Dali, Sunod Kanako

Doktrina ug mga Pakigsaad: Usa ka Kinatibuk-ang Pagpasabut

Ni Annelise Gardiner

Mga Magasin sa Simbahan

Si Joseph ug Sydney ni Annie Henrie Nader

Daklit nga mga Kamatuoran

• Kinatas-an nga seksyon: seksyon 124 (145 ka mga bersikulo)

• Kinamub-an nga (mga) seksyon: mga seksyon 13, 116, ug 120 (1 ka bersikulo matag usa)

• 138 ka mga seksyon ug 2 ka opisyal nga mga pahayag.

• Ang mipatigbabaw nga tingog diha sa Doktrina ug mga Pakigsaad mao kang Jesukristo.

• Dili sama sa ubang mga kasulatan, kini wala gihubad gikan sa karaang mga dokumento.

• Ang kadaghanan sa mga pagpadayag diha sa basahon nadawat ni Propeta Joseph Smith; ang uban nadawat ni Brigham Young (seksyon 136) ug ni Joseph F. Smith (seksyon 138), ingon man usab ni Wilford Woodruff (Opisyal nga Pahayag 1) ug Spencer W. Kimball (Opisyal nga Pahayag 2).

Unsa man kini?

Ang Doktrina ug mga Pakigsaad usa ka koleksyon sa modernong mga pagpadayag gikan sa Dios nga kadaghanan nadawat pinaagi ni Propeta Joseph Smith. Kadaghanan niining mga pagpadayag gihatag agi og tubag sa mga pangutana ni Joseph ug sa ubang nag-unang mga miyembro sa Simbahan nga nangutana sa Dios.

Ngano nga ang Doktrina ug mga Pakigsaad gihimo?

Atol sa unang mga adlaw sa Simbahan, dihay pipila lang ka mga kopya nga sinulat sa kamot niining mga pagpadayag. Niadtong 1831, ang mga lider sa Simbahan mihukom sa pag-imprinta ug pagmantala sa mga pagpadayag diha sa usa ka Basahon sa mga Sugo. Sa usa ka komperensya niadtong Nobyembre 1831 nga naghisgut sa Basahon sa mga Sugo, si Joseph nakadawat og pagpadayag nga karon mao ang seksyon 1, ang pasiuna sa Doktrina ug mga Pakigsaad.

Usa ka Han-ay sa Panghitabo:

• 1823 Unang pagpadayag nga narekord: seksyon 2.

• 1833 Ang Basahon sa mga Sugo gimantala. Pipila ka mga kopya naluwas gikan sa pag-atake sa manggugubot nga panon diha sa printahanan. Duha ka mga batan-on, si Mary Elizabeth ug Caroline Amelia Rollins, miluwas sa mga pahina kutob sa ilang mahimo ug mitago gikan sa mga manggugubot nga panon diha sa kamaisan.

• 1835 Ang unang dinaghan nga edisyon nga giimprinta. Aduna kini dugang nga mga pagpadayag ug giusab ang ulohan ngadto sa Doktrina ug mga Pakigsaad.

• 1844 Giimprinta sa wala madugay human sa pagkamartir ni Joseph Smith, kining edisyon gidugangan og mga pagpadayag, pun-an sa seksyon 135.

• 1847 Si Brigham Young nakadawat og mga panudlo kon unsaon sa pagbalhin sa mga Santos sa kasadpan: seksyon 136.

• 1876 Kini nga edisyon nadugangan og 26 ka bag-ong mga seksyon ug ang unang edisyon sa pagbahin sa mga seksyon ngadto sa mga bersikulo.

• 1890 Si Wilford Woodruff miisyu sa Manipesto, nga misangpot sa paghunong sa dinaghan nga kaminyoon diha sa Simbahan (tan-awa sa Opisyal nga Pahayag 1).

• 1918 Si Joseph F. Smith mipaambit sa iyang panan-awon sa kalibutan sa espiritu: seksyon 138

• 1921 Gikan niini nga edisyon hangtud karon, ang Lectures on Faith wala na gilakip.

• 1978 Si Spencer W. Kimball nakadawat sa pagpadayag sa pagkapari nga nahimong Opisyal nga Pahayag 2.

• 1981 Kini nga edisyon gi-standardize ang mga ulohan ug midugang og mga cross-reference, uban sa pipila ka dugang nga mga pagpadayag.

• 2013 Kining edisyon gi-update ang impormasyon sa kasaysayan sa mga ulohan.

Pipila sa mga seksyon nailhan pinaagi sa espesyal nga mga ulohan sa wala pa kini gipundok ngadto sa Doktrina ug mga Pakigsaad:

• Seksyon 1—ang Pasiuna

• Seksyon 20—ang mga Artikulo ug mga Pakigsaad

• Seksyon 88—ang Dahon sa Oliba

• Seksyon 133—ang Apendiks

• Seksyon 134—ang Pamahayag kabahin sa mga Gobyerno ug mga Balaod

Ang Doktrina

Ang unang koleksyon sa mga pagpadayag gitawag og Basahon sa mga Sugo. Ang ulahing mga koleksyon gitawag og ang Doktrina ug mga Pakigsaad tungod kay kini gidugang sa sunod-sunod nga mga panudlo “diha sa doktrina sa simbahan,” nailhan isip ang “doktrina” sa minubo (karon gitawag og ang Lectures on Faith). Sukad sa 1921 nga edisyon, ang Lectures on Faith wala na gilakip, apan ang ulohan nga Doktrina ug mga Pakigsaad mao ra gihapon.¹

Ang Mga Pakigsaad

Ang nahibilin sa basahon naglangkob sa mga pagpadayag nga nadawat ni Joseph Smith. Kini nga bahin gitawag og “mga pakigsaad ug mga sugo sa Ginoo” o “mga pakigsaad” sa minubo. Ang nahaunang mga Santos miggamit sa “mga pakigsaad” o “mga sugo” nga nagpasabut niini nga mga pagpadayag nga nadawat sa Propeta aron mailhan kini gikan sa ubang mga sinulat ni Joseph Smith, sama sa dinasig nga mga wali ug sa iyang mga hubad sa Biblia.²

Nganong importante ang Doktrina ug mga Pakigsaad karon?

Ang Doktrina ug mga Pakigsaad naglangkob og mga pagpadayag gikan ni Jesukristo ngadto sa Iyang mga katawhan. Nagtudlo kini kanato nga ang Dios nakaila kanato pinaagi sa ngalan, nga Siya maminaw sa atong mga pag-ampo ug motubag sa atong mga pangutana, ug ang Dios makigsulti pa gihapon karon. Nagtudlo usab kini sa bililhong doktrina mahitungod sa plano sa kaluwasan ug naghatag kanato og dugang nga panabut sa Pag-ula ni Jesukristo. Kini naghatag og kahupayan pinaagi sa paghulagway kon sa unsang paagi nga ang Dios nahigugma kanato ug sa gihapon nagtawag kanato sa pagduol ngadto Kaniya bisan kon kita masayop.

Mubo nga mga sulat

1. Tan-awa sa Mga Hisgutanan sa Kasaysayan sa Simbahan, “Lectures on Theology (‘Lectures on Faith’) [Mga Panudlo sa Teyolohiya (‘Mga Panudlo sa Pagtuo’)],” ChurchofJesusChrist.org.

2. Tan-awa sa Mga Hisgutanan sa Kasaysayan sa Simbahan, “Doktrina ug mga Pakigsaad” ug sa “Mga Pagpadayag ni Joseph Smith,” ChurchofJesusChrist.org.