Lesona 17: Fotopampianarana sy Fanekempihavanana 6-9

Fotopampianarana sy Fanekempihavanana 6

“Banjino Aho amin’ny eritreritra rehetra; aza miroanàhana, aza matahotra”

Tamin’ny 5 aprily 1829 no nihaona voalohany tamin’i Joseph Smith i Oliver Cowdery. Roa andro tatỳ aoriana dia lasa mpitantsoratr’i Joseph tamin’ny fandikana ny Bokin’i Môrmôna izy. Ny Fotopampianarana sy Fanekempihavanana 6 dia ahitana torohevitra avy amin’ny Tompo izay miresaka momba ny fanontaniana sy olana maro nananan’i Oliver mikasika ny fandraisana anjara amin’ny asan’ny Tompo. Ity lesona ity dia natao hanampiana ireo mpianatra hametraka ny fitokiany amin’ny Mpamonjy rehefa miatrika fisalasalana sy tahotra izy ireo.

Ireo sahanasa fianarana azo atao

Fisalasalana sy tahotra

Soraty eny amin’ny solaitrabe ity fanontaniana manaraka ity ary asao ny mpianatra hanoratra ny valin-teniny eo ambanin’izany. Azo atao ny manao izany alohan’ny hanombohan’ny fotoam-pianarana na amin’ny fiandohan’ny lesona.

• Inona avy ireo tahotra, fisalasalana na ahiahy mety hananan’ny zatovo?

Rehefa avy nifanakalo hevitra momba ny fanontaniana teo aloha dia asao ny mpianatra hisaintsaina izay tahotra, fisalasalana, na ahiahy mety hananany eo amin’ny fiainany manokana. Hazavao fa mirakitra fahamarinana izay afaka manampy azy ireo amin’ny fotoana toy ireny ny Fotopampianarana sy Fanekempihavanana 6. Asao ny mpianatra hitady ireo fahamarinana ireo rehefa mandalina izy ireo.

Nanomboka nanampy an’i Joseph Smith i Oliver Cowdery

Hazavao fa mirakitra fanambarana iray nomena an’i Oliver Cowdery ny Fotopampianarana sy Fanekempihavanana 6. Mba hanampiana ny mpianatra hahatakatra ny fomba nihaonan’i Oliver voalohany tamin’i Joseph Smith dia azonao atao ny mampiseho ilay horonan-tsary “Days of Harmony” manomboka eo amin’ny mari-potoana 3:07 hatramin’ny 7:18. Io horonan-tsary io dia hita ao amin’ny ChurchofJesusChrist.org. Azon’ny mpianatra atao ihany koa ny mamaky ny Olomasina: Ny tantaran’ny Fiangonan’i Jesoa Kristy amin’izao andro farany izao, boky 1, The Standard of Truth, 1815–1846 (2018) pejy 58–60, na azonao fintinina ity andiam-pehezan-teny manaraka ity.

Mpampianatra tany an-tsekoly izay nanomboka niara-nipetraka tamin’ny ray aman-drenin’i Joseph Smith tamin’ny fararano tamin’ny taona 1828 i Oliver Cowdery. Raha niaraka tamin’ny fianakaviana Smith i Oliver dia nahare momba ny fiantsoana masina an’i Joseph sy ny fandikana ny Bokin’i Môrmôna teo an-dalam-panaovana. Nisy bitsika nanosika an’i Oliver hanontany raha afaka manampy an’i Joseph amin’ny fandikan-teny izy. Tamin’ny lohataonan’ny taona 1829, dia niaraka tamin’i Samuel zandrin’i Joseph tany Harmony, Pennsylvanie, i Oliver mba hihaona voalohany tamin’ny Mpaminany.

• Raha teo amin’ny toe-javatra niainan’i Oliver Cowdery no misy ianao dia inona no fanontaniana na ahiahy mety ho nanananao nandritra izany fotoana izany?

Fotoana fohy taorian’ny nahatongavany tao Harmony dia lasa mpitantsoratr’i Joseph Smith i Oliver. Na dia teo aza ny fanamafisana masina voarain’i Oliver teo aloha mikasika ny fanomezam-pahasoavan’ny faminanian’i Joseph ho an’ny fandikan-teny, dia mbola nanana fanontaniana mikasika ny fandraisany anjara amin’ny asan’ny Tompo ihany izy. Naharay ilay fanambarana voarakitra ao amin’ny Fotopampianarana sy Fanekempihavanana 6 i Joseph Smith nandritra io fotoana io.

Mahafantatra sy matoky ny Mpamonjy

Vakio ny Fotopampianarana sy Fanekempihavanana 6:14–24, 32–37, ary tadiavo ny torohevitra avy amin’ny Tompo ho an’i Oliver. Mariho manokana ny zavatra nampianarin’ny Tompo momba ny Tenany izay afaka manampy antsika amin’ny fotoan’ny fisalasalana na ny tahotra.

Ankoatra ny famakiana ireo andininy ireo dia afaka mijery ny “Days of Harmony” ihany koa ireo mpianatra manomboka eo amin’ny mari-potoana 15:02 hatramin’ny 17:49.

Mba hanampiana ny mpianatra hieritreritra lalina ny zavatra vakiny dia asehoy eny amin’ny solaitrabe ny sarin’i Jesoa Kristy. Rehefa hitan’ny mpianatra ny fampianaran’ny Mpamonjy ao amin’ireo andininy ireo dia afaka manoratra izany manodidina ilay sary eny amin’ny solaitrabe izy ireo.

• Inona no ianaranao momba an’i Jesoa Kristy izay afaka manampy anao hametraka ny fitokianao Aminy rehefa miatrika tahotra, fisalasalana, na ahiahy ianao?

• Ahoana no ahafahan’ireo fahamarinana momba ny Mpamonjy ireo manampy ho anao amin’ny fotoana toy izany?

Banjino i Jesoa Kristy

Ny Fotopampianarana sy Fanekempihavanana 6:36 dia andalan-tsoratra masina fifehezana fotopampianarana. Asao hanisy marika amin’ny fomba miavaka ireo andalan-tsoratra masina fifehezana fotopampianarana ny mpianatra mba ho mora foana aminy ny mahita ny toerana misy azy.

Vakio indray ny Fotopampianarana sy Fanekempihavanana 6:36–37, ary tadiavo ireo fanasan’ny Mpamonjy ho an’i Oliver.

• Ahoana no amintinanao ny fahamarinana nampianarina tao amin’ny andininy 36?

Azonao atao ny manantitrantitra fa rehefa mibanjina an’i Jesoa Kristy isika dia afaka mandresy ny fisalasalana sy ny tahotra.

Inona, araka ny eritreritrao, no dikan’ny hoe mibanjina an’i Jesoa Kristy amin’ny eritreritra rehetra?

Mba hanampiana ny mpianatra hahita ny fifandraisana misy eo amin’ireo fampianaran’ny Mpamonjy ao amin’ny andininy 36 sy 37, dia hevero ny hampiseho ilay sary hatrany am-piandohan’ny lesona. Hazavao fa ny hoe mibanjina zavatra dia midika hoe mahita sy mandinika. Avy eo dia apetraho ireto fanontaniana manaraka ireto:

• Nahoana, araka ny eritreritrao, no tian’ny Mpamonjy “hibanjina” ny ratrany isika? (Fotopampianarana sy Fanekempihavanana 6:37).

• Inona no mety ho vokatry ny fahatsiarovana ny Sorompanavotany sy ny Fitsanganany tamin’ny maty eo amintsika?

Mba hanampiana ireo mpianatra hahatakatra kokoa ny fomba ahafahan’izy ireo mibanjina an’i Jesoa Kristy dia asehoy ireto rafi-tantara manaraka ireto. Azonao atao koa ny mamorona rafi-tantara hafa mifandraika kokoa amin’ny toe-javatra iainan’ny mpianatrao.

Manana fanontaniana tsy voavaly momba ny filazantsara i Anna. Indraindray izy dia mahatsapa fa tsy matanjaka tsara ahafahana mandresy ny fisalasalany ny fijoroana ho vavolombelona ananany.

Mijaly noho ny olana momba ny fahatsapany tena ho tsy misy dikany firy i Eric. Mahatsiaro tena ho tsy misy mahatsikaritra izy any am-pianarana.

Ny ray aman-drenin’i Sophie dia sahirana amin’ny famelomana eo amin’ny lafiny ara-bola ny fianakaviany. Manahy izy hoe tsy hanana vola ampy eo anatrehan’ny zavatra rehetra ilain’ny fianakaviany ny ray aman-dreniny.

Zarao ho vondrona kely ny mpianatra ary omeo iray amin’ireo rafi-tantara ireo ny vondrona tsirairay mba hifantohana rehefa mifanakalo hevitra momba ireto fanontaniana manaraka ireto izy ireo.

• Inona no fomba telo farafahakeliny ahafahan’ireo olona ireo mibanjina an’i Kristy amin’ny toe-javatra misy azy ireo?

• Ahoana no ahafahan’ireo fomba ireo mitondra fiovana eo amin’ny fiainan’ireo olona ireo?

Rehefa avy nifanakalo hevitra niaraka tamin’ny vondrona misy azy ireo mpianatra dia asao izy ireo hizara ny valin-tenin’izy ireo amin’ny iray kilasy. Ao anatin’ny fifanakalozan-kevitra dia mety hanampy ny manontany ny mpianatra hoe nahoana no ohatra amin’ny fibanjinana an’i Kristy ireo fomba hitan’izy ireo.

Asao koa ny mpianatra hizara ohatra mikasika ny fomba nitahiana azy ireo rehefa nibanjina an’i Jesoa Kristy teo amin’ny fiainany izy ireo.

Mampihatra izany amin’ny fiainanao

Mba hanampiana ireo mpianatra hampihatra ny torohevitry ny Mpamonjy mba hibanjina Azy dia asao izy ireo hieritreritra momba ny tahotr’izy ireo, ny fisalasalany, na ny ahiahiny izay hitan’izy ireo tany am-piandohan’ny lesona. Asehoy ireto fanontaniana manaraka ireto, ary omeo fotoana ireo mpianatra hamaly izany ao anatin’ny diary fandalinany.

• Inona no nianaranao na tsapanao momba an’i Jesoa Kristy androany izay afaka manampy anao amin’ireo tahotra, fisalasalana, na ahiahy anananao?

• Inona avy ireo fomba manokana izay hiezahanao hampiharana ny torohevitry ny Mpamonjy mba “[hibanjina Azy] amin’ny eritreritra rehetra; [tsy hiroanàhana,], [tsy hatahotra]”?

Ataovy tsianjery

Azonao atao ny manampy ireo mpianatra hitadidy ny toko sy andinin-tsoratra masina sy ny andian-teny manan-danja ao amin’ny Fotopampianarana sy Fanekempihavanana 6:36 dia ataovy famerenana amin’ny lesona manaraka izany. Ny andian-teny manan-danja ao amin’ny soratra masina dia ny andininy iray manontolo: “Banjino Aho amin’ny eritreritra rehetra; aza miroanàhana, aza matahotra.” Misy hevitra ho an’ny sahanasa fitadidiana ao amin’ny fitaovana tovana eo ambanin’ny “Sahanasa famerenana fifehezana fotopampianarana.”

Loharanom-pitaovana fanampiny

Inona no tsapan’ny Mpamonjy momba ahy na dia eo aza ny ahiahiko?

Nampianatra izao ny Loholona Dieter F. Uchtdorf ao amin’ny Kôlejin’ny Apôstôly Roambinifolo:

Ry tanora namako malala, raha teto izao ny Mpamonjy dia inona no holazainy aminareo?

Mino aho fa hanomboka amin’ny fanehoana ny fitiavany lalina ho anareo Izy. Mety hilaza izany amin’ny teny Izy, nefa mety hiseho mafy tokoa izany—amin’ny maha eo Azy fotsiny—ka tsy azo hiodivirana fa mipaka lalina any am-ponao any, mameno ny atifanahinao iray manontolo!

Na izany aza, satria malemy sy tsy lavorary isika rehetra, dia mety hanomboka hiahiahy ny ao an-tsainao ao. Mety hahatsiaro ireo fahadisoana nataonao ianao, ireo fotoana izay nanekenao ho resin’ny fakam-panahy, ireo zavatra nirianao raha mba tsy natao—na ireo izay nirinao raha nataonao tsaratsara kokoa.

Ho tsapan’ny Mpamonjy izany, ary mino aho fa hanome toky anao Izy amin’ny teny izay efa nolazainy ao amin’ny soratra masina manao hoe:

• “Aza matahotra” [Lioka 5:10; 8:50; 12:7; Fotopampianarana sy Fanekempihavanana 38:15; 50:41; 98:1].

• “Aza miroanàhana” [Fotopampianarana sy Fanekempihavanana 6:36].

• “Matokia” [Matio 14:27; Jaona 16:33; Fotopampianarana sy Fanekempihavanana 61:36; 68:6; 78:18].

• “Aoka tsy hitebiteby ny fonareo” [Jaona 14:1, 27].

(Dieter F. Uchtdorf, “I Jesoa Kristy no maha zatovo mahery” Liahona, nôv. 2022, 9.)

Ahoana no ahafahako mibanjina an’i Kristy amin’ny eritreritra rehetra?

Nampianatra izao ny Filoha Henry B. Eyring ao amin’ny Fiadidiana Voalohany hoe:

Nomen’ny Tompo ny fomba hahazoana toe-tsaina miandrandra zavatra tsara amin’ny ho avy, tamin’ny hoe: “Banjino Aho amin’ ny eritreritra rehetra; aza miroanàhana, aza matahotra” (F&F 6:36). Nolazain’ny Filoha Monson antsika ny fomba hanaovana izany. Mila misaintsaina sy mampihatra ireo fitsipika hita ao amin’ny Bokin’i Môrmôna sy ny tenin’ny mpaminany isika. Mivavaka mandrakariva. Mino. Manompo ny Tompo amin’ny fo, ny hery, ny saina, ary ny tanjatsika rehetra. Mila mivavaka amin’ny herin’ny fontsika manontolo isika mba hangataka ny fanomezam-pahasoavan’ny fiantrana, dia ny fitiavana madion’i Kristy (jereo ny Môrônia 7:47–48). Fa ny tena lehibe indrindra, dia mila manaraka tsy tapaka sy amim-pahazotoana ny torohevitry ny mpaminany isika. (Henry B. Eyring, “Aza matahotra ny hanao soa,” Liahona, nôv. 2017, 103.)

Ny Loholona Ulisses Soares ao amin’ny Kôlejin’ny Apôstôly Roambinifolo dia nizara hoe:

Ny fikatsahana an’i Kristy amin’ny eritreritra rehetra sy ny fanarahana Azy amin’ny fontsika manontolo dia mitaky ny hampifanarahantsika ny saintsika sy ny faniriantsika amin’ny Azy. … Izany fomba fanao izany dia midika fa mampifanaraka tsy tapaka ny fiainantsika amin’ny filazantsaran’i Jesoa Kristy isika ary mifantoka isan’andro amin’izay tsara. (Ulisses Soares, “Mikatsaka an’i Kristy amin’ny eritreritra rehetra,” Liahona, nôv. 2020, 82–83.)

Inona no mety hitranga amiko rehefa mibanjina an’i Kristy amin’ny eritreritra rehetra aho?

Nampianatra toy izao ny Filoha Russell M. Nelson:

Tsy maintsy aorina mafy eo amin’ny Mpamonjy sy ny filazantsarany ny fifantohantsika. Mitaky ezaka ara-tsaina be ny fiezahana mibanjina Azy amin’ny eritreritra rehetra. Kanefa rehefa manao izany isika dia hisinda ireo tahotra sy ahiahy. (Russell M. Nelson, “Misintona ny herin’i Jesoa Kristy ho eo amin’ny fiainantsika,” Liahona, mey 2017, 41.)

Sahanasa fianarana fanampiny

Mianatra momba an’i Oliver Cowdery

Mba hanampiana ny mpianatra hianatra momba ny tantaram-piainan’i Oliver Cowdery any am-piandohan’ny lesona dia hevero ny hanome ireto teny manan-danja manaraka ireto izay mahakasika amin’i Oliver amina tapa-taratasy: mpampianatra, mpitantsoratra, nivahiny, Harmony, fisalasalana, fiadanana, ary vavaka. Apetraho eo amin’ny solaitrabe ireo tapa-taratasy. Rehefa avy namaky ny Olomasina, 1:58–60, dia asaivo mamintina ny vakiteniny ireo mpianatra amin’ny alalan’ny fandaminana ireo tapa-taratasy araka ny filaharany eny amin’ny solaitrabe. Afaka mamintina ny zavatra izay nianarany ireo mpianatra rehefa avy eo.

Afaka mamaky misimisy kokoa momba an’i Oliver Cowdery ihany koa ny mpianatra eo ambanin’ny “Church History Topics” ao amin’ny application Médiathèque de l’Évangile.

Soratra masina ampifandraisina

Zarao ho vondrona kely ireo mpianatra ary asao izy ireo hikaroka soratra masina izay azon’izy ireo ampifandraisina amin’ny Fotopampianarana sy Fanekempihavanana 6:36. Azon’izy ireo atao ny mikaroka teny toy ny fatokiana, fisalasalana, sy tahotra ao amin’ny Torolalana ho an’ny Soratra Masina.

Afaka mizara ny soratra masina hitany amin’ny vondrona misy azy sy amin’ny iray kilasy ny mpianatra. Azonao atao koa ny mamporisika azy ireo mba hanampy ao amin’ny soratra masiny ireo andinin-tsoratra masina mifandray avy amin’ny mpiara-mianatra aminy. Raha tsy izany dia afaka manao lisitra an’ireo andinin-tsoratra masina ao amin’ny diary fandalinany ihany koa izy ireo.

Fanehoana avy ao amin’ny soratra masina momba ny fibanjinana an’i Jesoa Kristy

Mba hanampiana ireo mpianatra hahita ohatra avy ao amin’ny soratra masina izay maneho ny fibanjinana an’i Jesoa Kristy sy ireo fitahiana azo avy amin’ny fanaovana izany dia asao ny mpianatra handalina ny Matio 14:22–32 sy ny Nomery 21:4–11.

Mba hanampiana ny mpianatra haka sary an-tsaina ny zavatra niainan’i Petera tao amin’ny Matio 14, dia azony jerena ny hoe “Wherefore Didst Thou Doubt?” (2:06). Azonao atao ny mifanakalo hevitra momba ny fahasamihafana teo amin’ny zavatra niainan’i Petera rehefa nibanjina an’i Kristy izy sy rehefa nifantoka tamin’ny fisalasalana sy ny tahotra.

“Aoka ianao hiaina ao anatin’ny finoana fa tsy ao anatin’ny tahotra”

Asehoy ny horonan-tsary “Live by Faith, Not by Fear“ (1:09) mba hanampiana ireo mpianatra hahita sy hahatsapa ny fomba ahafahan’ny fatokiana ny Mpamonjy manampy azy ireo handresy ny fisalasalana sy ny tahotra mety hatrehiny eo amin’ny fiainany. Azonao atao ny manasa ireo mpianatra hizara ny eritreriny na ny fahatsapany rehefa avy nijery ilay horonan-tsary.