Napaeskwela Gumikan sa Uhong

Ni Jun Hori

Unsa nga mga leksyon nga akong makat-unan gikan sa usa ka butang nga luod sama sa uhong?

Paghulagway ni Julia Yellow

Dili ko ganahan og mga uhong. Kanang baho ug grano—dili gyud ko ganahan niini! Apan ang akong mga ginikanan misugod sa pagpatubo og mga uhong sa bata pa ko, mao nga nangaon kami niini sa kada adlaw. Sa panahon sa ting-ani, motabang ko sa akong mga ginikanan hangtud na sa lawom nang gabii. Magtimbang ko og tag 200 gramo nga mga uhong, puston, ug isira ang silyo sa putos. Nakahinumdom ko nga nalingaw samtang nakig-istorya sa akong pamilya. Mura kadto og dunay usa ka family home evening kada adlaw.

Nakahatag usab kadto og kinitaan alang sa pamilya, busa kinahanglan motabang kami. Apan adunay duha ka dili maayo: Una, usa sa akong paborito nga mga programa sa telebisyon maatol nianang orasa nga kinahanglan kaming motrabaho, mao nga dili ko makatan-aw niini. Ug ikaduha, sa oras nga mahuman ko sa trabaho, magka-itom ang akong kamot gikan sa mga uhong, ug lisud kaayong tangtangon ang kolor ug ang baho gamit ang sabon. Sa dihang bata pa ko, usahay moreklamo ko nganong kinahanglan ko nga motabang og maayo kada adlaw.

Ang mga uhong taud-taud nga nakahatag og maayo nga kinitaan, apan sa kaulahian ang mga presyo mios-os samtang misaka ang kadaghan sa mga mag-uuma sa uhong, ug ang akong mga ginikanan mihunong na sa pagpatubo og mga uhong. Naghunahuna ko nga mihunong lang sila tungod kay mios-os ang presyo, apan akong nahibaloan ang tinuod nga nakapasurprisa nako sa dihang migradwar ko sa kolehiyo.

Ang akong mga ginikanan misugod sa pag-ugmad og mga uhong aron sa pagtigom og pundo para sa kolehiyo alang nako ug sa akong mga igsoong lalaki. Mihunong lang sila tungod kay nakab-ot na nila ang ilang gitakda nga kantidad. Dihang akong nahibaloan, akong gibati ang kaulaw sa kanunayng pagreklamo. Wala ako masayud nga nagtrabaho ko alang sa akong umaabut nga mga galastuhan sa kolehiyo. Ug dugang pa niana, ang akong pamilya mitabang nako!

Nagbalik balik ko sa pagreklamo nga wala masayud nga nagpatubo mi og mga uhong alang sa akong kaugalingong pagka-eskolar. Ang akong pagreklamo nahisama nilang Laman ug Lemuel sa 1 Nephi 2:12: “Ug busa si Laman ug si Lemuel … nagbagulbol tungod kay sila wala makahibalo sa mga pamaagi sa Dios kinsa naglalang kanila.” Nalipay ko nga ang Ginoo nakaila kaayo nako ug mipanalangin kanako, bisan pa sa akong mga pagreklamo.

Siguro dili gyud ko maganahan mokaon og mga uhong. Apan kon walay mga uhong, sa pagkatinuod medyo maguol ko, tungod kay wala unta koy oportunidad sa paghinumdom niadtong mga kasinatian uban sa akong pamilya. Tungod niini, nakakat-on ko sa paghatag og bili sa akong mga panalangin ug mosalig sa plano sa Ginoo—ug dili moreklamo! Mao nga bisan og dili ko ganahan og mga uhong, karon mapasalamaton ako niini. Usa kini ka importanting simbolo aron mapahinumduman ko sa kasuod sa akong pamilya.

Ang tagsulat nagpuyo sa Siyudad sa Shinagawa, Japan.