Lesona 34: Fotopampianarana sy Fanekempihavanana 19

Tombano ny fianaranao 2

Fotopampianarana sy Fanekempihavanana 6–19

Ny fisaintsainana sy ny fanombantombanana ny fianarantsika ara-panahy dia afaka manampy antsika hanakaiky kokoa ny Mpamonjy. Ity lesona ity dia afaka manampy ny mpianatra hahatsiaro sy hanombantombana ny fomba nanampian’ny zavatra niainan’izy ireo tamin’ny fandalinana ny Fotopampianarana sy Fanekempihavanana azy ireo hitombo ara-panahy hatreto.

Sahanasa fianarana azo atao

Tombano ny fianaranao

Asao ny mpianatra hanoratra amin’ny taratasy kely ny zavatra ataony izay mitaky fanazaran-tena tsy tapaka. Dia angataho izy ireo hampiampitapita ny taratasin’izy ireo. Vakio mafy ny sasany amin’izy ireo ary jereo raha hain’ny mpianatra ny maminavina hoe an’iza ilay taratasy novakinao. Isaky ny avy mamaky taratasy ianao dia afaka mametraka ireto fanontaniana manaraka ireto amin’ilay mpianatra nanoratra azy.

• Manao ahoana ny hafainganam-pandehan’ny fivoaranao ao anatin’ity sahanasa ity?

• Nahoana no zava-dehibe ny fanombantombanana ny fivoaranao? Inona no mety ho fiantraikan’izany eo amin’ny fanirianao hanohy hanao fanazaran-tena?

  Ampio ny mpianatra hahatakatra ny maha-zava-dehibe ny fisaintsainana ny fivoaran’izy ireo ara-panahy sy ny ezaka ataon’izy ireo mba ho tonga tahaka ny Ray any An-danitra sy i Jesoa Kristy kokoa. Ny fisaintsainana toy izany dia afaka mandrisika azy ireo hiezaka hatrany. Ny Fanahy Masina dia afaka manampy azy ireo hamantatra na dia ny fivoarana misoko mangina aza. Raha ilaina, dia ampio ny mpianatra hahatakatra fa na dia mahatsapa aza izy ireo fa tsy nivoatra dia afaka manampy azy ireo hahita ny zavatra azony atao mba handrosoana ny fisaintsainana ny fivoarany. Mety hanampy ny manasa ireo mpianatra hamaly ny iray na maromaro amin’ireto fanontaniana manaraka ireto ao anatin’ny diary fandalinany.

• Inona no fiantraikan’ny zavatra nianaranao tao amin’ny Fotopampianarana sy Fanekempihavanana teo amin’ny fahatsapanao momba ny filazantsara?

• Inona no fiantraikan’ny ezaka tsy tapaka nataonao, rehefa nandeha ny fotoana, teo amin’ny fivoaranao ara-panahy sy ny finoanao an’i Jesoa Kristy?

• Raha tsy mahatsapa ianao fa nivoatra ara-panahy, inona no fanitsiana kely azonao atao eo amin’ny zavatra ataonao tsy tapaka?

Azonao atao ny mangataka ny mpianatra hanombantombana ny fihetseham-pony na ny fivoaran’izy ireo amin’ireo lohahevitra nodinihinareo tao anatin’ireo lesona manokana. Hevero ny hampiasa ny sasany amin’ireto hevitra manaraka ireto.

Manazava ny fahatongavan’ny Bokin’i Môrmôna

Tao anatin’ny herinandro vitsivitsy izay dia mety ho nianatra momba ny famoahana ny Bokin’i Môrmôna tamin’ny fomba mahagaga ireo mpianatra. Zarao tsiroaroa ny mpianatra mba hiomana hanazava ny Bokin’i Môrmôna amin’ny mpianatra roa hafa. Azonao atao ny manome azy ireo fahafahana hamintina ny zavatra nianarany ho valin’ny toe-javatra noforonina iray tahaka izao manaraka izao.

Alaivo sary an-tsaina hoe misy olona manontany ny finoanao ny Bokin’i Môrmôna ary mangataka anao hanampy azy ireo hahatakatra ny atao hoe Bokin’i Môrmôna sy ny fiavian’izany. Ahoana no hanazavanao izany?

Afaka manao ny sasany amin’ireto manaraka ireto ianao ao anatin’ny fanazavanao:

• Tantarao amin’izy ireo amin’ny alalan’ny teninao manokana ny tantaran’ny fivoahan’ny Bokin’i Môrmôna. (Azonao atao ny mitady soratra masina izay hanampy anao na tantara voarakitra izay azonao fintinina.)

• Mampiasà sary izay afaka manampy anao hanazava.

• Zarao ny fahatsapanao momba ny Bokin’i Môrmôna na ny zavatra niainanao tamin’ny Bokin’i Môrmôna.

Raha mila fitarihana ny mpianatra dia azonao atao ny manoro hevitra azy ireo hanazava ny sasany amin’ireto tantara manaraka ireto. Afaka mampiasa sary toy ny etsy ambany izy ireo mba hanampiana azy ireo amin’ny fanazavana ataon’izy ireo.

• Ny fitsidihan’ny anjely Môrônia an’i Joseph Smith; ireo takela-bolamena (Joseph Smith—Tantara 1:30–54)

• Ny fandikana tamin’ny alalan’ny fanomezam-pahasoavan’ Andriamanitra sy ny heriny

• Ireo Vavolombelona Telo nahita ireo takela-bolamena (Fotopampianarana sy Fanekempihavanana 5:11–15; 17:1–5)

Fahatsapana fa lehibe ny hasarobidin’ny fanahinao amin’ Andriamanitra

Raha toa ka nanana fahafahana handalina ny Fotopampianarana sy Fanekempihavanana 18:1–13 tao amin’ny seminera ny mpianatra, dia azonao atao ny manasa azy ireo hanao izao asa atao manaraka izao. Raha izany no izy, dia avelao ny mpianatra hiresaka momba ny zavatra nanan-danja ho azy ireo tao anatin’io zavatra niainana io sy ny fiantraikan’izany teo amin’izy ireo.

Tao anatin’ny lesona iray vao haingana dia nasaina ianao hieritreritra lalina kokoa momba ny hasarobidinao eo imason’ Andriamanitra. Mety efa namorona fampahatsiahivana izay hitanao tsy tapaka ianao (toy ny peta-drindrina na fond d’écran amin’ny telefaonina), na nirotsaka nanao vavaka misy fifantohana kokoa, na nanokana fotoana hanoratana ao amin’ny diary, na nandalina ny tsodranon’ny patriarika nomena anao, na nanao zavatra hafa.

• Inona no nataonao mba hanampiana anao hieritreritra bebe kokoa momba ny hasarobidinao eo imason’ Andriamanitra?

• Inona no fahasamihafana tsikaritrao vao haingana teo amin’ny fomba famaritan’izao tontolo izao ny hoe hasarobidy sy ny fomba famaritan’ Andriamanitra ny hoe hasarobidy?

• Inona no nianaranao vao haingana izay nanamafy na nampitombo ny fahatokisanao fa lehibe ny hasarobidinao eo anatrehan’ Andriamanitra?

Ny sasany amin’ireo mpianatrao dia mety ho tsy nanao na inona na inona tato anatin’ny herinandro vitsivitsy mba hahatsapana ny hasarobidin’izy ireo eo anatrehan’ Andriamanitra. Aoka ianao hanana toetra antra fo eo anatrehan’ireo mpianatra ireo ao anatin’ity fifanakalozan-kevitra ity. Aza misalasala manasa ireo mpianatra hanomboka na hanohy ity asa atao ity mandritra ny herinandro vitsivitsy manaraka. Omeo toky izy ireo fa ny Rainy any An-danitra dia hanamafy ny fitiavany azy ireo rehefa manao izany izy ireo.

Fandraisana fanambarana ho an’ny tena manokana

Raha toa ianao ka nampiasa ity kisary manaraka ity tao amin’ny lesona iray vao haingana dia azonao atao ny mampiseho izany amin’ny mpianatra na manao sarin’izany eny amin’ny solaitrabe. Asao ny mpianatra hizara ny zavatra nianarany tato anatin’ny herinandro vitsivitsy mikasika ny fomba handraisana sy hamantarana fanambarana.

Mba hanampiana ny mpianatra hanombantombana ny fomba nampiharan’izy ireo ny fitsipiky ny fanambarana teo amin’ny fiainany dia asao izy ireo hameno ny iray na maromaro amin’ireto teny nambara manaraka ireto ao amin’ny diariny.

Mifidiana vitsivitsy amin’ireto teny nambara ireto ary fenoy ao anatin’ny diarinao izy ireo. Mety hahatsapa ho voatarika hanoratra eritreritra sy fahatsapana hafa ianao. Aza misalasala manao izany.

Ny zavatra manan-danja indrindra nianarako vao haingana momba ny fanambarana avy amin’ny Ray any An-danitra dia …

Ny zavatra vitsivitsy izay nezahiko natao vao haingana mba handraisana fanambarana amin’ny alalan’ny Fanahy Masina dia ahitana ny …

Ny zavatra iray izay toa nisy fiantraikany tamin’ny fahafahako nandray fanambarana dia ny …

Ny zavatra niainako vao haingana izay tsy tiako hohadinoina dia …

Te hanohy hampitombo ny fahafahako mandray fanambarana avy amin’ Andriamanitra aho satria …

Mba hampitomboana bebe kokoa ny fahafahako mandray fanambarana avy amin’ Andriamanitra dia manolo-tena aho …

Asao ny mpianatra hizara amin’ny iray kilasy izay eritreriny mikasika ny fahazoana fanambarana ho an’ny tena manokana avy amin’ Andriamanitra. Mametraha fanontaniana mandrisika ny fanohizana ny fandraisana andraikitra izay manampy ireo mpianatra hamaly sy hifampiresaka. Izany dia mety ho fanontaniana toy ny hoe “Inona no nanaitra anao tamin’ny zavatra nozarain’ny mpiara-mianatra aminao?” na “Inona no zavatra nozarain’ny mpiara-mianatra aminao izay tianao handramana koa?”