7. Sauniga ma Feagaiga

Sauniga

7.1. O se sauniga o se faatinoga paia e faia i le pule o le perisitua. Ua mamanuina sauniga taitasi e le Atua ina ia aoao atu ai upumoni faaleagaga, e masani lava e ala atu i faatusa.

7.2. O nisi sauniga e taua mo le faaeaga ma ua ta’ua o sauniga faaola. Ua na o le mauaina o sauniga faaola ma le tausia o feagaiga e faatatau i ai e mafai ai ona tatou maua faamanuiaga uma ua mafai ona maua e ala mai i le Togiola a Iesu Keriso. A aunoa ma nei sauniga faaola e le mafai ona tatou avea e faapei o lo tatou Tama Faalelagi pe toe foi atu e ola i Lona afioaga e faavavau (tagai MF&F 84:20–22). O sauniga faaola e faia i lalo o le taitaiga a i latou e umia ki o le perisitua.

7.3. O le sauniga faaola muamua o le talalelei o le papatisoga e ala i le faatofuina i le vai e se tasi ua i ai le pule. O le papatisoga e manaomia e se tagata ina ia avea ai ma se tagata o le Ekalesia a Iesu Keriso ma ia ulufale atu ai i le malo selesitila (tagai Ioane 3:5).

7.4. A uma ona papatiso se tagata, e toatasi pe sili atu tagata e umia le Perisitua Mekisateko e faamauina o ia o se tagata o le Ekalesia ma faaee i ona luga le meaalofa o le Agaga Paia (tagai 3  Nifae 27:20). O le meaalofa o le Agaga Paia e ese mai le uunaiga a le Agaga Paia. A o lei faia le papatisoga, e mafai ona lagona e se tagata le uunaiga a le Agaga Paia ma maua se molimau o le upumoni. A uma ona maua le meaalofa o le Agaga Paia, o se tagata e tausia ana feagaiga e i ai le aia i le mafutaga faifai pea a le Agaga Paia.

7.5. O isi sauniga faaola e aofia ai le faauuga i le Perisitua Mekisateko (mo alii), o le faaeega paia o le malumalu, ma le faamauga o le faaipoipoga. I le malumalu, o nei sauniga faaola e mafai foi ona faataunuuina e fai ai ma sui mo e ua maliliu. E pau lava le taimi e aoga ai sauniga e fai ai ma sui, pe afai lea e talia e tagata ua maliliu ia sauniga i le lalolagi o agaga ma faamamalu ia feagaiga e faatatau i ai.

7.6. O isi sauniga, e pei o le tagofia o le faamanatuga e faafou ai a tatou feagaiga o le papatisoga, faamaloloina o mai ma le faaigoaina ma le faamanuiaina o fanau, e taua foi mo lo tatou tuputupu a’e faaleagaga.

Mau fesootai: Malaki 4:5–6; Mataio 16:15–19; 1  Peteru 4:6; MF&F 131:1–4

Autu fesootai: O le Aiga Atua: O le Agaga Paia; O le Fuafuaga o le Faaolataga: Olaga pe a mavae le Oti; O le Togiola a Iesu Keriso; Perisitua ma Ki o le Perisitua

Feagaiga

7.7. O le feagaiga o se maliliega paia lea i le va o le Atua ma le tagata. E tuuina mai e le Atua tuutuuga mo le feagaiga, ma e tatou te malilie e faia le mea e Na te poloaiina i tatou e fai; ona folafola mai lea e le Atua mo i tatou ni faamanuiaga faapitoa mo lo tatou usiusitai (tagai Esoto 19:5–6; MF&F 82:10). Afai tatou te le tausia a tatou feagaiga, ona tatou le maua lea o faamanuiaga ua folafolaina mai.

7.8. O sauniga faaola uma o le perisitua e o faatasi ma feagaiga. Mo se faataitaiga, tatou te osi feagaiga ma le Alii e ala i le papatisoga (tagai Mosaea 18:8–10). O uso o ē mauaina le Perisitua Mekisateko, e ulu atu i se tautoga ma le feagaiga o le perisitua. Tatou te faafouina feagaiga na tatou faia e ala i le faamanatuga.

7.9. Tatou te osia isi feagaiga ao tatou maua sauniga faaola o le faaeega paia ma le faamauga o le faaipoipoga i le malumalu. Tatou te saunia e auai i sauniga ma osia feagaiga i le malumalu e ala i le ola i tulaga faatonuina o le agavaa ua faatuina e le Alii (tagai Salamo 24:3–4). E taua lo tatou agavaa e ulufale atu i le malumalu aua o le malumalu o le maota moni lava o le Alii. O le nofoaga lea e sili le paia i soo se nofoaga tapuai i le lalolagi.