“Lesona 18—Ny fandikana ny Bokin’i Môrmôna: Ny fanomezam-pahasoavan’ Andriamanitra sy ny heriny,” Fotopampianarana sy Fanekempihavanana: Boky torolalana ho an’ny mpampianatra seminera (2025)
“Ny fandikana ny Bokin’i Môrmôna,” Fotopampianarana sy Fanekempihavanana: Boky torolalana ho an’ny mpampianatra seminera
Lesona 18: Fotopampianarana sy Fanekempihavanana 6–9
Ny fandikana ny Bokin’i Môrmôna
“Ny fanomezam-pahasoavan’ Andriamanitra sy ny heriny”
Niaraka tamin’i Oliver Cowdery izay mpitantsoratra, i Joseph Smith dia nahavita fandrosoana mahagaga tamin’ny fandikana ny Bokin’i Môrmôna nandritra ny lohataonan’ny taona 1829. Na dia tsy mahafantatra antsipiriany manokana momba ny fomba nandikan’i Joseph Smith ny Bokin’i Môrmôna aza isika, dia fantatsika fa nahavita izany tamin’ny alalan’ny fanomezam-pahasoavan’ Andriamanitra sy ny heriny izy. Ity lesona ity dia natao hanampiana ny mpianatra hanamafy orina ny fijoroana ho vavolombelona ananany fa Andriamanitra dia nanome fitaovana sy hery an’i Joseph Smith mba handikana ny Bokin’i Môrmôna ho antsika.
Ireo sahanasa fianarana azo atao
Ny niandohan’ny Bokin’i Môrmôna
Azonao atao ny manomboka ny fotoam-pianarana amin’ny alalan’ny fizarana izao rafi-tantara izao. Azonao atao ny manome fahafahana ny mpianatra hilalao an-tsehatra miaraka amin’ny mpiara-mianatra iray na eo anoloan’ny kilasy.
Alaivo sary an-tsaina hoe indray andro ianao dia nizara ny finoanao tamin’ny iray tamin’ireo namanao akaiky fa ny Bokin’i Môrmôna dia soratra masina tahaka ny Baiboly. Toa gaga ihany ilay namanao ary nilaza fa nampianarina izy fa tamin’ny alalan’ny eritreriny i Joseph Smith no nanoratra ny Bokin’i Môrmôna.
-
Inona avy no azonao atao ao anatin’io toe-javatra io?
Hazavao amin’ny mpianatra fa ity lesona ity dia hanampy azy ireo hahita antsipiriany mifandraika amin’ny fandikan-tenin’i Joseph Smith ny Bokin’i Môrmôna. Asao ny mpianatra hitady fahamarinana rehefa mandalina, izay afaka manampy azy ireo amin’ny toe-javatra tahaka io sy manamafy orina ny fijoroana ho vavolombelona ananany fa avy amin’ Andriamanitra ny Bokin’i Môrmôna.
Nanampy tamin’ny fandikan-teny i Oliver Cowdery
Anontanio ny mpianatra hoe inona no tsaroany mikasika ny toe-javatra nisy mifandraika tamin’ny nanampian’i Oliver Cowdery an’i Joseph Smith handika ny Bokin’i Môrmôna. Raha ilaina dia jereo ny lesona momba ny “Fotopampianarana sy Fanekempihavanana 6” na ny Olomasina, boky 1, Ny fanevan’ny fahamarinana, 58–60.
Rehefa tonga tao Harmony, Pennsylvanie roa andro i Oliver Cowdery, dia nanomboka niasa ho mpitantsoratr’i Joseph Smith. Tsy ela dia nanao fandrosoana mahagaga teo amin’ny fandikana ny Bokin’i Môrmôna i Joseph sy i Oliver. Raha tombanana dia nahavita ny fandikana ny Bokin’i Môrmôna tao anatin’ny 65 andro fiasana teo ho eo i Joseph Smith niaraka amin’i Oliver, mpitantsorany (jereo ny Russell M. Nelson, “A Treasured Testament,” Ensign, July 1993, 61).
Ny famariparitan’i Joseph Smith ny fandikan-teny
Anontanio ireo mpianatra mikasika ny fahalalany ny fomba mahagaga izay nanatanterahan’i Joseph Smith ny fandikana ny Bokin’i Môrmôna.
Ity ampahany manaraka ity avy amin’ny lahatsoratra ao amin’ny Sujets de l’évangile mitondra ny lohateny hoe “Livre de Mormon, Traduction” dia afaka manampy ireo mpianatra hahatakatra ny zavatra tian’i Joseph Smith ho fantatr’izao tontolo izao momba ilay fandikan-teny.
Tao amin’ny sasin-tenin’ny Bokin’i Môrmôna edisiôna 1830, dia nanoratra i Joseph Smith hoe: “Mampahafantatra anareo aho fa nandika [ilay boky] noho ny fanomezam-pahasoavan’ Andriamanitra sy ny heriny.” Rehefa nanaovana fanadihadiana momba ny antsipirian’ny fomba nanaovana ny fandikan-teny i Joseph, dia namerimberina hatrany izy fa nanatontosa izany “noho ny fanomezam-pahasoavan’ Andriamanitra sy ny heriny”, ary nisy fotoana izy nanampy hoe, “Tsy natao izany mba hilazana amin’izao tontolo izao mikasika ny pitsopitsony manokana rehetra momba ny fahatongavan’ny Bokin’i Môrmôna.” (Sujets de l’évangile, “Livre de Mormon, Traduction,” ChurchofJesusChrist.org)
-
Inona no fahamarinana azontsika ianarana avy amin’ny tenin’i Joseph Smith momba ny fandikana ny Bokin’i Môrmôna?
Ampio ny mpianatra hamantatra ny fahamarinana hoe nandika ny Bokin’i Môrmôna tamin’ny alalan’ny fanomezam-pahasoavan’ Andriamanitra sy ny heriny i Joseph Smith.
-
Nahoana no zava-dehibe ny mahafantatra fa ny Bokin’i Môrmôna dia nadika tamin’ny alalan’ny herin’ Andriamanitra fa tsy tamin’ny alalan’i Joseph Smith?
Fitaovana fandikan-teny
Ity manaraka ity dia mety hanampy ny mpianatra hahatakatra kokoa momba ireo fitaovana nomen’ Andriamanitra an’i Joseph Smith mba hanampiana azy tamin’ny ezaka nataony tamin’ny fandikana ny Bokin’i Môrmôna.
Rehefa niseho tamin’i Joseph Smith ny anjely Môrônia tamin’ny 1823, dia nanome torolalana ny Mpaminany momba ny fomba hivoahan’ny Bokin’i Môrmôna izy.
Vakio ny Joseph Smith—Tantara 1:34–35 ary tadiavo izay fitaovana nomanin’ Andriamanitra mba handikana ny Bokin’i Môrmôna.
Raha tianao dia azonao atao koa ny manasa ny mpianatra hamaky ny Môrmôna 9:34 sy ny Etera 3:23–24 mba hanampiana azy ireo hahatsapa fa ny mpaminanin’ny Bokin’i Môrmôna dia nahatakatra fa Andriamanitra dia hanomana lalana handikana ny tenin’izy ireo.
-
Tamin’ny fomba ahoana no nanomanan’ny Tompo ny fandikana ny Bokin’i Môrmôna?
Mba hanampiana ny mpianatra hahatakatra kokoa ny antsipirian’ny fampiasan’i Joseph Smith ireo fitaovana azo tsapain-tanana handikana ny Bokin’i Môrmôna, dia asehoy ny horonan-tsary hoe “Seer Stone” (3:47), hita ao amin’ny ChurchofJesusChrist.org. Raha tsy izany dia azonao atao ny mamintina ity fampahalalana manaraka ity na manasa mpianatra iray hamaky izany amin’ny iray kilasy.
Ireo rakitsoratra ara-tantara tatỳ aoriana dia manondro fa ankoatra ny fampiasana ny Orima sy Tomima (indraindray antsoina hoe mpandika teny na solomaso Nefita) dia nampiasa fitaovana iray hafa antsoina hoe vato mpahita i Joseph Smith mba handikana ny Bokin’i Môrmôna. Efa nahita io fitaovana io taona maromaro talohan’ny nahazoany ireo takela-bolamena ny Mpaminany.
Tsy fantatsika ny antsipiriany momba ny fomba nampiasan’i Joseph ireo fitaovana nomanin’ Andriamanitra ireo. Milaza anefa ny vavolombelona fa nataon’i Joseph Smith tao anatin’ny satroka iray ny Orima sy Tomima na ny vato mpahita mba hisakanana ny hazavana, dia lasa hitany tsara kokoa ny teny nipoitra teo amin’ireo fitaovana azo tsapain-tanana (jereo ny Sujets de l’évangile “Livre de Mormon, Traduction,” ChurchofJesusChrist.org).
Ampio ny mpianatra hahatakatra fa na dia fantatsika aza ny antsipiriany sasany mifandraika amin’ny fandikana ny Bokin’i Môrmôna nataon’i Joseph Smith dia betsaka ny zavatra tsy fantatsika momba ny dingan’ilay fandikan-teny. Ny fahamarinana manan-danja indrindra dia ny namelan’ny herin’ Andriamanitra ny teniny hoentina any amin’ireo zanany.
Hevero ny hampiasa ny iray na maromaro amin’ireto loharanom-pitaovana manaraka ireto mba hanampiana ny mpianatra hahatakatra fa ny Bokin’i Môrmôna dia nadika tamin’ny alalan’ny fanomezam-pahasoavan’ Andriamanitra sy ny heriny.
-
Ny fizarana hoe “Ireo olo-malazan’ny Famerenana amin’ny laoniny” ao amin’ny “Fotopampianarana sy Fanekempihavanana 6–9: Io no fanahin’ny fanambarana,” Avia, hanaraka Ahy—Ho an’ny ao an-tokantrano sy any am-piangonana: Fotopampianarana sy Fanekempihavanana 2025
-
“Days of Harmony” manomboka amin’ny mari-potoana 7:18 ka hatramin’ny 11:33
25:0 -
Ny famariparitan’i Oliver Cowdery ny dingan’ny fandikan-teny araka ny voarakitra ao amin’ny Joseph Smith—Tantara (hita ao amin’ny andiam-pehezan-teny voalohany aorian’ny andininy 75)
Azonao atao ny manasa ny mpianatra mba hiresaka momba ireto fanontaniana manaraka ireto ao anaty vondrona kely na tsiroaroa alohan’ny hanasana azy ireo hizara ny valin-teniny amin’ny iray kilasy.
-
Inona avy ireo teny na andian-teny avy amin’i Emma na i Oliver izay manohana ny tenivavolombelon’i Joseph Smith fa ny Bokin’i Môrmôna dia nadika tamin’ny alalan’ny fanomezam-pahasoavana sy herin’ Andriamanitra?
-
Inona no nianaranao na tsapanao momba an’ Andriamanitra rehefa avy nahafantatra fa i Joseph Smith dia fitaovana teo an-tanany handikana ny Bokin’i Môrmôna?
Ny herin’ny Bokin’i Môrmôna eo amin’ny fiainanao
Hazavao fa ny iray amin’ireo fomba tsara indrindra ahafantarana fa ny Bokin’i Môrmôna dia nadika tamin’ny alalan’ny fanomezam-pahasoavan’ Andriamanitra sy ny heriny dia ny fandalinana izany sy ny fiainana ny herin’ Andriamanitra amin’ny alalan’ny fampiharana ny fampianarany.
Omeo fotoana ny mpianatra hitadiavana andininy na tantara iray ao amin’ny Bokin’i Môrmôna izay nisy fiantraikany teo amin’ny fiainany. Raha toa ka sahirana amin’ny fitadiavana zavatra ny mpianatra dia azo atao ny manome fanampiana na fitarihana, toy ny fanasana azy ireo handalina andalan-tsoratra masina fifehezana fotopampianarana sasantsasany. Azonao atao koa ny mandroso andinin-tsoratra masina vitsivitsy hohalalinin’izy ireo.
-
Inona no andininy na tantara iray ao amin’ny Bokin’i Môrmôna izay nisy fiantraikany teo amin’ny fiainanao?
-
Inona no fiantraikan’io andininy na tantara io tamin’ny zavatra tsapanao momba ny Ray any An-danitra sy i Jesoa Kristy?
Hevero ny hijoro ho vavolombelona amin’ny mpianatra fa ny hery mety ho azony avy amin’ny fandalinana ny Bokin’i Môrmôna dia fanamafisana ny herin’ Andriamanitra tamin’ny fitondrana ny Bokin’i Môrmôna.