« ថ្ងៃទី ២៦ ខែ កញ្ញា–ថ្ងៃទី ២ ខែ តុលា ។ អេសាយ ៥០–៥៧ ៖ ‹ ទ្រង់បានទ្រាំទ្ររងអស់ទាំងសេចក្តីឈឺចាប់របស់យើង ហើយបានទទួលផ្ទុកអស់ទាំងសេចក្តីទុក្ខព្រួយរបស់យើង › » ចូរមកតាមខ្ញុំ—សម្រាប់សាលាថ្ងៃអាទិត្យ ៖ ព្រះគម្ពីរសញ្ញាចាស់ ឆ្នាំ ២០២២ ( ឆ្នាំ ២០២១ )

« ថ្ងៃទី ២៦ ខែ កញ្ញា–ថ្ងៃទី ២ ខែ តុលា ។ អេសាយ ៥០–៥៧ » ចូរមកតាមខ្ញុំ—សម្រាប់ សាលាថ្ងៃអាទិត្យ ៖ ឆ្នាំ ២០២២

ការចំអកដាក់ព្រះគ្រីស្ទ ដោយ ខាល ហេនរីក ប្លក់

ថ្ងៃទី ២៦ ខែ កញ្ញា–ថ្ងៃទី ២ ខែ តុលា

អេសាយ ៥០–៥៧

« ទ្រង់បានទ្រាំទ្ររងអស់ទាំងសេចក្តីឈឺចាប់របស់យើង ហើយបានទទួលផ្ទុកអស់ទាំងសេចក្តីទុក្ខព្រួយរបស់យើង »

របៀបដ៏សំខាន់បំផុតដើម្បីរៀបចំខ្លួនបង្រៀនគឺ ត្រូវអាន និងសញ្ជឹងគិតពីបទគម្ពីរ ។ តើបងប្អូនមានអារម្មណ៍យ៉ាងណា និងរៀនបានអ្វីខ្លះ នៅពេលបងប្អូនអាន អេសាយ ៥០–៥៧ ?

កត់ត្រាចំណាប់អារម្មណ៍របស់បងប្អូន

អញ្ជើញឲ្យចែកចាយ

ដើម្បីបំផុសគំនិតសមាជិកក្នុងថ្នាក់ឲ្យចែកចាយបទពិសោធន៍ ដែលពួកគេបានមានពេលអាន អេសាយ ៥០–៥៧ បងប្អូនអាចសរសេរប្រយោគមួយដូចនេះដាក់លើក្ដារខៀន សេចក្ដីជំនឿរបស់ខ្ញុំលើព្រះយេស៊ូវគ្រីស្ទត្រូវបានពង្រឹង នៅពេលខ្ញុំអាន… ។ សូមអញ្ជើញសមាជិកក្នុងថ្នាក់ឲ្យចែកចាយពីរបៀបដែលពួកគេនឹងបញ្ចប់ប្រយោគនេះ ។

បង្រៀនគោលលទ្ធិ

អេសាយ ៥០–៥២

អនាគតគឺត្រចះត្រចង់សម្រាប់ប្រជារាស្ដ្ររបស់ព្រះអម្ចាស់ ។

យើងទាំងអស់គ្នាមានពេល ដែលយើងមានអារម្មណ៏ថាទន់ខ្សោយ ។ ដើម្បីជួយសមាជិកក្នុងថ្នាក់ឲ្យពឹងផ្អែកលើកម្លាំងរបស់ព្រះអម្ចាស់ បងប្អូនអាចចាត់ឲ្យពួកគេម្នាក់ៗអានពីរបីខនៅក្នុង អេសាយ ៥១–៥២ ហើយចែកចាយអ្វីមួយដែលពួកគេឃើញថា នឹងជួយពង្រឹងនរណាម្នាក់ដែលមានអារម្មណ៍ថាទន់ខ្សោយ ឬបាក់ទឹកចិត្ត ។ បងប្អូនក៏អាចចង្អុលបង្ហាញផងដែរថា ព្រះអង្គសង្គ្រោះដែលមានព្រះជន្មរស់ឡើងវិញ បានថ្លែងពាក្យពេចន៍របស់អេសាយមួយចំនួនឡើងវិញទៅកាន់ប្រជាជននៅទ្វីបអាមេរិក ( សូមមើល នីហ្វៃទី៣ ២០:៣២–៤៥ ) ។ តើបន្ទូលរបស់ព្រះអង្គសង្គ្រោះនៅក្នុង នីហ្វៃទី៣ ២០:៣០–៣៤ បន្ថែមដល់ការយល់ដឹងរបស់យើងយ៉ាងណាខ្លះ អំពីពេលវេលាដែលការព្យាករទាំងនេះនឹងត្រូវបានបំពេញ ?
គម្រោងមេរៀនសប្ដាហ៍នេះ នៅក្នុងសៀវភៅ ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ណែនាំឲ្យកត់ត្រាអ្វីៗគ្រប់យ៉ាងដែលមាននៅក្នុង អេសាយ ៥០–៥២ ជាអ្វីដែលព្រះអម្ចាស់អញ្ជើញប្រជាជនរបស់ទ្រង់ឲ្យធ្វើ ។ ប្រហែលជាសមាជិកក្នុងថ្នាក់អាចចែកចាយអ្វីដែលពួកគេបានរកឃើញ ហើយជជែកគ្នាអំពីអត្ថន័យនៃការអញ្ជើញទាំងនេះចំពោះពួកគេ ។ បងប្អូនអាចចង់ផ្ដោតលើការអញ្ជើញនានាដែលមាននៅក្នុង អេសាយ ៥១:១–២, ៦–៨; ៥២:១–៣, ៩–១១ ។ តើយើងអាចធ្វើសកម្មភាពតាមការអញ្ជើញទាំងនេះដោយរបៀបណា ? បងប្អូនអាចចង្អុលបង្ហាញថា គោលលទ្ធិ និង សេចក្ដីសញ្ញា ១១៣:៧–១០ ផ្ដល់នូវការពន្យល់ដ៏បំផុសគំនិតមួយអំពី អេសាយ ៥២:១–២ ។ តើបន្ទូលទាំងនេះបន្ថែមអ្វីខ្លះទៅលើការយល់ដឹងរបស់យើង ?

រូបចម្លាក់ព្រះគ្រីស្ទលីឈើឆ្កាង — ដោយសារតែសេចក្ដីស្រឡាញ់ ដោយជាងចម្លាក់ អេនជិលឡា ចនសុន

អេសាយ ៥២:១៣–១៥; ៥៣

ព្រះយេស៊ូវគ្រីស្ទបានលើកដាក់មកលើព្រះអង្គទ្រង់នូវអំពើបាប និងទុក្ខព្រួយរបស់យើង ។

ដើម្បីជួយសមាជិកក្នុងថ្នាក់ឲ្យមើលឃើញពាក្យពេចន៍របស់អេសាយនៅក្នុង អេសាយ ៥៣ បងប្អូនអាចបង្ហាញរូបភាពបីបួនសន្លឹកអំពីព្រឹត្តិការណ៍នៅជុំវិញដង្វាយធួនរបស់ព្រះយេស៊ូវគ្រីស្ទ ( សូមមើល សៀវភៅរូបភាពដំណឹងល្អ ល.រ. ៥៦–៦០ ) ។ បន្ទាប់មក បងប្អូនអាចសូមឲ្យសមាជិកក្នុងថ្នាក់រកមើលឃ្លានានានៅក្នុង អេសាយ ៥៣ ដែលពិពណ៌នាពីព្រឹត្តិការណ៍នៅក្នុងរូបភាពទាំងនេះ ។ តើពាក្យពេចន៍របស់អេសាយបង្រៀនអ្វីខ្លះ អំពីការរងទុក្ខរបស់ព្រះអង្គសង្គ្រោះសម្រាប់ពួកយើង ? តើពាក្យពេចន៍ទាំងនេះផ្ដល់ជាយោបល់អ្វីខ្លះ អំពីមូលហេតុដែលទ្រង់បានរងទុក្ខសម្រាប់ពួកយើង ? តើការបង្រៀនទាំងនេះបំផុសគំនិតយើងឲ្យធ្វើអ្វីខ្លះ ?
ដើម្បីយាងព្រះវិញ្ញាណបរិសុទ្ធឲ្យថ្លែងទីបន្ទាល់អំពីសេចក្ដីពិតដែលបានបង្រៀននៅក្នុង អេសាយ ៥២:១៣–១៥; ៥៣ បងប្អូនអាចសូមឲ្យសមាជិកក្នុងថ្នាក់អានខគម្ពីរទាំងនេះដោយស្ងាត់ស្ងៀម ខណៈបងប្អូនចាក់ទំនុកតម្កើងមួយបទអំពីដង្វាយធួនរបស់ព្រះយេស៊ូវគ្រីស្ទ ។ សូមអញ្ជើញឲ្យសមាជិកក្នុងថ្នាក់រកមើលពាក្យ ឬឃ្លានៅក្នុងបទគម្ពីរ ដែលពួកគេមានអារម្មណ៍ថាមានសារៈសំខាន់ជាពិសេស ។ រួចហើយ សូមឲ្យពួកគេចែកចាយអ្វីដែលពួកគេបានរកឃើញ ព្រមទាំងអារម្មណ៍របស់ពួកគេអំពីព្រះអង្គសង្គ្រោះ ។ សូមពិចារណាអញ្ជើញសមាជិកក្នុងថ្នាក់ឲ្យអាន ម៉ូសាយ ១៥:១០–១២ ផងដែរ ជាកន្លែងដែលអ័ប៊ីណាដៃបានពន្យល់ពីអត្ថន័យនៃឃ្លា « ពូជទ្រង់ » ។ តើខគម្ពីរនេះជួយយើងឲ្យយល់ពី អេសាយ ៥៣:១០ យ៉ាងដូចម្ដេច ?

អេសាយ ៥៤

ព្រះយេស៊ូវគ្រីស្ទសព្វព្រះទ័យឲ្យយើងត្រឡប់ទៅកាន់ទ្រង់វិញ ។

ការសិក្សា អេសាយ ៥៤ អាចបំផុសគំនិតដល់សមាជិកក្នុងថ្នាក់ ដែលមានអារម្មណ៍បាក់ទឹកចិត្តដោយសារតែអំពើបាប ឬភាពទន់ខ្សោយរបស់ពួកគេបាន ។ បងប្អូនអាចអញ្ជើញសមាជិកថ្នាក់ឲ្យស្រាវជ្រាវក្នុង ជំពូក ៥៤ រកមើលឃ្លា ឬខគម្ពីរនានាដែលបង្ហាញពីព្រះទ័យរបស់ព្រះអង្គសង្គ្រោះចំពោះពួកយើង ។ តើទ្រង់សព្វព្រះទ័យឲ្យយើងមានអារម្មណ៍យ៉ាងណាអំពីអំពើបាប និងភាពទន់ខ្សោយកាលពីអតីតកាលរបស់យើង ? តើទ្រង់សព្វព្រះទ័យឲ្យយើងមានអារម្មណ៍យ៉ាងណាអំពីទ្រង់ ? សូមលើកទឹកចិត្តសមាជិកក្នុងថ្នាក់ឲ្យចែកចាយអ្វីផ្សេងទៀត ដែលពួកគេបានរៀនអំពីព្រះយេស៊ូវគ្រីស្ទចេញមកពីជំពូកនេះ ។ សេចក្ដីថ្លែងការណ៍ដោយប្រធាន ឌៀថើរ អេហ្វ អុជដូហ្វ នៅក្នុង « ធនធានបន្ថែមទាំងឡាយ » អាចបន្ថែមការយល់ដឹងដល់ការពិភាក្សារបស់បងប្អូនបាន ។

ធនធានបន្ថែមទាំងឡាយ

តាមរយៈព្រះយេស៊ូវគ្រីស្ទ នោះយើងអាចមានសេចក្ដីសង្ឃឹម ។

ប្រធាន ឌៀថើរ អេហ្វ អុជដូហ្វ បានបង្រៀន ៖

« វាមិនសំខាន់ថាតើជីវិតយើងហិនហោចដល់កម្រិតណានោះទេ ។ វាមិនសំខាន់ថាតើអំពើបាបយើងមានពណ៌ក្រហមឆ្អៅ ភាពជូរចត់ ភាពឯកោ ឬដួងចិត្តយើងខ្ទេចខ្ទាំដល់កម្រិតណានោះឡើយ ។ សូម្បីតែជនទាំងឡាយដែលអស់សង្ឃឹម ដែលរស់នៅក្នុងភាពអស់សង្ឃឹម ដែលបានបាត់អស់នូវទំនុកចិត្ត បោះបង់សច្ចៈធម៌ ឬងាកចេញពីព្រះក៏អាចសាងខ្លួនជាថ្មីបានដែរ ។ …

« ដំណឹងដ៏រីករាយនៃដំណឹងល្អគឺថា ដោយសារតែផែនការនៃសុភមង្គលដ៏នៅអស់កល្បជានិច្ចដែលព្រះវរបិតាសួគ៌បានប្រទានឲ្យ និងតាមរយៈពលិកម្មដ៏គ្មានទីបញ្ចប់នៃព្រះយេស៊ូវគ្រីស្ទ នោះយើងមិនត្រឹមតែអាចបានប្រោសឲ្យរួចពីស្ថានភាពធ្លាក់របស់យើង ហើយស្ដារទៅរកភាពបរិសុទ្ធប៉ុណ្ណោះទេ ប៉ុន្តែយើងក៏អាចរីកចម្រើនលើសពីអ្វីដែលមនុស្សខាងសាច់ឈាមអាចស្រមៃបានទៅទៀត ហើយក្លាយជាអ្នកគ្រងមរតកនៃជីវិតដ៏នៅអស់កល្បជានិច្ច និងជាអ្នកទទួលសិរីល្អដ៏អស្ចារ្យរបស់ព្រះ » ( « He Will Place You on His Shoulders and Carry You Home » Liahona ខែ ឧសភា ឆ្នាំ ២០១៦ ទំព័រ ១០២ ) ។

ការកែលម្អការបង្រៀនរបស់យើង

រស់នៅឲ្យស័ក្ដិសមដើម្បីទទួលការដឹកនាំពីព្រះវិញ្ញាណ ។ នៅពេលបងប្អូនរស់នៅតាមដំណឹងល្អដោយភាពស័ក្ដិសម នោះបងប្អូនរស់នៅយ៉ាងស័ក្ដិសមដើម្បីទទួលព្រះវិញ្ញាណ ដែលជាគ្រូបង្រៀនដ៏ល្អបំផុត ។ នៅពេលបងប្អូនស្វែងរកការដឹកនាំពីព្រះវិញ្ញាណបរិសុទ្ធ នោះទ្រង់នឹងផ្ដល់ដល់បងប្អូននូវយោបល់ ចំណាប់អារម្មណ៍ និងគំនិតច្នៃប្រឌិតស្ដីពីរបៀបដើម្បីបំពេញតាមតម្រូវការរបស់អស់អ្នកដែលបងប្អូនបង្រៀន ។ ( សូមមើល ការបង្រៀនតាមរបៀបរបស់ព្រះអង្គសង្គ្រោះ ទំព័រ ៥ ) ។