“Joseph Smith—Akong Propeta,” Alang sa Kalig-on sa mga Kabatan-onan, Ene. 2021, 8–11.
Dali, Sunod Kanako
Joseph Smith—Akong Propeta
Siya usab inyong propeta. Mahimo ninyong tun-an ang iyang mga pagtulun-an niining tuiga sa paghimo kaniya nga labaw pa.
Usa ka butang nga gisulti ni Presidente Russell M. Nelson diha sa Abril 2020 nga kinatibuk-ang komperensya nakatandog kanako: “Bisan asa pa kamo nagpuyo o unsa ang inyong mga kahimtang, ang Ginoo nga si Jesukristo mao ang inyong Manluluwas, ug ang propeta sa Dios, si Joseph Smith, mao ang inyong propeta” (“Paminaw Kaniya” [ Liahona, Mayo 2020, 88]).
Sukad sa batan-on pa ko, mao kana ang akong gibati—si Joseph Smith mao ang akong propeta. Mas labaw pa kay ni bisan kinsa, kining propeta sa Pagpahiuli nakatabang kanako nga makaila ni Jesukristo ug sa Iyang ebanghelyo. Natun-an nako ang mga pagpadayag diha sa Doktrina ug mga Pakigsaad. Ug sa dihang tin-edyer pa ko, ang akong papa mihatag kanako og basahon sa mga pagtulun-an ni Propeta Joseph Smith, ug ako gayud dayon kining gitun-an. Ang pagtuon sa mga pagtulun-an nahimong usa ka importanting sukaranan sa akong pagpamatuod sa gipahiuli nga ebanghelyo.
Naghunahuna ko sukad niadto: unsay anaa sa mga pagtulun-an ni Joseph Smith nga nakahimo og dakong impresyon ngari kanako? Unsa ang nagtugot sa Espiritu sa pagsaksi nga kusog kaayo ngari kanako kabahin sa kamatuoran niini? Moingon ko nga tungod kadto sa tulo ka mga butang: (1) siya nasayud unsay iyang nahibaloan, ug siya mipahayag niini nga maisugon; (2) siya adunay usa ka paagi sa klaro nga pagpasabut sa mga kamatuoran nga iyang nakat-unan pinaagi sa pagpadayag; ug (3) iyang kinaiya ug personalidad kanunay misanag.
Siya Nasayud kon Unsay Iyang Nahibaloan, ug Mipahayag Siya Niini nga Maisugon
Sukad sa Unang Panan-awon, si Joseph Smith nag-atubang og pagpanggukod tungod sa pagpaambit sa unsay iyang nakat-unan pinaagi sa pagpadayag. Apan nasayud siya nga siya dili mahimong mobawi niini: “Ngano nga gigukod ako sa pagsulti sa kamatuoran? Ako tinuod gayud nga nakakita og usa ka panan-awon; ug kinsa ako nga makaharong sa Dios, o ngano nga ang kalibutan naglaraw sa paghimo kanako nga molimud kon unsa ang akong tinuod nga nakita? Kay ako nakakita og usa ka panan-awon; ako nasayud niini, ug ako nasayud nga ang Dios nasayud niini, ug ako dili makalimud niini, ni ako mangahas sa pagbuhat niini” (Joseph Smith—Kasaysayan 1:25).
Bisan og nasayud siya nga siya makadapit og dugang nga pagpanggukod ug pagdumot sa pagbuhat sa ingon, si Joseph Smith kusganong namahayag sa mga kamatuoran nga iyang nakat-unan gikan sa Dios sa tibuok niyang kinabuhi.
Pananglitan:
Bisan tuod kadaghanan sa mga tawo sa kalibutan sa Kristiyano nagtuo nga ang tawo gilalang sa Dios gikan sa wala, si Joseph Smith masaligon nga mitudlo og lahi nga butang:
“Ang tawo mao usab diha sa sinugdanan uban sa Dios. Ang salabutan, o ang kahayag sa kamatuoran, wala malalang o mabuhat, ni dili gayud mahimo” (Doktrina ug mga Pakigsaad 93:29).
“Ang kalag—sa hunahuna sa tawo—ang imortal nga espiritu. Diin kini gikan? Ang tanang makinaadmanon nga mga tawo ug mga doktor sa pagkabalaan nag-ingon nga ang Dios milalang niini sukad pa sa sinugdanan; apan dili kini mao: ang mao gayud nga ideya ang mipakaubos sa tawo diha sa akong pagkalkulo. Wala ako motuo sa doktrina; mas labaw ako nga nasayud. Paminawa kini, kamong tanan nga mga tawo sa kalibutan; kay ang Dios nagsulti kanako sa ingon; ug kon dili kamo motuo kanako, dili mahimo ang kamatuoran nga walay epekto” (Mga Pagtulun-an sa mga Presidente sa Simbahan: Joseph Smith [2007], 250).
Gipasabut Niya angmga Kamatuoran sa Klaro
Si Joseph Smith usahay mipasabut nga siya nasayud og mas daghan pa kabahin sa mga misteryo sa Dios kay sa iyang ikapaambit ngadto sa kalibutan. Apan sa dihang siya mitudlo, siya adunay usa ka paagi sa paghimo sa mga kamatuoran sa Dios nga yano ug simple.
Pananglitan:
Gikan sa Unang Panan-awon hangtud karon, si Joseph Smith nakakat-on og daghang kamatuoran mahitungod sa kinaiyahan sa Dios ang Amahan sa Kahangturan. Ug sa iyang mga pagtulun-an siya mipasabut sa kaimportante niining mga kamatuoran. Sama pananglit, siya miingon:
“Kon ang mga tawo dili makasabut sa kinaiya sa Dios, sila wala makasabut sa ilang kaugalingon” (Mga Pagtulun-an sa mga Presidente sa Simbahan: Joseph Smith, 46). Kana ang klaro nga pamahayag nga motuhop sa kasingkasing kon si kinsa ang Dios, kinsa kita, unsa ang atong relasyon ngadto Kaniya, ug unsa ang atong potensyal.
Iyang gisundan kana niining pamahayag: “Ang Dios Mismo usa ka tawo kaniadto sama kanato karon, ug usa ka nahimaya nga tawo” (Mga Pagtulun-an sa mga Presidente sa Simbahan: Joseph Smith, 48). Gani mas giklaro.
Ug dayon siya mitudlo niini: “Ang Dios mismo sa iyang kaugalingon, nakakita nga siya anaa sa taliwala sa mga espiritu ug kahimayaan, tungod kay siya mas labaw pa ka maalamon, nakakita nga angayan sa pagmugna og mga balaod diin ang uban makabaton og kahigayunan sa pag-uswag sama sa iyang kaugalingon.(Mga Pagtulun-an sa mga Presidente sa Simbahan: Joseph Smith, 251). Si Joseph Smith mipahayag sa usa ka butang nga maoy sukaranan sa plano sa Langitnong Amahan: ang Langitnong Amahan gusto nga kita mahimong sama Kaniya.
Iyang Kinaiya ug Personalidad Modan-ag
Ang paagi nga si Joseph Smith mipahayag sa iyang kaugalingon nakahatag kanato og ideya kon si kinsa siya ug kon unsa ang siya isip usa ka tawo ingon man isip usa ka propeta. Importante kini, tungod kay ang pagkonektar sa mga tawo sa bisan unsang paagi makahimo sa pagkonektar sa mga ideya nga mas sayon. Ang kinaiya ni Joseph misanag diha sa iyang mga pagtulun-an.
Pananglitan:
Bisan og si Joseph Smith sa kinatibuk-an malipayon ang kinaiya (tan-awa sa Joseph Smith—Kasaysayan 1:28), kon bahin na gani sa unsay gisugo sa Ginoo, dili siya mobaliwala niini. Nakat-on siya pinaagi sa kasinatian kon unsa ang sangputanan sa mopahisalaag gikan sa maong mga kasugoan (tan-awa, pananglitan sa, Doktrina ug mga Pakigsaad 3:4–9). Akong nasuta kining pagsagol sa gaan og buot nga kinaiya ug sa seryoso sa panghunahuna nga pagkadisipulo makapaintriga—ug ako mismo makaila niini.
Karon, isip propeta sa Pagpahiuli, si Joseph Smith gisugo sa pagtudlo sa gipadayag nga mga kamatuoran sa Dios, nga kadaghanan niini mga bag-o ngadto sa tanan. Si Joseph kinahanglan nga maningkamot sa pagtabang sa mga tawo nga makakat-on niining bag-ong mga kamatuoran. Apan usahay makapasagmuyo kaayo kini. Makausa miingon siya:
“Adunay labihan ka dako nga kalisud sa pagpasabut niining mga butanga dinhi niini nga henerasyon. Susama kini sa pagbuak og usa ka magahi nga liso gamit ang usa ka bibingka [usa ka piraso nga pagkaon gama sa mais] alang sa usa ka ligwat, ug kalabasa alang sa usa ka bakukang [usa ka martilyo nga kahoy]. Bisan ang mga Santos hinay kaayo ang pagsabut” (Mga Pagtulun-an sa mga Presidente sa Simbahan: Joseph Smith, 630).
Usa kini ka seryoso nga hilisgutan alang ni Joseph Smith. Lagmit adunay gayuy daghan kaayo nga gusto niya nga mahibaloan ug masabtan ug hangupon ug sundon sa mga tawo—ug sila dili lang gayud. Apan usa ka gamay nga yano ug inato lang nga analohiya gikan sa ika-disenuybe nga siglo sa utlanan sa U.S. naghulagway og butang sa lahi nga paagi ug naghatag kanato og usa ka gamay nga pagsabut sa mga butang ngadto sa personalidad ni Joseph Smith.
Adunay daghan pang mga aspeto sa kinaiya ni Joseph Smith nga misanag diha sa iyang mga pagtulun-an. Sama pananglit, ang iyang paghigugma sa mga higala: “Ang akong kasingkasing maghigugma kanila, ug ang akong mga kamot maghago alang niadtong kinsa nahigugma ug naghago alang kanako, ug sa kanunay magpabiling maunungon ngadto sa akong mga higala” (Mga Pagtulun-an sa mga Presidente sa Simbahan: Joseph Smith, 559).
O sa iyang pagkamabination ug pagkamanggihatagon: Kausa dihang gisulti sa mga tawo kon unsa kadako ang ilang gibati sa usa ka tawo kansang balay nga nasunog, si Joseph dali nga nakaingon, “Ako mibati og kalooy niini nga brother sa kantidad nga lima ka dolyares; kamong tanan tagpila ang inyong kalooy?” (Mga Pagtulun-an sa mga Presidente sa Simbahan: Joseph Smith 556).
Dayon ang iyang gugma sa pamilya, kaligdong, pagpaubos, pagsalig sa kaugalingon, hustisya ug kaangayan, hugot nga pagtuo taliwala sa mga pagsulay ug pag-antus. Kining tanan anaa, gipahayag uban sa mahangturong mga kamatuoran ug mga baruganan nga pagasundon.
Siya ang Akong Propeta
Si Joseph Smith giataki ug gisaway pa gihapon karon, syempre. Apan sama sa iyang giingon, “Wala gayud ako moingon kaninyo nga perpekto ako; apan walay sayop sa mga padayag nga akong gipanudlo” (Mga Pagtulun-an sa mga Presidente sa Simbahan: Joseph Smith, 632). Makahatag kita og usa ka maisugon nga saksi sa kamatuoran nga siya usa ka propeta. Akong nakita kini nga sayon sa pagpamatuod ni Joseph Smith—dili tungod kay adunay usa ka sayon nga tubag sa tanang pangutana nga lagmit ipangutana sa katawhan mahitungod kaniya apan tungod kay akong natun-an ang iyang mga pagpadayag ug propetikanhong mga pagtulun-an ug mibati sa Espiritu Santo nga nagpamatuod nga kini tinuod. Sama kini nga si Joseph mismo kausa miingon:
“Makahimo ako sa pagtilaw sa mga baruganan sa kinabuhing dayon, ug mao usab kamo. Gihatag kini kanako pinaagi sa padayag ni Jesukristo, ug nasayud ako nga kon sultihan ko kamo niini nga mga pulong sa kinabuhing dayon sama sa paghatag niini kanako, kamo makatilaw niini, ug nasayud ako nga mituo kamo niini. Moingon kamo nga tam-is ang dugos, ug ingon man usab ako. Mahimo usab ako nga motilaw sa espiritu sa kinabuhing dayon. Nasayud ako nga kini maayo, ug kon sultihan ko kamo niining mga butanga nga gihatag kanako pinaagi sa pagdasig sa Espiritu Santo, dili ninyo kapugngan nga tam-is ninyo kini nga madawat, ug malipay kaayo ug mas dugang pa” (Mga Pagtulun-an sa mga Presidente sa Simbahan: Joseph Smith, 636).
Akong natilawan kana nga katam-is. Kini gipaambit ngari kanako sa akong propeta, si Joseph Smith. Ug sama sa giingon ni Presidente Nelson, siya mao ang inyong propeta usab. Makahimo kamo og seryoso nga pagtuon sa iyang kinabuhi ug mga pagtulun-an niini nga tuig sa Dali, Sunod Kanako. Dayon makahatag kamo og pagsaksi sa matam-is nga mga kamatuoran nga siya mitabang nga inyong matilawan.