1. O Le Aiga Atua

o le Uluai Faaaliga

1.1. E tolu peresona mavaevae i le Aiga Atua: O Le Atua le Tama Faavavau; o Lona Alo o Iesu Keriso; ma le Agaga Paia. E i ai i le Tama ma le Alo ni tino o aano ma ivi, e faamamaluina, a o le Agaga Paia o se peresona o agaga (tagai MF&F 130:22–23). Ua autasi atoatoa i Latou i le faataunuuina o le fuafuaga o le faaolataga a le Tama Faalelagi.

Mau Fesootai: Kenese 1:26–27; Luka 24:36–39; Iosefa Samita—Talafaasolopito 1:15–20

O Le Atua Le Tama

1.2. O le Atua le Tama o ia o le Pule Aoao tatou te tapuai i ai. O Ia o le Tama o o tatou agaga (tagai Eperu 12:9). E atoatoa o Ia, e ona le mana uma, ma e silafia mea uma. E tonu foi o Ia, alofa mutimutivale, ma agaalofa. E alofa atoatoa le Atua i Ana fanau taitasi, ma e tutusa tagata uma ia te Ia (tagai 2 Nifae 26:33 O Lana galuega ma le mamalu o le faataunuuina o le faaofuina o le tagata i le tino ola pea ma le ola e faavavau.

Mau Fesootai: Ioane 17:3; Mosaea 4:9; Mose 1:39

Iesu Keriso

1.3. O Iesu Keriso o le Ulumatua a le Tama i le agaga ma o le Alo e Toatasi na Fanaua a le Tama i la le tino. I lalo o le faatonuga a le Tama, na foafoaina e Iesu Keriso le lagi ma le lalolagi. O Ia o Ieova o le Feagaiga Tuai ma le Mesia o le Feagaiga Fou.

1.4. E faia e Iesu Keriso le finagalo o le Tama i mea uma. Na Ia soifua i se soifuaga e le agasala ma na togiolaina mo agasala a tagata uma (tagai 3 Nifae 11:10–11). O Lona soifuaga o se faataitaiga atoatoa o le ala e tatau ona tatou ola ai (tagai 3 Nifae 12:48). O Ia o le tagata muamua o fanau a le Tama Faalelagi na toetu mai. I o tatou aso, e pei o aso anamua, o Ia o le ulu o Lana Ekalesia. O le a toe afio mai o Ia i le mana ma le mamalu, ma o le a nofotupu i le lalolagi i le taimi o le Meleniuma (tagai MF&F 29:10–11). O le a Ia faamasinoina tagata uma.

1.5. Ona o Iesu Keriso o lo tatou Faaola ma lo tatou Puluvaga ma le Tama, o tatalo uma, faamanuiaga, ma sauniga o le perisitua e tatau ona faia i Lona suafa (tagai 3  Nifae 18:15, 20–21).

Mau Fesootai: Isaia 53:3–5; Luka 24:36–39; 1 Korinito 15:20–22; Faaaliga 20:12; Alema 7:11–13; Alema 34:9–10; Helamana 5:12; Moronae 7:45, 47–48; MF&F 1:30; MF&F 6:36; MF&F 18:10–11; MF&F 19:16–19; MF&F 76:22–24

Autu Fesootai: O le Togiola a Iesu Keriso

O Le Agaga Paia

1.6. O le Agaga Paia o le sui lona tolu o le Aiga Atua. O ia o se peresona o agaga ma e leai sona tino o aano ma ivi. E masani ona taua o Ia o le Agaga, o le Agaga Paia, o le Agaga o le Atua, o le Agaga o le Alii, ma o Le Faamafanafana.

1.7. E molimau mai le Agaga Paia i le Tama ma le Alo, e faaalia mai le moni o mea uma, ma faamama i latou o e salamo ma ua papatisoina. E ala i le mana o le Agaga Paia, e mafai ona tatou maua meaalofa faaleagaga, o faamanuiaga po o malosiaga ua tuuina mai e le Alii mo lo tatou lelei ma ia fesoasoani ia i tatou e auauna atu ma faamanuia ai isi.

Mau fesootai: Ioane 3:5; 1  Korinito 2:5, 9–11; 2  Nifae 32:3; 2  Nifae 32:8–9; Mosaea 3:19Mosaea 18:8–10; 3  Nifae 27:20; Moronae 7:45, 47–48; Moronae 10:4–5; MF&F 8:2–3; MF&F 130:22–23

Autu fesootai:Mauaina o le Malamalama Faaleagaga; Sauniga ma Feagaiga