Usa ka Mensahe gikan sa Unang Kapangulohan

Among minahal nga mga kaigsoonan,

Mapasalamaton kami nga mopaila kaninyo niining bag-ong magasin alang sa kabatan-onan sa Ang Simbahan ni Jesukristo sa mga Santos sa Ulahing mga Adlaw: Alang sa Kalig-on sa mga Kabatan-onan. Mapasalamaton kami alang sa inyong kamaayo ug kalig-on isip ang kabatan-onan sa Simbahan karon. Kamo gayud ang paglaum sa Israel. Amoang sinsero nga tinguha nga kining bag-o nga mga pagmantala makatabang kaninyo nga magpabilin nga lig-on ug duol sa inyong Langitnong Amahan ug sa atong Manluluwas, si Jesukristo.

Ang Ginoo adunay buhat nga mahinungdanon kaninyo ug sa inyong henerasyon. Aron sa pagtabang kaninyo, kini nga magasin mohatag og tukma nga mga pagtulun-an sa modernong mga propeta ug mga apostoles, kinsa nahigugma kaninyo. Samtang magtuon kamo sa mga kasulatan gamit ang Dali, Sunod Kanako nga mga kapanguhaan sa Simbahan alang sa pagsunod ug pagkat-on sa ebanghelyo ni Jesukristo, kamo usab makatan-aw niining magasin alang sa dugang nga kahibalo, panabut, ug inspirasyon.

Sa unang higayon, kini bulag nga publikasyon nga alang ra sa kabatan-onan anaa sa lain-laing mga nasud ug mga pinulongan. Kami naglaum nga kini makahatag og usa ka diwa sa tibuok kalibutan nga pagkahisakop ug panaghiusa ug nga kamo makabaton og kalig-on gikan sa mga pagpamatuod ug mga kasinatian sa ubang mga kabatan-onan sa tibuok kalibutan.

Ang ngalan niining magasin nagpakita sa among pagsalig diha sa inyong kusog ingon nga ang kabatan-onan sa Simbahan. Kami mopamatuod nga ang tinuod nga kalipay moabut pinaagi sa atong hugot nga pagtuo kang Jesukristo, sa Iyang ebanghelyo, ug sa Iyang gipahiuli nga Simbahan.

Matinuoron,

Ang Unang Kapangulohan