Leksiyon 3: Pamahayag sa Pagpahiuli

Pasiuna sa Doktrina ug mga Pakigsaad

Pagpaminaw sa Tingog ni Jesukristo

Diha sa Doktrina ug mga Pakigsaad, atong mabasa ang kaugalingong mga pulong sa Ginoo, nagtabang kanato nga makadungog sa Iyang tingog nga namulong niadtong sa atong panahon ug gani kanato mismo. Kini nga leksiyon makatabang sa mga estudyante nga maandam sa pagkat-on sa pag-ila sa Manluluwas samtang magsugod sila sa ilang pagtuon sa Doktrina ug mga Pakigsaad.

Mga Posibleng Kalihokan sa Pagkat-on

Pakig-ila-ila diha kanimo

Ikonsiderar ang pagsugod sa klase pinaagi sa pagdapit sa mga estudyante sa pagpangutana sa usa ka klasmeyt og pangutana nga makatabang nila nga mas makaila pa niana nga tawo. Pananglitan, mahimo silang mangutana, “Unsa ang butang nga ganahan nimong buhaton sa imong libre nga oras?”

Human mahatagi og panahon ang mga estudyante sa pakig-istorya sa usa ka klasmeyt, mahimo nimong hisgotan ang mosunod:

Paghunahuna sa tawo nga imong gibati nga imong kaila kaayo.

• Unsa ang nakatabang kanimo nga mailhan pag-ayo kini nga tawo?

Dapita ang mga estudyante sa hilom nga pagpamalandong kon paminaw nila unsa ka maayo sila nakaila ni Jesukristo ug unsay ilang gibuhat karon aron mas makaila Kaniya.

Diha sa Doktrina ug mga Pakigsaad, gihulagway ni Jesukristo ang pipila ka mga paagi nga kita mas makaila Kaniya ug misaad kanato og panalangin nga atong madawat sa pagbuhat sa ingon.

Basaha ang Doktrina ug mga Pakigsaad 19:23–24, mangita sa mga pagdapit sa Manluluwas ug sa saad nga Iyang gihimo.

• Sa imong hunahuna sa unsang paagi ang mga pagdapit sa Manluluwas niini nga mga bersikulo makatabang kanato nga mas makaila Kaniya?

• Unsa ang atong makat-onan mahitungod sa Manluluwas gikan sa Iyang mga pulong niini nga mga bersikulo?

Ikonsiderar ang pagpunting sa saad sa Manluluwas sa bersikulo 23 nga atong masinati ang Iyang kalinaw samtang kita magkat-on mahitungod Kaniya ug maminaw sa Iyang mga pulong. Mahimong makatabang ang pagdapit sa mga estudyante sa paghunahuna og mas lawom mahitungod niini nga saad. Mahimo nimo silang hangyoon sa pagsusi kon unsa ka sagad nila bation ang kalinaw nga gikan ni Jesukristo ug sa unsang paagi maapektohan ang ilang kinabuhi kon mobati sila og dugang kalinaw.

Pagtuon sa Doktrina ug mga Pakigsaad

Karong tuiga, mahatagan ka og mga kahigayonan sa pagtuon sa Doktrina ug mga Pakigsaad sa panimalay, sa simbahan, ug sa seminary. Samtang magtuon ka, makabaton ka og daghang mga kahigayonan sa pagkat-on kang Jesukristo ug sa pagpaminaw sa Iyang mga pulong. Makatabang kini kanimo nga makaila Kaniya sa mas hingpit ug makasinati sa kalinaw nga Iyang gisaad.

• Unsa na ang imong nahibaloan mahitungod sa Doktrina ug mga Pakigsaad?

Ang ubang mga estudyante mahimong adunay mga tudling gikan sa Doktrina ug mga Pakigsaad nga hilabihang makahuloganon ngadto kanila. Mahimo nimong hangyoon ang pipila ka mga estudyante nga buot mopakigbahin niini nga mga tudling ug sa pagpasabot ngano nga kini makahuloganon. Mahimo usab nimong ipakigbahin ang pipila sa imong paborito nga mga tudling.

Dayon dapita ang mga estudyante sa pag-abli sa ilang mga kasulatan ngadto sa pasiuna sa Doktrina ug mga Pakigsaad.

Sa pasiuna sa Doktrina ug mga Pakigsaad, basaha ang mga parapo 1–3 ug ang kataposang kapahayag sa parapo 8. Samtang magbasa ka, pangitaa ang mga hugpong sa mga pulong kon sa unsang paagi ang pagtuon sa Doktrina ug mga Pakigsaad makatabang nimo nga mas hingpit nga makaila kang Jesukristo.

• Unsa ang imong nakat-onan mahitungod kon sa unsa nga paagi nga ang Doktrina ug mga Pakigsaad lahi gikan sa ubang mga basahon sa kasulatan?

• Unsa ang nakapahimo sa Doktrina ug mga Pakigsaad nga “mahinungdanon ang bili”?

Ang tingog sa Manluluwas diha sa Doktrina ug mga Pakigsaad

Usa ka kamatuoran nga atong makat-onan gikan niini nga mga parapo mao nga samtang magtuon kita sa Doktrina ug mga Pakigsaad, madungog nato ang tingog sa Manluluwas nga namulong kanato sa atong panahon ug mas makat-on pa mahitungod Kaniya.

Basaha ang Doktrina ug mga Pakigsaad 18:33–36, mangita og mga pagtulun-an gikan sa Manluluwas nga may kalabotan niini nga kamatuoran.

Mahimong makatabang ang paghatag og panahon sa mga estudyante sa pagpangita og pipila ka laing mga ehemplo ni Jesukristo nga namulong diha sa Doktrina ug mga Pakigsaad. Mahimo nimo silang dapiton sa pag-abli sa ilang mga kasulatan ngadto sa bisan asa nga seksiyon sa Doktrina ug mga Pakigsaad ug mangita og mga ehemplo sa Ginoo nga namulong.

• Sa unsang paagi kaha nga ang pagbasa sa mga pulong sa Manluluwas diha sa Doktrina ug mga Pakigsaad makapanalangin sa imong kinabuhi?

Kon gikinahanglan, ipasabot nga adunay daghan nga atong makat-onan mahitungod sa Manluluwas samtang kita magtuon sa Iyang mga pulong. Mas masabtan nato ang Iyang kinaiya, Iyang mga tinguha, ug unsa ang importante ngadto Kaniya. Makatabang usab ang pagpasabot nga si Jesukristo ug ang Langitnong Amahan managsama sa Ilang kahingpitan ug mga hiyas ug nagkahiusa sa Ilang katuyoan. Busa, samtang ang mga estudyante makaila ni Jesukristo,makat-on usab sila og daghan mahitungod sa Langitnong Amahan (tan-awa sa Juan 14:9).

Ang pag-ila sa Langitnong Amahan ug ni Jesukristo makadugang sa atong gugma alang Kanila ug makatabang kanato nga masinati ang kalinaw nga Sila lamang ang makahatag.

Sa tibuok nimong pagtuon sa Doktrina ug mga Pakigsaad, pagatutoki ang unsay imong nakat-onan mahitungod sa Langitnong Amahan ug ni Jesukristo. Mahimo gani nga makatabang ang pag-organisar og usa ka bahin diha sa imong journal sa pagtuon o paghimo og mubo nga sulat diha sa imong Gospel Library nga app alang sa pagrekord sa mga panabot nga imong nadawat mahitungod Kanila. Mahimo nimong idugang sa imong listahan sa mga panabot sa tibuok tuig. Ikonsiderar kon sa unsang paagi ang unsay imong nakat-onan mahitungod sa Langitnong Amahan ug ni Jesukristo nakaimpluwensiya sa imong gugma ug pagsalig diha Kanila.

Ang mosunod nga kalihokan sa pagtuon makatabang sa mga estudyante sa pag-ila sa mga ehemplo sa unsay ilang makat-onan mahitungod sa Langitnong Amahan ug ni Jesukristo gikan sa mga pulong sa Manluluwas diha sa Doktrina ug mga Pakigsaad. Mahimong makatabang ang pagbahin sa mga estudyante ngadto sa mga grupo ug sa paghatag og buluhaton sa matag grupo og usa o daghan pa nga mga tudling nga tun-an.

Tun-i ang mga pulong sa Manluluwas sa pipila sa mosunod nga mga tudling gikan sa Doktrina ug mga Pakigsaad. Hatagi og pagtagad kon unsay imong makat-onan mahitungod sa Langitnong Amahan ug ni Jesukristo gikan sa mga bersikulo nga imong gitun-an.

• Doktrina ug mga Pakigsaad 1:37–38; 10:67–70; 11:2; 14:9; 19:1–2; 25:15–16; 29:1–2; 84:77

Ikonsiderar ang paglista diha sa pisara sa mga tubag sa mga estudyante sa una sa mosunod nga mga pangutana. O mahimo kang modapit og nagkalainlaing mga estudyante sa pagduol sa pisara ug isulat ang ilang mga panabot.

• Unsa ang natabang niini nga mga tudling nga imong masabtan mahitungod sa Langitnong Amahan ug ni Jesukristo? Ngano sa imong hunahuna importante nga mahibalo niining mga butanga mahitungod Kanila?

• Sa unsang paagi nga ang unsay imong nakat-onan mahitungod sa Langitnong Amahan ug ni Jesukristo niini nga mga bersikulo makatabang kanimo nga makasinati og kalinaw?

Paghimo og tumong sa pagtuon sa kasulatan

Ipakigbahin ang mosunod, maghatag og panahon sa mga estudyante sa paghimo og tumong nga may kalabotan sa ilang pagtuon sa Doktrina ug mga Pakigsaad karong tuiga.

Alang sa dugang nga pagbansay kon unsaon pagdasig ang mga estudyante sa inadlaw nga pagtuon sa ebanghelyo , tan-awa ang pagbansay nga giulohan og “Tabangan ang mga Estudyante sa Paghimo og Tumong sa Inadlaw nga Pagtuon sa Kasulatan,” nga makita diha sa pagbansay sa Pagpalambo sa mga Kahanas sa Magtutudlo: Pagdapit og Makugihon nga Pagkat-on.

Usa sa katuyoan sa seminary mao ang pagtabang kanimo nga mas maduol sa Langitnong Amahan ug ni Jesukristo pinaagi sa inadlaw nga pagtuon sa mga kasulatan. Tinguhaa ang inspirasyon pinaagi sa Espiritu Santo sa paghimo og tumong nga may kalabotan sa imong pagtuon sa Doktrina ug mga Pakigsaad. Mahimo nimong hunahunaon ang mosunod nga mga pangutana samtang maghimo ka og tumong:

• Kanus-a ug asa ako makatuon sa akong mga kasulatan matag adlaw?

• Pila ka oras kada adlaw ako magtuon?

• Unsa ang akong mahimo aron mas hingpit nga madapit ang Espiritu Santo sa akong kasinatian?

Irekord ang imong tumong diha sa imong journal sa pagtuon.

Mahimo nimong hangyoon ang mga estudyante nga ipakigbahin ang ilang mga tubag sa pipila o sa tanan sa miaging mga pangutana human sila makahuman sa pagsulat.

Dasiga ang mga estudyante sa pagpaningkamot sa pagkab-ot sa ilang tumong. Ipasalig kanila nga ang pagbuhat sa ingon makatabang kanila nga makadungog sa tingog sa Manluluwas ug makadawat og giya gikan Kaniya. Paggahin og panahon sa tibuok tuig sa pagpahinumdom sa mga estudyante sa ilang tumong, paghatag kanila og mga kahigayonan sa pagsusi sa ilang pag-uswag.

Dugang nga mga Kapanguhaan

Unsa ang kalabotan tali sa Basahon ni Mormon ug sa Doktrina ug mga Pakigsaad?

Si Presidente Ezra Taft Benson (1899–1994) mitudlo:

Ang Doktrina ug mga Pakigsaad mao ang bugkos nga nagsumpay tali sa Basahon ni Mormon ug sa nagpadayong buhat sa Pagpahiuli pinaagi ni Propeta Joseph Smith ug sa iyang mga sumusunod. …

Ang Basahon ni Mormon mao ang “sukaranang bato” sa atong relihiyon, ug ang Doktrina ug mga Pakigsaad mao ang ulohang bato, uban sa nagpadayong pagpadayag sa ulahing mga adlaw. Ang Ginoo nagbutang sa Iyang selyo sa pagtugot diha sa sukaranang bato ug sa ulohang bato. (Ezra Taft Benson, “The Book of Mormon and the Doctrine and Covenants [Ang Basahon ni Mormon ug ang Doktrina ug mga Pakigsaad],” Ensign, Mayo 1987, 83)

Unsa ang nakapahimo sa Doktrina ug mga Pakigsaad nga usa ka importante nga basahon nga tun-an?

Si Elder Neal A. Maxwell (1926–2004) sa Korum sa Napulog Duha ka Apostoles mipahayag:

Kon pangutan-on unsa nga basahon sa kasulatan ang naghatag og labing kanunay nga kahigayonan sa “pagpaminaw” sa Ginoo nga namulong, kadaghanan sa mga indibidwal unang maghunahuna sa Bag-ong Tugon. Ang Bag-ong Tugon usa ka talagsaong koleksiyon sa mga binuhatan ug daghan sa mga doktrina sa Mesiyas. Apan diha sa Doktrina ug mga Pakigsaad atong madawat ang tingog ingon man ang pulong sa Ginoo. Halos “madungog” nato siya nga namulong. (Neal A. Maxwell, “The Doctrine and Covenants: The Voice of the Lord [Ang Doktrina ug mga Pakigsaad: Ang Tingog sa Ginoo],” Ensign, Dis. 1978, 4)

Si Elder John A. Widtsoe (1872–1952) sa Korum sa Napulog Duha ka Apostoles mitudlo:

Ang matag doktrina nga gitudlo sa Ang Simbahan ni Jesukristo sa mga Santos sa Ulahing mga Adlaw makita, gilatid man o gipanagna, diha sa Basahon sa Doktrina ug mga Pakigsaad. Kutob sa akong nasayran, walay doktrina nga gitudlo sa Simbahan nga dili makita sa pipila ka paagi o matang dinhi niini nga basahon. … Walay laing usa sa atong sagrado nga mga basahon ang makahimo sa samang pag-angkon sa tibuok nga pagsusi sa tanang mga doktrina sa Simbahan. (John A. Widtsoe, The Message of the Doctrine and Covenants [Ang Mensahe sa Doktrina ug mga Pakigsaad] [1969], 117)

Asa ako makakat-on pa og dugang mahitungod sa Doktrina ug mga Pakigsaad?

Ang mosunod nga mga kapanguhaan makatabang sa mga estudyante nga mas makasabot kon unsa ang anaa sa Doktrina ug mga Pakigsaad:

• Annelise Gardiner, “Doktrina ug mga Pakigsaad: Usa ka Kinatibuk-ang Pagpasabot,” Alang sa Kalig-on sa mga Kabatan-onan, Ene. 2021, 14–15

• Mga Pangutana ug Mga Tubag, “Doktrina ug mga Pakigsaad,” topics.ChurchofJesusChrist.org

Dugang nga mga Kalihokan sa Pagkat-on

Sagrado nga mga pagpadayag nga miabot sa panahon sa panginahanglan

Kadaghanan sa mga pagpadayag diha sa Doktrina ug mga Pakigsaad miabot sa panahon sa panginahanglan o agig tubag sa mga pangutana. Aron matabangan ang mga estudyante nga makasabot niini, dapita sila sa pagbasa sa parapo 6 diha sa pasiuna sa Doktrina ug mga Pakigsaad, mangita sa mga kahimtang nga kasagarang misangpot niini nga mga pagpadayag nga gihatag. Mahimong ipakigbahin sa mga estudyante ang ilang nakat-onan mahitungod sa Ginoo base sa unsay ilang nadiskobrehan niini nga parapo.

Mahimong maghunahuna usab ang mga estudyante sa mga panahon sa ilang kinabuhi nga nanginahanglan sila og giya gikan sa Langitnong Amahan. Dasiga sila sa pagtinguha sa Iyang giya diha sa ilang kasamtangan ug sa umaabot nga mga panahon sa panginahanglan.

Bililhon nga mga pagtulun-an diha sa Doktrina ug mga Pakigsaad

Aron matabangan ang mga estudyante nga makakuha og kinatibuk-ang pagpasabot sa importante nga mga hilisgotan sa doktrina nga ilang tun-an diha sa Doktrina ug mga Pakigsaad, ikonsiderar ang pagdapit kanila sa pagbasa sa parapo 8 sa pasiuna sa Doktrina ug mga Pakigsaad.

Mahimong mopili ang mga estudyante og usa sa mga hilisgotan nga gilista niini nga parapo nga gusto nilang makat-onan pa. Aron makakita og may kalabotan nga mga bersikulo diha sa Doktrina ug mga Pakigsaad, mahimo nilang gamiton ang mga himan sa pagtuon sama sa Giya ngadto sa mga Kasulatan.

Ang nagpadayon nga Pagpahiuli sa ebanghelyo sa Manluluwas

Bisan og ang Doktrina ug mga Pakigsaad naglangkob sa mahinungdanon nga mga pagtulun-an gikan sa Ginoo isip kabahin sa Pagpahiuli sa Iyang ebanghelyo dinhi sa yuta, ang Pagpahiuli wala mahuman uban sa pagmantala sa Doktrina ug mga Pakigsaad. Ang Ginoo nagpadayon sa pagpadayag sa kamatuoran ngadto sa Iyang mga propeta ug apostoles isip kabahin sa nagpadayon nga Pagpahiuli.

Aron matabangan ang mga estudyante nga makasabot niini nga konsepto, ikonsiderar ang pagpakigbahin sa mosunod nga pamahayag ni Presidente Russell M. Nelson:

Ang Pagpahiuli usa ka proseso, dili usa ra ka panghitabo, ug magpadayon hangtod ang Ginoo moanhi pag-usab.

… Ang nagpadayon nga Pagpahiuli nagkinahanglan og nagpadayon nga pagpadayag. (Russell M. Nelson, “Ang Templo ug ang Inyong Espirituwal nga Pundasyon,” Liahona, Nob. 2021, 95)

Ikonsiderar ang pagdapit sa mga estudyante sa pagpakigbahin sa pipila ka importante nga mga kamatuoran o mga pagtulun-an nga gipadayag sa Ginoo ngadto sa Iyang mga propeta ug apostoles karong bag-ong panahon.