“Сургаал ба Гэрээ 18:11–16: ‘Та нарын баяр хөөр хэчнээн агуу байх билээ,’” Сургаал ба Гэрээний семинарын багшийн гарын авлага (2025)
“Сургаал ба Гэрээ 18:11–16,” Сургаал ба Гэрээний семинарын багшийн гарын авлага
28-р хичээл: Сургаал ба Гэрээ 18
Сургаал ба Гэрээ 18:11–16
“Та нарын баяр хөөр хэчнээн агуу байх билээ”
Их Эзэн Сүмийн талаарх хүслээ үргэлжлүүлэн илчлэхдээ Иосеф Смит, Оливер Каудери, Давид Витмер нарт Өөрийнх нь сайн мэдээг хуваалцахаас ирдэг баяр хөөрийн тухай ярьсан юм. Энэ хичээл нь Аврагчийн сайн мэдээг бусадтай хуваалцах суралцагчдын хүсэл эрмэлзлийг нэмэгдүүлэхэд тусална.
Боломжит суралцах үйл ажиллагаа
Юу танд баяр хөөр авчирдаг вэ?
Хоёр хоёроороо нэгээс хоёр минутад багтаан, өөрсдөд нь баяр хөөр авчирдаг бүх зүйлийн тухай бодож, жагсаалт гаргахад суралцагчдыг урь. Суралцагчдыг жижиг бүлгүүдэд хуваарилаад, бүлэг бүрд өөр өөр өнгийн самбарын маркер өг. Бүлгийн хүн бүр өөрсдөд нь баяр хөөр авчирдаг зүйлсийг самбарт нэгээс хоёр минутын туршид ээлжлэн бичиж болох юм.
Бичсэн нэг зүйлийг сонгон, энэ нь яагаад баяр хөөр авчирдаг тухай хуваалцахад хэдэн суралцагчийг урь.
Тэнгэрлэг Эцэг, Есүс Христ хоёр биднийг баяр хөөр мэдрээсэй хэмээн хүсдэг (2 Нифай 2:25-ыг үзнэ үү). Аврагчид юу баяр хөөр авчирдаг мөн тэрхүү баяр хөөрийг бид хэрхэн мэдэрч болох тухай Сургаал ба Гэрээ 18-д тунхагласан.
Суралцагчдыг хэр их баяр хөөрийг амьдралдаа одоо мэдэрч байгаа болон яагаад илүү их баяр хөөр мэдрэхийг хүсэж байгаа тухай бодоход урь. Тэднийг өнөөдрийн хичээлээр амьдралдаа агуу баяр хөөрийг хэрхэн мэдэрч болох тухай сургаалуудыг олж мэдэхэд урамшуул.
Есүс Христийн баяр хөөр
Хэрэв Аврагчаас юу Түүнд баяр хөөр авчирдгийг асуувал Аврагч юу гэж хариулж болох тухай тунгаан бодоход суралцагчдыг урь.
Сургаал ба Гэрээ 18:11–13-ыг уншаад, юу Аврагчид агуу баяр хөөр авчирдгийг олж мэд.
Суралцагчдыг хариулахаас өмнө дараах хоёр асуултыг тунгаан бодоход урь. Тэднээс хуваалцахыг хүсэхээсээ өмнө та судлах тэмдэглэлдээ өөрсдийн хариултуудыг бичихэд тэднийг урьж болно. Асуулт тавихаас чинь өмнө суралцагчид Лук 15:1–10-ыг уншвал тэдэнд хэрэгтэй байж болох юм.
-
Биднийг наманчлах үед Аврагч яагаад агуу баяр хөөрийг мэдэрдэг гэж та бодож байна вэ?
-
Аврагчийн талаар үүнийг ойлгох нь бидний үйлдэл, хүсэл эрмэлзэлд хэрхэн нөлөөлөх вэ?
Сургаал ба Гэрээ 18:15–16 бол төгс эзэмших судрын хэсэг юм. Суралцагчдыг төгс эзэмших сургаалын судрын хэсгийг хожим амархан олохын тулд онцгойлон тэмдэглэхэд урь.
Сургаал ба Гэрээ 18:14–16-г уншаад, Аврагчийн биднээс юу хүсдэгийг харуулсан үг хэллэгүүдийг тэмдэглэ.
-
Эдгээр шүлэг танд Аврагчийн тухай болон Тэр биднээс хүсдэгийг ойлгоход хэрхэн тусалж байна вэ?
Шаардлагатай бол, эдгээр шүлгээс сурч болох нэг үнэнийг буюу Бусдыг Өөрт нь авчирснаар ирдэг баяр хөөрийг мэдрэхийг Есүс Христ биднээс хүсдэг гэдгийг тайлбарла. Энэ үнэнийг самбар дээр бичиж болно.
Далын ахлагч Маркус Б.Нэш сайн мэдээг хуваалцахад ирдэг баяр хөөрийн тухай ийнхүү заасан.
Хүн амьдралын гайхамшигт зорилгыг олж мэдэн; Христ Өөрийг нь дагадаг хүмүүсийг өршөөж, тусалдгийг ойлгож; Христийг даган баптисмын усанд орохыг сонгох үед амьдралын нөхцөл байдал нь өөрчлөгдөхгүй ч амьдрал нь сайжирдаг.
Нигерийн Онитшад миний танилцсан гэрэл цацруулсан баяр баясгалантай нэгэн эмэгтэй үнэнийг мэдэж авч, баптисм хүртсэнийхээ дараа “Бүх зүйл сайхан байна. Би аз жаргалтай байна. Би тэнгэрт байна” гэж хэлж билээ. Сайн мэдээг хуваалцах нь хуваалцаж байгаа, хүлээн авч байгаа хоёр хүний аль алинд баяр хөөр, итгэл найдвар төрүүлдэг. Сайн мэдээг хуваалцахад үнэхээр “та нарын баяр хөөр хэчнээн агуу байх билээ!” Сайн мэдээг хуваалцах нь баяр хөөрийн дээд баяр хөөр, найдварын дээд найдвар юм. (Маркус Б.Нэш, “Гэрлээ өргө,” Лиахона, 2021 оны 11-р сар, 71–72)
-
Бусдыг Есүс Христ рүү чиглүүлэх нь яагаад тийм их баяр хөөрийг авчирдаг гэж та бодож байна вэ?
-
Сайн мэдээг бусадтай хуваалцсанаар баяр хөөрийг мэдэрч байсан ямар туршлагууд танд байдаг (эсвэл мэддэг) вэ?
Суралцагчдад өмнөх асуултад хариулахад нь туслахын тулд тэднийг судраас жишээнүүдийг хайж олоход урьж болно. Тэд (Алма 26:1–16 дээрх) Аммоны үгс болон (Алма 29:9–17 дээрх) Алмагийн үгсийг уншиж болно.
Бэрхшээлийг даван туулах
Түүний сайн мэдээг хуваалцахад эдгээр амлалт биднийг зоригжуулж болох ч заримдаа саад бэрхшээл эсвэл санаа зовоосон асуудлууд нь бусадтай хуваалцахаас зайлсхийхэд хүргэдэг гэдгийг тайлбарла. Суралцагчдыг тулгарч болох зарим саад бэрхшээлийг нэрлэж, самбар дээр хариултуудаа жагсаан бичихэд урь. Суралцагчдыг эдгээр саад бэрхшээлтэй тулгардаг хэн нэгний тухай (эсвэл таньдаг хэн нэгнийг бодож) төсөөлөн, дараах үйл ажиллагааг дуусгахад урь.
Аврагчийн сайн мэдээг хуваалцах тухайд санаа зовниж буй хүнтэй юуг хуваалцаж болох талаар бич. Дараах санаануудыг багтаахыг бод. Үүнд:
-
Бусдыг Аврагчид авчрах хүслийг нэмэгдүүлдэг, Түүний тухай таны мэддэг зүйлс (мөн хэрэв боломжтой бол таны мэддэг зүйлийг гэрчилдэг судар)
-
Аврагчид ойртох нь танд хэрхэн баяр хөөрийг авчирсан мөн та яагаад бусад хүнийг үүнтэй адил адислалуудыг хүлээн аваасай гэж хүсдэг тухай
-
Бодгалиудыг Христэд авчрахад мэдэрсэн таны өөрийн болон таны таньдаг хүмүүсийн туршлага мөн эдгээр туршлага хэрхэн баяр хөөр авчирсан тухай
Суралцагчдад бичих хангалттай цаг гаргаж өгсний дараа бичсэн зүйлээ хуваалцах боломжийг олго. Ийн үйлдэх нэг арга зам нь сайн мэдээг хуваалцахад санаа зовниж байгаа хүн мэт жүжигчлэн үзүүлэхэд нэг эсвэл хоёр суралцагчийг урих явдал юм. Бусад суралцагч хэрэгтэй гэж бодсон нэг зүйлээ хуваалцаж болно.
Харилцан ярилцсаны дараа суралцагчдад дараах урилгыг өг.
Өнөөдрийн хичээлээс сурч, мэдэрсэн зүйлийнхээ тухай эргэцүүлэн бодох цаг гаргаж өг. Бусдыг Есүс Христэд авчрахыг хичээх, сайн мэдээг хуваалцах талаар юу мэдэрч байгаагаа бичиж тэмдэглэ. Дараа нь санахыг хүсэж байгаа сурсан зүйлээ, ялангуяа Аврагчийн талаар сурсан зүйлээ оруулахыг бодоорой.
Нэг эсвэл хоёр суралцагчийг сурсан зүйлээ юм уу санахыг хүсэж байгаа зүйлээ хуваалцахад урих байдлаар хичээлээ өндөрлүүлэхийг бод. Өнөөдрийн ярилцсан үнэнүүдийг гэрчил.
Цээжил
Та энэ хичээлийн турш суралцагчдад төгс эзэмших сургаалын эшлэл, судрын түлхүүр үг хэллэгүүдийг цээжлэхэд нь тусалж, дараа дараагийн хичээлүүд дээрээ давтаж болно. “Хэрэв та нар олон бодгалийг надад авчрах юм бол та нарын баяр хөөр хэчнээн агуу байх билээ!” гэдэг нь Сургаал ба Гэрээ 18:15–16 дээрх судрын түлхүүр үг хэллэг юм. “Төгс эзэмших сургаалыг давтах үйл ажиллагаа” хэсгийн хавсралт материалуудад цээжлэх үйл ажиллагаанд зориулсан санаанууд бий.