6. Perisitua ma Ki o le Perisitua

6.1. O le perisitua o le mana e faavavau ma le pule a le Atua. E ala mai i le perisitua, na foafoaina ai e le Atua ma puleaina lagi ma le lalolagi. E ala mai i lenei mana ua Ia faaolaina ma faaeaina ai Lana fanau. E faaee atu le perisitua i luga o tama tane agavaa o le Ekalesia. E maua uma e fanau a le Atua faamanuiaga o le perisitua e ala atu i sauniga ma feagaiga o le talalelei.

6.2. O ki o le perisitua o aia tatau ia o le au peresitene, po o le mana ua tuuina mai e le Atua i le tagata e pulea ma taitai ai le malo o le Atua i luga o le fogaeleele (tagai Mataio 16:15–19). O ki o le perisitua e taua e taitai ai le talaiina o le talalelei ma le taitaiina o sauniga o le faaolataga.

6.3. O Iesu Keriso o loo umia ki uma o le perisitua e faatatau i Lana Ekalesia. Ua Ia faaee atu i luga o Ana Aposetolo taitasi ki uma e faatatau i le malo o le Atua i le fogaeleele. O le Peresitene o le Ekalesia e na o le pau lea o le tagata ua faatagaina e faaaoga uma na ki o le perisitua. O peresitene o malumalu, peresitene o misiona, peresitene o siteki, epikopo, ma peresitene o korama e umia foi ki o le perisitua lena e faatagaina i latou e pule faamalumalu ma taitaia le galuega ua tofia i latou e fai.

6.4. O i latou uma o e auauna atu i le Ekalesia—alii ma tamaitai—e valaauina i lalo o le taitaiga a lē ua umia ki o le perisitua (tagai MF&F 42:11). Na aoao mai Elder Dallin  H. Oaks o le Korama a Aposetolo e Toasefululua, “Po o ai lava e galue i se tofi po o se valaauga na maua mai se tasi o loo umiaina ki o le perisitua ua ia faaaogaina le pule o le perisitua i le faatinoina o ona tiute atofaina” (“O Ki ma le Pule o le Perisitua,”Ensignpo o le Liahona,Me 2014, 50–51). E faatoa mafai ona faaaoga le pule o le perisitua i le amiotonu (tagai MF&F 121:36, 41–42).

6.5. O i latou ua faauuina i Perisitua Mekisateko e ulu atu i le tautoga ma le feagaiga o le perisitua. Afai latou te faalautele lo latou valaaulia ma taliaina ma le faatuatua le Alii ma Ana auauna, o le a latou maua faamanuiaga o le faaeaga. Ua folafolaina atu foi faapena i tamaitai faamanuiaga o le faaeaga ao latou faamaoni i feagaiga na latou faia ma le Alii.

Mau fesootai: Ioane 15:16; Efeso 2:19–20

Autu fesootai : O le Toefuataiga; Perofeta ma Faaaliga; Sauniga ma Feagaiga

Perisitua Arona

6.6. E masani lava ona taua le Perisitua Arona o le perisitua sauniuni. O le Perisitua Arona “e umia ki o asiasiga ma galuega a agelu, ma le talalelei o le salamo, ma le papatisoga” (MF&F 13:1). E ala i le faaaogaina o lenei perisitua, o le faamanatuga e saunia, faamanuiaina, ma faatautaia. O tofi i le Perisitua Arona o le tiakono, aoao, ositaulaga, ma le epikopo.

Perisitua Mekisateko

6.7. O le Perisitua Mekisateko o le perisitua e maualuga atu, pe sili atu, ma e “e umia le aiā o le pulefaamalumalu, ma ua i ai le mana ma le pule i luga o tofi uma i le ekalesia i tupulaga uma o le lalolagi, e taitai ai i mea faaleagaga.” (MF&F 107:8). O faamanuiaga uma, sauniga, feagaiga, ma faatulagaga o le Ekalesia ua taitaia i lalo o le pule o le Peresitene o le Ekalesia, o le Peresitene lea o le Perisitua Mekisateko. O lenei perisitua na tuuina atu ia Atamu ma na i ai pea lava i le lalolagi i soo se taimi e faaali mai ai e le Alii Lana talalelei. E aofia i le Perisitua Mekisateko ia tofi o le toeaina, faitaulaga sili, peteriaka, Fitugafulu ma le Aposetolo.

Mau fesootai: Efeso 4:11–14