2. O Le Fuafuaga o le Faaolataga

Iesu Keriso o loo foafoaina le Lalolagi

2.1. I le muai olaga, sa folasia mai ai e le Tama Faalelagi se fuafuaga e mafai ai e i tatou ona avea e faapei o Ia ma maua ai le tino ola pea ma le ola e faavavau (tagai Mose 1:39). Ina ia faataunuuina lenei fuafuaga ma avea e faapei o lo tatou Tama oi le Lagi, e tatau ona tatou iloa o Ia ma Lona Alo, o Iesu Keriso, ma maua se malamalama sao o lo La uiga ma uiga faaalia (tagai Ioane 17:3).

2.2. E taua e tusitusiga paia lenei fuafuaga o le fuafuaga o le faaolataga, o le fuafuaga sili o le fiafia, o le fuafuaga o le togiola, ma le fuafuaga o le alofa mutimutivale. O lenei fuafuaga e aofia ai le Foafoaga, le Pau, le Togiola a Iesu Keriso, ma tulafono uma, o sauniga, ma aoaoga faavae o le talalelei. O le pule faitalia—o le tomai e filifili ma faatino ai mo i tatou lava—e taua foi i le fuafuaga a le Tama Faalelagi. O lo tatou alualu i luma e faavavau e faalagolago lea i le ala tatou te faaaoga ai lenei meaalofa (tagai Iosua 24:15; 2 Nifae 2:27).

2.3. O Iesu Keriso e Totonugalemu i le Fuafuaga a le Tama Faalelagi. O le fuafuaga o le faaolataga e mafai ai e i tatou ona faaatoatoaina, maua se atoatoaga o le olioli, olioli i sootaga faaleaiga i le faavavau atoa, ma ola faavavau i le afioaga o le Atua.

Mau fesootai: Malaki 4:5–6; 3 Nifae 12:48; MF&F 131:1–4

Muai Olaga

2.4. Ae tatou te lei fananau mai i le lalolagi, sa tatou nonofo i le afioaga o lo tatou Tama Faalelagi o ni Ana fanau agaga (tagai Aperaamo 3:22–23). I lenei muai olaga sa tatou auai i se fonotaga ma isi fanau agaga a le Tama Faalelagi. I lena fonotaga, sa folasia mai ai e le Tama Faalelagi Lana fuafuaga ma na osifeagaiga ai le Iesu Keriso o le muai olaga e avea ma Faaola.

2.5. Na tatou faaaogaina la tatou faitalia e mulimuli ai i le fuafuaga a le Tama Faalelagi. O e na mulimuli i le Tama Faalelagi ma Iesu Keriso na faataga e o mai i le lalolagi ia latou maua le poto masani i le olaga faitino ma alualu ai i luma e agai atu i le ola e faavavau. O Lusifelo, o le isi atalii agaga o le Atua, na tetee i le fuafuaga. Sa avea o ia ma Satani, ma na tuliesea faatasi ma e na mulimuli ia te ia mai le lagi ma taofia ai faamanuiaga o le mauaina o se tino faaletino ma le poto masani i le olaga faitino.

Mau fesootai: Ieremia 1:4–5; Eperu 12:9; 2 Nifae 2:273 Nifae 11:10–11

O Le Foafoaga

2.6. Na foafoaina e Iesu Keriso le lagi ma le lalolagi i lalo o le taitaiga a le Tama (tagai MF&F 76:22–24). Na taua le Foafoaga o le lalolagi i le fuafuaga a le Atua. Na tuuina mai ai se nofoaga e mafai ai ona tatou maua se tino faaletino, ia tofotofoina ma suesueina ai, ma atiina ae ai uiga paia.

2.7. O Atamu o le uluai tagata na foafoaina i le lalolagi. Na foafoaina e le Atua Atamu ma Eva i Lona lava faatusa. O tagata ola uma—alii ma le tamaitai—ua foafoaina i le faatusa o le Atua (tagai Kenese 1:26–27). O le itupa [o le tagata] o se uiga taua lea o tagata taitasi i le mua’i olaga, olaga faitino, ma le faasinomaga ma le faamoemoega e faavavau.

O Le Pau

2.8. I le faatoaga o Etena na tuufaatasia ai e le Atua Atamu ma Eva i le faaipoipoga. Ao i ai Atamu ma Eva i le faatoaga, na i ai pea i laua i le afioaga o le Atua ma na mafai ona ola ai e faavavau. Na la ola ai i le mama, ma na saunia e le Atua mea na la manaomia.

2.9. Na tuuina atu e le Atua ia Atamu ma Eva lo la faitalia ao i ai i laua i le Faatoaga o Etena. Sa Ia poloaiina i laua e aua le aia le fua e faasaina—le fua o le laau e iloa ai le lelei ma le leaga. O le usitaia o lenei poloaiga o lona uiga e mafai ai ona la tumau i le faatoaga. Ae ui i lea, e lei malamalama Atamu ma Eva afai la te tumau i le faatoaga o le a la le agai i luma e ala i le mauaina o le poto masani o le faafeagai i le olaga faitino. O le a la le iloa le olioli aua o le a la le iloaina le faanoanoa ma le tiga. Ma le isi foi, o le a le mafai ona maua se la fanau.

2.10. Na faaosoosoina e Satani Atamu ma Eva e aai i le fua faasaina, ma na la filifili e faia. Ona o lenei filifiliga, na tulieseina i laua mai le afioaga o le Atua ma na avea ai ma tagata pau ma faaletino. O le solitulafono a Atamu ma Eva ma suiga na la oo i ai o se taunuuga, e aofia ai le oti faaleagaga ma le faaletino, ua ta’ua o le Pau. O le oti faaleagaga o le vavaeeseina lea mai le Atua. O le oti faaletino o le tuueseeseina lea o le agaga mai le tino faaletino.

2.11. O le Pau o se vaega taua o le fuafuaga o le faaolataga a le Tama Faalelagi. O se taunuuga o le Pau, ua mafai ai e Atamu ma Eva ona maua ni fanau. O i laua ma le la fanau ua mafai ona lagona le olioli ma le faanoanoa, iloa le lelei mai le leaga, ma alualu i luma (tagai 2  Nifae 2:22–25).

2.12. I le avea ai ma fanau a Atamu ma Eva, ua tatou mautofi ai i se tulaga pau i le olaga faitino. Ua tuueseina i tatou mai le afioaga o le Atua ma ua oo i ai le oti faaletino. E tofotofoina foi i tatou i faigata o le olaga faitino ma faaosoosoga a le fili. A o lei faasalaina i tatou mo le agasala a Atamu ma Eva, e faasalaina i tatou mo a tatou lava agasala. E ala mai i le Togiola a Iesu Keriso, e mafai ona tatou manumalo i aafiaga leaga o le Pau, maua le faamagaloina o a tatou agasala, ma maua se olioli atoatoa mulimuli ane.

Mau fesootai: Kenese 1:28; Mosaea 3:19; Alema 34:9–10

Autu Fesootai: O le Togiola a Iesu Keriso

Olaga Faaletino

2.13. O le olaga faaletino o se taimi o le aoaoga, lea tatou te faamaonia ai o le a tatou faaaoga lo tatou faitalia e fai ai mea uma ua poloaiina ai e le Alii ma saunia mo le ola e faavavau e ala i le atiina ae o uiga auaumama paia. Tatou te faia lenei mea ao tatou faaaoga le faatuatua ia Iesu Keriso ma Lana Togiola, salamo, maua sauniga faaola ma feagaiga e pei o le papatisoga ma le faamauga, ma tumau faamaoni seia oo i le iuga o o tatou olaga faaletino i le mulimuli i le faataitaiga a Iesu Keriso.

2.14. I le olaga faaletino, e tuufaatasia o tatou agaga ma o tatou tino faaletino, e maua ai e i tatou avanoa e tuputupuae ai ma atiina ae i auala e lei mafaia i le muai olaga. Ona o lo tatou Tama oi le Lagi e i ai se tino o aano ma ivi, e manaomia e o tatou tino le alualu i luma ma avea e faapei o Ia. O o tatou tino e paia ma e tatau ona faaaloalo i ai o se meaalofa mai lo tatou Tama Faalelagi (tagai 1  Korinito 6:19–20).

Mau fesootai: Iosua 24:15; Mataio 22:36–39; Ioane 14:15; 2 Nifae 2:27; 3 Nifae12:48; Moronae 7:45, 47–48; MF&F 130:22–23

Autu fesootai : O le Aigaatua; O le Togiola a Iesu Keriso; Sauniga ma Feagaiga; Poloaiga

Olaga pe a mavae le Oti

2.15. Pe a tatou feoti, o le a ulufale atu o tatou agaga i le lalolagi o agaga ma faatalitali ai mo le Toetutu. O agaga o e amiotonu o le a nonofo i le mea o i ai le fiafia, ua ta’ua o le parataiso. O i latou e maliliu e aunoa ma le malamalama i le upumoni ma i latou e le usiusitai i le olaga faitino e ulufale atu i se nofoaga le tumau i le lalolagi pe a mavae le oti ua taua o le falepuipui o agaga.

2.16. O tagata taitasi o le a iu ina maua le avanoa e aoao ai mataupu faavae o le talalelei ma maua ona sauniga ma feagaiga. O le toatele o ē faamaoni o le a talaiina atu le talalelei ia i latou o i le falepuipui o agaga. O i latou na filifili e talia le talalelei, salamo, ma talia sauniga o le faaolataga ua faia mo i latou i malumalu o le a mau i parataiso seia oo i le Toetu (tagai 1  Peteru 4:6).

2.17. O le Toetu o le toe faatasia lea o o tatou tino agaga ma o tatou tino faaletino o aano ma ivi ua faaatoatoaina. A mavae le toetu o le a tatou faavavau—o lo tatou agaga ma le tino o le a le toe tuueseeseina lava. O tagata uma e fananau mai i le lalolagi o le a toetutu aua na manumalo Iesu Keriso i le oti faaletino (tagai 1  Korinito 15:20–22). O le a toetutu muamua e amiotonu nai lo o e amioleaga ma o le a tutula’i mai i le Uluai Toetu.

2.18. O le a faia le Faamasinoga Mulimuli pe a mavae le Toetu. O le a faamasinoina e Iesu Keriso tagata taitasi e iloa ai le mamalu faavavau o le a ia mauaina. O lenei faamasinoga o le a faalagolago i le usiusitai o tagata taitoatasi i poloaiga a le Atua (tagai Faaaliga 20:12).

2.19. E tolu malo o le mamalu: o le malo selesitila, le malo teresitila, ma le malo telesitila (tagai 1  Korinito 15:40–42). O i latou o e lototoa i le molimau ia Iesu ma usiusitai i mataupu faavae o le talalelei, o le a nonofo i le malo selesitila i le afioaga o le Atua le Tama ma Lona Alo o Iesu Keriso, ma faatasi ma tagata amiotonu o o latou aiga.

Mau fesootai: Luka 24:36–39; Ioane 17:3; MF&F 131:1–4

Autu fesootai: O le Togiola a Iesu Keriso; Sauniga ma Feagaiga