“Fotopampianarana sy Fanekempihavanana 19:1–24, tapany 1: Nanaiky ny sitrapon’ny Ray any An-danitra i Jesoa Kristy,” Boky torolalana ho an’ny mpampianatra seminera: Fotopampianarana sy Fanekempihavanana (2025)
“Fotopampianarana sy Fanekempihavanana 19:1–24, tapany 1,” Boky torolalana ho an’ny mpampianatra seminera: Fotopampianarana sy Fanekempihavanana
Lesona 31: Fotopampianarana sy Fanekempihavanana 19
Fotopampianarana sy Fanekempihavanana 19:1–24, tapany 1
Nanaiky ny sitrapon’ny Ray any An-danitra i Jesoa Kristy
Nitady fampiononana sy torohevitra i Martin Harris ka nangataka fanambarana avy amin’ny Tompo tamin’ny alalan’ny Mpaminany Joseph Smith. Ao amin’ny Fotopampianarana sy Fanekempihavanana 19 dia nitantara ny fomba nisafidianany ny hanaiky ny sitrapon’ny Ray any An-danitra sy ny nahazoany hery handresena ny zava-drehetra ny Mpamonjy. Nampanantenaina fiadanana i Martin raha toa ka mibebaka sy manaiky ny zavatra nasain’ny Tompo nataony. Ity lesona ity dia afaka manampy ny mpianatra amin’ny fampitomboana ny fanirian’izy ireo hanaraka ny ohatr’i Jesoa Kristy eo amin’ny fanekena ny sitrapon’ny Ray any An-danitra.
Sahanasa fianarana azo atao
Ny ohatra nasehon’ny Mpamonjy
Soraty eny amin’ny solaitrabe ny fehezan-teny tsy feno tsy ny ____ anie no atao, fa ny _____ ary angataho ny mpianatra mba hameno ny zavatra nolazain’ny Mpamonjy tamin’ny Rainy (jereo ny Lioka 22:42). Asao ny mpianatra iray hizara ilay toe-javatra nisy ka nilazan’i Jesoa izany.
-
Inona, araka ny eritreritrao, no dikan’ny hoe manolotra ny sitrapontsika amin’ Andriamanitra?
-
Inona ny zavatra sarotra sasany ilaina afoy mety tsy maintsy angatahina mba hataon’ny zatovo mba hanarahana ny sitrapon’ny Ray any An-danitra?
Hevero ny hihaino ireo valinteny izay omen’ireo mpianatra mikasika ilay fanontaniana teo aloha eny amin’ny solaitrabe. (Fanamarihana: Ny fitazonana tahadikan’ity lisitra ity dia mety hanampy rehefa mampianatra ny lesona ao amin’ny “Fotopampianarana sy Fanekempihavanana 19:25–41.” Ao amin’io lesona io dia asaina hanaraka ny ohatry ny Mpamonjy amin’ny fanekena ny sitrapon’ny Ray any An-danitra ny mpianatra.)
Mba hampitomboana ny fanomezan-danja ho an’ny tena manokana, dia asao ny mpianatra hisaintsaina ny fotoana iray izay nahatsapany fisalasalana ny hanatanteraka ny fanolorantena iray nataony tamin’ny Tompo na ny hanao izay fantany fa marina. Amporisiho izy ireo hitadidy ireo toe-javatra ireo rehefa mandalina ny ohatry ny Mpamonjy tamin’ny fampandeferana ny sitrapony teo anatrehan’ny sitrapon’ Andriamanitra.
Ny faneken’ny Mpamonjy ny Rainy
Noho ny faniriany hanohana ny Mpaminany Joseph Smith sy ny famoahana ny Bokin’i Môrmôna, dia nampanantena i Martin Harris fa hanampy amin’ny fandoavana ny fanaovana ny fanontana. Rehefa tsapany fa mety ho voatery hivarotra ny toeram-pamboleny sy fiompiany izy noho izany, dia nangataka fanambarana misy tari-dalana avy amin’ny Tompo tamin’ny alalan’i Joseph izy. Ao amin’ilay fanambarana, izay fantatra ankehitriny amin’ny hoe Fotopampianarana sy Fanekempihavanana 19, dia nampianatra fahamarinana manan-danja momba ny sorompanavotany ny Mpamonjy. Ireo fahamarinana ireo dia nanampy an’i Martin hahatakatra ny maha zava-dehibe ny fanekena ny sitrapon’ny Ray any An-danitra na dia sarotra aza izany.
Azon’ny mpianatra atao ny mamaky manokana ireto andininy manaraka ireto na miaraka amin’ny namany miara-miasa aminy.
Vakio ny Fotopampianarana sy Fanekempihavanana 19:1–5, 15–19, 23–24. Hevero ny hanisy marika ireo teny sy andian-teny manan-danja izay mampianatra anao mikasika an’i Jesoa Kristy sy ny toetrany.
-
Inona avy ireo fahamarinana hitanao tao amin’ireo andininy ireo?
Asao ny mpianatra hizara ireo fahamarinana hitany. Ny fomba iray hanaovana izany dia ny fanomezana taratasy kely ny mpianatra tsirairay. Azon’ny mpianatra atao avy eo ny manoratra ny fahamarinana hitany eo amin’ny taratasiny ary mampiseho izany eny amin’ny solaitrabe. Mba hisian’ny fifanakalozan-kevitra ao an-dakilasy, dia mifidiana fanamarihana maromaro eny amin’ny solaitrabe ary asao ireo mpianatra izay nanoratra izany mba hizara ny antony maha zava-dehibe ny mahatakatra ilay fahamarinana momba an’i Jesoa Kristy. (Fanamarihana: Hiompana amin’ny Fotopampianarana sy Fanekempihavanana 19:16–19 ny lesona manaraka. Azonao atao ny mitahiry fifanakalozan-kevitra lalindalina kokoa momba ny fibebahana sy ny Sorompanavotan’ny Mpamonjy ho an’io lesona io.)
Raha toa ka tsy milaza izany ny mpianatra dia hamafiso manokana ity fahamarinana manaraka ity: Nanaiky tamim-panetrentena ny sitrapon’ny Ray any An-danitra i Jesoa Kristy (andininy 2, 19, 24). Azonao atao ny mamporisika ny mpianatra hanisy marika ireo teny ao amin’ireo andininy ireo izay maneho io fahamarinana io.
-
Inona no dikan’ny hoe nampifanaraka ny sitrapony tamin’ny an’ny Ray i Jesoa Kristy?
-
Ahoana, araka ny eritreritrao, no mety ho nahafahan’ny zavatra nampianarin’i Jesoa Kristy momba ny Tenany nanampy an’i Martin teo amin’ny toe-javatra niainany? Ahoana no mety hanampian’izany antsika rehefa asaina manao fahafoizan-tena sarotra isika?
Mifantoka amin’i Jesoa Kristy: Ity sahanasa manaraka ity dia manampy ireo mpianatra hifantoka amin’ny fandalinany an’i Jesoa Kristy. Ity fiofanana ity dia hanampy anao hampihatra ny fizarana amin’ny mpianatra ny fomba hahatongavan’izy ireo ho tahaka an’i Jesoa Kristy kokoa sy ny famporisihana azy ireo amin’ny fanohizana ny ezaka ataony.
Mba hanampiana ireo mpianatra hahatsapa ny halalin’ny fanirian’ny Mpamonjy hanaiky ny Rainy sy ny tsy fiovaovan’izany dia zarao ho vondrona telo ny iray kilasy. Omeo iray amin’ireto lohahevitra manaraka ireto ny vondrona tsirairay ary asaivo mamaky ireo andininy voatanisa izy ireo. Aorian’ny famakiana ireo andininy dia afaka mifanakalo hevitra momba ny zavatra nianarany momba ny fifandraisan’ny Mpamonjy amin’ny Rainy ny vondrona.
Fiainana talohan’ny nahaterahana: Mosesy 4:1–2; 3 Nefia 1:13–14
Fanompoana teto an-tany: Jaona 6:38; 8:28–29; Môzià 15:7–8
Fiainana aorian’ny fahafatesana: 3 Nefia 11:10–11
Hevero ny hanasa ny mpianatra mba hamorona vondrona vaovao miaraka amin’ireo mpiara-mianatra izay nandalina ireo andinin-tsoratra masina ho an’ireo lohahevitra roa hafa. Ao amin’ny vondrona vaovao misy azy ireo dia afaka mifandimby mizara ny zavatra noresahiny tao amin’ny vondrona nisy azy teo aloha ny mpianatra.
Misafidy ny hanaiky
Azonao atao ny mampiseho ity teny nambara manaraka ity, ary asao ny mpianatra hifanakalo hevitra momba ireo fanontaniana roa etsy ambany miaraka amin’ny namana mpiara-miasa iray.
Ny Loholona Neal A. Maxwell (1926–2004) tao amin’ny Kôlejin’ny Apôstôly Roambinifolo dia nampianatra hoe:
Ny fankatoavana ny sitrapon’olona iray no hany tena zavatry ny tena manokana izay azontsika apetraka eo amin’ny alitaran’ Andriamanitra. Ireo zavatra hafa izay “omentsika” … dia tsy inona fa ireo zavatra izay efa nomeny na nampindraminy antsika. Na izany aza rehefa mankatò izaho sy ianao amin’ny farany, amin’ny famelana ny sitrapontsika ho atelin’ny sitrapon’ Andriamanitra, amin’izay isika dia tena manome zavatra ho Azy! Izay no tena fananantsika izay tena antsika marina mba hatolotra! (Neal A. Maxwell, “Swallowed Up in the Will of the Father,” Ensign, Nov. 1995, 24)
-
Inona, araka ny eritreritrao, no tsy mampitovy ny fampandeferana ny sitraponao, araka ny nampianarin’ny Loholona Maxwell, sy ny fankatoavana tsotra?
-
Oviana ianao no nahita olona nanaraka ny ohatra nasehon’ny Mpamonjy tamin’ny fampandeferana ny sitrapony eo anatrehan’ny sitrapon’ Andriamanitra na dia sarotra aza izany?
Mba hamaranana ny lesona dia azonao atao ny mampiseho ity teny nambara manaraka ity eny amin’ny solaitrabe. Asao ny mpianatra mba ho eny amin’ny solaitrabe ary hanipika ireo andian-teny manokana izay hitany fa tanteraka teo amin’ny fiainany rehefa nanaiky ny sitrapon’ Andriamanitra izy ireo. Azonao atao ihany koa ny mijoro ho vavolombelona momba ny fomba nitahiana anao tamin’ny alalan’ny fanarahana ny ohatra nasehon’ny Mpamonjy tamin’ny fanekena ny sitrapon’ny Ray any An-danitra.
Nijoro ho vavolombelona ny Filoha Ezra Taft Benson (1899–1994) hoe:
Ireo lehilahy sy vehivavy izay mampitodika ny fiainany amin’ Andriamanitra dia hahita fa Izy dia afaka manao zavatra bebe kokoa amin’ny fiainan’izy ireo mihoatra izay azon’izy ireo atao. Hahatonga ny fifalian’izy ireo ho lalim-paka Izy, hanitatra ny fahitan’izy ireo, hampavitrika ny sain’izy ireo, … hampahery ny fanahin’izy ireo, hampitombo ny fitahiana ho azy ireo, hampitombo ireo fahafahana manao zavatra azon’izy ireo araraotina, hampitony ny fanahin’izy ireo, hanome namana ary handrotsaka fiadanana. Na iza na iza hanolotra ny fiainany amin’ny fanompoana an’ Andriamanitra dia hahazo ny fiainana mandrakizay izy. (Teachings of Presidents of the Church: Ezra Taft Benson [2014], 42–43)