“Fotopampianarana sy Fanekempihavanana 11:8–30: -Amin’ireo rehetra izay manana faniriana tsara,-” Fotopampianarana sy Fanekempihavanana: Boky torolalana ho an’ny mpampianatra seminera (2025)
“Fotopampianarana sy Fanekempihavanana 11:8–30,” Fotopampianarana sy Fanekempihavanana: Boky torolalana ho an’ny mpampianatra seminera
Fotopampianarana sy Fanekempihavanana 10–11
Fotopampianarana sy Fanekempihavanana 11:8–30
“Amin’ireo rehetra izay manana faniriana tsara”
Rehefa nanomboka nivelatra ny Famerenana amin’ny laonin’ny filazantsaran’i Jesoa Kristy dia maro ireo olona izay nanam-paniriana ny hahafantatra ny fomba nahafahan’izy ireo manampy. Tafiditra ao anatin’izany ireo olona tamin’ny fianakavian’i Joseph Smith toy an’i Hyrum, rahalahiny. Nidera an’i Hyrum ny Tompo noho ny faniriana tsara nananany ary nampianatra azy ny fomba tokony hiomanany mba hanampy amin’ilay asa. Ity lesona ity dia afaka manampy ireo mpianatra hikatsaka ny fanampian’ny Tompo mba hiomanan’izy ireo handray anjara amin’ny asany.
Ireo sahanasa fianarana azo atao
“Araka izay irinareo”
Asao ny mpianatra hieritreritra fotoana iray izay nanirian’izy ireo ny hanatevin-daharana na handray anjara amina hetsika na tanjona mendrika iray. Mety ho anisan’ny hevitra ny fanomanana fiaraha-mientan’ny tanora iray, ny fandraisana anjara amin’ny tetikasam-panompoana iray, na ny fidirana amin’ny klioba na fikambanana iray. Asao ny mpianatra hifanakalo hevitra momba ireo zavatra nilainy mba hiomanana mialoha amin’ny fanatanterahana ilay asa na ny fahatratrarana ilay tanjona.
Zarao ny fampahalalana toy izao manaraka izao mba hanampiana ireo mpianatra hahatakatra ilay zavatra izay nirin’i Hyrum Smith hirotsahana ka nitarika tamin’ny fahazoana ilay fanambarana ao amin’ny Fotopampianarana sy Fanekempihavanana 11.
Tamin’ny mey 1829, ny faniriana lehiben’i Hyrum Smith dia ny handray anjara amin’ny Famerenana amin’ny laoniny ny Fiangonan’ny Mpamonjy. Namakivaky 400 kilaometatra mahery avy tao Palmyra, New York, nankany Harmony, Pennsylvanie izy mba hitsidika an’i Joseph zandriny lahy sy hahafantatra ny zavatra azony atao mba hanampiana azy. Nambaran’ny Tompo ny Fotopampianarana sy Fanekempihavanana 11 noho ny faniriana marin’i Hyrum.
Vakio ny Fotopampianarana sy Fanekempihavanana 11:8, ka tadiavo ny fomba nitahian’ny Tompo an’i Hyrum Smith noho izy naniry ny hanampy amin’ny asa. Aorian’izay dia vakio ny Fotopampianarana sy Fanekempihavanana 11:27, ka tadiavo hoe iza koa no noresahin’ny Mpamonjy tao amin’io fanambarana io.
Asao ireo mpianatra hamantatra fahamarinana iray avy amin’ireo andinin-tsoratra masina ireo ary hilaza izany amin’ny teniny manokana. Mety hiteny toy izao izy ireo: Raha maniry hanompo Azy isika, dia afaka manao ny asany amin’ny alalantsika Andriamanitra.
Omeo fahafahana ny mpianatra hanombantombana ny tenany amin’ny fiomanany hanao ny asan’ Andriamanitra. Fomba iray ahafahan’izy ireo manombantombana ny tenany ity manaraka ity.
Amin’ny alalan’ny fampiasana ity mari-pandrefesena manaraka ity dia fidio hoe hatraiza ny fahavononanao hanao ny asan’ Andriamanitra:
-
1 = Tena tsy vonona
-
2 = Tsy dia tena vonona
-
3 = Vonombonona
-
4 = Tena vonona
Eritrereto ny zavatra azonao atao mba hampitomboana ny fahavononanao. Azonao raketina ao amin’ny diary fandalinanao ny eritreritrao.
Miomana hanompo
Zarao ho vondrona kely ny mpianatra ary amporisiho izy ireo mba hifandimby hamaky mafy ireto andininy manaraka ireto.
Vakio ny Fotopampianarana sy Fanekempihavanana 11:11–26, ary asio marika ireo andian-teny mifono torohevitra manokana izay nomen’ny Mpamonjy mba hanampiana an’i Hyrum hiomana hanompo amim-pahatokiana. Rehefa vita ny fandalinana ireo andininy ireo dia misafidiana andian-teny iray izay manoro hevitra hoe ahoana no azontsika iomanana. Mieritrereta fomba roa na telo voafaritra ahafahan’ny olona iray mampihatra izany torohevitra izany eo amin’ny fiainany.
Asao ny vondrona tsirairay hanoratra eny amin’ny solaitrabe ilay andian-teny nofidiny ary hizara amin’ny iray kilasy fomba vitsivitsy ahafahan’izy ireo mampihatra izany. Azonao atao ny mametraka fanontaniana fanohizana toy ny hoe: “Amin’ny fomba ahoana ny fampiharana izany torohevitra izany ankehitriny no miantraika amin’ny hoe ho lasa olona tahaka ny ahoana ianao any aoriana any eo amin’ny fiainanao?” Mihainoa tsara rehefa mizara zavatra ny mpianatra mba hamantarana hoe inona ireo andian-teny tokony handaniana fotoana kokoa hifanakalozana hevitra. Ireto fizarana telo manaraka ireto dia azo ampiasaina mba hanampiana ireo mpianatra hahatakatra sy hifanakalo hevitra ary hiomana hampihatra andian-teny voafaritra.
“Apetraho amin’ilay Fanahy izay mitarika hanao ny tsara ny fitokianao” (andininy 12)
Mieritrereta toe-javatra tena misy eo amin’ny fiainana izay mety tsy maintsy hanapahan’ny zatovo iray hevitra raha toa izy ka hatoky ny Fanahy na tsia.
-
Nahoana no ilaina ny finoana ny Mpamonjy mba hatokisana tanteraka ny Fanahy amin’ireo toe-javatra ireo?
-
Inona no azontsika atao mba hianarana ny fomba handraisana tsara kokoa fitaomam-panahy avy amin’ny Fanahy Masina sy handraisana andraikitra eo anatrehan’izany?
Mety ho anisan’ny valiny ny fandraisana amim-pahamendrehana ny fanasan’ny Tompo, ny fanoratana sy ny fanaovana asa araka ny bitsika izay tonga, ary ny fisaintsainana ao anatin’ny vavaka na fandalinana soratra masina ataon’ny tena manokana. Asao ny mpianatra hizara ny zavatra niainany rehefa natoky ny Fanahy izy ireo mba hanao ny tsara.
“Mitandrina ny didiko, eny, amin’ny herinao rehetra, ny sainao rehetra ary ny tanjakao rehetra.” (andininy 20)
Misafidiana didy telo na efatra izay heverinao fa mihatra indrindra amin’ny zatovo.
Soraty ho an’ny didy tsirairay ny fomba mety ho azon’ny zatovo hitandremana izany amin’ny heriny sy ny sainy ary ny tanjany rehetra.
-
Nahoana no ilaina ny fiezahana hitandrina ny didin’ny Tompo mba hanompoana Azy amin’ny fomba tsara kokoa?
-
Ahoana no nitahiana anao na ny olona fantatrao noho ny fiezahana amim-pahazotoana hitandrina ny didin’ny Mpamonjy?
“Katsaho aloha ny hahazo ny teniko” (andininy 21)
Manaova lisitr’ireo zavatra mety hataon’ny olona iray izay mikatsaka ny “hahazo ny tenin[’ny Tompo]” fa tsy mamaky soratra masina fotsiny ihany.
Mety hisy valiny ilazana ny hoe fanisiana marika ireo andinin-tsoratra masina, firaketana an-tsoratra ny eritreritra tonga ao an-tsaina, fitadiavana valin’ny fanontaniana ary ny vavaka mandritra ny fandalinana.
-
Amin’ny fomba ahoana ny fiomananao amin’ny nahim-po ho lasa misiônera, mpampianatra, mpitarika, mpanompo, vady, na ray na reny tsara kokoa ho an’ny hoavy no miantraika amin’ny fomba fandalinanao ny filazantsara ankehitriny?
-
Inona no zavatra voafaritra iray azonao atao mba hampitomboana ny fahombiazan’ny fandalinanao soratra masina isan’andro? (Mety efa nametraka tanjona mitovy amin’izany ianao teo aloha. Mety ho fotoana tsara handinihana ny fivoaranao izao.)
Ampiharo ny zavatra izay nianaranao
Ny fahatakarana ny famariparitan’ny Mpamonjy ny Tenany ao amin’ny fizarana 11 dia afaka manampy ireo mpianatra hanantena fa hanampy azy ireo hampihatra ireo fanasana ato amin’ity fizarana ity Izy. Asao ny mpianatra hamaky ny andininy 11 sy 28–30 ary hifanakalo hevitra momba ireto fanontaniana manaraka ireto.
-
Ahoana no ahafahan’ny Mpamonjy manazava ny lalanao rehefa miezaka manaraka ny toroheviny sy miomana hanompo Azy ianao?
-
Ahoana no ahafahanao “mandray” tsara kokoa ny Mpamonjy sy ny toroheviny eo amin’ny fiainanao?
-
Inona araka ny eritreritrao, no dikan’ny hoe nomena fahefana ho tonga zanakalahy sy zanakavavin’ Andriamanitra?
Omeo fotoana mangina ny mpianatra hisaintsainana izao manaraka izao sy hampiharana ny zavatra nianarany. Raha mila fanampiana amin’ny fieritreretana hevitra ny mpianatra dia asao izy ireo hifidy andian-teny iray voatanisa eny amin’ny solaitrabe tany am-piandohan’ny lesona. Zarao ny fahatsapanao manokana mikasika ny fomba nitondran’ny fanompoana ny Tompo soa ho anao sy nitahian’izany ny fiainanao.
Makà fotoana kely hakana sary an-tsaina hoe te ho lasa mpanompo toy ny ahoana ho an’ny Tompo ianao ankehitriny, ao anatin’ny roa taona, ao anatin’ny 10 taona, ary mandritra ny androm-piainanao manontolo. Misafidiana andian-teny iray farafahakeliny avy amin’ny fandalinanao anio izay tianao hifantohana ary mamoròna drafitra hanatanterahana izany. Ny fomba iray hanaovana izany dia ny fanaovana sary tohatra tsotra misy dingana telo na efatra. Soraty eo amin’ny dingana tsirairay ny zavatra azonao atao mba hanampiana anao hahazo kokoa ny tenin’ny Tompo, hitandrina ny didiny, na hampihatra torohevitra iray nofidinao hifantohana.