Lesona 19: Fotopampianarana sy Fanekempihavanana 6–9

Fotopampianarana sy Fanekempihavanana 8

“Ny Fanahin’ny fanambarana”

Nampiaiky volana an’i Oliver Cowdery ny fahaizan’i Joseph Smith nandika ny Bokin’i Môrmôna. Tiany koa raha homen’ Andriamanitra fanomezam-pahasoavana mitovy amin’izany izy. Nampanantena an’i Olivier ny Tompo fa hanome azy ny fanomezam-pahasoavana amin’ny fandikan-teny araka ny finoany. Tamin’izay fotoana izay dia nampianatra an’i Oliver fitsipika manan-danja maro momba ny fanambarana i Jesoa Kristy. Ity lesona ity dia afaka manampy ireo mpianatra hahafantatra bebe kokoa ny fomba iresahan’ Andriamanitra amin’izy ireo amin’ny alalan’ny Fanahy Masina.

Ireo sahanasa fianarana azo atao

Fanontaniana momba ny fanambarana

Mba hanampiana ireo mpianatra hanomboka handalina momba ny fanambarana dia zarao izao manaraka izao:

Te hiresaka amintsika Andriamanitra ary manao izany amin’ny fomba samihafa tokoa Izy. Amin’ny alalan’ny Fanahy Masina, Andriamanitra dia mikatsaka ny “hanampy antsika hamaly ny filantsika manokana, ny andraikitsika sy ny fanontaniantsika, ary hanampy antsika hanamafy orina ny fijoroana ho vavolombelona ananantsika” (Sujets et questions, “Révélationtopics.ChurchofJesusChrist.org).

• Inona no fanontaniana anananao na ananan’ny olona hafa fantatrao momba ny famantarana fanambaran’ Andriamanitra?

  Hevero ny hanasa mpianatra maromaro hanoratra ny fanontanian’izy ireo eny amin’ny solaitrabe na amin’ny taratasy. Azonao atao ny manasa ny mpianatra hitady valiny mandritra ny fianarany androany. Tsy andrasana ho voavaly ao an-dakilasy ny fanontaniana rehetra, saingy afaka manoratra izay hevi-baovao hitany ny mpianatra. Azonao atao ny mampiasa ireto fanontaniana manaraka ireto mba hanampiana ny mpianatra hieritreritra ny antony isalasalan’ny olona momba ny fanambarana.

• Nahoana no sarotra ny mamantatra hoe rahoviana Andriamanitra no mifandray amintsika ary amin’ny fomba ahoana?

• Nahoana araka ny eritreritrao no zava-dehibe ny fanatsarana ny fahafahantsika mamantatra sy manaraka ny fanambaran’ Andriamanitra?

Azonao atao ny mangataka ny mpianatra hanomboka amin’ny pejy iray ao amin’ny diary fandalinany na handray an-tsoratra ao amin’ny application Médiathèque de l’Évangile, izay ahafahan’izy ireo mirakitra ny zavatra nianarany momba ny fanambarana avy amin’ny Tompo. Afaka manome ohatra ianao amin’ny alalan’ny fanaovana zavatra mitovy amin’izany eny amin’ny solaitrabe. Atombohy amin’ny lohateny toy ny Ahoana no ahafantarako fa mandray fanambarana avy amin’ Andriamanitra aho?

Mampianatra an’i Oliver Cowdery momba ny fanambarana ny Tompo

Fony izy mpitantsoratra dia afaka nijoro ho vavolombelona i Oliver Cowdery fa nomen’ny Tompo an’i Joseph Smith ny fahefana handika ny Bokin’i Môrmôna. Naniry ny handika teny ihany koa i Oliver. Nanaiky hanome azy io tombontsoa io ny Tompo (jereo Fotopampianarana sy Fanekempihavanana 6:25). Mba hanampiana an’i Oliver hahomby dia nampianatra fitsipika manan-danja momba ny fandraisana fanambarana ny Tompo.

Ny Fotopampianarana sy Fanekempihavanana 8:2–3 dia andalan-tsoratra masina fifehezana fotopampianarana. Asao ny mpianatra hanisy marika amin’ny fomba miavaka ireo andalan-tsoratra masina fifehezana fotopampianarana mba ho mora aminy ny mahita ny toerana misy azy.

Vakio ny Fotopampianarana sy Fanekempihavanana 8:1–3, ka tadiavo ny zavatra tian’ny Tompo ho fantatr’i Oliver mikasika ny fandraisana fanambarana.

• Inona no nianaranao avy amin’ireo andininy ireo mikasika ny fomba ahafahan’ny Tompo miresaka amintsika amin’ny alalan’ny Fanahy Masina?

  Asaivo mizara ny zavatra hitany ireo mpianatra. Amin’ireo fahamarinana mety ho hitan’ny mpianatra, dia ampio izy ireo hahita fa mifandray amin’ny saintsika sy ny fontsika ny Tompo amin’ny alalan’ny Fanahy Masina.

  Mifantoha amin’ireo fahamarinana izay mitondra mankany amin’ny fiovam-po: Mba hahazoana fiofanana fanampiny momba ireo fanontaniana izay manampy ireo mpianatra hamantatra sy hilaza ireo fitsipiky ny fiovam-po dia jereo ny fiofanana mitondra ny lohateny hoe “Mifantoha amin’ireo fahamarinana izay mitondra ho amin’ny fiovampo sy manorina finoana an’i Jesoa Kristy,” hita ao amin’ny fiofanana hoe Fahaiza-manao ho fampivoarana ny mpampianatra: Ampianaro ny fotopampianarana.

  Soraty eo ambanin’ilay lohateny eny amin’ny solaitrabe io fahamarinana io. Ny fanaovana kisary tahaka ity manaraka ity dia afaka manampy ireo mpianatra haka sary an-tsaina ny fampianaran’ny Tompo ao amin’ireo andininy ireo.

  

• Raha araka ny fandalinanao samirery sy ny traikefanao, inona avy ny sasany amin’ireo fomba ifandraisan’ Andriamanitra amin’ny saintsika? Ahoana no ifandraisany amin’ny fontsika?

Ny Loholona Richard G. Scott (1928-2015) tao amin’ny Kôlejin’ny Apôstôly Roambinifolo dia nizara ny sasany amin’ireo fomba itenenan’ Andriamanitra amin’ny saintsika sy ny fontsika amin’ny alalan’ny Fanahy Masina:

Mijoro ho vavolombelona aho fa ny Tompo dia afaka miresaka amin’ny sainareo sy ny fonareo amin’ny alalan’ny Fanahy Masina. Indraindray dia fahatsapana ankapobeny fotsiny ireo fahatsapana. Indraindray dia tonga mazava be sy mora fantatra ilay fitarihana ka azo soratana toy ny sora-tononina ara-panahy izany. (Richard G. Scott, “Mba hahazoana tari-dalana ara-panahy,” Liahona, nôv. 2009, 9)

Azonao atao ny manampy ireo mpianatra hahita lamin’ny fifandraisana amin’ny saina sy ny fo ao anatin’ireto ohatra manaraka mikasika an’i Oliver Cowdery ireto: Fotopampianarana sy Fanekempihavanana 6:22–24; 9:8–9. Afaka mikaroka ireo teny sy andian-teny nampiasain’ny Tompo ireo mpianatra mba hanazavana ny sasany amin’ireo fomba iresahany amin’ny saintsika sy ny fontsika.

Mety hanampy ny hanazavana fa ny hoe mahamay ny ao anatin’ny tratra voalaza ao amin’ny Fotopampianarana sy Fanekempihavanana 9:8 dia mety hilazana “fahatsapana fiadanana sy filaminana” (Dallin H. Oaks, “Teaching and Learning by the Spirit,” Ensign, mar. 1997, 13).

Fifandraisana amin’ny alalan’ny Fanahy Masina

Hazavao fa misy fampianarana maro hafa ao amin’ny soratra masina sy avy amin’ireo mpitarika ao amin’ny Fiangonana maoderina izay manampy antsika hahatakatra ny fomba ifandraisan’ Andriamanitra amintsika amin’ny alalan’ny Fanahy Masina. Omeo fotoana ny mpianatra hitadiavana sy handalinana ary hifanakalozan-kevitra momba ireo fampianarana sasany ireo.

Ny fomba iray hanaovana izany dia ny fanasana azy ireo hampiasa fitaovana toy ny Torolalana ho an’ny Soratra Masina, na ny fikarohana ao amin’ny Médiathèque de l’Évangile mba hahitana soratra masina na fanambarana avy amin’ireo mpitarika ao amin’ny Fiangonana izay mamariparitra ny sasany amin’ireo fomba ahafahantsika mamantatra fanambarana amin’ny alalan’ny Fanahy Masina.

Safidy iray hafa hanaovana izany ny manasa ireo mpianatra handalina ireto soratra masina manaraka ireto mba hahitana ny zavatra azony ianarana momba ny fanambarana ho an’ny tena manokana:

• Jaona 14:26

• Galatiana 5:22–23

• Helamàna 5:30

• Fotopampianarana sy Fanekempihavanana 11:12–13

Azonao atao koa ny mampiseho amin’ny mpianatra ilay horonan-tsary “Patterns of Light: Discerning Light” (2:12). Ao amin’io horonan-tsary io, ny Loholona David A. Bednar ao amin’ny Kôlejin’ny Apôstôly Roambinifolo dia nizara fahatakarana mikasika ny fomba ahafahantsika mamantatra ny fahasamihafana eo amin’ny eritreritsika manokana sy bitsika avy amin’ny Fanahy Masina.

Rehefa nanana fotoana ampy handalinana ireo mpianatra dia azonao atao ny manasa azy ireo hanampy ny zavatra nianarany ao amin’ilay lisitra eny amin’ny solaitrabe.

Ny fanontaniana toy izao manaraka izao dia afaka manampy ny mpianatra hifanakalo hevitra momba ny zavatra nianarany ary hamela ny Fanahy Masina hijoro ho vavolombelona amin’ny iray kilasy.

• Inona no nianaranao momba ireo fomba samihafa ifandraisan’ Andriamanitra amintsika amin’ny alalan’ny Fanahy Masina?

• Manampy anao hahatakatra inona momba ny toetra sy fanirian’ny Ray any An-danitra sy i Jesoa Kristy ireo fampianarana ireo?

• Inona no zavatra niainanao tamin’ny fahatakarana ny fomba ifandraisan’ny Fanahy Masina?

Ampahatsiahivo ireo mpianatra ireo fanontaniana napetrany tany amin’ny fanombohan’ny fotoam-pianarana. Asao ny mpianatra hizara ny zavatra nianarany izay nanampy tamin’ny famaliana ny iray tamin’ireo fanontaniana ireo. Farano ny fotoam-pianarana amin’ny fanasana ireo mpianatra mba hiezaka hamantatra ny Tompo izay miteny ao am-pony sy ao an-tsainy amin’ny iray na maromaro amin’ireo fomba maro nianarany. Ampio ireo mpianatra hahatakatra fa ny fanekena ny fanambaran’ny Tompo dia mitaky ezaka mitohy mandritra ny androm-piainany.

Ataovy tsianjery

Azonao atao koa ny manampy ny mpianatra hitadidy ny toko sy andinin-tsoratra masina sy ny andian-teny manan-danja ao amin’ny Fotopampianarana sy Fanekempihavanana 8:2–3 ary avereno jerena ao anatin’ny lesona manaraka izany. Ny andian-teny manan-danja ao amin’ny soratra masina dia ny hoe “Hiteny anao ao an-tsainao sy ao am-ponao Aho, amin’ny alalan’ny Fanahy Masina.” Ireo hevitra ho an’ny sahanasa fitadidiana dia ao amin’ny fitaovana tovana eo ambanin’ny “Sahanasa famerenana fifehezana fotopampianarana.”

Loharanom-pitaovana fanampiny

Inona anampian’ny Fanahy Masina ahy mba ho takatro?

Nampianatra ny Loholona Quentin L. Cook ao amin’ny Kôlejin’ny Apôstôly Roambinifolo hoe:

Ny fanambarana ho an’ny tena manokana dia mifototra amin’ireo fahamarinana ara-panahy izay voaray avy amin’ny Fanahy Masina. Ny Fanahy Masina no mpanambara sy mpijoro ho vavolombelona momba ny fahamarinana rehetra, indrindra ny mahakasika ny Mpamonjy. Raha tsy eo ny Fanahy Masina dia tsy afaka mahalala marina isika hoe i Jesoa no Kristy. (Quentin L. Cook, “Ny fitahiana entin’ny fanambarana tsy tapaka amin’ireo mpaminany sy ny fanambarana ho an’ny tena manokana hitarihana ny fiainantsika,” Liahona, mey 2020, 98)

Inona no tokony hataoko raha toa ka tsy mamaly ahy Andriamanitra?

Ny Loholona D. Todd Christofferson ao amin’ny Kôlejin’ny Apôstôly Roambinifolo dia namaly io fanontaniana io:

Nampianatra izao ny Loholona Gerrit W. Gong ao amin’ny Kôlejin’ny Apôstôly Roambinifolo:

Na dia samihafa aza ny toe-javatra iainana, rehefa manao izay rehetra azontsika atao isika, sy izay tsara indrindra azontsika atao, ary mangataka amin-kitsimpo ny fanampiany eny, dia hitarika antsika ny Tompo, amin’ny fotoany sy ny fombany, amin’ny alalan’ny Fanahy Masina. (Gerrit W. Gong, “Fiombonana ao amin’ny fanekempihavanana,”Liahona, nôv. 2019, 82)

Ny Loholona Richard G. Scott (1928–2015) dia nampianatra toy izao:

Inona no ataonao rehefa niomana tsara ianao, nivavaka mafy, niandry valiny nandritra ny fotoana maharitra, nefa tsy mbola nahatsapa ho nahazo valiny ihany? Azonao atao ny maneho fisaorana rehefa mitranga izany, satria porofon’ny fatokisana [an’ Andriamanitra] izany. Rehefa miaina amim-pahamendrehana ianao ka mifanaraka amin’ny fampianaran’ny Mpamonjy ny safidinao ary mila manao asa ianao dia ataovy amim-pitokiana izany. … Rehefa miaina amim-pahamarinana ianao ka manao asa amim-pitokiana dia tsy hamela anao hanohy lavitra loatra Andriamanitra ka hoe tsy hanome fampitandremana raha toa ka nandray fanapahan-kevitra tsy nety ianao. (Richard G. Scott, “Faire appel au don divin de la prière,” Liahona, mey 2007, 10.)

Inona no azoko atao mba hahaizako tsara kokoa mandray sy mamantatra fanambarana?

Nampianatra toy izao ny Filoha Russell M. Nelson:

Mivavaha amin’ny anaran’i Jesoa Kristy momba ny zavatra manahirana ny sainareo, ny tahotrareo, ny fahalemenareo, eny, ny zavatra tena irin’ny fonareo. Dia mihainoa avy eo! Soraty ny eritreritra izay tonga ao an-tsainareo. Raketo an-tsoratra ny zavatra tsapanareo ary araho asa izay bitsihin’ny Fanahy aminareo fa tokony hataonareo. Rehefa mamerimberina izany dingana izany ianareo isan’andro, isam-bolana, ary isan-taona, dia “hitombo ny fahaizanareo mampihatra ny fitsipiky ny fanambarana” [Teachings of Presidents of the Church: Joseph Smith (2007), 132]. …

Mamporisika anao aho hampitombo ny fahafahanao ara-panahy amin’izao fotoana izao handray fanambarana ho an’ny tenanao manokana. …

Tsy misy na inona na inona manokatra ny lanitra tahaka ny fitambaran’ny fahadiovana lehibe, ny fankatoavana marina, ny fikatsahana amin-kitsim-po, ny fivokisana isan’andro amin’ny tenin’i Kristy ao amin’ny Bokin’i Môrmôna, ary ny fanokanana fotoana matetika hanaovana asa any amin’ny tempoly sy tantaram-pianakaviana. (Russell M. Nelson, “Fanambarana ho an’ny Fiangonana, fanambarana ho an’ny fiainantsika,” Liahona, mey 2018, 95.)

Inona avy ireo fomba sasany hafa iresahan’ Andriamanitra amintsika amin’ny alalan’ny Fanahy Masina?

Nampianatra toy izao ny Loholona Paul V. Johnson ao amin’ny Fitopololahy:

Ny Fanahy dia miresaka amin’ny olona samy hafa amin’ny fomba samy hafa, ary mety hiresaka amin’ny olona iray amin’ny fomba samy hafa Izy amin’ny fotoana samy hafa. Vokatr’izany dia fianarana mandritra ny androm-piainana ny fianarana ireo fomba maro hiresahany amintsika. Indraindray Izy dia miresaka ao an- “tsaina sy ao am-po[ntsika]” [Fotopampianarana sy Fanekempihavanana 8:2] amin’ny feo tony kanefa mahery vaika, manindrona “ireo izay … nandre hatrany anatiny.” [3 Nefia 11:3]. Amin’ny fotoana hafa, ireo bitsiny dia “mibahana ao an-tsain[tsika]” na “manery … ny fihetseham-po[ntsika].” [Fotopampianarana sy Fanekempihavanana 128:1]. Indraindray ny tratrantsika dia “hahamay ny ao anatin[tsika]” [Fotopampianarana sy Fanekempihavanana 9:8]. Indraindray dia mameno fifaliana ny fanahintsika Izy, manazava ny saintsika [jereo Fotopampianarana sy Fanekempihavanana 6:14–15], na milaza fiadanana amin’ny fontsika mitebiteby [jereo Fotopampianarana sy Fanekempihavanana 6:22–23]. (David P. Homer, “Nandre ny feony,” Liahona, mey 2019, 42)

Jereo ny amboarana horonan-tsary “Hear Him” ao amin’ny ChurchofJesusChrist.org mba hahitana ohatra amin’ireo mpitarika ato amin’ny Fiangonana mamariparitra ireo fomba samihafa nahafantaran’izy ireo ny fomba nitenenan’ Andriamanitra tamin’izy ireo.

Sahanasa fianarana fanampiny

Asa atao hanasana fanambarana

Mety mahatsiaro ho diso fanantenana ny mpianatra amin’ny tsy fahazoana ny fanambarana izay tadiaviny. Azonao atao ny manampy azy ireo hianatra avy amin’ny torolalan’ny Tompo ho an’i Oliver Cowdery rehefa tsy nahavita nandika teny izy. (jereo ny Olomasina, boky 1, Ny fanevan’ny fahamarinana, 62–64). Azon’ny mpianatra atao ny mandalina ny Fotopampianarana sy Fanekempihavanana 9:7–11, ary hitady ny zavatra nampianarin’ny Tompo an’i Oliver mikasika ny fomba fiomanana amin’ny fandraisana fanambarana. Azonao atao ihany koa ny mampiasa ilay teny nindramina avy amin’ny Filoha Russell M. Nelson ao amin’ny “Loharanom-pitaovana” fanampiny ao anatin’ny fifanakalozan-kevitra ataonareo.

Azonao asaina ny mpianatra hanao lisitra ireo lohahevitra izay mety hikatsahan’ireo zatovo fanambarana. Ny valiny dia mety ahitana ny fanamafisana orina ny fijoroana ho vavolombelona momba ny filazantsaran’i Jesoa Kristy, ny fandraisana fanapahan-kevitra eo amin’ny fiainana, na ny fandraisana ny valin’ireo fanontaniana. Ampio ny mpianatra hahatakatra hoe nahoana no hanampy azy ireo ny fampiharana ny zavatra ampianarin’ny Tompo ao amin’ny Fotopampianarana sy Fanekempihavanana 9:7–11.

Ny Fanahin’ny fanambarana sy i Mosesy

Rehefa avy mamaky ny Fotopampianarana sy Fanekempihavanana 8:2–3, dia tsara ny miresaka momba ny tantara izay noresahin’ny Tompo ao amin’ny andininy 3. Azonao atao ny mampiseho ny sarin’i Mosesy sy ny zanak’i Isiraely niampita ny Ranomasina Mena. Asao ireo mpianatra hizara antsipirian-javatra vitsivitsy izay fantany mikasika ilay tantara voarakitra ao amin’ny Eksodosy 14–15. Azonao atao ny manasa ireo mpianatra hifanakalo hevitra mikasika ny mety ho toy ny ahoana no fomba nandraisan’i Mosesy fanambarana avy amin’ny Tompo rehefa nila izany izy. Azonao atao ny manasa ireo mpianatra haka sary an-tsaina ireo toe-javatra izay ahafahan’ny olona iray amin’izao androntsika izao mikatsaka fanambarana avy amin’ny Tompo mba hanampiana azy.