4. O Le Toefuataiga

o papatusi auro

4.1. Ua toefuatai mai e le Atua Lana talalelei i nei aso e gata ai e ala i le toe faatuina o Ana upumoni, pule o le perisitua, ma le Ekalesia i le lalolagi. Na valoia mai e perofeta anamua le Toefuataiga o le talalelei i aso e gata ai (tagai Isaia 29:13–14; Galuega 3:19–21).

4.2. Na amata le Toefuataiga i le 1820. O le Atua le Tama ma le Lona Alo, o Iesu Keriso, na faaali atu ia Iosefa Samita i le tali i le tatalo a Iosefa, ma na La valaaulia o ia e avea ma Perofeta o le Toefuataiga (tagai Iosefa Samita—Talafaasolopito 1:15–20).

4.3. Na valaaulia e le Atua Iosefa Samita e avea ma molimau o le Keriso soifua o aso e gata ai. I le avea ai ma le Perofeta o le Toefuataiga, na faaliliu e Iosefa Samita le Tusi a Mamona e ala i le meaalofa ma le mana o le Atua (tagai MF&F 135:3). Faatasi ma le Tusi Paia, ua molimau le Tusi a Mamona ia Iesu Keriso ma e maua ai le atoatoaga o le talalelei (tagai Esekielu 37:15–17). O le Tusi a Mamona o se molimau foi i le valaauga faaperofeta o Iosefa Samita ma le moni o le Toefuataiga.

4.4. O se vaega o le Toefuataiga, na auina mai e le Atua avefeau e toefuatai mai le Perisitua Arona ma le Mekisateko. Ona Ia faatonuina lea o Lana Ekalesia ia toe faatuina i le lalolagi ia Aperila 6, 1830. Ona sa faatuina e le Atua lava Ia, O le Ekalesia a Iesu Keriso o le Au Paia o Aso e Gata Ai ua pau lea o “le  ekalesia moni ma ola e tasi i luga o le lalolagi atoa” (MF&F 1:30).

Mau fesootai: Amosa 3:7; Efeso 2:19–20; Efeso 4:11–14; MF&F 13:1; MF&F 76:22–24; MF&F 107:8

Autu fesootai: O le Aiga Atua; Perofeta ma Faaaliga

Liliuese

4.5. O le manaomia o le Toefuataiga o upumoni a le Atua i aso e gata ai, le pule o le perisitua, ma le Ekalesia na tupuga mai ona o le liliuese. Na tupu le liliuese ina ua aluese se tagata se toatasi pe sili atu mai upumoni o le talalelei.

4.6. Ina ua mavae le faasatauroina o le Faaola ma le maliliu ai o Ana Aposetolo, e toatele tagata na liliuese mai upumoni na faatuina e le Faaola (tagai 2  Tesalonia 2:1–3). O mataupu faavae o le talalelei ma vaega o tusitusiga paia na faaleagaina ma leiloloa. O suiga le faatagaina na faia i faalapotopotoga o le Ekalesia ma sauniga o le perisitua. Ona ua salalau tele lenei amioleaga, o lea sa aveesea ai e le Alii le pule ma ki o le perisitua mai le lalolagi. E ui lava e toatele tagata lelei ma faamaoni na tapuai i le Atua e tusa ai ma le malamalama na i ai ia i latou ma maua tali ia latou tatalo, na tuua le lalolagi e aunoa ma ni faaaliga mamana e ala mai i perofeta soifua. O lenei periota e taua o le Liliuese Tele.

4.7. O isi vaitaimi o le liliuese lautele na tutupu lava i le gasologa o le talafaasolopito o le lalolagi.

Autu fesootai: Perofeta ma Faaaliga; Perisitua ma Ki o le Perisitua; Sauniga ma Feagaiga

Tisipenisione o le Talalelei

4.8. Ina ua pauu fanau a le Atua i se tulaga o le liliuese, sa Ia aapa atu ma le agaalofa ia i latou e ala i le valaaulia o perofeta ma toe faasafua atu faamanuiaga o le talalelei e ala atu i Ana perofeta i tagata. O se vaitaimi e faaali atu ai e le Alii Ana upumoni, pule o le perisitua, ma sauniga e taua o se tisipenisione. O se vaitaimi lea e i ai i le Alii e lē itiiti ifo ma le toatasi se auauna tofia o lē e umia le perisitua paia ma e i ai le tiute paia e faasalalau atu le talalelei ma faia ona sauniga o i ai.

4.9. O tisipenisione ua faailoaina faatasi ma Atamu, Enoka, Noa, Aperaamo, Mose, Iesu Keriso, ma isi. O le Toefuataiga o le talalelei i aso e gata ai, lea na amata e le Alii e ala mai i le Perofeta o Iosefa Samita, o se vaega o lenei mamanu o tisipenisione.

4.10. I tisipenisione uma lava, ua saili le Alii ma Ana perofeta e faatu Siona. O Siona e faatatau i tagata o le feagaiga a le Alii o e mama loto, ua tuufaatasia i le amiotonu, ma tausia e le tasi le isi (tagai Mose 7:18). O Siona foi e faatatau i se nofoaga e nonofo ai tagata e mama loto.

4.11. Ua tatou ola nei i le tisipenisione mulimuli—le tisipenisione o le atoatoaga o taimi. Ua na o le pau lea o le tisipenisione o le a le iu i se liliuese. O le Ekalesia a Iesu Keriso o le Au Paia o Aso e Gata Ai o le a iu lava ina tumu ai le lalolagi atoa ma tumau e faavavau (tagai Tanielu 2:44).

Autu fesootai: Perofeta ma Faaaliga; Perisitua ma Ki o le Perisitua; Sauniga ma Feagaiga