5. Perofeta ma Faaaliga

tagata o loo lagolagoina o latou taitai

5.1. O se perofeta o se tagata ua valaaulia e le Atua e saunoa atu mo Ia (tagai Ieremia 1:4–5; Amosa 3:7; Ioane 15:16; MF&F 1:37–38). E molimau mai perofeta ia Iesu Keriso ma aoao atu Lana talalelei. Latou te faalauiloa mai le finagalo o le Atua ma Lona uiga moni. Latou te fetuuina le agasala, lapatai atu i ona taunuuga, ma fesoasoani ia i tatou e aloese mai le faaseseina (tagai Esekielu 3:16–17; Efeso 4:11–14). I nisi o taimi, latou te valoia mea e tutupu i le lumanai. E mafai e perofeta ona faia nei tiutetauave ona latou te maua le pule ma faaaliga mai le Atua.

5.2. O faaaliga o le fesootaiga lea mai le Atua i Ana fanau. O le tele o faaaliga e oo mai uunaiga, manatu, ma lagona mai le Agaga Paia. E mafai foi ona oo mai faaaliga e ala i faaaliga vaaia, miti, ma asiasiga a agelu.

5.3. I Lana galuega i le lalolagi faapea foi i o tatou aso, na faatuina e le Alii Lana Ekalesia i le faavae o perofeta ma Aposetolo (tagai Efeso 2:19–20). O le Peresitene o le Ekalesia a Iesu Keriso o le Au Paia o Aso e Gata Ai o le perofeta a le Atua i le lalolagi i le aso. Matou te lagolagoina le Peresitene o le Ekalesia o se perofeta, tagatavaai, ma talifaaaliga ma na o le pau lea o le tagata i le lalolagi e mauaina faaaliga e taitaiina ai le Ekalesia atoa. Afai tatou te mauaina ma le faatuatua ma usiusitai i aoaoga a le Peresitene o le Ekalesia, o le a faamanuiaina i tatou e le Atua e manumalo i le taufaasese ma le tiapolo (tagai MF&F 21:4-6 Tatou te lagolagoina foi fesoasoani i le Au Peresitene Sili ma sui o le Korama a Aposetolo e Toasefululua, o ni perofeta, tagatavaai ma talifaaaliga.

5.4. O tusitusiga paia —o le Tusi Paia, Tusi a Mamona, Mataupu Faavae ma Feagaiga, ma le Penina Tautele —o loo i ai faaaliga na tuuina mai e ala i perofeta anamua ma perofeta o aso e gata ai. Ao tatou suesue i upu a perofeta, e mafai ona tatou aoaoina upumoni ma maua le taitaiga.

5.5. Ao tuuina mai e le Atua faaaliga e ala mai perofeta e taitaia Ana fanau uma, e mafai e tagata ona maua faaaliga e fesoasoani ia i latou i o latou manaoga faapitoa, tiutetauave, ma fesili ma fesoasoani e faamalosia a latou molimau. Ae ui i lea, o uunaiga patino mai le Alii o le a le feteenai lava ma faaaliga e tuuina mai e le Atua e ala mai i Ana perofeta.

Mau fesootai: Aperaamo 3:22–23; Mataio 16:15–19; 2  Timoteo 3:15–17; 2 Nifae 32:3; MF&F 8:2–3; MF&F 76:22–24

Autu fesootai: Mauaina o le Malamalama Faaleagaga; Perisitua ma Ki o le Perisitua