E nehenehe ’outou e ani i te mau pīahi ’ia feruri ē e hō’ē hoa tō rātou o te fa’ataiā nei i te ani i te arata’ira’a ’aore rā i te mau ha’amaita’ira’a a te Fatu. E aha tā te mau pīahi e nehenehe e parau nō te fa’aitoito i teie hoa ? Nāhea e nehenehe ai rātou e fa’a’ohipa i te mau parau a te Fa’aora i roto i te Mataio 7:7–11 ?

Mataio 7:15–20

E nehenehe tātou e ’ite i te mau peropheta mau ’e te mau peropheta ha’avare na roto i tā rātou mau hotu.

• ’Ua fa’aruru paha tā ’outou mau pīahi i te mau ha’api’ira’a ha’avare ’e te tahi atu mau ha’avare a te ’enemi, i ni’a ānei i te itenati ’aore rā i te tahi atu mau vāhi. ’Ua fa’aro’o ato’a paha rātou i te tahi atu mau ta’ata ’ia fa’ahapa i te mau tāvini a te Fatu. Nāhea e nehenehe ai ia tātou e tauturu ia rātou ’ia ’ite e nāhea ’ia ’ite i te mau peropheta ha’avare e tā rātou mau ha’api’ira’a ’e te mau peropheta mau e tā rātou mau ha’api’ira’a ? E nehenehe ’outou e fa’a’ite i te tahi mau mā’a hotu ’e ’ia ani e aha tā tātou e nehenehe e parau ē nō tei hea ra tumu rā’au rātou. Nāhea teie ravera’a e tauturu ia tātou ’ia ta’a maitai i te Mataio 7:15–20? E nehenehe ato’a ’outou e tai’o ’āmui i te tahi mau poro’i a te mau peropheta ora ’aita i maoro a’enei. E aha te mau « hotu » ’aore rā te mau hope’a i te pe’era’a i tā rātou a’o e fa’atupu mai ?

  hotu

  E nehenehe tātou e ’ite i te mau peropheta mau nā roto i tā rātou mau hotu.

• E nehenehe te Mataio 7:15–20 e tauturu i te patura’a i te fa’aro’o o te mau pīahi i roto i te misiōni hanahana a te peropheta Iosepha Semita. E aha te mau hotu o te ’ohipa a Iosepha Semita tei fa’aotihia ? Nō te tahi mau mana’o, a hi’o i te poro’i a Elder Neil L. Andersen « Iosepha Semita » (Ensign ’aore rā Liahona, Novema 2014, 28–31). Nāhea e nehenehe ai ia tātou e fa’a’ohipa i te fa’aaura’a a te Fa’aora i roto i te Mataio 7:15–20 nō te fa’a’ite pāpū atu i tō tātou mau hoa ’e tō tātou ’utuāfare nō ni’a i te peropheta Iosepha ?

tāpa’o nō te ha’api’ira’a mai.

Fa’aitoito i te ha’api’ira’a mai i te fare

Teie hepetoma, ’a tuatāpapa ai te mau pīahi i te mau temeio e rave rahi tā te Fa’aora i rave, ’a ani ia rātou ’ia feruri i te mau hi’ora’a nō te mau temeio i tō tātou nei ’anotau—te mea rahi ’aore rā te mea ha’iha’i—tā rātou iho i ’ite ’aore rā tā rātou i fa’aro’oro’o.

tāpa’o nō te mau rāve’a tauturu

Te tahi atu mau rāve’a tauturu

Mataio 6–7

Mau hīmene e fa’a’ohipa i roto i te piha ha’api’ira’a

• E aha te mau parau tumu nō ni’a i te pure tā te mau pīahi i ha’api’i mai nā roto i te mau parau o te hīmene « Te Hia’ai Mau ’o te ’Ā’au » ? (Te Mau Hīmene, no. 77).

• E nehenehe te tai’ora’a, te hīmenera’a, ’aore rā te fa’aro’ora’a i te hīmene « ’Auē te Ta’ata i Parau ia Iehova », Te mau Hīmene, no. 16, e tauturu i te mau pīahi ’ia feruri i te tahi o te mau hotu e nehenehe ai tātou e ’ite ē ’ua riro Iosepha Semita ’ei peropheta nā te Atua (’a hi’o ato’a PH&PF 135:3 ; « Iosepha Semita », Mau Parau Tumu nō te ’Evanelia, topics.lds.org).

Mau ’ā’amu nō ni’a i te pure

’Ua fa’ati’a mai te peresideni Boyd K. Packer i te ’ā’amu nō te hō’ē pure ’utuāfare tā tōna ’utuāfare i fa’atupu hou ’a tere atu ai ’oia i California. ’Ua parau mai te hō’ē taote ’animara ia rātou ē e’ita tā rātou pua’atoro e ora i te roara’a te mahana. « ’Ua fa’aoti tā mātou tamaiti iti i tō mātou pure. I muri a’e i tona anira’a i te Metua i te Ao ra ’ia ‘ha’amaita’i ia pāpā i roto i tōna mau tere ’e ’ia ha’amaita’i ia mātou pā’ātoa’, ’ua ha’amata ’oia i muri iho i te hō’ē anira’a pāpū. ’Ua parau ’oia, ‘e te Metua i te Ao ra, ’a ha’amaita’i ia Bossy te pua’atoro ’ia ora maita’i ’oia’ ».

« California, ’ua fa’ati’a vau i te ’ohipa tei tupu ’e ’ua parau vau, ‘e ti’a iāna ’ia ha’api’i ē e’ita tātou e fāri’i i te mau mea tā tātou e pure mai terā te ’ōhie.’

« Tē vai ra te hō’ē ha’api’ira’a e ti’a ’ia ha’api’ihia, o vau rā tei ha’api’i mai e ’ere tā’u tamaiti. I tō’u ho’ira’a i te fare i te pō Sābati, ’ua ora roa o Bossy’ » (« Te pure ’e te mau muhumuhu », Ensign ’aore rā Liahona, Novema 2009, 45).

’Ua parau te taea’e Mangal Dan Dipty, te hō’ē melo nō te ’Ēkālesia nō Inidia : « ’Ei tamari’iri’i ’ua haere tāmau vau i te ’ēkālesia Lutero Purutia. E haere pinepine mātou i te mou’a nō te pure ’āmui. I te hō’ē mahana ua, ’ua rari roa te mau ta’ata ato’a i roto i te pupu pure, ’e ’ua pūpū te hō’ē o te mau ta’ata a’o i te hō’ē pure ma te ’ā’au tae ma te tāparu atu i te Fatu ’ia tāpe’a i te ua. I tō mātou māere rahi ’ua fa’aea te ua. O terā te ha’amatara’a o tō’u fa’aro’o i te Atua ’e i te pure » (« My Journey as a Pioneer from India », Ensign, Tiurai 2016, 67).

Nā te tahi atu mau ’ā’amu nō ni’a i te pure, ’a hi’o i te tuha’a, te mau reo o te feiā mo’a i te mau mahana hope’a nei o te Ensign ’aore rā Liahona.

Ha’amata’ira’a i tā tātou ha’api’ira’a

’Eiaha e mata’u i te muhu ’ore « E tītau te mau uira’a maita’i i te taime nō te pāhono. E tītau te reira i te ferurira’a, te ’imira’a ’e te fa’aurura’a. E nehenehe te taime nō te tīa’i i te mau pāhonora’a e riro ’ei taime mo’a nō te feruri-māite-ra’a. ’Eiaha e topa i roto i te fa’aoti-’oi’oi-ra’a i te reira ma te pāhono i tā ’outou iho uira’a ’aore rā ma te tu’u atu i te tahi atu mea ». (Te Ha’api’ira’a mai tā te Fa’aora, 31).