“Ang Mahinungdanong Kawsa sa Pagpahiuli,” Alang sa Kalig-on sa mga Kabatan-onan, Ene. 2021, 3–5.
Ang Mahinungdanong Kawsa sa Pagpahiuli
Ang buhat nga gisugdan ni Joseph ug Hyrum Smith, uban sa daghang pang matinud-anon nga mga katawhan, nagpadayon sa Simbahan karon.
Sa dihang ang batan-ong si Joseph Smith miadto sa kakahoyan aron mag-ampo, nakasinati siya og usa ka talagsaon nga panan-awon, nailhan karon isip ang Unang Panan-awon.
Dinhi niining panan-awon, ang Manluluwas misulti ni Joseph nga ang iyang mga sala napasaylo. Siya usab mitubag sa pangutana ni Joseph ug miingon nga walay simbahan nianang panahona nga “giila sa Dios isip iyang simbahan ug gingharian.”
“Sa samang higayon,” si Joseph mihinumdom, “[Ako] [na]kadawat og saad nga ang kahingpitan sa ebanghelyo kinahanglan ipahibalo kanako sa umaabut nga panahon.”1
Misunod niining mahimayaon nga panan-awon, si Joseph migula gikan sa Sagradong Kakahoyan aron sugdan ang iyang pagpangandam nga mahimong usa ka propeta sa Dios.
Si Moroni ug ang Basahon ni Mormon
Tulo ka tuig human niadto, sa 1823, ang kalangitan miabli pag-usab isip kabahin sa nagpadayon nga Pagpahiuli sa ebanghelyo ni Jesukristo sa katapusang mga adlaw. Usa ka anghel nga ginganlan og Moroni mipakita ngadto kaniya ug miingon “nga ang Dios adunay ipabuhat [kaniya] … [ug nga] dihay usa ka basahon nga gitagoan, gisulat sa bulawang mga palid” nga naglangkob sa “kahingpitan sa Ebanghelyo” (Joseph Smith—Kasaysayan 1:33–34).
Sa katapusan, si Joseph mikuha, mihubad, ug mimantala sa karaang talaan, nahibaloan karon nga ang Basahon ni Mormon.
Matinud-anong mga Kaigsoonan
Ang igsoon ni Joseph nga si Hyrum mao kanunay ang kaabag ni Joseph. Sa ilang kinabuhi, si Joseph ug Hyrum dungan nga nakigharong sa mga manggugubot ug pagpanggukod. Sama pananglit, nag-antus sila sa pinakagrabe nga kondisyon sa Bilanggoan sa Liberty sa Missouri sulod sa lima ka bulan panahon sa tingtugnaw sa 1838–39.
Samtang nag-atubang og pagpanggukod, si Hyrum nagpakita og pagtuo sa mga saad sa Ginoo, lakip sa garantiya nga makaikyas sa iyang mga kaaway kon pilion niya. Pagka-Hunyo 1844, si Hyrum gipapili nga mabuhi o mohalad sa iyang kinabuhi aron sa paghimaya sa Dios ug “mosilyo sa iyang pagpamatuod uban sa iyang dugo”—nag-abay uban sa iyang hinigugmang igsoon nga si Joseph.(tan-awa sa Doktrina ug mga Pakigsaad 136:39).
Usa ka semana sa wala pa sila gipatay diha sa linoog nga pagpatay, gisultihan ni Joseph si Hyrum sa pagdala sa iyang pamilya ug mobiya. Ako mibati gihapon sa hilabihang emosyon samtang nahinumdom ko sa tubag ni Hyrum: “Joseph, dili ko makabiya nimo.”2
Busa si Joseph ug Hyrum nangadto sa Carthage, diin sila nahimong mga martir alang sa kawsa ug sa ngalan ni Kristo. “Sa kinabuhi sila wala mabahin ug sa kamatayon sila wala mabulag!” (Doktrina ug mga Pakigsaad 135:3;).
Usa ka Tawag sa Paglihok
Kinahanglan atong hinumduman kanunay ang bili nga gibayran ni Joseph ug Hyrum Smith, dungan sa ubang daghang matinud-anong mga lalaki, mga babaye, ug mga kabataan, sa pag-establisar sa Simbahan aron ikaw ug ako makapahimulos sa daghang mga panalangin ug tanan niining pinadayag nga mga kamatuoran nga anaa kanato karon. Ang ilang kamatinud-anon dili gayud mahikalimtan!
Sa wala pa ang iyang kamatayon niadtong 1844, si Joseph misulat og madasigong sulat ngadto sa mga Santos. Usa kadto ka pahimatngon, nga nagpadayon sa Simbahan karon:
“Mga kaigsoonan, kita dili ba mopadayon sa hilabihan ka mahinungdanon nga katuyoan? Padayon ug ayaw pagsibug. Pagmaisugon, mga kaigsoonang lalaki [ug mga babaye]; ug sa kanunay, ngadto sa kadaugan! …
“… Kita kinahanglan, busa, ingon nga usa ka simbahan ug usa ka katawhan, ug ingon nga mga Santos sa Ulahing mga Adlaw, mohalad ngadto sa Ginoo og usa ka halad sa pagkamatarung” (Doktrina ug mga Pakigsaad 128:22, 24).
Ikonsiderar unsa nga halad ang inyong ipresentar ngadto sa Ginoo diha sa pagkamatarung sa umaabut nga mga adlaw. Pagmaisugon—ipaambit kini sa laing tawo nga inyong gisaligan, ug ilabi na, palihug gahini og panahon sa pagbuhat niini!
Ako nasayud nga ang Manluluwas malipay kon atong ihatag Kaniya ang usa ka halad gikan sa atong kasingkasing diha sa pagkamatarung, sama nga Siya nalipay sa matinud-anong halad niadtong talagsaong managsoon, si Joseph ug Hyrum Smith, ug sa tanang matinud-anong mga Santos.