29-р хичээл: Сургаал ба Гэрээ 18

Сургаал ба Гэрээ 18:21–47

“Би та нарын гараар гайхамшигт ажлыг үйлдэх болно”

1829 оны 6-р сард Аврагч Оливер Каудери, Давид Витмер хоёрт Түүний нэрийг “зүрх сэтгэлийнхээ бүрэн зорилгоор” өөрсөд дээрээ авах хүсэлтэй ах нарыг эрж олох үүрэг хариуцлагыг өгчээ (Сургаал ба Гэрээ 18:27). Дараа нь эдгээр ах энэ эрин үеийн Арван хоёр төлөөлөгчийн чуулгын анхны гишүүдийн нэгээр үйлчлэхээр дуудагдах байв. Энэ хичээл нь Их Эзэн хэрхэн Өөрийн төлөөлөгчдийн дуудлагаар дамжуулан биднийг адисалж, бидэнд тусалдаг талаар ойлгоход суралцагчдад тусална.

Боломжит суралцах үйл ажиллагаа

Арван хоёр төлөөлөгч

Дараах үйл ажиллагаа нь орчин үеийн төлөөлөгч, бошиглогчдоор дамжуулан бидэнд тусалдаг Их Эзэний тусын талаар бодоход суралцагчдад тусална.

Дараах мэргэжлүүдийг самбарт бич. Үүнд: эмч, механикч, мужаан, төмөр эдлэл боловсруулагч, багш. Мөн та суралцагчдаас бидэнд тусалдаг бусад онцгой чадвартай хүмүүсийн мэргэжлийг нэрлэхийг хүсэж болно.

Энэ хүмүүсийн хэн нэгэнд талархаж байсан үеэ бод.

• Эдгээр онцгой чадвартай хүн ямар байдлаар бидэнд тусалдаг вэ?

• Тэд хэрхэн мэргэшдэг вэ?

Одоогийн Тэргүүн зөвлөл, Арван хоёр төлөөлөгчийн чуулгын зургийг үзүүлэхийг бод. Эдгээр ахын нэрс, гэр бүлийн дэлгэрэнгүй мэдээлэл, мэргэжил зэрэг тэдний талаар мэддэг зүйлсээ товч хуваалцахад суралцагчдыг урьж болно. Төлөөлөгчдийг дэлхий даяар Есүс Христийг гэрчлэхээр Түүгээр дуудагддаг гэдгийг суралцагчид ойлгож байгаа эсэхийг баталгаажуул. (Судруудын удирдамж дахь “Төлөөлөгч” гэдгийг scriptures.ChurchofJesusChrist.org-оос үзнэ үү).

Аврагч биднийг хайрладаг бөгөөд бидэнд онцгой арга замаар туслахаар төлөөлөгчдийг дууддаг.

• Аврагчийн төлөөлөгчид бидэнд ямар байдлаар туслах онцгой чадвартай вэ?

• Аврагч Өөрийн төлөөлөгчдийг сонгохын тулд ямар шаардлагуудыг тавьдаг гэж та бодож байна вэ?

Аврагч биднийг удирдан чиглүүлэхээр төлөөлөгч, бошиглогчдыг дуудсан тухай суралцагчид өнөөдөр сурна гэдгийг тайлбарла. Өнөөдөр энэ дэлхийд төлөөлөгч, бошиглогчидтой байснаар суралцагчдын амьдралд хэрхэн нөлөөлсөн талаар бодож үзэхэд тэднийг урь. Хожмын үеийн бошиглогч, төлөөлөгчдөөр дамжуулан тэдний амьдрал хэрхэн адислагдаж болох тухай илүү сайн ойлгоход туслах сургаалуудыг эрж олоход тэднийг урамшуул.

Христийн нэрийг өөрсөд дээрээ авах

Сургаал ба Гэрээ 18-д Их Эзэн Давид Витмер, Оливер Каудери хоёрт Арван хоёр төлөөлөгчийн чуулгад хэзээ нэгэн өдөр үйлчлэхээр дуудагдах ах нарыг эрж хайхыг зааварлажээ (Сургаал ба Гэрээ 18:37–38-ыг үзнэ үү).

Сургаал ба Гэрээ 18:21–25-ыг уншаад, Давид, Оливер хоёрт өгсөн Аврагчийн зөвлөгөөг олж мэд.

• Их Эзэн Давид, Оливер хоёрыг яагаад таны уншсан эдгээр шүлэгт цэдэглэгдсэн зүйлийг ойлгоосой хэмээн хүссэн гэж та бодож байна вэ?

Суралцагчдыг Христийн нэрийг өөрсөд дээрээ авах нь ямар утга учиртай талаар хуваалцахад урь. Бид баптисм хүртэхдээ мөн ариун ёслолоос хүртэхдээ Аврагчийн нэрийг өөрсөд дээрээ хүлээн авахад бэлэн байгаагаа харуулдаг гэдгийг онцлох нь тустай байж болох юм. Дараах мэдэгдэл мөн тустай байж болно. Тухайлбал:

Далын ахлагч Пол Б.Пайпэр Есүс Христийн нэрийг өөрсөд дээрээ авна гэдэг нь юу гэсэн үг болохыг ийн тайлбарласан.

Өөрсөд дээрээ Христийн нэрийг авснаар бид Түүний сургаал, зан байдлыг, эцэст нь Түүний хайрыг өөрсдөдөө хүлээн авах амлалт өгдөг. Тэгснээр тэдгээр нь бидний нэг хэсэг болдог юм. (Пол Б.Пайпэр, “Бүгд өөрсдийн дээр Эцэгээс ирсэн нэрийг авах ёстой,” 2018 оны 10-р сарын Ерөнхий чуулган, 52–55)

Төлөөлөгчийн үүрэг хариуцлага ба тавигдах шаардлага

Их Эзэн Давид, Оливер хоёрт төлөөлөгчөөр дуудагдах хүмүүст тавигдах зайлшгүй шаардлагын талаар зааварчилгаа өгчээ.

Сургаал ба Гэрээ 18:26–27-г уншаад, эдгээр шүлэгт дурдсан шаардлагуудыг олж мэд. 27-р шүлэгт дурдсан шавь гэсэн үг нь төлөөлөгчөөр дуудагдах хүнийг хэлж байгаа гэдгийг анхаарна уу.

• Аврагч Өөрийн төлөөлөгчдөд ямар шаардлага тавьсан бэ?

• Аврагч яагаад Өөрийнхөө төлөөлөгчөөр үйлчлэх хүмүүст энэхүү шаардлагыг тавьсан гэж та бодож байна вэ?

• Аврагчийн төлөөлөгчийн тухай мэдэж авах нь танд хэрхэн туслах вэ?

Аврагч Сургаал ба Гэрээ 18-д болон Сургаал ба Гэрээний бусад бүлэгт төлөөлөгчийн нэмэлт үүрэг хариуцлагыг дурдсан байдаг гэдгийг тайлбарла. Дараах хүснэгтийг самбарт зураад, судлах тэмдэглэлдээ хуулж зурахад суралцагчдыг урьж болно. Суралцагчдын 26–27-р шүлгээс сурсан зүйлсийг та нэмж болно. Суралцагчид даалгасан шүлгүүдийг хувь хувьдаа уншиж эсвэл жижиг бүлэгт хуваагдан уншиж, судлах тэмдэглэлдээ хүснэгтийг гүйцэд бөглөж болно. Дараа нь бүлэг бүр нэгээс хоёр хариултыг самбар дээрх жагсаалтад нэмж болно.

Сургаал ба Гэрээ 18:26–36 болон 107:23-ыг ашиглан дараах хүснэгтийг бөглө.

Их Эзэн Арван хоёр төлөөлөгчөөс ямар зан чанарыг хүссэн бэ?	Их Эзэн бусдыг Өөр дээрээ авчруулахын тулд төлөөлөгчдөөс юу хийхийг хүссэн бэ?

Цөөн суралцагчийг төлөөлөгчийн талаар маш чухал эсвэл онцгой гэж бодсон зүйлээ самбар дээр дугуйлахад урь. Яагаад ийн сонгосныг нь тэднээр хуваалцуул. Та мөн дараах асуултуудыг авч үзэн ярилцаж болно.

• Их Эзэн төлөөлөгчдөөрөө дамжуулан танд болон бусдад хэрхэн тусалдаг тухай эдгээр шүлгээс та юу сурч мэдсэн бэ?

• Төлөөлөгчийн тухай эдгээр шүлгээс сурсан зүйлээ та хэрхэн дүгнэж болох вэ?

  Аврагчийн төлөөлөгчид биднийг Түүн дээр ирж, Түүний үгсээс суралцахад тусалдаг гэсэн үнэнийг нэгтгэн дүгнэж, самбар дээр бичихэд нь суралцагчдад тусал.

• Аврагчийн төлөөлөгчид таныг болон бусдыг Түүн дээр ирэхэд хэрхэн тусалдгийг та харсан бэ?

Орчин үеийн төлөөлөгчдийн жишээ болон сургаалууд

Сургаал ба Гэрээ 18-д цэдэглэгдсэн Их Эзэний тавьсан шаардлага, үүрэг хариуцлагуудтай орчин үеийн төлөөлөгчдийн жишээ хэрхэн нийцэж буйг олж харах цагийг суралцагчдад гаргаж өг. Дараах үйл ажиллагаа үүнд тусална.

Одоогийн нэг эсвэл түүнээс дээш төлөөлөгчдийн сургаалыг судлах цаг гарга. Та сүүлд гарсан ерөнхий чуулганы үгс, Сүмийн сэтгүүлийн нийтлэл эсвэл сошиал медиа дээрх нийтлэлүүдийг судалж болно. Судалж байхдаа та төлөөлөгчид бидэнд Христэд ирэхэд туслахын тулд өөрийн үүрэг хариуцлагыг хэрхэн гүйцэлдүүлдгийг олж мэд. Таны тодорхой хэрэгцээнд зориулсан, таны асуултад хариулсан төлөөлөгчийн захиасыг хайж болно.

Суралцагчдад судлах хангалттай цаг гаргаж өгсний дараа ангийнхантайгаа эсвэл жижиг бүлгүүддээ сурсан зүйлээ хуваалцах боломжийг олго.

Нэмэлт эх сурвалж

Арван хоёр төлөөлөгчийн чуулгад хэн сонгогдсон бэ?

Сургаал ба Гэрээ 18-д цэдэглэгдсэн илчлэлтийг хүлээн авснаас хойш ойролцоогоор зургаан жилийн дараа, 1835 оны 2-р сард Арван хоёр төлөөлөгчийн чуулгыг зохион байгуулжээ. Мормоны Номын гурван гэрч болох Оливер Каудери, Давид Витмер, Мартин Харрис нар “Иосеф Смиттэй зөвлөлдсөний” үндсэн дээр дараах ах нарыг сонгосон байна (Church History Topics дахь “Quorum of the Twelve”-ийг ChurchofJesusChrist.org/study/history/topics-оос үзнэ үү). Тэдгээр нь Лайман Жонсон, Бригам Янг, Хибэр С.Кимбалл, Оорсон Хайд, Давид В.Паттэн, Лук Жонсон, Виллям Э.Маклэлин, Жон Ф.Боинтон, Оорсон Пратт, Виллям Смит, Томас Б.Марш, Парлэй П.Пратт нар байсан.

Би Есүс Христийн Хожмын Үеийн Гэгээнтнүүдийн Сүмийн төлөөлөгчийн талаар илүү ихийг хаанаас судалж болох вэ?

Тэргүүн зөвлөл, Арван хоёр төлөөлөгчийн чуулгын шинэ гишүүдийг дэмжин баталсны дараа Сүмийн сэтгүүлд намтрыг нийтэлжээ. Хамгийн сүүлд эдгээр нийтлэлийг Арван хоёр төлөөлөгчийн чуулгын хүндэт гишүүд бичсэн юм. Эдгээр нийтлэл нь prophets.ChurchofJesusChrist.org дээрх намтруудаас илүү дэлгэрэнгүй мэдээлэл, түүхийг агуулдаг. Хэрэв энэ гарын авлага нийтлэгдсэнээс хойш шинэ төлөөлөгч дуудагдвал Ерөнхий чуулганаар дэмжин батлагдсанаас хэдэн сарын дараа та тэдний талаарх нийтлэлийг Лиахона сэтгүүлээс олж авч болно.

“President Russell M. Nelson: Guided, Prepared, Committed” (ChurchofJesusChrist.org)

“President Dallin H. Oaks: Following the Lord’s Ways” (ChurchofJesusChrist.org)

“President Henry B. Eyring: Towering Intellect, Childlike Humility” (ChurchofJesusChrist.org)

“Elder M. Russell Ballard: True to the Faith” (ChurchofJesusChrist.org)

“Elder Jeffrey R. Holland of the Quorum of the Twelve Apostles” (ChurchofJesusChrist.org)

“Elder Dieter F. Uchtdorf: On to New Horizons” (ChurchofJesusChrist.org)

“Elder David A. Bednar: Going Forward in the Strength of the Lord” (ChurchofJesusChrist.org)

“Elder Quentin L. Cook: A Willing Heart and Mind” (ChurchofJesusChrist.org)

“Elder D. Todd Christofferson: Prepared to Serve the Lord” (ChurchofJesusChrist.org)

“Elder Neil L. Andersen: Man of Faith” (ChurchofJesusChrist.org)

“Elder Ronald A. Rasband: Gifted Leader, Devoted Father” (ChurchofJesusChrist.org)

“Elder Gary E. Stevenson: An Understanding Heart” (ChurchofJesusChrist.org)

“Ахлагч Дэйл Г.Рэнланд: Дуулгавартай үйлчлэгч” (ChurchofJesusChrist.org)

“Elder Gerrit W. Gong: Love the Lord and Trust Him” (ChurchofJesusChrist.org)

“Ахлагч Үлиссэс Соарэс: Заль мэхгүй нэгэн” (ChurchofJesusChrist.org)

Тэргүүн зөвлөл, Арван хоёр төлөөлөгчийн чуулгын талаарх намтарчилсан богино видеонууд дараах вэб хуудсанд байгаа.

Meet the Apostles (ChurchofJesusChrist.org)

Төлөөлөгчдийн чин хүсэл юу вэ?

Арван хоёр төлөөлөгчийн чуулгын ахлагч Нийл Л.Андэрсэн ийн заасан.

Зарим хүн Тэргүүн зөвлөл, Арван хоёр төлөөлөгчийн чуулгыг улс төр, бизнес, соёлын удирдагчид шиг дэлхийн зүйлсэд ашиг сонирхолтой гэж хардаг.

Гэвч бид үүрэг хариуцлагадаа огт өөрөөр ханддаг. Биднийг хүсэлт гаргагчид дундаас сонгоогүй. Ямар нэг мэргэжлийн тусгай бэлтгэлгүйгээр бид дэлхий даяар Есүс Христийн нэрийг сүүлчийн амьсгалаа хураатал гэрчлэхээр дуудагдаж томилогдсон. Бид өвдсөн, ганцаардсан, шантарсныг мөн ядуу хүмүүсийг адисалж, Бурханы хаант улсыг хүчирхэгжүүлэхийн төлөө хөдөлмөрлөдөг. Бид Их Эзэний хүслийг мэдэж авч, хүмүүст, тэр тусмаа мөнх амьдралыг эрэлхийлж буй хүмүүст тунхаглахыг эрэлхийлдэг. (Нийл Л.Андэрсэн, “Есүс Христийг дагах: Амар тайвныг тогтоогч байх нь,” Лиахона, 2022 оны 5-р сар)

Их Эзэн төлөөлөгчдөөрөө дамжуулан хувь хүнд хэрхэн тохинуулдаг вэ?

Арван хоёр төлөөлөгчийн чуулгын ахлагч Дэвид A.Бэднар дараах туршлагыг хуваалцжээ.

Төлөөлөгчид бол Их Эзэний үйлчлэгчид юм. Тэд дэлхий даяарх Сүмийн гишүүд дээр зочлохын тулд аялдаг.

Би хамгийн анх төлөөлөгчөөр аялахдаа, мэргэн ухааны үгийн дагуу амьдарч чадахгүй байсан нэгэн хүнтэй уулзсан юм. Би түүнд “Их Эзэн ‘Та үүнийг хийж чадна’ гэсэн тун энгийн захиасыг өгүүлэхээр намайг энд илгээсэн. Та энэхүү сорилттой тулгарах үедээ Түүний тусламжийг авах болно гэдгийг би танд амлаж байна” гэж хэлсэн.

Их Эзэн ганцхан хүнд туслуулах гэж л арван хоёр төлөөлөгчийнхөө нэгийг дэлхийн хагасыг туулах газар илгээнэ гэж үү? Хариулт нь тийм. Тэр үргэлж ийнхүү илгээдэг. (“Төлөөлөгчид юу хийдэг вэ?,” 2016 оны 10-р сарын Ерөнхий чуулган, 72)

Нэмэлт суралцах үйл ажиллагаа

Сургаал ба Гэрээ 18:27. Зүрх сэтгэлийн бүрэн зорилго

Энэ хичээлийн зарчмуудыг олж мэдсэний дараа суралцагчдыг Матай 4:18–22 дээрх Есүс Христ төлөөлөгчдөө дуудаж байгаа бүлгийг уншиж, хэрхэн энэ ах нар “зүрх сэтгэлийн бүрэн зорилго”-ыг харуулсныг олоход урь. Та тэдэнд “Хэрэв эдгээр ах зүрх сэтгэлийн өчүүхэн зорилготойгоор үйлдсэн бол өөр юу хийж болох байсан бэ?” эсвэл “Ямар арга замаар бошиглогч, төлөөлөгчид эдгээр загасчинтай адил вэ? ” гэсэн асуултуудыг тавьж болох юм. Төлөөлөгчид ажил мэргэжил хийгээд бусад эн тэргүүнд тавих зүйлсээ орхин, үлдсэн амьдралынхаа туршид Есүс Христэд бүрэн цагаар үйлчилдэг гэдгийг суралцагчдад сануулж болно. Энэ нь зүрх сэтгэлийн бүрэн зорилгоор үйлчлэх нэг арга зам мөн. Орчин үеийн төлөөлөгчдийн амьдралын жишээг хуваалцах талаар бодож үз.

Ерөнхийлөгч Рассэлл М.Нэлсон

“Ерөнхийлөгч Нэлсон: Бурханы бошиглогч” (6:26) видеог үзэх талаар бодож үз. Ерөнхийлөгч Рассэлл М.Нэлсоны зүрх сэтгэлийн бүрэн зорилгоор Есүс Христийн нэрийг өөр дээрээ авахыг хүсдэг талаарх нотолгоог хайж олоход суралцагчдыг урь.

Би судраас судалснаар Их Эзэний дуу хоолойг сонсож чадна

Суралцагчдын судар судлах явдалд төвлөрөх нь илүү үр дүнтэй гэж та мэдэрвэл Сургаал ба Гэрээ 18:34–36-г унших цагийг суралцагчдад гаргаж өгөн, тэдний хувийн сургалтыг үнэлж дүгнэ. Их Эзэний дуу хоолойг сонсож чадах нэг арга замыг таньж олоход тэднийг урь. Та “эдгээр үгс” гэдэг нь судруудыг хэлж байгаа гэдгийг тайлбарлах хэрэгтэй. “Судраас судлах үедээ та хэзээ Их Эзэний дуу хоолойг сонсож байсан бэ?” эсвэл “Биднийг суралцах үед Түүний дуу хоолойг тодорхой сонсоход бидэнд юу тусалж болох вэ?” гэх мэт асуултуудыг тавих талаар бодож үз.