Faatomuaga i le Atamai i Aoaoga Faavae

talavou o loo talanoa

I le Tusi a Mamona, na aoao e le perofeta o Helamana ona atalii “o luga lava o le papa o lo tatou Togiola, o le Keriso lea, le Alo o le Atua, e ao ina oulua atinae ai lo oulua faavae” (Helamana 5:12). O le fausiaina o se faavae i luga o Iesu Keriso—lea e aofia ai le malamalama, talitonu, ma le ola e tusa ai ma Lana aoaoga faavae—o le a faalolotoina lo tatou liua ma le tautinoga i le avea ai ma Ona soo, puipuia i tatou mai aafiaga o le fili, ma fesoasoani ia i tatou ia faamanuiaina ai olaga o isi.

O se tasi o ala tatou te ausia ai lenei mea o le suesue lea i tusitusiga paia i le faasologa sao i le vasega. O le isi ala tatou te fausia ai lo tatou faavae i luga o Iesu Keriso ma Lana aoaoga faavae e ala i se taumafaiga e taua o le Atamai i Aoaoga Faavae.

O le Atamai i Aoaoga Faavae e taulai atu i taunuuga e lua:

1. Aoaoina ma le faaaogaina o mataupu faavae mamana mo le mauaina o le malamalama faaleagaga

   Ua faaalia mai e le Tama Faalelagi mataupu faavae mo le mauaina o le malamalama faaleagaga. O nei mataupu faavae e aofia ai le faatinoina i le faatuatua, iloiloina o manatu ma fesili ma se vaaiga e faavavau, ma le sailia o se malamalama sili atu e ala i punaoa mamana ua filifilia. Tatou te atiina ae le atamai i aoaoga faavae ao tatou faaaogaina nei mataupu faavae i taimi o vasega ma fafo o vasega ma sailia tali i fesili faaleaoaoga faavae ma talafaasolopito i se ala lena e valaaulia ai le Agaga Paia e faamalosia lo tatou faatuatua ia Iesu Keriso ma Lana aoaoga faavae.

2. O le atamai i aoaoga faavae o le talalelei a Iesu Keriso ma fuaitau o mau lea e aoaoina ai lena aoaoga faavae

   O lenei taunuuga o le Atamai i Aoaoga Faavae e ausiaina i le:

   1. Atiina ae o se malamalama e loloto atu o autu faaleaoaoga faavae e iva nei:

      • O Le Aiga Atua

      • O le fuafuaga o le faaolataga

      • O Le Togiola a Iesu Keriso

      • O Le Toefuataiga

      • Perofeta ma faaaliga

      • Perisitua ma ki o le perisitua

      • Sauniga ma feagaiga

      • Faaipoipoga ma aiga

      • Poloaiga

   2. Malamalama i fuaitau autu o le aoaoga faavae ua faailoaina i le vaega o le “Mauaina o le Malamalama Faaleagaga“ o lenei pepa ma i autu faaleaoaoga faavae taitasi e iva.

   3. Iloaina pe faapefea ona aoaoina fuaitau autu o aoaoga faavae ua aoaoina i fuaitau o mau i le atamai i aoaoga faavae ma mafai ona manatua ma sue na fuaitau.

   4. Faamatalaina manino o fuaitau autu taitasi o le aoaoga faavae, e faaaoga ai fuaitau o le atamai i aoaoga faavae e faatatau i ai.

   5. Faaaogaina o le aoaoga faavae o le talalelei a Iesu Keriso ia tatou filifiliga i aso taitasi ma a tatou tali i fesili i faafitauli faaleaoaoga faavae, faaleagafesootai, ma talafaasolopito.